የሲቪል ማህበረሰብ ድርጅቶች ባለስልጣን ከህ.ወ.ሓት ጋር ስለተደረሰው ስምምነት ለሲቪል ማህበረሰብ ድርጅቶች ገለጻ አደረገ፡፡
የፍትህ ሚንስቴር ሚንስትር ዶ/ር ጌዲዮን ጢሞቲዎስ በተገኙበት በደቡብ አፍሪካ ስለተደረገው ስምምነት ለሲቪል ማህበረሰብ ድርጅቶች ገለጻ ተደርጓል፡፡ ስምምነቱ ምን ምን ጉዳዮችን እንዳካተተ ፣ በቀጣይ ስለሚወሰዱ ርምጃዎች እንዲሁም የሲቪል ማህበረሰብ ድርጅቶች ስምምነቱ ተግባራዊ እንዲሆን ማድረግ ስለሚገባቸው አስተዋጽዖ ሰፊ ገለጻ ተሰጥቷል፡፡ በተለይም የሲቪል ማህበረሰብ ድርጅቶች በስምምነቱ ላይ አሉታዊ ተጽዕኖ የሚፈጥሩ ቅስቀሳዎችን ወደጎን በመተው በስምምነቱ መሰረት ተግባራዊ እንዲሆን በጎ ተጽዕኖ ማድረግ ብሎም በጦርነቱ የተጎዱ የማህበረሰብ ክፍሎችንና የወደሙ መሰረተ ልማቶችን መልሶ በማቋቋም ማገዝ እንደሚጠበቅባቸው ዶ/ር ጌዲዮን ጠቁመዋል፡፡ አያይዘውም መንግስት ዘላቂ ሰላምን ለማረጋገጥ የሚያደርገው ጥረት ስኬታማ እንዲሆን በሀገራዊ ምክክሩ ላይ ንቁ ተሳትፎ በማድረግ ለሀገራዊ መግባባትና ለዘላቂ ሰላም የሲቪል ማህበረሰብ ድርጅቶች የበኩላቸውን መወጣት ይጠበቅባቸዋል ብለዋል፡፡



በመድረኩ ላይ ከሰላምና ከሀገራዊ ምክክር ጋር በተያያዘ የሲቪል ማህበረሰብ ድርጅቶች ትልቅ ኃላፊነት እንዳለባቸው የተጠቀሰ ሲሆን ከዚህ በተጨማሪም ከጊዜ ወደጊዜ ስር እየሰደደ የመጣውን ሙስና በመረጃና በማስረጃ በመሞገትና በማጋለጥ የሲቪል ማህበረሰብ ድርጅቶች የበኩላቸውን እንዲወጡ ጥሪ ቀርቧል፡፡ የመድረኩ ተሳታፊዎች መንግስት እየወሰደ ያለውን ርምጃ አድንቀው የሲቪል ማህበረሰብ ዘርፉ ለስምምነቱ መሳካት የድርሻውን እንደሚወጣ ገልጸዋል፡፡
የኢትዮጵያ ሕይወት ብርሃን ቤተክርስቲያን የልማት ድርጅት ከ20.6 ሚሊዮን ብር በላይ በሆነ ወጪ 18 ትምህርት ቤቶችን መልሶ ማቋቋም ትግበራ ላይ መሆኑ ተገለጸ፡፡
የኢትዮጵያ ሕይወት ብርሃን ቤተክርስቲያን የልማት ድርጅት ከኮምፓሽን ኢንተርናሽናል ባገኘው የ20.6 ሚሊየን ብር የገንዘብ ድጋፍ በጦርነቱ ጉዳት በደረሰባቸው የሰሜን ሸዋ፣ ደቡብ ወሎ እና ሰሜን ወሎ ዞኖች 18 ትምህርት ቤቶችን መልሶ የማቋቋም ፕሮጀክት በትግበራ ላይ እንደሚገኝ የድርጅቱ ዋና ስራአስኪያጅ አቶ ታገለ ማቴዎስ ገለጹ፡፡ የድርጅቱ ስራስኪያጅ አቶ ታገለ ማቴዎስ እንደገለጹት በጦርነቱ ምክንያት ጉዳት የደረሰባቸው ትምህርት ቤቶችን መልሶ ለማቋቋም እየተሰራ መሆኑን አንስተው ድጋፉ በዋናነት ኮምፒውተር፣ የተማሪዎች መቀመጫ ወንበር፣ ፎቶ ኮፒ ማሽን፣ ፕሪንተር እና የፈተና ማባዣ ማሽኖችን ያካተተ ነው ያሉ ሲሆን በሸዋ ሮቢት፣ በደሴ፣ በኩታበር፣ በሀይቅ፣ በወልዲያ፣ በቆቦ ከተሞች የተማሪ መቀመጫ ወንበሮች ደርሰዋል ብለዋል፡፡ ቀሪ ስራዎችም በሚቀጥሉት ሳምንታት እንደሚጠናቀቁ አክለው አብራርተዋል፡፡



የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ የኃይማኖት ተቋማት ለረጅም ዘመናት ከሃይማኖታዊ ተግባራቶቻቸው ጎን ለጎን ኅብረተሰቡን ለማገዝ በልማት ስራዎች ላይ ሲሳተፉ ቆይተዋል ያሉ ሲሆን ባለስልጣን መስሪያ ቤቱ እንዲህ ያለውን ተግባር በእጅጉ እንደሚያበረታታ ገልጸዋል፡፡ ባለስልጣን መስሪያ ቤቱ በጦርነቱ ጉዳት ለደረሰባቸው አካባቢዎች የሲቪል ማህበረሰብ ድርጅቶችን በማስተባበር የተለያዩ ድጋፎችን ለተጎጂዎች እያደረሰ እንደሚገኝ ጠቅሰው የኢትዮጵያ ሕይወት ብርሃን ቤተክርስቲያን የልማት ድርጅት ከኮምፓሽን ኢንተርናሽናል ባገኘው የገንዘብ ድጋፍ 18 ትምህርት ቤቶችን መልሶ በማቋቋም እያደረገ ያለው ድጋፍ ተጠናክሮ መቀጠል አለበት ሲሉ መልዕክታቸውን አስተላልፈዋል፡፡ የኢትዮጵያ ሕይወት ብርሃን ቤተክርስቲያን የልማት ድርጅት ከ1992 ዓ.ም ጀምሮ በርካታ የልማት ስራዎችንና የአስቸኳይ ጊዜ ድጋፎችን ሲያደርግ የቆየ ሲሆን በአሁኑ ጊዜ ከ140 ሚሊዮን በላይ አመታዊ በጀት በመመደብ ከ10 አጋር ድርጅቶች ጋር በዘርፈ ብዙ የልማት ስራዎችን በመስራት ላይ ይገኛል፡፡ በፕሮጀክት ገለጻው ላይ የባለስልጣን መስሪያ ቤቱ ዋና ዳይሬክተር አቶ ጂማ ዲልቦን ጨምሮ የአማራ ክልል ትምህርት ቢሮ እና ፋይናንስ ቢሮ ተወካዮች እንዲሁም የኮምፓሽን ኢትዮጵያ ተወካይ ተሳታፊዎች ሆነዋል፡፡
ባለስልጣን መስሪያ ቤቱ ተፈናቃዮች ወደቀያቸው ተመልሰው የተረጋጋ ኑሮ እስኪጀምሩ ድጋፍ ማድረጉን እንደሚቀጥል ገለጸ፡፡
በሲቪል ማኅበረሰብ ድርጅቶች ባለሥልጣን አስተባባሪነት ከአንድ ሚሊዮን ብር በላይ ግምት ያላቸው የምግብና የንጽህና መጠበቂያ ቁሳቁሶችን እንዲሁም አልባሳትን በደብረብርሃን ከተማ ተጠልለው ለሚገኙ ተፈናቃዮች ድጋፍ ተደርጓል፡፡ በሶስተኛው ዙር የሲቪል ማኀበረሰብ ድርጅቶች ባለስልጣን የሰብዓዊ ድጋፍ ማሰባሰቢያ መርሃ ግብር ላይ ለበርካታ የሲቪል ማህበረሰብ ድርጅቶች በተለያዩ የጸጥታ መደፍረስ ምክንያቶች ከቀያቸው ለተፈናቀሉ ዜጎች የሰብዓዊ ድጋፍ እንዲያደርጉ ጥሪ መተላለፉ የሚታወስ ነው፡፡ ይህንኑ ተከትሎ ኤስ አይ ኤም ኢትዮጵያ (SIM-Ethiopia) ከተባለ የውጪ የሲቪል ማህበረሰብ ድርጅት ጋር በመተባበር ከአንድ ሚልየን ብር በላይ ግማታዊ ዋጋ ያላቸው የምግብ፣ የአልባሳትና የንጽህና መጠበቂያ ቁሳቁስ ድጋፍ ተደርጓል፡፡ በድጋፉ ወቅት ንግግር ያደረጉት የሲቪል ማህበረሰብ ድጅቶች ባለስልጣን የጽህፈት ቤት ኃላፊ አቶ በፍቃዱ በሀገሪቱ ክፍሎች በተለያዩ ምክንያቶች ተፈናቅለው ለሚገኙ ዜጎች ባለስልጣን መስሪያ ቤቱ የሲቪል ማህበረሰብ ድርጅቶችን በማስተባበር የተለያዩ ሰብዓዊ ድጋፎችን ሲያቀርብ መቆየቱን አውስተው ካሁን በፊት ወደዚህ አካባቢ በመምጣት በገባንው ቃል መሰረት ለዚሁ ዓላማ ከተቋቋመ ኮሚቴ ጋር በመነጋገር ድጋፉን ይዘን መጥተናል ብለዋል፡፡



አክለውም ባለስልጣን መስሪያ ቤቱ የሲቪል ማህበረሰብ ድርጅቶችን በማስተባበር በተለያዩ የመጠለያ ጣቢያዎች ለሚገኙ ዜጎች ድጋፍ የሚያደርግ መሆኑን አንስተው ተፈናቃዮች ወደቀያቸው ተመልሰው የተረጋጋ ኑሮ እስኪጀምሩ ድረስ ድጋፍ ማድረጉን አጠናክሮ እንደሚቀጥል አክለው ገልጸዋል፡፡ የደብረ ብርሃን ከተማ አስተዳደር የስራ እድል ፈጠራና ምግብ ዋስትና ጽሕፈት ቤት ኃላፊ የሆኑት አቶ ግርማ ድባቤ፤ በወይንሸት መጠለያ ጣቢያ ከ6800 በላይ ተፈናቃዮች እንደሚገኙ አንስተው ከወር በፊት የባለስልጣን መስሪያ ቤቱ ከፍተኛ የስራ ኃላዎች በገቡት ቃል መሰረት ቃላቸውን ጠብቀው ከኤስ አይ ኤም ኢትዮጵያ (SIM-Ethiopia) ጋር በመሆን ድጋፉን ይዘው በመምጣታቸው ምስጋናቸውን አቅርበዋል፡፡ በመንግስትና በተለያዩ ድጋፍ አድራጊ አካላት ድጋፍ እየተደረገ ቢሆንም በቂ አይደልም ያሉት አቶ ግርማ በሁሉም የመጠለያ ጣቢያዎች የምግብና የንጽህና መጠበቂያ ቁሳቁስ እጥረት ያለ በመሆኑ ይህ ጊዜ እስኪያልፍ እንድንረዳዳ መልዕክቴን አስተላልፋለሁ ብለዋል፡፡ ኤስ አይ ኤም ኢትዮጵያ (SIM-Ethiopia) በሲቪል ማህበረሰብ ድርጅቶች ባለስልጣን ተመዝግቦ በተለያዩ የሰብዓዊ ድጋፍና ልማት ስራዎች ላይ የተሰማራ የውጪ የሲቪል ማህበረሰብ ድርጅት ሲሆን በኦሮሚያ፣በደቡብና በአማራ ክልል በተለይም በባህርዳርና በእንጅባራ፣ የተለያዩ የልማት ፕሮጅክቶችን እየሰራ ይገኛል፡፡ የኤስ አይ ኤም ኢትዮጵያ (SIM-Ethiopia) ሲኒየር ሚኒስትሪ ማናጀር የሆኑት አቶ ነብዩ ኃይሌ እዚህ ደብረብርሃን ላይ ከፍተኛ ቁጥር ያለው ተፈናቃይ ያለ መሆኑን ስንሰማ ከባለስልጣን መስሪያ ቤቱ ጋር በመነጋገር የስንዴ ዱቄትና የምግብ ዘይት ድጋፍ አድርገናል ያሉ ሲሆን ማህበረሰባችን ከገጠመው ችግር እስኪወጣ ድረስ አቅም በፈቀደ መጠን ድጋፍ ማድረጋችንን እንቀጥላለን ብለዋል፡፡
አለም አቀፍ ድርጅቶች አህጉር አቀፍ ቢሮዎቻቸውን በኢትዮጵያ እንዲከፍቱ ጥሪ ቀረበ፡፡

መሰረቱን እንግሊዝ አገር ያደረገው ችልድረንስ ኢንቨስትመንት ፈንድ ፋውንዴሽን (children’s investment fund foundation (CIFF UK)) የተባለ የውጪ ድርጅት የአፍሪካ ክልላዊ ቢሮውን (The CIFF UK Africa Regional office) በአዲስ አበባ ለመክፈት የሚያስችለውን የመግባቢያ ስምምነት ከሲቪል መማህበረሰብ ድርጅቶች ባለስልጣን ጋር ተፈራርሟል፡፡ በስምምነቱ ላይ የሲቪል ማህበረሰብ ድርጅቶች ባለስልጣን ም/ዋና ዳይሬክተር አቶ ፋሲካው ሞላን ጨምሮ የባለስልጣን መስሪያ ቤቱ የስራ ኃላፊዎችና የCIFF የስራ ኃላፊዎች ተገኝተዋል፡፡ ስምምነቱን የተፈራረሙት የሲቪል ማህበረሰብ ድርጅቶች ባለስልጣን ምክትል ዋና ዳይሬክተር አቶ ፋሲካው ሞላ፤ ኢትዮጵያ ውስጥ ያለው የሲቪል ማህበረሰብ ድርጅቶች አጠቃላይ ህጋዊና ተቋማዊ ማዕቀፍ መሻሻሉንና የሲቪል ማህበረሰብ ድርጅቶች ኢትዮጵያ ውስጥ የልማት አጋር እንደሆኑ የሚያሳይ የህግና የፖሊሲ ማዕቀፍ መኖሩን አንስተው ባለስልጣን መስሪያ ቤቱ ይህን ለማስፈጸም ከፍተኛ ጥረት እያደረገ ይገኛል ብለዋል፡፡ የሚያሰራና ምቹ የሆነ የስራ ሁኔታ በመፈጠሩ የውጪ ድርጅቶችም ሆኑ ሀገር በቀል ድርጅቶች ከጊዜ ወደጊዜ ቁጥራቸው እየጨመረ መጥቷል ያሉት ምክትል ዋና ዳይሬክተሩ በርካታ የውጪ ድርጅቶች ክልላዊ ቢሯቸውን (Regional office) በኢትዮጵያ እየከፈቱ እንደሚገኙና የልማት አጋሮቸቻችን እየሆኑ እንደሆነ አንስተው CIFF UKም የዚሁ መሻሻል ማሳያ እንደሆነ ተናግረዋል፡፡
አቶ ፋሲካው በንግግራቸው ድርጅቶችን ህግ አውጥቶ ከማስተዳደር ባሻገር እንደ CIFF UK ያሉ የተለየ ባህሪ ያላቸውን ድርጅቶች መፍትሄ የሚሰጥ አሰራር መዘርጋት ያስፈልጋል ያሉ ሲሆን ይህ የመግባቢያ ስምምነት የተፈረመው ድርጅቱ ያለውን ነባራዊ ሁኔታ ከግምት ውስጥ በማስገባት ለማስተዳደር እንዲያመችና ድርጅቱም በተሻለ ሁኔታ መንቀሳቀስ እንዲችል እድል የሚሰጥ ነው ሲሉ ገልጸዋል፡፡ በአፍሪካም፣ በእሲያም ሆነ በተለያዩ አህጉራት የሚንቀሳቀሱ ድርጅቶች ኢትዮጵያ ውስጥ መጥተው አህጉር አቀፍ እና ክልል አቀፍ ቢሮዎችን ቢከፍቱ መንግስት እጁን ዘርግቶ እንደሚቀበላቸው ያነሱት አቶ ፋሲካው ለዚህም የተሻለና ሊያሰራ የሚችል የህግ ማዕቀፍና ፖሊሲ ያለ መሆኑን በመጠቆም አለም አቀፍ ድርጅቶች አህጉር አቀፍ ቢሮዎቻቸውን በኢትዮጵያ እንዲከፍቱ ጥሪያቸውን አቅርበዋል፡፡

ችልድረንስ ኢንቨስትመንት ፈንድ ፋውንዴሽን (children’s investment fund foundation (CIFF UK)) በፈረንጆቹ አቆጣጠር በ2020 በሲቪል ማህበረሰብ ድርጅቶች ባለስልጣን ተመዝግቦ በእናቶችና ህጻናት ጤና፣ በቤተሰብ ምጣኔና በአካባቢ ጥበቃ እንዲሁም በስነ ምግብ ላይ የሚሰራ የውጪ ድርጅት ሲሆን ከባለስልጣን መስሪያ ቤቱ ጋር ባደረገው ስምምነት መሰረት የምስራቅ እና ደቡባዊ አፍሪካ ቢሮውን በአዲስ አበባ የሚከፍት ይሆናል፡፡ድርጅቱ በዓመት ከ500 ሚሊዮን ዶላር በላይ ገንዘብ በመላው ዓለም ኢንቨስት እያደረገ የሚገኝ ድርጅት ሲሆን በኢትዮጵያ ክልላዊ ቢሮውን በመክፈቱ ከ230 ሚሊዮን ዶላር በላይ በኢትዮጵያ ኢንቨስት የሚያደርግ ይሆናል፡፡ በሰሜኑ የሀገሪቱ ክፍል ከተከሰተው ወቅታዊ ሁኔታ ጋር በተያያዘም በዩኒሴፍ በኩል ከ15-20 ሚሊዮን የሚደርስ ድጋፍ እንግሊዝ በሚገኘው ዋና ቢሮው አማካኝነት ድጋፍ ማድረጉንና በቅርቡ ለተጎጂዎች በዩኒሴፍ በኩል እንደሚደርስ የድርጅቱ የአፍሪካና የኢትዮጵያ ተወካይ ዶ/ር አብርሃም አስማረ ገልጸዋል፡፡
የቮለንተሪዝም ኢንፎርሜሽን ማኔጅመንት ሲስተም (VIMS) ተጨማሪ ማሻሻያዎችን በማድረግ አገልግሎት እየሰጠ ይገኛል፡፡

የሲቪል ማህበረሰብ ድርጅቶች ባለስልጣን በአዋጅ ቁጥር 1113/11 በተሰጠው ስልጣንና ኃላፊነት የበጎ ፈቃደኝነትንና በጎ አድራጊነትን ባህል ለማድረግ የሚያስችሉ በርካታ ስራዎችን እየሰራ ይገኛል፡፡ ከነዚህ ስራዎች መካከል በጎ ፈቃደኞች ባሉበት ሆነው በፈለጉት የበጎ ፈቃድ ዘርፍ ላይ መሰማራት እንዲችሉ አስቻይ ሁኔታዎችን መፍጠር ነው፡፡ በዚሁ መሰረት በባለስልጣን መስሪያ ቤቱ የበጎ ፈቃድ ማጎልበትና ፈንድ አስተዳደር አማካኝነት ስራ ላይ የነበረው በጎ ፈቃደኞች ባሉበት ሆነው ለበጎፈቃድ አገልግሎት መመዝገብ እንዲችሉ የሚያግዝ የቮለንተሪዝም ኢንፎርሜሽን ማኔጅመንት ሲስተም (VIMS) ዘርግቶ ሲሰራ ቆይቷል፡፡ ይህን አሰራር በማዘመን የበጎ ፈቃድ አገልግሎት ሰጪ ዜጎችን የሚፈልጉ ተቋማት በቀጥታ ባሉበት ሆነው በጎ ፈቃደኞችን ማግኘት እንዲችሉ ለማድረግ ሲስተሙ ላይ ማሻሻያ አድርጓል፡፡ ይህም ካሁን ቀደም ድርጅቶችና ተቋማት ጥሪ ተደርጎላቸው በደብዳቤ ጠይቀው ይወስዱበት የነበረው አሰራር ተቀይሮ በኦንላይን በፈለጉበት የሙያ ዘርፍ በጎ ፈቃደኞችን ማግኘት እንዲችሉ የሚያስችል ነው፡፡ የቮለንተሪዝም ኢንፎርሜሽን ማኔጅመንት ሲስተም በፕሪሚየም (volunteerism information management system) ደረጃ መበልጸጉን አስመልክቶ ከተቋሙ የስራ ኃላፊዎች ጋር በተደረገ የትውውቅና የግብዓት ማሰባሰቢያ መርሃ ግብር ላይ የባለስልጣን መስሪያ ቤቱ ምክትል ዋና ዳይሬክተር አቶ ፋሲካው ሞላ እንዳሉት፤ በጎ ፋቃደኝነትን እንደሀገር ባህል ለማድረግ ሁሉም ጠንክሮ መስራት እንደሚጠበቅበት አንስተው አሁን ተሻሽሎ በፕሪሚየም ደረጃ የቀረበው የቮለንተሪዝም ኢንፎርሜሽን ማኔጅመንት ሲስተም የበጎ ፈቃደኝነትና በጎ አድራጊነት ባህልን በማህበረሰቡ ውስጥ ለማስረጽ ትልቅ ሚና እንደሚኖረው ገልጸዋል፡፡
የቮለንተሪዝም ኢንፎርሜሽን ማኔጅመንት ሲስተም ካሁን በፊት የበጎ ፈቃድ አገልግሎት መስጠት የሚፈልጉ በጎፈቃደኞችን በድህረ ገጽ የሚመዘግብ ሲስተም ሲሆን አሁን በተደረገለት ማሻሻያ ከበጎ ፈቃደኞች በተጨማሪ በጎ ፈቃደኛ ፈላጊ ድርጅቶችና ተቋማትም ተመዝግበው የፈለጉትን በጎ ፈቃደኛ ማግኘት እንዲችሉ የሚያስችል ነው፡፡
ጣምራ ለማህበራዊ ልማት 25ኛ ዓመት የምስረታ በዓሉን አከበረ፡፡

በስነስርዓቱ ላይ የመክፈቻ ንግግር ያደረጉት የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ እንደተናገሩት ድርጅቱ በበጎ ፈቃደኛና ልበ ብሩሃን በሆኑ ወጣቶች ከዘሬ ሃያ አምስት ዓመታት በፊት ለተለያዩ ማህበራዊ ችግሮች የተጋለጡ የማህበረሰብ ክፍሎችን መደገፍ ዓላማ አድርጎ “ጣምራ የፀረ-ኤድስ ክበብ” በሚል ስያሜ የተቋቋመ እና በሲቪል ማኅበረሰብ ድርጅቶች ባለሥልጣን ተመዝግቦ በመንቀሳቀስ ላይ የሚገኝ መሆኑን ተናግረዋል፡፡ ዋና ዳይሬክተሩ አክለውም አፍላ ወጣቶቹ በወቅቱ የነበራቸውን እምቅ የኪነ-ጥበብ ተሰጥዖ እንደ አብይ መሳሪያ ተጠቅመው በትምህርት ቤቶች፣ በስፖርት ሜዳዎች በከተማ ጎዳናዎች እና በየመንደሩ እየተዘዋወሩ ስለ ኤች.አይ.ቪ ኤድስ በሽታ አስከፊነት ህብረተሰቡን በማስተማርና የታመሙትን በመንከባከብ እንቅስቃሴያቸውን መጀመራቸውን አስታውሰው ቀስ በቀስ ወደ ሌሎች የጤናና ማህበራዊ ጉዳዮችም በማስፋት ህብረተሰቡን በተለይም ሴቶችን፣ ወጣቶችንና አቅመ ደካሞችን ትኩረት አድርጎ መስራቱ በአብነትነት የሚያስጠቅሰውና የሚያስመሰግነው ጉዳይ ነው ሲሉ ገልጸዋል፡፡ በመጨረሻም የምስረታ ባህላቸውን ምክንያት በማድረግ የእንኳን አደረሳችሁ መልዕክት በማስተላለፍ ጣምራ ለማህበራዊ ልማት ወጣቶች ማህበር በ25 ዓመታት ውስጥ ያሳካቸውን ዓላማዎች የበለጠ በማስፋት፣የህብረተሰቡን ሁለንተናዊ ተጠቃሚነት እንዲረጋገጥ ከዚህ የተሻለ ስራ እንደምትሰሩ ተስፋ አደርጋለሁ በማለት መልዕክታቸውን አስተላልፈዋል::

የሲቪል ማህበረሰብ ድርጅቶች ባለስልጣን NABU ከተባለ ውጭ ድርጅት ጋር የመግባቢያ ሰነድ ተፈራረመ፡፡

THE NATURE AND BIODIVERSITY CONSERVATION UNION /NABU/ ሪጅናል ቢሮውን መክፈት የሚያስችለውን የስምምነት ሰነድ ነው ከባለስልጣን መስሪያቤቱ ጋር የተፈራረመው፡፡ ድርጅቱ በተፈጥሮ ሃብት ጥበቃ ላይ ተሰማርቶ የሚሰራ ሲሆን ማህበረሰቡን ተጠቃሚ ለማድረግ እና የተፈጥሮ ሃብትም ያለአግባብ እንዳይወድም ተገቢውን እንክብካቤ የሚያደርግ ድርጅት መሆኑን ተገልጷል፡ የመግባቢያ ሰነድ ዋና ዓላማ በአፍሪካ ሪጂናል ቢሮ እንዲኖረው ለማስቻል ብሎም ከሌሎች የሲቪል ማህበረሰብ ድርጅቶች ጋር በቅርበት ለመስራት እንዲያስችል መሆኑን በአፍሪካ ሪጅናል ኦፊስ አክቲንግ ዳይሬክተር አቶ ሲሳይ አስፋው ተናግረዋል፡፡
የኢትዮጵያ የሙያ ማህበራት ህብረት ተመሰረተ፡፡
ጠቅላላ ጉባኤው ፕሮፌሰር ኢማና ጌቱን የጉባኤው ሰብሳቢ አድርጎ መርጧል፡፡ በመርሃ ግብሩ ላይ የመክፈቻ ንግግር ያደረጉት የተቋሙ ዋና ዳይሬክተር አቶ ጂማ ዲልቦ እንደተናገሩት በአገራችን የሙያ ማህበራት መቋቋም ረጅም ታሪክ ያለው ቢሆንም ለሙያ ማህበራት መደራጀት እና ማደግ ምቹ የሆነ የሕግ ማዕቀፍ ባለመኖሩ ምክንያት ዘርፉ በማህበራዊ፣ፖለቲካዊና ኢኮኖሚያዊ እድገት ውስጥ የሚገባውን ሚና እንዳይጫወት ማድረጉን ገልጸዋል፡፡ በአገራችን በተካሄደው አገራዊ ሪፎርም ማግስት መንግስት ቅድሚያ ትኩረት ሰጥቶ ካሻሻላቸው ሕግች መካከል የሲቪል ማህበራትን የሚመራው ሕግ ሲሆን አዋጁ ያልተገደበ የዓላማ ነፃነት እንዲያገኙ ካደረጋቸው አደረጃጀቶች አንዱ የሙያ ማህበር መሆኑን አመላክተዋ፡፡ ከዚህ ቀደም በነበረው ህግ ሙያ ማህበራት ለአባላት ጥቅም ካልሆነ በስተቀር ለሦስተኛ ወገን እንዳይሰሩ ተከልክለው የነበረው መሆኑን በመግለጽ በዚህም ሀገርና ህዝብ ከሙያ ማህበራት ማግኘት የሚገባውን ጠቀሜታ ሳያገኙ መቅረታቸውን አንስተዋል፡፡ አዋጁን ተከትሎ “የሙያ ማህበራት ድጋፍ እና አስተዳደር መመሪያ መውጣቱን አንስተው ባለሥልጣኑ በዘርፉ ከተሰማሩ የመንግስት አካላት ጋር በመተባበር የሙያ ማህበራትን ለመደገፍና ለማበረታታት የተለያዩ ድጋፎችን ሊያመቻች እንደሚችልም በግልጽ መመላከቱን አብራርተዋል፡፡



ከዚሁ ጋር በተያያዘ የሙያ ማህበራት በተሻለ ሁኔታ ለመምራትና ለመደገፍ እንዲቻል በቅርቡ ተጠንቶ በጸደቀው አዲስ የባለሥልጣን መ/ቤታችን መዋቅራዊ አደረጃጀት አንድ ራሱን የቻለ “የሙያ ማህበራት ዴስክ” ያለው መሆኑን በማንሳት ይህ ዴስክ በቀጣይ ለሙያ ማህበራት የሚደረጉ ድጋፎችን በተደራጀና በተጠና መንገድ ለማከናወን እንደሚያግዝ ይታመናል ሲሉ ተናግረዋል፡፡ በመጨረሻም በዛሬው ዕለት የሚመሠረተው የሙያ ማህበራት ህብረት (Ethiopian professional associations Alliance) ከዚህ በፊት በዘርፉ የነበሩትን ችግሮች በመቅረፍ የሙያ ማህበራት ተጠናክረውና ተደጋግፈው በችሎታና በዕውቀት የተገነቡ ተቋማት እንዲፈጠሩ፣የምርምር ስራዎች እንዲጎለብቱ በማድረግ ሳይንስና ቴክኖሎጂ ማስፋፋት አገራችንን ወደ ተሻለ ደረጃ በማድረስ ውስጥ ግንባር ቀደም ሚና እንደምትጫወቱ መንግስት ከፍተኛ እምነት አለው ሲሉ መልዕክታቸውን አስተላልፈዋል፡፡ በፕሮግራሙ ላይ የጉባኤው መተዳደሪያ ደንብን ጨምሮ በርካታ መነሻ ጹሑፎች ቀርበው ውይይት የተደረገባቸው ሲሆን በመጨረሻም ፕሮፌሰር ኢማና ጌቱ የጠቅላላ ጉባኤ ሰብሳቢ ፣አቶ ሰለሞን ደበሌ ም/ሰብሳቢ እና አቶ ሲሳይ ሳህሌ ጸሐፊ በማድረግ የመረጠ ሲሆን ከዚህ በተጨማሪ ዘጠኝ አባላት ያሉት ስራ አስፈጻሚ አካላትን በመምረጥ ተጠናቋል፡፡
ዋና ዳይሬክተር አቶ ጂማ ዲልቦ በማላዊ የፆታ፣ የማህበረሰብ ልማት እና ማህበራዊ ደህንነት ሚኒስቴር ተወካይ ወ/ሮ ሮዝሊን በቢሯቸው አግኝተው አነጋግረዋል፡፡

በማላዊ የፆታ፣ የማህበረሰብ ልማት እና ማህበራዊ ደህንነት ሚኒስቴር ተወካይ በሆኑት ወ/ሮ ሮዝሊን የተመራ ልዑክ በሲቪል ማህበረሰብ ድርጅቶች ባለስልጣን በመገኘት የልምድ ልውውጥ አድርጓል፡፡ የልምድ ልውውጡን ያደረጉት በማላዊ መንግስት መንግስታዊ ያልሆኑ ድርጅቶች ተቆጣጣሪ ባለስልጣን የስራ ኃላፊዎች ሲሆኑ በባለስልጣን መስሪያ ቤቱ በመገኘት በኢትዮጵያ የሲቪል ማህበረሰብ ድርጅቶች ታሪክ፣ እንቅስቃሴ እና ተቋሙ እያከናወነ ስላለው ተግባር በባለስልጣን መስሪያ ቤቱ ዋና ዳይሬክተር አቶ ጂማ ዲልቦ ገለጻ ተደርጎላቸዋል፡፡
ዋና ዳይሬክተሩ በማብራሪያቸው ባለስልጣን መስሪያ ቤቱ የሲቪል ማህበረሰብ ምህዳሩን ለማስፋት በርካታ ተግባራት መከናወኑን በማንሳት ባለፉት አራት አመታት ብቻ ከ2500 በላይ አዲስ የሲቪል ማህበረሰብ ድርጅቶች እንደተመዘገቡ ፣ባለስልጣን መስሪያ ቤቱ ከአጋር አካላት ጋር በመሆን ዘርፉ ለሀገር የሚጠበቅበትን እንዲያበረክት የተለያዩ የህግ ማሻሻያዎችን ማድረጉን፣መምሪያዎችንና ማኗሎችን በማዘጋጀት ግልጽና ተገማች የሆነ አገልግሎት እየሰጠ እንደሚገኝም ጠቁመዋል፡፡ ተቋማዊ የሪፎርም ስራዎች፣የበጎ ፈቃድና በጎ አድራጊነትን በማህበረሰቡ ውስጥ ለማስረጽ የተከናወኑ ስራዎች፣ቴክኖሎጂን ከመጠቀም አንጻር፣ከፈንድ አስተዳድር አንጻር የተከናወኑ ተግባራት፣የአጋርነት እና ትብብር ስራዎች፣ከድርቅና ከሰብዓዊ ድጋፍ አንጻር ድርጅቶችን በማስተባበር የተከናወኑ ተግባራት አበረታች መሆናቸውን አንስተዋል፡፡
በማላዊ የፆታ፣ የማህበረሰብ ልማት እና ማህበራዊ ደህንነት ሚኒስቴር ተወካይ የሆኑት ወ/ሮ ሮዝሊን በበኩላቸው በማላዊ ያለው የሲቪል ማህበረሰብ ድርጅቶች አደረጃጀት ኢትዮጵያ ካለው የሲቪል ማህበረሰብ ድርጅቶች አደረጃጀት የተለየ እንደሆነ አንስተዋል፡፡ አያይዘውም በማላዊ ከባለስልጣነ መስሪያ ቤቱ ጋር አቻ የሆነ ኃላፊነት የተሰጠው መንግስታዊ ያልሆኑ ድርጅቶች ተቆጣጣሪ ባለስልጣን የሚባል መሆኑን በማንሳት በዚህ ተቋም ውስጥ መንግስታዊ ያልሆኑ ድርጅቶችን የመመዝገብና የመቆጣጠር ስራዎችን እንደሚሰራ አብራርተዋል፡፡ በማላዊ መንግስታዊ ያልሆኑ ድርጅቶች ተቆጣጣሪ ባለስልጣን የኮርፖሬት ሰርቪስ ዳይሬክተር የሆኑት ወ/ሮ ሊንዳ ብሪጌት በበኩላቸው ከባለስልጣን መስሪያ ቤቱ በጣም ጠቃሚ የሆኑ ልምዶችን ማግኘት መቻላቸውን አንስተው ወደተቋማቸው ተመልሰው በባለስልጣን መስሪያ ቤቱ ያገኙትን ተመክሮ ተግባር ላይ እንደሚያውሉት አብራርተዋል፡፡
የፌደራል መንግስት መስሪያ ቤቶች መዋቅራዊ አደረጃጀት ለውጥ መሰረት የመንግስት ሰራተኞች ድልድል አፈጻጸም መመሪያ ላይ የግንዛቤ ማስጨበጫ መድረክ ተዘጋጀ፡፡
በድልድል መመሪያ ቁጥር 859/2014 ዙሪያ ስልጠና በተሰጠበት ወቅት የመክፈቻ ንግግር ያደረጉት የተቋሙ ዋና ዳይሬክተር አቶ ጂማ ዲልቦ እንደገለጹት ተቋሙ በባለፉት ሶስት ዓመታት በሪፎርም ውስጥ ማለፉን በማንሳት ለአንድ ተቋም ውጤታማነት ሃሳብ፣መዋቅር እና የሰው ሃይል መሰረታዊ ጉዳዬች መሆናቸውን አብራርተዋል፡፡ የትልልቅ ተቋማት ጅማሮ ሃሳብ ነው ያሉት ዋና ዳይሬክተሩ እኛ እንደተቋም የጠራ ሃሳብ አለን ሃሳብን ወደ ተግባር ለመለወጥ ደግሞ ግልጽ የሆነ የማህበረሰቡን የመደራጀት መብት እና የማህበረሰቡን የላቀ ተጠቃሚነት የሚያረጋግጥ መዋቅር ጸድቆ መጥቷል ሲሉ ገልጸዋል፡፡ ሃሳብ እና መዋቅር ውጤታማ እንዲሆን ደግሞ የሰው ሃይል ወሳኝ ነው፤ ይህ የድልድል መመሪያም ለሁሉም ኮሚቴዎችና የተቋሙ ሰራተኞች ግንዛቤ በማስያዝ በእውቀት፣ክህሎትና በስነምግባር የታነጸ የሰው ሃይል እና ሁልግዜ ለመለወጥ፣ለመማር እና አዳዲስ ቴክኖሎጂ ለመጠቀም ዝግጁ የሆነ የሰው ሃይል በተቋሙ እንዲኖር ይሰራል ብለዋል፡፡



አዲሱ ድልድል እንደሃገር ለየት ያሉ ጉዳዬች እንዳሉት በማንሳት እንደተቋምም በሪፎርም ውስጥ እንደቆየ ተቋም ይህ አዲስ ድልድል የተቋሙን ዓላማ ወደፊት የሚራምድ እና ወደ ሌላ ከፍታ የሚወስድ ነው ሲሉ ገልጸዋል፡፡ በመጨረሻም የተቋሙን ርዕይ መሰረት ያደረገ ድልድል እንደሚፈጸም አምናለሁ በማለት ከመመሪያው በተጨማሪ የሃገሪቱን የ10 ዓመት ስትራቴጂክ እቅድ ታሳቢ ይደረጋል ሲሉ መልዕክታቸውን አስተላልፈዋል፡፡








