ADRA Ethiopia /Adventist Development and Relief Agency -Ethiopia/ በኦሮሚያ ክልላዊ መንግስት በምስራቅ ሸዋ እና በምዕራብ አርሲ ዞኖች በስልሳ ሰባት ሚሊዩን ስምንት መቶ ሺ ብር ያስገነባቸውን ትምህርት ቤቶች አስመርቋል፡፡

በምረቃ ስነስርዓቱ ላይ የኢ.ፊ.ድ.ሪ የሲቪል ማህበረሰብ ድርጅቶች ዋና ዳሬክተር አቶ ጂማ ዲልቦ እና የኦሮሚያ ክልላዊ መንግስት የትምህርት ቢሮ ሐላፊ ዶ/ር ቶላ በሪሶ ተገኝተዋል። ዋና ዳይሬክተር አቶ ጂማ ዲልቦ ባስተላለፉት መልዕክት ADRA Ethiopia በትምህርት መሰረተ ልማት ግንባታ እያበረከተ ላለው ዘርፈ ብዙ ድጋፍ አመስግነው ማህበረሰቡም ለተገነቡት ትምህርት ቤቶች ጥበቃ እና ደህንነት መስራት አለባቸው ሲሉ ገልጸዋል፡፡ አድራ ኢትዮጵያ በትምህርት መሰረተ ልማት ግንባታ የትምህርትን ተደራሽነት፣ ፍትሐዊነት እና ጥራትን ለማስጠበቅ በመስራት በክልላቸው ውስጥ ቀዳሚ መሆኑን የገለጹት የኦሮሚያ ክልላዊ መንግስት የትምህርት ቢሮ ሀላፊ ዶ/ር ቶላ በሪሶ ድርጅቱ ላበረከተው ከፍተኛ አስተዋጽኦ የላቀ ምስጋና አቅርበዋል። የአድራ የፕሮግራም እና ኦፕሬሽን ዳይሬክተር አቶ ዘሪሁን አዋኖ በበኩላቸው ኢትዮጵያ የጀመረችውን ዘርፈ ብዙ የልማት ሥራዎች አጠናክሮ እንደሚቀጥል አብራርተው የትምህርት ተደራሽነት ፣ፍትሐዊነት እና ጥራትን ለማሻሻል ጠንክሮ እንደሚሰራ ተናግረዋል፡፡

በእለቱም አምስት መቶ ሀምሳ ሺ ብር ወጪ የተደረገበት የምግብ ድጋፍ ለ50 አባወራዎች እና ቤተሰቦቻቸው የተደረገ ሲሆን ይህ ድጋፍ በቀጣይነት በዞኖቹ ውስጥ በሚገኙ ሁለት ትምህርት ቤቶች ላይ የትምህርት ቤት ምገባ ፕሮግራም ተጠናክሮ እንደሚቀጥል የድርጅቱ ፕሮግራም አስተባባሪ የሆኑት አቶ ብስራት አበራ አስታውቀዋል። የትምህርት መሰረተ ልማቶቹ ከኖርዌይ መንግስት እና ከ ADRA Norway በተገኘ የገንዘብ ድጋፍ መገንባታቸውን ድርጅቱ አስታውቋል።


ባለስልጣን መስሪያ ቤቱ ለአካል ጉዳተኞችና ዘርፈ ብዙ ተግባራት ላይ ለተሰማሩ ድርጅቶች ቅድሚያ በመስጠት መርህ ተመስርቶ እየሰራ እንደሚገኝ ተጠቆመ፡፡

የሲቪል ማህበረሰብ ድርጅቶች ባለስልጣን አዋጅ ቁጥር 1113/2011 ጸድቆ ተግባራዊ ከሆነ በኋላ ለአካል ጉዳተኞችና ልዩ ትኩረት በሚሹ ዘርፎች ላይ ለሚሰሩ ድርጅቶች ድጋፍ ሲያደርግ ቆይቷል፡፡ ይህ ተግባር ተጠናክሮ ይቀጥል ዘንድ በተቋሙ ለሚሰሩ የምዝገባ፣ ክትትልና ድጋፍ ባለሙያዎች በአካል ጉዳተኞች መብት እና አሳታፊነት ዙሪያ ከኢትዮጵያ አካል ጉዳተኛ ሴቶች ብሄራዊ ማህበር ጋር በመሆን የግንዛቤ ማስጨበጫ ስልጠና እየሰጠ ይገኛል፡፡ በስልጠናው መክፈቻ ላይ የባለስልጣን መስሪያቤቱ የምዝገባ፣ ክትትልና ድጋፍ ዳይሬክቶሬት ዳይሬክተር አቶ ተሾመ ወርቁ ባስተላለፉት መልዕክት ባለስልጣን መስሪያ ቤቱ ለአካል ጉዳተኞችና ዘርፈ ብዙ ስራዎችን ለሚሰሩ፤ ሴቶች ፣ ህጻናት፣ አረጋውያን ላይ ለሚሰሩ እና መሰል ዘርፎች ላይ ለተሰማሩ ድርጅቶች ቅድሚያ በመስጠት መርህ አገልግሎት በመስጠት ላይ እንደሚገኝ አንስተዋል፡፡

ባለስልጣን መስሪያ ቤቱ አደረጃጀቱን እየከለሰ እንደሚገኝ የገለጹት አቶ ተሾመ ወርቁ በባለስልጣን መስሪያ ቤቱ አዲሱ አደረጃጀት የአካል ጉዳተኞች ዴስክ እንደሚቋቋም አንስተው ተቋሙ የሚሰጠውን አገልግሎት ለማቀላጠፍና በተለይም አካል ጉዳተኞችን በሚመለከት ልዩ ድጋፍና ክትትል ለማድረግ ያስችለናል ሲሉ ገልጸዋል፡፡
የኢትዮጵያ አካል ጉዳተኛ ሴቶች ብሄራዊ ማህበር ዳይሬክተር የሆኑት ወ/ሮ ድባቤ እንዳሉት የቀድሞው አዋጅ ተነስቶ አዲሱ አዋጅ 1113/11 ከወጣ በኋላ ትልልቅ ፕሮጀክቶችን ከተለያዩ ባለድርሻ አካላት ጋር በመሆን እየሰሩ እንደሚገኙ ጠቁመው ለዚህም ባለስልጣን መስሪያ ቤቱን አመስግነዋል፡፡ አያይዘውም ድርጅቶች የፕሮጀክት ቅድመ ጥናት ሲያቀርቡ የአካል ጉዳተኛ ሴቶችና ህጻናትን ያካተተ መሆን ይኖርበታል ያሉት ወ/ሮ ድባቤ ስልጠናው እስከዛሬ የተገመገሙ ፕሮጀክቶች እይታዎቻችን አካል ጉዳተኛ ተኮር ናቸው ወይ የሚለውን በመመልከት በክትትልና ግምገማ ስርዓታችን የአካል ጉተኞችን መብትና ጥቅም በሚያስጠብቅ መልኩ የሚደረግ ነው ወይ የሚለውን ለመፈተሸ ያግዛል ብለዋል፡፡ የኢትዮጵያ አካል ጉዳተኛ ሴቶች ብሄራዊ ማህበር በ1995 ዓ.ም በ8 አካል ጉዳተኛ ሴቶች አማካኝነት የተመሰረተ ሲሆን በአሁን ጊዜ 555 በላይ አካል ጉዳተኛ ሴቶች አባላት እንዳሉት በማህበሩ ዳይሬክተር በወ/ሮ ድባቤ ተጠቅሷል፡፡


የቻይና ፋዉንዴሽን ፎር ሩራል ዴቨሎፕመንት 3ኛ ዓመት የኢትዮጵያ ቢሮ ምስረታ በዓል እና የስም ለዉጥ መርሃ-ግብር አካሄደ፡፡

የቻይና ፋዉንዴሽን ፎር ሩራል ዴቨሎፕመንት የኢትዮጵያ ቢሮውን እ.ኤ.አ በ2019 በአዲሱ አዋጅ የተመዘገበ ድርጅት ሲሆን በቀድሞዉ ስያሜ የቻይና ፋዉንዴሽን ፎር ፖቨርቲ አሊቬሽን በመባል ይታወቃል ነበር፡፡ የቻይና ፋዉንዴሽን ፎር ሩራል ዴቨሎፕመንት የኢትዮጵያ ቢሮ በሶስት ዓመት ቆይታዉ በርካታ ፕሮጀክቶችን መተግበር የቻለ ድርጅት ሲሆን ከነዚህም መካከል ከት/ት ሚኒስቴር ጋር በመተባበር የተማሪዎች ቦርሳ እና መማሪያ ቁሳቁሶች ከቻይና ሃገር እያስመጣ ድጋፍ ለሚያስፈልጋችዉ የመጀመሪያ ደረጃ ተማሪዎች በተለያዩ ክልሎች ሲያቀርብ ቆይቷል፡፡ በተጨማሪም የተማሪዎች ምገባ፣ ንጹህ የመጠጥ ዉሃ አቅርቦት ፣ የሴቶች ኢኮኖሚያዊ አቅም ማዳበር እና የምግብ ድጋፍ ስርጭቶችን በማከናወን ላይ ይገኛል፡፡ የድርጅቱ 3ተኛ ዓመት የኢትዮጵያ ምስረታዉ ፕሮግራም ላይ የሲቪል ማህበረሰብ ድርጅች ባለስልጣን ዋና ዳይሬክተር አቶ ጂማ ዲልቦ መልዕክት አስተላልፈዋል፡፡
ድርጅቱ በርካታ እንግዶች በተገኙበት ጠቅላላ ሪፖርት ያቀረበ ሲሆን በዕለቱም ዋና ዳይሬክተር አቶ ጂማ ዲልቦን ጨምሮ ከቻይና ኢምባሲ በኢትዮጵያ ፤የቻይና ቻምበር ኦፍ ኮሜርስ ፤ የቻይና ፋዉንዴሽን ፎር ሩራል ዴቨሎፕመንት ዋና ቢሮ ዳይሬክተር ዉ ፖንግ ፤ የግብርና ሚኒስቴር ተወካይ ፤የዉናሃ ኢነርጂ ሚኒስቴር ተወካይ ፤የገንዘብ ሚኒስቴር ተወካይ እና ሌሎች እንግዶች ተገኝተው መልዕክት አስተላልፈዋል፡፡


የህግ ማሻሻል ብቻውን ግብ አይሆንም በተሻሻለው ህግ ልክና መጠን ስራ ላይ መዋል አለበት፡፡

የሲቪል ማህበረሰብ ድርጅቶች ባለሥልጣን ከሲዳማ ብሄራዊ ክልላዊ መንግስት ጠቅላይ አቃቤ ህግ ጋር በመተባበር በሲቪል ማህረሰብ ድርጅቶች አዋጅ እና በተለያዩ ህጎች ላይ የውይይት መድረክ አካሄደ፡፡ በመድረኩ ላይ በክብር እንግድነት የተገኙት የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ በመክፈቻ ንግግራቸው እንዳሉት በአገር አቀፍ ደረጃ ባለፉት አራት ዓመታት የሪፎርም ስራዎች ሲከናወኑ እንደነበር በማስታወስ በዋናነት ሪፎርሙ ከህግ እና ከተቋማት ጋር የተያያዙ ሪፎርሞች መሆኑን አንስተዋል፡፡ ኢትዮጵያ በአለም አቀፍ ደረጃ ሲያስወቅሳት የነበሩ ህጎች ህዝብን ባሳተፈ መንገድ ማሻሻል መቻሉን ገልፀው ከነዚህ መካከል የበጎ አድራጎት ድርጅቶችና ማህበራት አዋጅ አንዱ ነው ሲሉ ገልፀዋል፡፡ ህግ ማሻሻል ብቻ ግብ አይሆንም ያሉት ዋና ዳይሬክተሩ የተሻሻሉ ህጎች ልክና መጠን ስራ ላይ መዋል፣ ዜጎችን መጥቀም መቻል፣ አለበት እንዲሁም መሬት ላይ ወርዶ የዜጎችን መብትና ጥቅም ማዳበር መቻል አለበት ሲሉ ገልፀዋል፡፡

ሌላው ያነሱት ባለስልጣን መስሪቤቱ ከፍተኛ የሆነ የሪፎርም ስራዎች ሰርቷል በተለይ ለህዝብ ቅርብ እንዲሆን የሲቪል ማህረሰብ ድርጅቶች ለአገር ግንባታ፣ለዴሞክራሲያዊ ስርዓት ግንባታ እና ለልማት የሚያደርጉትን አስተዋጽኦ በሚገባ መወጣት እንዲችሉ ለማድረግ መቻሉን ገልፀዋል፡፡ በሶስት ዓመታት ውስጥ በባለስልጣን መስሪያ ቤቱ የተመዘገቡ አዲስ ድርጅቶች ከ2500 በላይ ነው በማለት ይህ ቁጥር በቀድሞ አዋጅ በአስር ዓመትታ ውስጥ ያልተመዘገበ ውጤት ነው ሲሉ አብራርተዋል፡፡ በመጨረሻም በፌደራል ደረጃ ከፍተኛ ሪፎርሞች ቢደረጉም በሚፈለገው ደረጃ ወደክልል የማውረድ ስራ አልተሰራም ይህንንም በቀጣይ ለመስራት በጋራ መቆም አለብን በማለት ባለስልጣን መስሪያ ቤቱም ለክልሎች እያደረገ ያለውን ድጋፍ አጠናክሮ እንደሚቀጥል ተናግረዋል፡፡


የሀረሪ ብሄራዊ ክልልን ጨምሮ ሌሎቹም ክልሎች የክልል የሲቪል ማህበረሰብ ድርጅቶችን ህግ በማዘጋጀት ላይ ይገኛሉ፡፡

በሲቪል ማህበረሰብ ድርጅቶች ዘርፍ በርካታ ተግዳሮቶች የነበሩበት የበጎ አድራጎት ድርቶችና ማህበራት አዋጅ ቁጥር 621/2001 ሙሉ በሙሉ ተሽሮ የሲቪል ማህበረሰብ ድርጅቶች አዋጅ ቁጥር 1113/2011 ጸድቆ በስራ ላይ ከዋለ 3 አመታት የተቆጠሩ ሲሆን አዲሱ አዋጅ በስራ ላይ መዋሉን ተከትሎ ዘርፉ ከፍተኛ የሆነ መነቃቃት እየታየበት ይገኛል፡፡
የአዋጁ ተፈጻሚነት በፌደራል ደረጃ በተመዘገቡና በአዲስ አበባና በድሬዳዋ ከተማ አስተዳደር በሚንቀሳቀሱ ድርጅቶች ላይ ብቻ በመሆኑ በአንድ ክልል ብቻ የሚንቀሳቀሱ ድርጅቶች በፌዴራል ደረጃ የተፈጠረው ምቹ ሁኔታ ሳይፈጠርላቸው ቆይቷል፡፡ የሲቪል ማህበረሰብ ድርጅቶች ባለስልጣን በክልሎች የመደራጀት መብትን ማረጋገጥ ይቻል ዘንድ በፌዴራል ደረጃ ከወጣው የሲቪል ማህበረሰብ ድርጅቶች አዋጅ ጋር ተቀራራቢ የሆነ ህግ በክልሎች እንዲኖር ዘርፈ ብዙ ድጋፎችን እያደረገ ይገኛል፡፡ በዚህም መሰረት ሁሉም ክልሎች የሲቪል ማህበረሰብ ድርጅቶች ረቂቅ አዋጅ በማዘጋጀት ላይ የሚገኙ ሲሆን ይህንን ረቂቅ አዋጅ ካዘጋጁት ክልሎች መካከል የሀረሪ ብሄራዊ ክልላዊ መንግስትና የደቡብ ምእራብ ኢትዮጵያ ብሄራዊ ክልላዊ መንግስት የፍትህ ቢሮ እና የገንዘብና ኢኮኖሚ ልማት ቢሮዎች ከባለስልጣኑ ጋር በመተባበር ከዛሬ ጀምሮ ለ2 ቀናት ውይይቶችን በማድረግ ላይ ይገኛሉ፡፡

በሀረሪ ብሄራዊ ክልላዊ መንግስት በሀረር ከተማ እተካሄደ በሚገኘው የውይይት መርኃ ግብር ላይ የክልሉ ገንዘብና ኢኮኖሚ ትብብር ቢሮ ም/ቢሮ ሀላፊ አቶ አብዱልባሲጥ አቡበከር እንዳሉት በፌደራልና በክልል ያለው የሲቪል ማህበረሰብ ድርጅቶች ህግ ወጥነት ያለው መሆን አለበት በሚል መርህ የዜጎችን የመደራጀት መብት በክልሎች በተሟላ ሁኔታ ለማረጋገጥ እየሰሩ እንደሚገኙ ገልጸዋል፡፡

የሲቪል ማህበረሰብ ድርጅቶች ባለስልጣን የህግ ጉዳዮች ዳይሬክቶሬት ዳይሬክተር አቶ ዮናስ ምስጋናው በበኩላቸው የሲቪል ማህበረሰብ ድርጅቶች ቀደም ባለው የበጎ አድራጎትና ማህበራት አዋጅ 621/2001 በርካታ ክልከላዎች የነበሩበት እንደነበረ አንስተው በፌደራል ደረጃ በአዲሱ የሲቪል ማህበረሰብ ድርጅቶች አዋጅ 1113/2011 እነዚህ ክልከላዎች ሙሉ በሙሉ ተነስተው የዜጎችን የመደራጀት መብት ማረጋገጥ ተችሏል ብለዋል፡፡ አያይዘውም ባለስልጣን መስሪያ ቤቱ የፌደራሉ የሲቪል ማህበረሰብ ድርጅቶች አዋጅ እስከ ክልል ባለው መዋቅር ወጥነት ያለው ህግ እንዲኖርና የሲቪል ማህበረሰብ ድርጅቶች ህግን ተከትለው በየትኛውም ክልል ተንቀሳቅሰው የማህበረሰቡን ተጠቃሚነት ማረጋገጥ ይችሉ ዘንድ ትኩረት ሰጥቶ እየሰራ ይገኛል ብለዋል፡፡ የክልሉ የሲቪል ማህበረሰብ ድርጅቶች ጉዳዮች ዳይሬክተር አቶ መሀመድ ራህመቶ እንደገለጹት ከሆነ በሀረሪ ብሄራዊ ክልል ውስጥ 32 የሲቪል ማህበረሰብ ድርጅቶች ያሉ ሲሆን ከ520 ሚሊዮን ብር በላይ የሚያወጡ 36 ፕሮጀክቶችን ከክልሉ የገንዘብና ኢኮኖሚ ትብብር ቢሮ ጋር ተፈራርመው በመንቀሳቀስ ላይ ይገኛሉ፡፡

የሲቪል ማህበረሰብ ድርጅቶች ባለስልጣን ክልሎች የራሳቸውን የሲቪል ማህበረሰብ ድርጅቶች ህግ እንዲያዘጋጁ ሞዴል ረቂቅ ህግ ከማዘጋጀት ጀምሮ በርካታ የሙያና የፋይናንስ ድጋፍ እያደረገ የሚገኝ ሲሆን በሀረሪ ብሄራዊ ክልላዊ መንግስት የሲቪል ማህበረሰብ ድርጅቶች ምዝገባና አስተዳደር ረቂቅ መመሪያ ላይ የክልሉ ገንዘብና ኢኮኖሚ ትብብር ቢሮ ከክልሉ ፍትህ ቢሮና ከባለስልጣን መስሪያ ቤቱ ጋር በመሆን ግብዓት በማሰባሰብ ላይ ይገኛል ብለዋል፡፡ እስካሁን ባለው ሁኔታ ሶስት ክልሎች የራሳቸውን የክልል የሲቪል ማህበረሰብ ድርጅቶች ህግ በየምክር ቤቶቻቸው ማጽደቃቸው ተገልጿል፡፡


የኢትዮጵያ የሲቪል ማህበረሰብ ድርጅቶች የዳሰሳ ጥናት ሪፖርት ይፋ ሆነ፡፡

የሲቪል ማህበረሰብ ድርጅቶች ባለስልጣን ከአውሮፓ ህብረት የሲቪል ማህበረሰብ ድርጅቶች ፈንድ (EUCSF III) እና ከብሪቲሽ ሲቪል ሶሳይቲ ሰፖርት ፕሮግራም (CSSP II) ጋር በመሆን ያስጠናው የሲቪል ማህበረሰብ ድርጅቶች የዳሰሳ ጥናት ሪፖርት በአዲስ አበባ ይፋ ተደርጓል፡፡ የዳሰሳ ጥናቱ ሪፖርት ይፋ ሲደረግ የፍትህ ሚኒስቴር ሚንስትር ዶ/ር ጌዲዮን ጢሞትዮስን ጨምሮ የተለያዩ ሚንስትሮችና የባለስልጣን መስሪያቤቱ ከፍተኛ የስራ ኃላፊዎች እንዲሁም ጥሪ የተደረገላቸው የሲቪል ማህበረሰብ ድርጅቶች ተገኝተዋል፡፡ የባለስልጣን መስሪያ ቤቱ ዋና ዳይሬክተር አቶ ጂማ ዲልቦ የኢትዮጵያ የሲቪል ማህበረሰብ ድርጅቶች የዳሰሳ ጥናት ይፋ ሲደረግ እንዳሉት ጥናቱ የሲቪል ማህበረሰብ ድርጅቶች ቀደም ሲል ከነበረባቸው ማነቆ ተላቀው አሁን ላይ በነጻነት መንቀሳቀስ እንዲችሉ ምቹ ሁኔታዎች መፈጠር መቻላቸውን አንስተው በተለይም አዲሱ አዋጅ ከወጣ በኋላ ከ2200 በላይ አዲስ የሲቪል ማህበረሰብ ድርጅቶች በባለስልጣን መስሪያ ቤቱ ስር ተመዝገበው መንቀሳቀስ መቻላቸውን ጠቁመዋል፡፡

የሲቪል ማህበረሰብ ድርጅቶች ታሪክ 50 ዓመታትን ወደኋላ ያስቆጠረ እንደሆነ ያነሱት ዋና ዳይሬክተሩ አሁን ላይ መንግስት የፈጠረውን ምቹ ሁኔታ በመጠቀም በርካታ የሲቪል ማህበረሰብ ድርጅቶች ተመዝግበው ለሀገር፣ ለዴሞክራሲ ስርዓት ግንባታ እንዲሁም ለህብረተሰብ ተጠቃሚነት የድርሻቸውን እየተወጡ እንደሚገኙ በንግግራቸው ጠቁመዋል፡፡ ለሪፖርቱ መሳካት ከፍተኛ አስተዋጽዖ ያበረከቱትን የጥናት ቡድኑ አባላትን እንዲሁም ለጥናቱ መሳካት አስተዋጽዖ ያበረከቱ አካላትን ሁሉ ዋና ዳይሬክተሩ አመስግነዋል፡፡ በመርኃ ግብሩ ላይ የኢትዮጵያ የሲቪል ማህበረሰብ ድርጅቶች የዳሰሳ ጥናትን የተመለከተ አጭር ገለጻ በጥናት ቡድኑ መሪ አቶ ደበበ ኃይለ ገብርኤል የቀረበ ሲሆን የፍትህ ሚኒስቴር ሚንስትር ዶ/ር ጌዲዮን ጢሞቲዎስ እንዲሁም የሰላም ሚኒስቴር ሚንስትር ደዔታ አቶ ታዬ ደንደዓና ጥሪ የተደረገላቸው ሚንስትር ደኤታዎች በጋራ የጥናት ሪፖርቱን ይፋ አድርገዋል፡፡


ባለስልጣን መስሪያ ቤቱ በአገልግሎት አሰጣጡ ግልፀኝነትንና ተጠያቂነትን የተላበሰ ሞዴል ተቋም መሆን አለበት ፡፡

የሲቪል ማህረሰብ ድርጅቶች ባለስልጣን ለሁለተኛ ዙር በማህበራዊ ተጠያቂነት ላይ ስልጠና ሰጠ፡፡ በስልጠናው ላይ የተገኙት የባለስልጣን መስሪያ ቤቱ ም/ዋና ዳይሬክተር አቶ ፋሲካው ሞላ እንዳሉት መስሪያ ቤቱ ባለፉት ዓመታት በለውጥ ሂደት ውስጥ መሆኑን አንስተው በዋናነት የተቋሙ ሰራተኞች አቅማቸውን ለማጎልበትና የአመለካከት ለውጥ ማምጣት እዲችሉ፣ የአገልግሎት አሰጣጡን የተሻለ ለማድረግ የአቅም ግንባታ ስልጠናዎችን መስጠቱን ገልፀዋል፡፡ አያይዘውም አዋጅ 1113/2011 ሲወጣ በነፃነት የተደራጀ የነቃ ማህበረሰብ ለመፍጠር ጠንካራ የሆነ የሲቪል ማህበረሰብ ድርጅቶችን መገንባት አስፈላጊ ነው ይህ ሲሆን ግዴታውን የሚወጣ ማህበረሰብ መፍጠር ይቻላል ብለዋል፡:

የዛሬው ስልጠና የማህበራዊ ተጠያቂነት ፕሮግራም አንዱ የተቋማችን የለውጥ አካል ነው፡፡ ሁሉም አመራርና ባለሙያ በማህበራዊ ተጠያቂነት ላይ በቂ እውቀትና ግንዛቤ ሊኖረው እንዲሁም የስራው አካል አድርጎ መጠቀም አለበት በማለት የሲቪል ማህበረሰብ ድርጅቶች ማህበራዊ ተጠያቂነትን ተረድተው እንዲሰሩ አቅማቸውን መገንባት ያስፈልጋል ሲሉ ተናግረዋል ፡፡ ም/ዋና ዳይሬክተሩ አጽንኦት ሰጥተው የተናገሩት የሲቪል ማህበረሰብ ድርጅቶች መንግስት ተጠያቂነት ፣ግልጸኝነት እና የመልካም አስተዳደር ችግር አለበት ብሎ ለመናገር በመጀመሪያ ራሳቸው ሞዴል መሆን አለባቸው ሲሉ ተናግረዋል፡፡


የሚዲያ ባለሙያዎች እና ጋዜጠኞች ለሰብአዊ መብት መጎልበት ያላቸውን ሚና ላይ ውይይት ተደረገ፡፡

የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ በንግግራቸው በአንድ ሀገር እድገትም ሆነ ውድቀት ውስጥ ሚዲያ ያለውን ሚና ማሳነሰ አይቻልም፡፡ በተለይም ዲጂታላይዝድ እየሆነ በመጣው ዓለም ውስጥ የሚዲያ ሚና በእጅጉ ጎልቶ እንደሚታይ እና አንዳንዴ ከተጽዕኖ ፈጣሪነቱና የሰዎችን አመለካከት ከመቅረጽ አኳያ እንደ 4ኛ መንግስትም ይቆጠራል ሲሉ ገልጸዋል ፡፡ አክለውም የሚዲያው ዘርፍ ዘርፈ-ብዙ ችግሮች ያሉበት ቢሆንም ከለውጡ በኋላ በሚዲያና በሲ/ማ/ድርጅቶች ዘርፍ የተከናወኑ የሪፎርም ተግባራት በተለይም የሕግና የተቋማዊ ሪፎሞች ሥራዎች በዘርፉ ይታይ የነበሩትን ህጸጾች በማረም አስቻይ ማዕቀፎች እንዲፈጠሩ መደረጉን በንግግራቸው ወቅት አስታውሰዋል፡፡ በቀጣይም በዴሞክራሲ ሥርዓት ግንባታ፣ በመልካም አስተዳደር፣ በሰብአዊ መብት አያያዝ፣ ሙስናንና ብልሹ አሰራሮችን ከመዋጋት አኳያ ሚዲያና የሲቪል ማህበረሰብ ድርጅቶች የበኩላቸውን አስተዋጽኦ እንዲያበረክቱ ይጠበቃል ብለዋል ፡፡

የጋዜጠኝነት ሙያ እንዲሻሻል፣ በዘርፉ ያሉ ሙያተኞች ዕውቀታቸውን እንዲጎለብት፣ ብስለትና ሥነ ምግባር ያላቸው ባለሙያዎች እንዲፈጠሩ፤ ለሰው ልጆች ክብርና መብት የሚሟገቱ ሀቀኛ ባለሙያዎች እንዲበዙና እንዲበረክቱ ከማድረግ አኳያ ዛሬ ምስረታው እውን የሚሆነው ማህበር አስተዋጽኦ ይኖረዋል ሲሉ ገልጸዋል፡፡ በተለይም በአገራችን ካጋጠመን የእርስ በርስ ግጭት መነሻ አንዳንድ የውጭ ኃይሎች ጣልቃ በመግባት በተለያየ መንገድ የአሸባሪ ቡድኖችን በመደገፍ ሀገራችንን ለማፈራረስ ብሎም የሚሰጣቸውን የተሳሳተና የውሸት ትርክቶች በማራገብ የዓለም ማህበረሰብን ለማሳሳት የተሄደበት ርቀት ቀላል ባለመሆኑ ሚዲያዎች ሀቁን ለዓለም ማህበረሰብ በማሳወቅ ላይ በቂ ስራ መሥራት ላይ አሁንም ከፊታችሁ ረጅም ጉዞ ይጠብቃችኋል በማለት መልዕክታቸውን አስተላልፈዋል ፡፡


ባለስልጣን መስሪያ ቤቱ በሰባት ረቂቅ መመሪያዎች ላይ ግብዓት በማሰባሰብ ላይ ይገኛል፡፡

ባለስልጣን መስሪያ ቤቱ ከተቋሙ ሰራተኞች በሰባት ረቂቅ መመሪያዎች ላይ የግብዓት ማሰባሰቢያ መርሃ ግብር እያከናወነ ይገኛል፡፡ በግብዓት ማሰባሰቢያ መርኃ ግብሩ ላይ የባለስልጣን መስሪያ ቤቱ ከፍተኛ የስራ ኃላፊዎችን ጨምሮ የሚመለከታቸው የስራ ክፍል ሃላፊዎች፣ተወካዮችና ባለሙያዎች ተገኝተዋል፡፡ ዋና ዳይሬክተር አቶ ጂማ ዲልቦ በመርሃ ግብሩ ላይ ባስተላለፉት መልዕክት ባለስልጣን መስሪያ ቤቱ የተለያዩ መመሪያዎችን በማውጣት አገልግሎት አሰጣጡን ግልጽ እና ተገማች እንዲሆን ለማስቻል 17 ረቂቅ መመሪያዎችን ያዘጋጀ መሆኑን በመጥቀስ ከአሁን በፊት ከጸደቁትና በተግባር ላይ ከዋሉ መመሪያዎች በተጨማሪ ሰባት ረቂቅ መመሪያዎች ለውይይት የቀረቡ መሆኑን አንስተው የተቋሙ ባለሙያዎች እንዲወያዩበትና አስተያየት እንዲሰጡበት እየተደረገ እንደሚገኝ አንስተዋል፡፡

ለውይይት የቀረቡት 7ቱ መመሪያዎች የሲ.ማ.ድ ከታክስና ቀረጥ ነጻ አጠቃቀም ረቂቅ መመሪያ፣ በሲማድ ውስጥ ስለሚሰሩ የውጪ አገር ዜጎች የስራ ፈቃድ አሰጣጥ ረቂቅ መመሪያ፣ ስለውጪ ድርጅቶች ምዝገባና አስተዳደር የወጣ ረቂቅ መመሪያ ፣ እምነትን መሰረት ያደረጉ የበጎ አድራጎት ድርጅቶችን ስለመመዝገብና ለማስተዳደር የወጣ ረቂቅ መመሪያ፣ ህብረቶችንና ካውንስሎችን ለመመዝገብና ለማስተዳደር የወጣ ረቂቅ መመሪያዎች ሲሆኑ ከእነዚህ መመሪያዎች በተጨማሪ የባለስልጣን መስሪያ ቤቱን ቦርድ የሚመለከት እንዲሁም የህገወጥ የገንዘብ ዝውውርና በወንጀል የተገኘ ገንዘብን ለበጎ አድራጎት ተግባር ማዋልን የሚከለክሉ ናቸው፡፡


የኢፌዲሪ የፍትህ ሚኒስትር ክቡር ዶ/ር ጌዲዮን ጢሞቲዮስ እና የባለስልጣኑ ከፍተኛ አመራሮች የአዲሱን ዓመት ዋዜማ በመቄዶኒያ የበጎ አድራጎት ማህበር በመገኘት ከአረጋውያኑ ጋር አሳለፉ::

በአዲሱ ዓመት ዋዜማ ጳጉሜ 04/2014 በመቄዶኒያ በጎ አድራጎት ማህበር የተገኙት የፍትህ ሚኒስትሩ ዶ/ር ጌዲዮን ጢሞቲዎስ እና የባለስልጣኑ ዋና ዳይሬክተር አቶ ጂማ ዲልቦ እና ምክትል ዋና ዳይሬክተር አቶ ፋሲካው ሞላ በቆይታቸው በመቄዶኒያ ድጋፍ እተደረገላቸው ያሉ አረጋውያንና የአእምሮ ህሙማንን ተዘዋውረው ጎብኝተዋል፡፡ በተጨማሪም ድርጅቱ የሚሰጠውን አገልግሎት ዘላቂነት ለማረጋገጥ እያስገነባ ያለው ግዙፍ ህንፃ የተጎበኘ ሲሆን ህንፃው በሶስት ዓመት ከግማሽ ጊዜ ውስጥ 70 ፐርሰንት በላይ መድረሱ የሚያስመስግን መሆኑ ተገልፆል፡፡ የድርጅቱ መስራችና ስራ-አስኪያጅ የሆኑት የክብር ዶክተር ቢኒያም በለጠ የእንክብካቤ ማእከሉን አስጎብኝተዋል፡፡ ከማእከሉ ከሚገኙ አረጋውያን ጋርም ዋዜማውን በማስመለከት ፕሮግራም የተደረገ ሲሆን ድርጅቱ የሚያደርጋቸውን ስራዎች የሚያሳይ ዶክመንታሪ ቀርቧል፤ አረጋውያኑ የአዲስ ዓመት ዋዜማን አብራችሁን ስላከበራችሁ እጅግ ተደስተናል በማለት የገለፁ ሲሆን ምስጋናቸውን በአባታዊና እናታዊ ምርቃት ገልፀዋል፡፡

May be an image of 5 people, people standing and indoorMay be an image of 1 person, standing and indoorMay be an image of outdoors

ክቡር ሚኒስትር ዶ/ር ጌዲዮን መቄዶኒያ በጎ አድራጎት ማህበር እያከናዎነ ያለው ስራ አስደናቂ መሆኑን በመግለፅ የማህበሩ እንቅስቃሴ እንደአገር ልንማራቸው የሚገቡ በአጭር ጊዜ ውስጥ ውጤታማ ስራ የማከናዎን፣ የአብሮነት፣ የወንድማማችነት፣ የአንድነትና የመረዳዳት እሴቶችን በስፋት ማዳበሩን መረዳት መቻላቸውን ጠቅሰዋል፡፡ ከዚህ ጋር ተያይዞም ኢትዮጵያ እንደመቄዶኒያ መሆን ያለበት መሆኑን አስመረው ተናግረዋል፡፡ አዲሱ ዓመት መቄዶኒያ የበለጠ አገልግሎቱን የሚያስፋበትና ስኬታማ የሚሆንበት እንዲሆን በመመኘት እና ለተቋሙን አስፈላጊውን ድጋፍ ለማድረግ ጥረት እንደሚያደርጉ በመግለፅ ለመላው የመቄዶኒያ ማህበረሰብ በሙሉ መልካም አዲስ ዓመት እንዲሆን ተመኝተዋል፡፡ የባለስልጣኑ አመራሮች ለመቄዶኒያ በጎ አድራጎት ማህበር መስራችና ስራ-አስኪያጅ እንዲሁም ለስራ ባልደረቦቹ እያከናዎኑ ላሉት ለትውልድ ተሻጋሪ ለሆነው መልካም ስራ ከፍተኛ ምስጋናቸውን በማቅረብ ማህበሩ እንዲጠናከር አስፈላጊውን የቅርብ ድጋፍ የሚያደርጉ መሆኑን ገልፀዋል፡፡ መቄዶኒያ በጎ አድራጎት ማህበር ከ7500 በላይ ጧሪ ደጋፊ የሌላቸውን በጎዳና ላይ ይገኙ የነበሩ አረጋውያንና አእምሮ ህሙማንን አቅፎ እንክብካቤ የሚሰጥ ውጤታማ መልካም ተቋም መሆኑ በጎብኝቱ ለመረዳት ተችሏል፡፡