የሲቪል ማኅበረሰብ ድርጅቶች ባለስልጣን ለአፋር ክልል ከ179 ሚሊዮን ብር በላይ የሚገመት የዓይነትና የገንዘብ ድጋፍ አደረገ፡፡

የሲቪል ማኅበረሰብ ድርጅቶች ባለስልጣን የሲቪል ማህበረሰብ ድርጅቶችን በማስተባበር በተለያዩ ጊዚያት ድጋፍ ማድረጉ ተገልጷል፡፡ የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ የክልሉን ፕረዝዳንት አቶ አወል አርባ ጨምሮ ሌሎች የስራ ሃላፊዎች ጋር በዚሁ ዙሪያ ውይይት አድርገዋል፡፡ ዋና ዳይሬክተሩ በንግግራቸው እንደገለጹት በሃገራችን በተከሰተው ጦርነት የደረሰውን አደጋ ለመቅረፍ እንዲሁም ለተፈናቀሉ ወገኖቻችንን ድጋፍ ለማድረግ የባለስልጣን መስርያቤቱ በተለያዩ ግዚያት የሲቪል ማህበረሰብ ድርጅቶችን ጥሪ በማድረግ ጉዳቱ ለደረሰባቸው ክልሎች በአይነትና በጥሬ ገንዘብ ድጋፍ ሲያደርግ መቆየቱን ተናግረዋል፡፡ በዚሁም መሰረት ባለስልጣን መስርያቤቱ በአፋር ብሄራዊ ክልላዊ መንግስት መኪናን ጨምሮ የተለያዩ የምግብ፣፣መድሃኒትና የህክምና መገልገያ መሳሪያዎች በድምሩ ከ 179,520,000 (አንድ መቶ ሰባ ዘጠኝ ሚሊዮን አምስት መቶ ሃያ ሺ ብር) የሚገመት ድጋፎችን ማድረጋቸውን አቶ ጂማ ዲልቦ አክለው ገልጸዋል ፡፡ የአፋር ብሄራዊ ክልላዊ መንግስት ርዕሰ መስተዳደር አቶ አወል አርባ በበኩላቸው የአፋር ክልል ከ2012 ዓ.ም ጀምሮ በርካታ ፈተናዎች ውስጥ ማለፉን ገልጸው በችግራችን ግዜ ሁሉ የሁሉም ክልሎች እንዲሁም አንዳንድ የሲቪል ማህበረሰብ ድርጅቶች በኩል የተደረገላቸውን ድጋፍ አመስግነዋል፡፡ ዛሬም በሲቪል ማህበረሰብ ድርጅቶች ባለስልጣን የተደረገልን ድጋፍ ይህንኑ የሚያመላክትና ኢትዮጵያዊነትንና ወንድማማችነትን የሚያሳይ ነው በማለት በክልሉ በጦርነቱ በደረሰው ከፍተኛ ጉዳትና የተፈናቀለው ማህበረሰብ ቁጥር አንፃር ድጋፍ እንደሚያስፈልግ ተናግረዋል፡፡


ሴቶችን በሁሉም መስክ በማሳተፍ ብቃታቸውን መጠቀም መቻል አለብን ተባለ::

የሲቪል ማህበረሰብ ድርጅቶች ባለስልጣን አመራሮችና ሰራተኞች “ሴትን አከብራለሁ ጥቃቷንም እከላከላለሁ” በሚል መሪ ቃል ዓለም አቀፍ የፀረ ፆታ ጥቃት ቀንን በደመቀ ሁኔታ አከበሩ፡፡ በበዓሉ ላይ የተገኙት የባለስልጣኑ ዋና ዳይሬክተር አቶ ጂማ ዲልቦ እንዳሉት በሴቶች ላይ የሚደርሰውን ፆታዊ ጥቃት ለመከላከል በአመት አንድ ጊዜ ብቻ መወያየት ሳይሆን የሁልጊዜ ተግባራችን መሆን እንደለበት ተናግረዋል፡፡ አክለውም ሴቶችን በሁሉም መስኮች በማሳተፍ ብቃታቸውን መጠቀም መቻል አለብን ሲሉ ገልጸዋል፡፡ ሴቶችን የማክበር አንዱ መገለጫ ጥቃቷን በመከላከል ነው ያሉት ዋና ዳይሬክተሩ ከፆታዊ ጥቃት ነጻ የሆነ ተቋም በመፍጠር ለሌሎች ሞዴል መሆን አለብን ብለዋል፡፡ ይህንንም ተግባራዊ ለማድረግ safeguarding policy መውጣቱን ገልጸዋል፡፡ ይህን በዓል ስናከብር ባለፉት ሁለት አመታት በአገራችን በነበረው ጦርነት የጥቃት ሰለባ የሆኑ ሴቶቻችን አሁን በተደረገው የሰላም ስምምነት መሰረት ሰላማቸውን ባገኙበት ወቅተ መሆኑ ለየት ያደረገዋል ብለዋለ፡፡ አለም አቀፍ የፀረ ፆታ ጥቃት ቀን በዓለም አቀፍ ደረጃ ለ31ኛ ጊዜ በአገራችን ደግሞ ለ17ኛ ጊዜ ተከብሮ ውሏል፡፡


የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ population service International Ethiopia (PSI Ethiopia) እየተሰሩ ያሉ የተለያዩ ፕሮጀክቶችን ጎብኝተዋል፡፡

የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ የተቋሙ የስራ ሀላፊዎችና ባለሙያዎች በጉብኝቱ ተሳትፈዋል፡፡ ጉብኝቱ የተደረገው በኦሮሚያ ክልል ምዕራብ አርሲ ዞን ሻሸመኔ ከተማ፣ በሲዳማ ክልል ሀዋሳ ከተማ እንዲሁም በዎላይታ ሶዶ ዞን ሶዶ ከተማ እና ዳሞትሶሬ ወረዳ የሚገኙና ፒኤስ አይ ኢትዮጵያ (PSI Ethiopia) በቅንጅት በሚሰራባቸው ፕሮጀክቶች ነው፡፡ በጉብኝቱ የአፍላ ወጣቶችን እርግዝና ለመቀነስ በሻያንባ ቅሌና ቀበሌ ጤና ኬላ እየተሰራ ያለውን የብልህ ጅማሮ ፕሮግራም እንዲሁም የኤች አይ ስርጭትን ለመቀነስና በወሲብ ንግድ ላይ የተሰማሩ ሴቶችን መደገፍና የምክር አገልግሎት መስጠትን ዓላማ ያደረገው የሙሉ ፕሮጀክት፣ ተላላፊ ባልሆኑ በሽታዎች ላይ ትኩረት በማድረግ በተለይ በሀዋሳ ከተማ በሚሊኒየም ጤና አጠባበቅ ጣቢያ እየተሰሩ ያሉ ስራዎች ትኩረት ያገኙ ናቸው፡፡ የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ ከጉብኝቱ መጠናቀቅ በኋላ በሰጡት አስተያየት በማህበረሰብ አቀፍ የጤና አጠባበቅ ላይ የተሻሻሉ የሽንት ቤት ሳኖፓትሪዎችን በማቅረብ የማህበረሰቡን የጤና አጠባበቅ ዘይቤ ለመቀየር እና ለወጣቶችም የስራ እድል ለመፍጠር የተሄደበትን ርቀት እንዲሁም በአፍላ እድሜያቸው በወሲብ ንግድ በተሰማሩ ሴቶች ላይ ትኩረት በማድረግ የኤች አይቪ ምርመራና የምክር አገልግሎት እንዲሁም ለቫይረሱ የተጋላጭነት ደረጃ ለመቀነስ ድርጅቱ እያደረገ የሚገኘው ጥረት የሚደነቅ መሆኑን አንስተዋል፡፡

መንግስት የሲቪክ ምህዳሩ እንዲሰፋ ከፍተኛ ትኩረት ሰጥቶ እየሰራ እንደሚገኝና የሲቪል ማህበረሰብ ድርጅቶች በሀገር ልማትና በዴሞክራሲ ስርዓት ግንባታ ላይ ጉለህ ድርሻ እንዲኖራቸው ባለስልጣን መስሪያ ቤቱ የተለያዩ የአሰራር ስርዓቶችን ከመዘርጋት ባለፈ ድርጅቶች የሚሰሯቸውን ፕሮጀክቶች መስክ ድረስ ወርዶ በማየት ያለባቸውን ችግር ለመፍታት ጥረት እያደረገ እንደሚገኝ ጠቅሰዋል፡፡ የሲቪል ማህበረሰብ ድርጅቶች በየደረጃው ከሚገኙ የመንግስት መዋቅሮች ጋር በትብብር መስራት መቻላቸው ውጤታማ እንደሚያደረጋቸው በዎላይታ ሶዶ ዞን የተሰሩ ስራዎች ትልቅ ማሳያ መሆናቸውን ያነሱት ዋና ዳይሬክተሩ ከተለያዩ የመንግስት ተቋማትና የሲቪል ማህበረሰብ ድርጅቶች ጋር በትብብርና በቅንጅት መስራት ውጤታማ እና የተሻለ እንደሚያደርግ ጠቁመው በብልህ ጅማሬ በተለይ ሴቶች በአፍላ እድሜያቸው ለእርግዝና እንዳይጋለጡ ከማንቃት ባሻገር ወደትምህርታቸው እንዲመለሱ እንዲሁም በወሲብ ንግድ ላይ የተሰማሩ ሴቶች ከወሲብ ንግድ ወጥተው ድርጅቱ በዘላቂነት ገቢ የሚያገኙበትን ዘዴ ቢመለከት የሚል አስተያየት ሰጥተዋል ፡፡

የፒኤስ አይ ኢትዮጵያ population service International Ethiopia (PSI Ethiopia) የኢትዮጵያ ተወካይ የሆኑት ዶክተር ዶሮቲ PSI Ethiopia የተለያዩ ስልጠናዎችንና ቴክኒካል ድጋፎችን በማድረግ በማህበረሰቡ ውስጥ ያሉትን ችግሮች ለመፍታት እየሰራ እንደሚገኝ አንስተው በህብረተሰብ ጤና፣ ስነተዋልዶ ጤና፣ የስራ እድል ፈጠራና የገበያ ትስስር ላይ የተለያዩ ስለልጠናዎችን በመስጠትና የቴክኒክ እገዛዎችን እንደሚያደርግ አንስተዋል፡፡ በጉብኝቱ እጅግ መደሰታቸውን የገለጹት ዶክተር ዶኸርቲ በጉብኝቱ ወቅት የተሰጡ ገንቢ አስተያየቶች ወደፊት በስፋት እንደሚሰሩባቸው ጠቁመው ከተለያዩ የመንግስት ተቋማት ጋር ያላቸውንም ቅንጅት አጠናክረው በመቀጠል የህብረተሰቡን ችግር በዘላቂነት ሊፈቱ የሚችሉ ስራዎችን ትኩረት ሰጥተው እንደሚሰሩ ተናግረዋል፡፡ ፒኤስ አይ ኢትዮጵያ population service International Ethiopia (PSI Ethiopia) በፈረንጆቹ አቆጣጠር በ2003 የተቋቋመና በሲቪል ማህበረሰብ ድርጅቶች ባለስልጣን ተመዝግቦ በተለያዩ የኢትዮጵያ ክፍሎች በመንቀሳቀስ ላይ የሚገኝ የሲቪል ማህበረሰብ ድርጅት ሲሆን በስነ ተዋልዶ ጤና፣ በማህበረሰብ ጤና አጠጠባበቅ እንዲሁም ተላላፊ ባልሆኑ በሽታዎች ላይ የሚሰራና መሰል ስራዎችን የሚደግፍ ነው፡፡ ሀዋሳ በሚገኘው ቢሮው በሲዳማ፣ እና በደቡብ ብሄር ብሄረሰቦችና ህዝቦች ክልል ብቻ ከ71 በላይ ወረዳዎችን በፕሮግራሞቹ የደረሰ ሲሆን በርካታ የማህበረሰብ ክፍሎችን ተጠቃሚ እያደረገ የሚገኝ የሲቪል ማህበረሰብ ድርጅት ነው፡፡


"በጎ ፈቃደኝነት ለአብሮነት" በሚል መሪ ቃል ዓለም አቀፍ የበጎ ፈቃደኛነት ቀን ተከብሮ ዋለ፡፡

የሲቪል ማህበረሰብ ድርጅቶች ባለስልጣን ከሴቶችና ማህበራዊ ጉዳይ ሚኒስቴር ጋር በመተባበር በአዳማ ከተማ ፕሮግራሙን አዘጋጅተዋል፡፡ በበዓሉ በክብር እንግድነት የተገኙት የሴቶችና ማህበራዊ ጉዳይ ሚኒስቴር ሚኒስትር ዴኤታ ወ/ሮ ሙና አህመድ እንደተናገሩት በጎ ፈቃደኝነት ዜጎች ከራስ ወዳድነት እና ፍላጎት ወደጎን ብለው የዘር ስብጥር አስተዳደግና አመለካከት አልያም የድንበር ወሰን ሳያግዳቸው ከቅን ልቦና በመነጨ ያለምንም ክፍያ በራሳቸው ተነሳሽነት ጊዜያቸውን፣ ጉልበታቸውን እና እውቀታቸውን ተጠቅመው የሰውችን ሰብዓዊ ህይወት ለማሻሻል ማህራዊ ተሳትፎን እና ማህራዊ ትስስርን ለማጠናከር የሚውል በጎ ተግባር ነው፡፡ ሚኒስትር ዴኤታዋ ቀኑን ማክበር ያስፈለገበት ዓብይ ምክንያት ብለው ያነሱት በአሁኑ ወቅት በአገራችን ውስጥ በተፈጥሮአዊና በሰው ሰራሽ ክስተቶች ሳቢያ በአስቸጋሪ ሁኔታ ውስጥ የሚገኙ ወገኖቻችን በመኖራቸው ችግሮቻቸውን ለመቅረፍ ሁላችንም በጋራ መቆም ይገባናል ሲሉ ገልጸዋል፡፡ ሌላው ያነሱት በአገራችን የበጎ ፈቃደኝነት አገልግሎት ከህዝባች ታሪክ ባህል ወግና እሴቶችን ከማህበራዊ መስተጋብሮች ጋር የተቆራኘ የረጅም ጊዜ ታሪክ መሆኑን አንስተዋል፡፡

የበጎ ፈቃደኝነት አገልግሎት በአገር ደረጃ በተበጣጠሰ መንገድ ሳይሆን ወጥ እንዲሆን እና የዘርፉን እንቅስቃሴና የወጣቶችን ተሳትፎ ወደላቀ ደረጃ ለማሸጋገር ብሄራዊ የወጣቶች የበጎ ፈቃድ አገልግሎት ፖሊሲ እና የወጣቶች የዜግነት አገልግሎት አዋጅ በረቂቅ ደረጃ እየተዘጋጀ መሆኑን በመግለጽ የበጎ ፋቃደኝነት አስተሳሰብ በማህበረሰቡ ዘንድ በማስረጽ ዜጎች በአገልግሎት ላይ በንቃት እንዲሳተፉ ጥሪአቸውን አስተላልፈዋል፡፡ የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ እንዳሉት የበጎ ፈቃደኝነት ቀን ከመሪ ቃሉ ስንነሳ በጎ ፈቃደኝነት ለአገር አንድነትና አብሮነት ቁልፍ ሚና እንዳለው የሚገልጽ ነው በማለት በአሁኑ ወቅት አገራዊ አንድነትን ለማጠናከር እየተደረገ ካለው አኳያ ትልቅ እንድምታ አለው ሲሉ ገልጸዋል፡፡ አክለውም የአገራችን ኢትዮጵያ አንድነትና አብሮነት የሚረጋገጠው በስርዓት ታንጾ ባደገ ቅን ልብ እና በጎ አድራጊነትና አስተዋይ ልቦች ነው በማለት የበጎ ፈቃድ አገልግሎት በእድሜ፣ በፆታ፣ በዘር፣ በሃይማኖት እና በድንበር ሳይገደብ ሰብዓዊ መልክ ብቻ በመከተል የሚከናወን ተግባር መሆኑን አንስተዋል፡፡ የሲቪል ማህበረሰብ ድርጅቶች ባለስልጣን በአዋጅ 1113/2011 መሰረት በህገ መንግስቱ የተረጋገጠውን የመደራጀት መብት በተሟላ መንገድ በማክበር የሲቪል ማህበረሰብ ድርጅቶች ህግን አክብረው እንዲንቀሳቀሱ ክትትልና ድጋፍ በማድረግ ፤በአገራችን የበጎ አድራጊነትና የበጎ ፈቃደኝነት ባህል በህብረተሰቡ ውስጥ በማስረጽ ፤ድርጅቶች በአገር ልማትና ዴሞክራሲያዊ ስርዓት ግንባታ ላይ አስተዋጽኦ እንዲኖራቸው በማስቻል የተደራጀ ማህበረሰብ በመፍጠር የህብረተሰቡን የላቀ ተጠቃሚነት እና የአገራችንን ብልጽግና ለማረጋገጥ ከባለድርሻ አካላት ጋር እየተሰራ ነው ሲሉ መልዕክታቸውን አስተላልፈዋል፡፡ ሌለዋው ዋና ዳይሬክተሩ ያነሱት የበጎ ፈቃድ አገልግሎት ሳይቆራረጥ ተቋማዊ አሰራር ተዘርግቶለት እንዲከናወን ስራዎች እየተከናወኑ መሆኑን በመግለጽ የበጎ ፈቃድ አገልግሎት ለአገራችን ልማት ፣አንድነት፣ ሰላምና መረጋጋት ቁልፍ ሚና እዳለው በመረዳት ሁሉም የህብረተሰብ ክፍል እና ተቋማ በጋራ መስራት እንደለባቸው አንስተዋል፡፡ የበጎ ፈቃድ አድራጊዎች እና በጎ ፈቃድ ፈላጊዎች ለማገናኘት የሚያስችል /VMSI/ የተባለ የመመዝገቢያ ድህረገጽ ተዘጋጅቶ በዛሬው እለት ተመርቆ ተከፍቷል ፡፡ በመጨረሻም በዚህ ተግባር በጎ አስተዋጽኦ ላበረከቱ ድርጅቶች የምስጋና የምስክር ወረቀት ተሰጥቷቸዋል፡፡


የሲቪል ማህበረሰብ ድርጅቶች ባለስልጣን ከCSSP2 ጋር በመተባበር በአካል ጉዳተኞች መብትና አካታችነት ላይ ለተቋሙ አመራሮች ስልጠና ሰጠ::

የሲቪል ማህረሰብ ድርጅቶች ባለስልጣን በአዋጅ 1113/2011 የተሰጠውን ተግባርና ኃላፊነት ለመወጣት እና በተቋሙ የተጀመረውን ለውጥ ለማስቀጠል አዲስ መዋቅራዊ አደረጃጀት በመፍጠር የሲቪል ማህበረሰብ ድርጅቶችን ለመደገፍ፣ ለመከታተል ብሎም የህረተሰቡን ተጠቃሚነት ለማረጋገጥ እየሰራ ይገኛል፡፡ በዛሬው ዕለት ተቋሙ ከCSSP2 ጋር በመተባበር በአካል ጉዳተኞች መብትና አካታችነት ላይ ለተቋሙ አመራሮች ለሁለት ቀናት የሚቆይ ስልጠና እየሰጠ ይገኛል፡፡ በስልጠናው ላይ የተገኙት የባለስልጣን መስሪያ ቤቱ ም/ዋና ዳይሬክተር አቶ ፋሲካው ሞላ እንዳሉ ባለስልጣን መስሪያ ቤቱ ለአራት ዓመታት በለውጥ እንቅስቃሴ ውስጥ መሆኑን በመጥቀስ በአሁን ጊዜ አዲስ የለውጥ ስሜት እና አዲስ አደረጃጀት መፍጠር መቻሉን ገልጸዋል፡፡ አክለውም በተቋሙ አዲስ በተደራጀው መዋቅር ውስጥ የአካል ጉዳተኞችን የሚከታተል ዴስክ መካተቱን አንስተው በርካታ በአካል ጉዳተኞች ላይ የሚሰሩ የሲቪል ማህረሰብ ድርጅቶች በመኖራቸው እነዚህ ድርጅቶች የአካል ጉዳተኞችን መብትና ጥቅማቸውን ለማስጠበቅ በተሟላ መልኩ ጠንክረው መስራት እንዳለባቸው አንስተዋል፡፡ የባለስልጣን መስሪያ ቤቱ የአገልግሎት አሰጣጡን ለማሻሻል የሰራተኛውን አቅም ማጎልበት ቀዳሚ ተግባር ነው ያሉት ምክትል ዋና ዳይሬክተሩ በአካል ጉዳተኞች መብትና አካታችነት ላይ የተሰጠውን ስልጠና እንዲካሄድ ለተባበረው CSSP2 ምስጋናቸውን አቅርበዋል፡፡


የሲቪል ማህበረሰብ ድርጅቶች ባለስልጣንና የሲቪል ማህበረሰብ ድርጀቶች ምክር ቤት በጋራ ከ1 ቢሊየን ብር በላይ የሚሆን የዓይነትና የገንዘብ ድጋፍ ለማሰባሰብ እና ለተጎጂዎች ለማድረስ እየሰሩ እንደሚገኙ ተገለጸ፡፡

የሲቪል ማህበረሰብ ድርጅቶች ባለስጣንና የሲቪል ማህበረሰብ ድረጅቶች ምክር ቤት ጉዳት በደረሰባቸው አካባቢዎች ከሚንቀሳቀሱ 4 ሀገር በቀል የሲቪል ማህበረሰብ ድርጅቶች ጋር በገንዘብ የተሰበሰበውን ድጋፍ ለተጎጂዎች ለማድረስ የሚያስችል የመግባቢያ ስምምነት ተፈራርመዋል፡፡ ስምምነቱ የተፈረመው በሰሜኑ የሀገሪቱ ክፍል ተፈጥሮ በነበረው ግጭት ጉዳት ለደረሰባቸው የማህበረሰብ ክፍሎች የተሰበሰበውን የገንዘብ ድጋፍ በቀጥታ ለማድረስ እንዲያስችል መሆኑ ተገልጿል፡፡ በፊርማ ስነስርዓቱ ላይ የተገኙት የሲቪል ማህበረሰብ ድርጅቶች ባለስልጣን ምክትል ዋና ዳይሬክተር አቶ ፋሲካው ሞላ የሲቪል ማህበረሰብ ድርጅቶች ባለስልጣንና የሲቪል ማህበረሰብ ድርጅቶቸ ካውንስል በተናጠል ከሚያደርጉት ድጋፍ በተጨማሪ ከተወሰኑ የሲቪል ማህበረሰብ ድርጅቶች ጋር ስምምነት በማድረግ የተሰበሰበው የገንዘብ ድጋፍ በቀጥታ ለተጎጂዎች እንዲደርስ እምነት ያለን በመሆኑ ይህን ስምምነት ጉዳት በደረሰባቸው አካባቢዎች ከሚንቀሳቀሱ 4 ሀገር በቀል የሲቪል ማህበረሰብ ድርጅቶች ጋር ሊደረግ እንደተቻለ ጠቁመዋል፡፡ አክለውም ባለስልጣን መስሪያ ቤቱ ከሲቪል ማህበረሰብ ድርቶች ምክር ቤት ጋር በመሆን ወደ 1 ቢሊየን ብር የሚጠጋ ድጋፍ ለተጎጂዎች ለማሰብሰብ ኮሚቴ ተዋቅሮ እየሰራ መሆኑን አንስተው ሁሉም የሲቪል ማህበረሰብ ድርጅቶች ካሁን በፊት ሲያደርጉ እንደነበረው ድጋፋቸውን አጠናክረው እንዲቀጥሉ ጥሪ አድርገዋል፡፡

መንግስት ያደረገው ስምምነት መሬት ላይ ወርዶ ፍሬያማ እንዲሆን የሲቪል ማህበረሰብ ድርጅቶች ትልቅ ኃላፊነት አለባቸው ያሉት ምክትል ዋና ዳይሬክተሩ ማህበረሰቡ በሚያጋጥመው ማንኛውም ሰው ሰራሽም ሆነ ተፈጥሮአዊ ችግር ቀድሞ በመድረስ የመደገፍና የማገዝ የህግም ሆነ የሞራል ግዴታ ያለባቸው መሆኑን አንስተዋል፡፡ የሲቪል ማህበረሰብ ድርጅቶች ምክር ቤት ዳይሬክተር የሆኑት አቶ ሄኖክ መለሰ በበኩላቸው የሲቪል ማህበረሰብ ድርጅቶች ምክር ቤት በትግራይ ክልል የሚንቀሳቀሱ ድርጅቶችን ለማገዝ እየሰራ እንደሚገኝ አንስተው በቅርቡ በትግራይ የሚንቀሳቀሱ ድርጅቶች ያቀፈ ኢኒሼቲቭ ለማቋቋም ጥረት እያደረገ እንደሚገኝ አንስተዋል፡፡ ከባለስልጣን መስሪያ ቤቱ ጋር በቅርበት እየሰራን እንገኛለን ያሉት አቶ ሄኖክ መለሰ ዛሬ የተደረገው ስምምነት ትልቅ ኃላፊነትን የሚሰጥና ለተጎጂዎችዎች በትክክል ለመድረስ የሚያግዝ እንደሆነም አንስተዋል፡፡ ስምምነቱ የተፈረመው ፋና አዲስ ትውልድ ኢትዮጵያ፣ ሪዲም ዘ ጀነሬሽን፣ ሴቭ ዩር ሆሊ ላንድ አሶየሽን እንዲሁም ተጋሩ ኢኒሼቲቭ ፎር ፒስ ኤንድ ሪሃብሊሽን ፎር ኢትዮጵያ ከተባሉ ሀገር በቀል ድርጅቶች ጋር ሲሆን በስምምነቱ መሰረት በጥሬ ገንዘብ የተሰበሰበው ድጋፍ በነዚህ አራት ድርጅቶች በኩል ለተጎጂዎች እንዲደርስ የሚያስችል ነው፡፡

ስምምነቱ በሲቪል ማህበረሰብ ድርጅቶችና በመንግስት መካከል ትልቅ መተማመንን የሚፈጥር እንደሆነና የተጣለባቸውን አደራ በትክክል ለመወጣት ስምምነቱን የፈረሙት ድርጅቶች ተወካዮች የገለጹ ሲሆን በቀጣይም በርካታ ስራዎችን ተጎጂዎች ባሉበት አካባቢ ሁሉ ለመስራት ትልቅ መነሳሳትን እንደፈጠረላቸው ጠቁመዋል፡፡ በመርኃ ግብሩ ላይ የሲቪል ማህበረሰብ ድርጅቶች ከመቼውም ጊዜ በላይ ድጋፋቸውን አጠናክረው እንዲቀጥሉ ጥሪ የቀረበ ሲሆን ለዚሁ ዓላማ የሲቪል ማህበረሰብ ድርጅቶች የሰብዓዊ ድጋፍ አሰባሳቢ ኮሚቴ ተቋቁሞ እየሰራ እንደሚገኝ ተጠቁሟል፡፡


ዓለም ዓቀፍ የአካል ጉዳተኞች ቀን በድሬደዋ አስተዳደር በድምቀት ተከብሯል ::

በዓለም ለ31ኛ ጊዜ እንዲሁም በኢትዮጵያ ለ30ኛ ጊዜ “አካታች የፈጠራ የስራና ሽግግራዊ መፍትሄ ለኢትዮጵያ አካል ጉዳተኞች ሁለንተናዊ ተደራሽነት” በሚል መሪ ቃል በድሬደዋ አስተዳደር ሚንስትሮች፣ የአስተዳደሩ ከፍተኛ ኃላፊዎች እንዲሁም በርካታ ታዳሚዎች በተገኙበት በከፍተኛ ድምቀት ተከብሮ ውሏል፡፡ ከዋዜማው ጀምሮ በበርካታ ሁነቶች የታጀበው ዓለም ዓቀፉ የአካል ጉዳተኞች ቀን በድምቀት የተከበረ ሲሆን በአካል ጉዳተኞች ዙሪያ በትብብር እየሰሩ ለሚገኙ አካላትና ለበዓሉ መሳካት አስተዋጽዖ ላበረከቱ የሲቪል ማህበራት እውቅናና ምስጋና ተሰጥቶበታል፡፡ በመክፈቻ መርኃ ግብሩ የተለያዩ ተቋማት አካል ጉዳተኞችን በሚመለከት እየሰሩ ያሉትን ስራ ያቀረቡ ሲሆን በሲቪል ማህበረሰብ ድርጅቶች ባለስልጣን ምክትል ዋና ዳይሬክተር አቶ ፋሲካው ሞላ በባለስልጣን መስሪያ ቤቱ በኩል አካል ጉዳተኞችን መሰረት አድርገው ለሚቋቋሙ ድርጅቶች ስለሚሰጥ ድጋፍና በኢትዮጵያ ስላለው እንቅስቃሴ እንዲሁም ባለስልጣን መስሪያ ቤቱ አካል ጉዳተኞችን በሚመለከት እየሰራቸው ስለሚገኙ ስራዎች ገለጻ አድርገዋል፡፡

በክብርት ሚንስትር ደኤታ ወ/ሮ አየለች አወያይነት በተካሄደው በዚህ የፓናል ውይይት ላይ የባለስልጣን መስሪያ ቤቱ ምክትል ዋና ዳይሬክተር አቶ ፋሲካው ሞላ ባለስልጣን መስሪያ ቤቱ በሚያወጣቸው ህጎችና መመሪያዎች ላይ አካል ጉዳተኞችን ተሳትፎ እያደረጉ እንደሚገኙ አንስተው በአካል ጉዳተኞች ዙሪያ ለሚሰሩ ድርጅቶች የድጋፍና ክትትል ዴስክ በማደራጀት በልዩ ሁኔታ በእቅድ እየሰራበት እንደሚገኝ አንስተዋል፡፡ የሲቪል ማህበረሰብ ድርጅቶች ባለስልጣንን ጨምሮ ከተለያዩ አካላት የተሰባሰቡና በአስተዳደሩ የሚገኙ አካል ጉዳተኞች የሚገለገሉባቸው ቁሳቁሶች በሴቶችና ማህበራዊ ጉዳይ ሚንስቴር በኩል ለአስተዳደሩ የሴቶችና ማህበራዊ ጉዳይ ቢሮ ተበርክቷል፡፡ በነበረው መርኃ ግብር የባለስልጣን መስሪያ ቤቱ ምክትል ዋና ዳይሬክተር አቶ ፋሲካው ሞላ በተገኙበት ቸሻየር ኢትዮጵያ የተባለ በሲቪል ማህበረሰብ ድርጅቶች ባለስልጣን የተመዘገበ የሲቪል ማህበረሰብ ድርጅት በድሬደዋ አስተዳደር እየሰራ ያለው ስራ ተጎብኝቷል፡፡


በፀደቁ አራት መመሪያዎች ላይ ስልጠና ተሰጠ፡፡

ለክልል ፋይናንስ ቢሮ ሃላፊዎችና ለባለስልጣን መስርያቤቱ የተለያዩ የስራ ክፍል ሃላፊዎች በፀደቁ አራት መመሪያዎች ላይ ስልጠና ተሰጠ፡፡ ከአራቱ መመሪያዎች በተጨማሪ ከዚህ ቀደም በየክልሎቹ በመመሪያዎች ላይ የተሰጡ ስልጠናዎች በተመለከተ ግምገማ ተደርጓል፡፡ በስልጠናው ላይ የመክፈቻ ንግግር ያደረጉት የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ ባስተላለፉት መልዕክት ባለፉት አራት ዓመታት የሲቪል ማህበረሰብ ድርጅቶች ዘርፍ በተሻለ መልኩ ለመምራት ያስችል ዘንድ በርካታ የሪፎርም ስራዎች እንደተሰሩ እንዲሁም የሲቪል ማህበረሰብ ድርጅቶች እንቅስቃሴ ምህዳር በተሻለ መልኩ ክፍት ለማድረግና ለሀገር ልማትና ዲሞክራሲ ግንባታ ከግዜ ወደ ግዜ እየጨመረ እንዲሄድ ለማድረግ ስንሰራ ቆይተናል ብለዋል ፡፡ አዋጅ በሚወጣበት ወቅት ጥቅል ፖሊሲውን ይዞ ነው የሚወጣው አዋጁን ተከትሎ የሚወጡ ደንብና መመሪያዎች ደግሞ አዋጁን በደንብ ግልጽ ያደርጋሉ ብለዋል ፡፡ አያይዘውም ደንቡ በተለያዩ ምክንያቶች በተፈለገው ጊዜ አልወጣም ነገር ግን ደንቡ እስኪፀድቅ ድረስ በመጠባበበቅ ሴክተሩ ላይ ሊደርስ የሚችለውን ተፅህኖ ግምት ውስጥ በማስገባት ለባለስልጣን መስሪያቤቱ በተሰጠው ስልጣን መሰረት መመሪያዎችን በማውጣት ስራ ላይ መዋሉን ተናግረዋል ፡፡ በመጨረሻም እነዚህ መመሪያዎች ለአገልግሎት ሰጪውም ሆነ አገልግሎት ለሚያገኘው ብልሹ አሰራርን ከመከላከል አኳያ ከፍተኛ ጠቀሜታ ያለው በመሆኑ መመሪያውን በተገቢው ተረድተን እና ተገንዝበን መጠቀም ይኖርብናል በማለት መልዕክታቸውን አስተላልፈዋል፡፡


‹‹ሙስናን መታገል በተግባር›› በሚል መሪ ቃል በዓለም ዓቀፍ ደረጃ ለ19ኛ ግዜ በሃገራችን ደግሞ ለ18ኛ ግዜ የዓለም ዓቀፍ የጸረ ሙስና ቀን በዓል በተቋሙ ከአጠቃላይ ሰራተኛ ጋር ተከብሯል፡፡

የባለስልጣን መስሪያ ቤቱ ዋና ዳይሬክተር አቶ ጂማ ዲልቦ በመክፈቻ ንግግራቸው እንደገለጹት ሀገራችን ኢትዮጵያ የተባበሩት መንግሥታት የፀረ-ሙስና ኮንቬንሽንን ከማርቀቅ ጀምሮ እሰከ ማፅደቅ በነበረው ሂደት ንቁ ተሳትፎ ስታደርግ መቆየቷ እና በኋላም በዓለምአቀፍ ደረጃ እየተካሄደ ለሚገኘው የፀረ-ሙስና ትግል አጋርነቷን በማሳየት ላይ እንደምትገኝ ገልጸዋል፡፡ ይሁንና ነው ያሉት ዋና ዳይሬክተሩ በድህነት ውስጥ ባለች ሀገር “በእንቅርት ላይ ጆሮ ደግፍ” እንዲሉ ሙስናና ሌብነት የእድገታችን ማነቆ ሆኖ ከፍተኛ ተጽዕኖ እያደረሰብን ይገኛል፡፡ በተለይም ሕዝብን ለማገልገል የተቋቋሙ አገልግሎት ሰጪ የሆኑ መንግስታዊ ተቋማት ከሌብነትና ብልሹ አሠራር በፀዳ መልኩ በታማኝነትና በቅንነት ማገልገል ሲገባቸው ይህንን ኃላፊነታቸውን ለጊዜያዊ ጥቅም አሳልፈው በመሸጥ የሀገራችንን እድገት በእጅጉ ወደ ኋላ እየጎተቱ ይገኛሉ ብለዋል፡፡ በተቋማችን አገልግሎት ስንሰጥ ያስቀመጥናቸውን ተቋማዊ እሴቶቻችን ባከበረ መልኩ በአጋርነት እና በትብብር በመስራት፣ግልጽነት እና ተጠያቂነት፣በማስፈን ቅንነት እና ታማኝነት በመላበስ፤ፕሮፈሽናሊዝምን ባከበረ መልኩ እንዲሁም፣ምላሽ ሰጪነትንና ሰብአዊነት ማዕከል አድርገን ማገልገል የሚጠበቅብን ሲሆን እንደተቋም ሌብነትና ብልሹ አሰራርን በተመለከተ ዜሮ ቶለራንስ (zero-Tolerance) የሆነ መሪህን የምንከተል መሆናችንን በዚህ አጋጣሚ ለማረጋገጥ እወዳለሁ ሲሉ ገልጸዋል፡፡

በአሁኑ ጊዜ ህዝቡ በመልካም አስተዳደር ዕጦት ክፉኛ መማረሩን አንስተው ለዚህ ደግሞ አፋጣኝ መፍትሔ ካልሰጠን መጨረሻው ትልቅ ቀውስና ትርምስ ይሆናል፤በመሆኑም መንግስት ይህንን ችግር ለመታገል ባለው ቁርጠኝነት በቅርቡ በአገር አቀፍ ደረጃ ብሔራዊ ፀረ-ሙስና ኮሚቴ በማቋቋም ሌብነትን ትርጉም ባለው መልኩ ለመታገል መጠነ ሰፊ እንቅስቃሴ የተጀመረ መሆኑን አንስተው ሁሉም ዜጋ ተጨባጭ መረጃ በመስጠት ሌቦችን ማጋለጥና ለሕግ እንዲቀርቡ ለማድረግ በቁርጠኝነት መሥራት ይኖርብና ሲሉ መልዕክታቸውን አስተላልፈዋል፡፡ ወ/ሮ ትግስት አቡዬ የስነምግባር መከታተያ ዳይሬክቶሬት ዳይሬክተር በበኩላቸው ስለበዓሉ ባስተላለፉት መልዕክት የዘንድሮው የጸረ ሙስና ቀን ‹‹ሙስናን መታገል በተግባር›› በሚል መሪ ቃል በዓለም አቀፍ ደረጃ ለ19 ግዜ በሃገራን ደግሞ ለ18ኛ ግዜ እየተከበረ መሆኑን በመግለጽ በሀገራችን ኢትዬጵያ በውስጥና በውጭ ጠላቶቿ የተከፈተባትን የሕልውና አደጋ በጽናት ተቋቁማ ወደብልጽግና የምታደርገውን ጉዞ በሙስናና ብልሹ አሰራር ከቶውን እንዳይደናቀፍ በየደረጃው ከሚገኘው የመንግስት አመራና ሰራተኛ በተጨማሪ ከመላው ህብረተሰብ ብዙ ይጠበቃል ብለዋል፡፡ አያይዘውም በየዕርከኑ የምትገኙ የባለስልጣን መስሪያ ቤቱ አመራሮችና ሰራተኞች ሙስና ውስብስብና አስቸጋሪ እንዲሁም የሚያደርሰውም ጉዳት ከፍተኛና ልዩ ባህሪ ያለው ወንጀል መሆኑን በመረዳ ከቃል ባለፈ ተግባራዊ ትግል ማድረግ ከሁላችንም የሚጠበቅ ተግባር ነው ሲሉ መልዕክታቸውን አስተላልፈዋል፡፡

የተቋሙ ም/ዋና ዳይሬክተር አቶ ፋሲካው ሞላ የፕሮግራሙ ዓላማ፣ሀገራችን አለማቀፉ የፀረ-ሙስና ኮንቬንሽን አመሰራረት ታሪካዊ ዳራ፣የሙስና ምንነትና ትርጉም፣የሙስና ልዩ ባህሪያት፣የሙስና የህግ ማዕቀፎች፣በኢትየጵያ የጸረ-ሙስና ትግል እንቅስቃሴ፣የጸረ-ሙስና ትግል ቀጣይ የትኩረት አቅጣጫዎች፣የጸረ-ሙስና ትግል ቀጣይ አቅጣጫዎችና የባለድርሻ አካለት ሚና እንዲሁም ሌሎች ርዕሰ ጉዳዬችን ያካተተ ሰነድ አቅርበዋል፡፡ ከዚህም በተጨማሪ የዓለማቀፍ የጸረ ሙስና ትግልን እና ጥናቶችን መሰረት ያደረገ ጽሑፍ በኢትዮጵያ ሰብዓዊ መብት ድርጅቶች ጥምረት ቀርቦ ውይይት ተደርጎበታል፡፡


6ተኛው የኢፌዴሪ የሲቪል ማህበረሰብ ድርጅቶች ባለስልጣን፣የፌደራልና የክልል ባለድርሻ የመንግስት ተቋማት የጋራ ጉባኤ በጅግጅጋ ከተማ እየተካሄደ ይገኛል፡፡

የክልሉ ምክትል ፕረዝዳንት አቶ ኢብራሂም ዑስማን በጉባኤው ባስተላለፉት መልዕክት የሲቪል ማህረሰብ ድርጅቶች ህብረተሰቡን በማህበራዊ፣ ኢኮኖሚያዊና ፖለቲካዊ ጉዳዬች ላይ ያለው ግንዛቤ እንዲዳብር ማድረግን ጨምሮ በሚሰሯቸው ሌሎች ዘርፈብዙ ስራዎች ለሃገር ሁለንተናዊ እድገት ከፍተኛ ሚና እንደሚጫወቱ እሙን ነው ብለዋል፡፡ በዚህ ረገድ በባለፈው ዓመት በክልላችን አስከፊ ድርቅ መከሰቱን ተከትሎ ድርቁን ለማቋቋም በተደረገው ርብርብ የሲቪል ማህበረሰብ ድርጅቶች አስቸኳይ ሰብዓዊ ድጋፍ በማቅረብና የተለያዩ ድጋፎችን በማድረግ የጉዳቱን መጠን ለመቀነስ ያደረጉትን አስተዋጽኦ በመጥቀስ በድርቁ ወቅት ላሳዩት አጋርነትና ድጋፍ ከፍተኛ ምስጋና አቅርበዋል፡፡ የሶማሌ ክልልም የሲቪክ ማህበረሰብ ድርጅቶችን ያላሳተፈ እድገት እንዲሁም የዲሞክራሲ ስርዓት ግንባታ የሚፈለገውን ውጤት እንደማያመጣ ይገነዘባል በማለት ሁሉንም የማህበረሰብ ክፍሎች በእኩልነት ተጠቃሚ የሚያደርግ ዘላቂነት ያለው ሰላምና ልማት እንዲረጋገጥ ለሚደረገው ጥረት የሲቪል ማህበረሰብ ድርጅቶች በአግባቡ ሚናቸውን መወጣት የሚችሉበትን ምቹ ሁኔታ እንዲኖር በቁርጠኝነት ይሰራል ሲሉ መልዕክታቸውን አስተላልፈዋል፡፡

የፍትህ ሚኒስቴር ሚኒስትር ዴኤታ አቶ ፍቃዱ ጸጋ በበኩላቸው መንግስት በዘርፉ ለውጥ እንዲመጣ የህግ ማሻሻያዎችን ብሎም የአመራር ለውጥ በማድረግ ከፍተኛ የሆነ ለውጥ አስመዝግቧል ያሉ ሲሆን ሲሲቪል ማህበረሰብ ድርጅቶችም በሃገሪቱ የልማትና የመልካም አስተዳድር ጉዳዬች የማይተካ ሚና አላቸው ብለዋል፡፡ አያይዘውም ለዚህ ሃገር ፈተና የሆነውን የመልካም አስተዳድር ፈተና ዜጎች ተጋላጭ እንዳይሆኑ በማንቃት ረገድም ትልቅ ሚና አላቸው ሲሉ ገልጸዋል፡፡ የሲቪል ማበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ ባስለተላለፉት መልዕክት ይህ የጋራ ጉባኤ በዋናነት የሲቪል ማኅበረሰብ ዘርፉን ለማሳደግ እና የተሻለ ድጋፍና ክትትል ሥርዓት ለመዘርጋት፣ የዜጎች የመደራጀት መብት ለማረጋገጥ የሚመለከታቸው የፌደራልና የክልል መንግስታት በቅንጅት መስራት፣ በተቋማችንና በፌደራልና በክልል ተቋማት መካከል ዘመናዊና ፈጣን የመረጃ ልውውጥ መፍጠር፣ አገር በቀል ድርጅቶችን በማጠናከር በዘርፉ የሚደረገው አስተዋፅኦ ዘላቂና አስተማማኝ እንዲሆን ማስቻል፣ የጥናትና ምርምር ስራዎችን በማከናወን የሲቪል ማህበረሰብ ድርጅቶች በልማትና በዲሞክራሲ ሥርዓት ግንባታ ውስጥ ያላቸውን ሚና ማጎልበት እና ድርጅቶች የሚሰሯቸው የልማት ስራዎች ከመንግስት የልማት ዕቅዶች ጋር የተጣጣሙ መሆናቸውን ማረጋገጥ ዋናዎቹ ናቸው ብለዋል፡፡

በሰሜኑ ጦርነት ምክንያት ለተፈናቀሉ የማህበረሰብ ክፍሎች በሶስት ዙር በተደረገ የገቢ ማሰባሰቢያ መርሃ ግብር በአጠቃላይ ከአምስት መቶ አርባ አራት ሚሊየን ብር በላይ በዓይነትና በጥሬ ገንዘብ ድጋፍ መደረጉንም በንግግራቸው አካተው ገልጸዋል፡፡ ከአምስተኛው ጉባኤ በኋላ በሲቪል ማህበረሰብ ድርጅቶች ባለስልጣን የተከናወኑ ዋና ዋና ተግባራት ያጋጠሙ ችግሮችና የወደፊት የትኩረት አቅጣጫን የያዘ ሪፖርት በምክትል ዋና ዳይሬክተር አቶ ፋሲካው ሞላ ቀርቦ ውይይት እየተደረገበት ይገኛል፡፡