የኤጀንሲው ስኬት የሚለካው የተመዘገቡ የሲቪል ማህበረሰብ ድርጅቶች በሚያስመዘግቡት ውጤት እንደሆነ ተገለፀ፡፡

የሲቪል ማኅበረሰብ ድርጅቶች ኤጀንሲ ምክትል ዋና ዳይሬተርን ጨምሮ የኤጀንሲው ከፍትኛ የስራ  ኃላፊዎች አበበች ጎበና የህፃናት እንክብካ ልማት ማህበርን ጎብኝተዋል፡፡ የማህበሩን የስራ እንቅስቃሴ የተመለከቱት የኤጀንሲው ምክትል ዋና ዳይሬክተር አቶ ፋሲካው ሞላ እንደገለጹት የኤጀንሲው ስኬት የሚለካው የሲቪል ማኅበረሰብ ድርጅቶች በሚያስመዘግቡት ውጤት በመሆኑ ይበልጥ ውጤታማ እንድትሆኑ በማገዝ ረገድ ሁሌም ከጎናችሁ ነን ሲሉ በጉብኝቱ ወቅት መልዕክታቸውን አስተላልፈዋል፡፡

ምክትል ዋና ዳይሬክተሩ አክለውም ማህበሩ ራሱን በፋይናንስ ለመደገፍ እያደረገ ያለው ጥረት እጅግ የሚበረታታና ይበልጥ ሊጠናከር የሚገባው መሆኑን አንስተው ከመንግስትና ከሌሎች የሲቪል ማኅበረሰብ ድርጅቶች ጋር የስትራቴጂክ አጋርነት መፍጠር፤ አዳዲስ ሀሳቦችንና አሰራሮችን መሞከር፣ አበበች ጎበና የሚለው ስም ትልቅ ብራድ በመሆኑ ማህበሩ ሊጠቀምበትና በጎ አድራጊዎችን ሊስብበት እንደሚገባ አንስተዋል፡፡ ማህበሩ ላለፉት 42 ዓመታት ሲሰራ መቆየቱ እጅግ ትልቅ ስኬት መሆኑን አንስተው የክብር ዶክተር አበበች ጎበና ታሪክ ለበርካታ ሰዎች ምሳሌ የሚሆን በመሆኑ በዚህ እረገድ በርካቶችን መፍጠር ስለምንፈልግ ድጋፋችን ከእናንተ ጋር ነው ሲሉ ተናግረዋል፡፡
አቶ እሸቱ አረዶ የህጻናት ልማት ማህበሩ ማኔጂንግ ዳይሬክተር በበኩላቸው የልማት ማህበሩ ላለፉት ረጅም አመታት እጅግ በርካታ ስራዎችን ሲሰራ የቆየ ቢሆንም አሁን ላይ ድርጅቱ ችግሮች እያጋጠሙት ስለሆነ ትኩረት ሰጠቶ ሊደግፍው ይገባል ሲሉ ገልጸዋል፡፡

ስለ ድርጅቱ ማብራሪያ የሰጡት የድርጅቱ የኮሙኒኬሽን ሃላፊ እንዳነሱት ድርጅቱ ከተመሰረተ 42 ዓመታትን ክማስቆጠሩም ብላይ ወላጅ አልባ ህፃናትን ብቻ ሳይሆን ከህጻናት ጋር ተያያዥነት ያላቸውን ስራዎችን ማልትም የህፃናት እንክብካቤ፣ የወጣቶች ስልጠና፣ የባልትናና የዕደ ጥበባት ስራዎች፣ የጤና አገልግሎት፣ የሴቶች አቅም ግንባታ ስልጠናዎችን እንዲሁም የአካባቢ ጥበቃዎችን እንደሚሰራ ማብራሪያ ሰጥተዋል፡፡  የአበበች ጎበና የህፃናት ልማት ማህበር ሁለት ህፃናትን በማንሳት ከ42 ዓመት በፊት በክብር ዶክተር አበበች ጎበና የተመሠረተ ማህበር ሲሆን በአሁን ጊዜ ከ300 ሺህ በላይ ዜጎችን በቀጥታም ይሁን በተዘዋዋሪ እያገዘ ያለ የሲቪል ማህበረሰብ ድርጅት ነው፡፡


ም/ዋና ዳይሬክተር አቶ ፋሲካው ሞላ ለኤጀንሰው የአስር ዓመት ስትራቴጅክ እቅድ ዝግጅት ቴክኒካል ድጋፍ ከሚሰጠው ከFCG-Sweden የስራ ኃላፊዎች ጋር ተወያዩ፡፡

የሲቪል ማኅበረሰብ ድርጅቶች ኤጀንሲ በራስ የውስጥ አቅም የ10 ዓመት ስትራቴጅክ እቅድ አዘጋጅቶ ተግባራዊ እያደረገ የሚገኝ ሲሆን ይህ ዕቅድ የተቋሙ ርዕይ ዋነኛ ማዕዘን የሆኑትን ጠንካራ የሲቪል ማህበራት ዘርፍ እንዲፈጠር የማድረግ፤ ብቁና ውጤታማ ኤጀንሲ የመገንባት፣ የህብረተሰቡን የሲቪክ ባህሉ የማዳበር እንዲሁም በአጠቃላይ በሲቪል ማህበራት ዘርፍ እንቅስቃሴ የህብረተሰባችንን የላቀ ተጠቃሚነት የማረጋገጥ ተግባራትን የበለጠ ለማሳካት በሚያስችል እንዲሁም ዓለም አቀፍ ደረጃውን በጠበቀ መልኩ የ10 ዓመት ስትራቴጅክ እቅድ እንዲዘጋጅ ለማድረግ በፈረንሳይ የልማት ትብብር /AFD/ የፋይናንስ ድጋፍ አለም አቀፍ አማካሪ በሆነው በFCG-Sweden እቅዱን የማዘጋጀት ስራ እየተከናወነ ይገኛል፡፡
ምክትል ዋና ዳይሬክተር አቶ ፋሲካው ሞላ ይህ እቅድ የሲቪል ማህበረሰብ ድርጅቶች በተመለከተ እንደአገር የምንመራበት እቅድ መሆኑን በመረዳት ኢትዮጵያን የአፍሪካ የብልፅግና ተምሳሌት የማድረግ ርዕይ ካለው አገራዊ የ10 ዓመት የልማት እቅድ ጋር በተጣጣመና በተናበበ መልኩ ደረጃውን የጠበቀ ሆኖ መቀረፅ ያለበት መሆኑን በውይይቱ አንስተዋል፡፡

ዕቅዱን የማዘጋጀት ሂደቱ የፌዴራልና የክልል ባለድርሻ አካላትን እና ሲቪል ማህበራትን በማሳተፍ የሚከናወን መሆኑ በውይይቱ የጋራ መግባባት የተፈጠረበት ሲሆን የኤጀንሲው አመራሮችና ሰራተኞች በስፋት እየተሳተፉበት የሚዘጋጅ እቅድ እንደሚሆን ተመላክቷል፡፡ በእቅድ ዝግጅቱ የኤጀንሲውን የውስጥ አቅም ለመገንባት የሚያስችል እውቀትና ልምድ ከአማካሪው ድርጅት እንደሚገኝ ተስፋ የተጣለበት ሲሆን በዚሁ አግባብም ተግባራዊ መሆን እንዲችል የኤጀንሲው የቴክኒክ ኮሚቴ እና የስትሪንግ ኮሚቴ ተደራጅቶ በቅርበት ከአማካሪው ጋር እንዲሰራ እየተደረገ ይገኛል፡፡

በውይይቱ ስትራቴጂክ እቅዱ ትኩረት ሊያደርግባቸው የሚገቡ ዋና ዋና ጉዳዬች ላይ ትኩረት በማድረግ ውይይት የተደረገባቸው ሲሆን አማካሪው ድርጅት ከቴክኒክ ኮሚቴው ጋር በጋራ በመሆን ለኤጀንሲው ማኔጅመንት አባላትና የሚመለከታቸው ባለሙያዎች ስልጠናዎችን እየሰጠ ይገኛል፤ ከባለድርሻ አካላትና ተገልጋዮች ጋር ውይይቶችን በማድረግ ግብዓት ለመውሰድ ስራ መጀመሩም ተገልጿል፡፡
እቅዱ በተያዘለት ጊዜ ውስጥ ለማጠናቀቅ የአማካሪ ድርጅቱ ባለሙያዎች እያደረጉ ለሚገኙት ያለሰለሰ ጥረት ም/ዋና ዳይሬክተሩ ምስጋና ያቀረቡ ሲሆን በቀጣይም በዚሁ መንገድ በመፈፀም እቅዱ ደረጃውን ጠብቆ በወቅቱ እንደሚጠናቀቅ ተስፋቸውን ገልፀዋል፡፡ የአማካሪ ድርጅቱ ኃላፊዎ በኤጀንሲው በኩል እየተደረገ ያለውን ድጋፍና ተሳትፎ በማንሳት ምስጋና አቅርበዋል፡፡
በመጨረሻም በኤጀንሲው ያሉ ባለሙያዎችና ሃላፊዎች በቀጣይ እቅዱን የመተግበር ኃላፊነት የእነርሱ መሆኑን በመገንዘብ በእቅዱ ዝግጅት በቅርበት መሳተፍ፣ አስፈላጊ መረጃዎችንና ሃሳቦችን መስጠት እንዲሁም የሚሰጡ ስልጠናዎችን በትኩረት መከታተል እንደሚገባ ተገልፆል፡፡ ከዚህ ጋር በተያያዘም የሲቪል ማህበረሰብ ድርጅቶች ዘርፉን ውጤታማ ለማድረግ የሚዘጋጅ ወሳኝ አገራዊ እቅድ መሆኑን በማሰብ በሂደቱ ላይ በሚገባ መሳተፍ አለባቸው ብለዋል፡፡


‹‹ኢትዬጵያ ትልበስ ትውልድ ይታደስ››

የሲቪል ማህበረሰብ ድርጅቶች ኤጀንሲ ከጋምቤላ ብሔራዊ ክልላዊ መንግስት ጋር በመተባበር ‹‹ኢትዬጵያ ትልበስ ትውልድ ይታደስ›› በሚል መሪ ቃል የአረንጓዴ አሻራ መርሃ ግብር አካሂዷል፡፡

 

በፕሮግራሙ የመንግስት ከፍተኛ ሃላፊዎች፣ከተለያዩ የሲቪል ማህበረሰብ ድርጅቶች የተወከሉ ሃላፊዎችና ባለሙያዎች እንዲሁም የክልሉ ሃገር ሽማግሌዎችና ከተለያዩ አደረጃጀት የተወከሉ አካላት ታድመዋል፡፡

የክልሉ ፕሬዝዳንት አቶ ዑመድ ኡጅሉ እንኳን ወደ በረሃማ ገነት ወደ ሆነችው ጋምቤላ ክልል በደህና መጣችሁ በማለት በክልሉ ለሶስተኛ ግዜ ኢትዬጵያን እናልብሳት መርሃግብር እየተካሄደ መሆኑን እና በዘንድሮ መርሃ ግብር ከክልሉ ከሚተከለው በተጨማሪ ለደቡብ ሱዳን ችግኝ ለመስጠት እቅድ መያዛቸውን ገልጸዋል፡፡

 

የዕለቱ የክብር እንግዳ ዶ/ር አለሙ ስሜ የፖለቲካ ፓርቲዎችና ሲቪል ማህበራት ዘርፍ ኃላፊ የፕሮግራሙን ዋና ዓላማ ሲያብራሩ በርካታ ኢትዬጵያውያን የተሳተፉበት ነጻና ዴሞክራሲያዊ ምርጫ በተደረገ ማግስት በተለያዩ ክልሎች በመሄድ በኢፌዴሪ ጠቅላይ ሚኒስትር የተጀመረውን የአረንጓዴ አሻራ መርሃ ግብር ለማከናወን እና በየክልሉ ችግኙን ስንተክል ፍቅርና ሰላምን አብረን ለመትከል ነው ብለዋል፡፡

 

አያይዘውም በባለፉት 27 ዓመታት ከፍቅር ይልቅ ጥላቻን፣ከአንድነት ይልቅ መለያየትን መሰረት በማድረግ ሲሰራ መቆየቱን ገልጸው ይህ የሃገራችን ችግር በመሆኑ በጋራ ልንቀርፈው ይገባል ሲሉ አብራርተዋል፡፡ ለሲቪል ማህበረሰብ ድርጅቶችም ከመምረጥ ጀምሮ ምርጫው ሰላማዊና ዲሞክራሲያዊ እንዲሆን ላደረጉት አስተዋጽኦ ምስጋናቸውን አቅርበዋል፡፡

በመጨረሻም በክልሉ ከለውጡ በኋላ ብሔር ብሔረሰቦች ተባብረውና ተከባብረው ከሚኖሩበት ክልል ተጠቃሽ መሆኑን በመግለጽ በሃገራችን በምርጫው የተፈጠረው የመቻቻልና የሰላም ድባብ በማስቀጠል እንዲሁም ሁላችንም የድርሻችንን በመወጣት የምንፈልጋትን ኢትዬጵያን መፍጠር እንችላለን ሲሉ መልዕክታቸውን አስተላልፈዋል፡፡

 

የኤጀንሲው ዋና ዳይሬክተር በበኩላቸው ባስተላለፉት መልዕክት በባለፉት ሁለት ዓመታት የሲቪል ማበረሰብ ድርጅቶች ችግኝ በተለያዩ አከባቢዎች የተከሉ መሆኑን በማስታወስ የዘንድሮው ለየት የሚያደርገው ራቅ ብሎ በጋምቤላ ክልል መሆኑ ነው ብለዋል፡፡ ዋና ዳይሬክተሩ አክለውም ችግኙን ስንተክል ጥላቻን እና አረምን ነቅለን ፍቅርን እና መተሳሰብን የምንተክልበት እንዲሆን እመኛለሁ በማለት መልዕክታቸውን አስተላልፈዋል፡፡ ከችግኝ ተከላ ፕሮግራሙ በተጨማሪ የክልሉ ኪነት ባንድ የተለያዩ ባህላዊ ጭፈራዎችን ለታዳሚው አቅርበዋል፡፡


ከ3 ሚሊዮን ብር በላይ የሚያወጣ የፕሮጀክት ስምምነት ተደረገ፡፡

መዋቅራዊ በሆነ መንገድ በጎ ፈቃደኝነትንና የበጎ ፈቃድ መርሆችን በአዲስ አበባ ከተማ ውስጥ ለሚኖሩ የማህበረሰብ ክፍሎች ለማስረጽ ያግዛል የተባለለት ከ3 ሚሊዮን ብር በላይ የሚያወጣ የፕሮጀክት ስምምነት ተደረገ፡፡

 

የሲቪል ማህበረሰብ ድርጅቶች ኤጀንሲ ሰርቭ ግሎባል ከተባለ መሰረቱን አሜሪካን ሀገር ካደረገ ግብረ ሰናይ ድርጅት ጋር የበጎ ፈቃደኝነት ባህልን መዋቅራዊ በሆነ መንገድ ለማስተዋወቅ ያግዝልኛል ያለውን ስምምነት ተፈራርሟል፡፡ ፕሮጀክቱ ለቀጣዮቹ ሶስት አመታት የሚቆይ ሲሆን በጠቅላላው ከ3 ሚሊዮን ብር በላይ ወጪ ይደረግበታል ተብሏል፡፡

በስምምነት ስነስርዓቱ ላይ የሲቪል ማህበረሰብ ድርጅቶች ኤጀንሲ ምክትል ዳይሬክተርን ጨምሮ የአዲስ አበባ የፋይናንስ ትብብር ቢሮ እና የወጣቶችና በጎ ፈቃድ ማስተባበሪያ ቢሮ ሃላፊዎች እንዲሁም የሰርቭ ገሎባል ተወካዮች የተገኙ ሲሆን ፕሮጅክቱ በተለይም የኦንላይን ቮለንቲር ማኔጅመንት ሲሰተም (online volunteer management system) መዘርጋት፣ የበጎ ፈቃድ ባህልንና መርሆን በተለያዩ የማህበረሰብ ክፍሎች ዘንድ ማጎልበት፣ ከበጎ ፈቃድ ጋር ተያይዞ በሚወጡ ፖሊሲዎችና መመሪያች ላይ የበኩሉን መወጣት እንዲሁም ፕሮፌሽናል የሆኑ የበጎ ፈቃድ ባለሙያዎችን በተለያዩ ተቋማት ውስጥ ተመድበው የበጎ ፈቃድ አገልግሎት መስጠት የሚችሉበትንና በዚህም እውቅና የሚያገኙበትን ሁኔታዎች መፍጠር ዓላማ አድርጎ የተያዘ  ነው፡፡

ከተቋሙ ከፍተኛ አማካሪ አቶ እስቲበል ምትኩ እንዳገኘነው መረጃ ከሆነ በዚህ ፕሮጀክት ከ6000 በላይ ዜጎች በቀጥታ ተጠቃሚ ሲሆኑ ከአንድ ሚሊየን በላይ በአስሩም ክፍለ ከተማዎች የሚገኙ የከተማዋ ነዋሪዎች በአገልግሎቱ ተደራሽ ይደረጋሉ ተብሏል፡፡ በተጨማሪም በልዩ ልዩ የሙያ መስኮች የተመረቁ ሙያተኞች በምደባ በልዩ ልዩ ተቋማት ውስጥ ተመድበው አገልግሎት ይሰጣሉ ብለውናል፡፡

 

ፕሮጀክቱ ልዩ ድጋፍ የሚያሻቸውን የማህበረሰብ ክፍሎች ቅድሚያ ተጠቃሚ የሚያደርግ ሲሆን በተለይም አካል ጉዳተኞች ህጻናትና ሴቶች እንዲሁም አረጋውያን ላይ ቅድሚያ ሰጥቶ ይሰራል ተብሏል፡፡ ኤጀንሲውን በተለይ በOVMS (online volunteer management system)ን በመዘርጋት ግንባር ቀደም ተቋም እንዲሆን የሚያስችለው ነው፡፡

 

ፕሮጀክቱ ወጣቶችን፣ ህጻናትን፣ ዲያስፖራዎችን፣ ልዩ ልዩ ድጋፍ የሚያሻቸውን የማህበረሰብ ክፍሎችንና አረጋውያንን የሚጠቅም ፕሮጀክት መሆኑም ተያይዞ ተገልጹዋል፡፡


በኤጀንሲው የቀረቡት አምስት ረቂቅ መመሪያዎች ኤጀንሲው አዋጁን ለማስፈጸም የሚያደርገውን ጥረት የሚያያግዙ መሆናቸው ተገለጸ፡፡

የሲቨቢል ማህበረሰብ ድርጅቶች ኤጀንሲ አዋጅ ቁጥር 1113/2011ን መሰረት አድርገው በተዘጋጁ አምስት ረቂቅ መመሪያዎች ላይ ለሁለት ቀናት ከሁሉም የማህበራት ህብረቶች ጋር ውይይት አድርጓል፡፡ ኤጀንሲው ባለፉት ሁለት አመታት የተቋቋመበትን አዋጅ ለማስፈጸም ያስችለው ዘንድ በርካታ መመሪያዎችን በማዘጋጀት ለውይይት ክፍት ያደረገ ሲሆን የዚሁ አካል የሆነ የውይይት መድረክ በኢሊሌ ኢንተርናሽናል ሆቴል አዘጋጅቷል፡፡

 

የውይይት መድረኩን የከፈቱት የኤጀንሲው ዋና ዳይሬክተር አቶ ጂማ ዲልቦ ሴክተሩ ከነበረበት ጨለማ ወጥቶ በነጻነት ለመንቀሳቀስ በሚያስችለው ጎዳና ላይ ነው ያሉ ሲሆን ኤጀንሲውም አዋጁን ለማስፈጸም ያስችለው ዘንድ በርካታ የሪፎርም ስራዎችን ሰርቷል ብለዋል፡፡ አያይይውም ኤጀንሲው በተቋቋመበት አዋጅ ቁጥር 1113/2011 አንቀጽ 89 መሰረት አዋጁን ለማስፈጸም ያስችለው ዘንድ ልዩ ልዩ መመሪያዎችን የማውጣት ስልጣን የተሰጠው መሆኑን ጠቁመው ሆኖም ግን በበርካታ ምክንያቶች በተፈለገው ጊዜ ለማጸደቅ አልተቻለም ብለዋል፡፡ ለዚህም እንደምክንያት ያነሱት የሲቪል ማህበረሰብ ድርጅቶች ምክር ቤት በታቀደው ጊዜ አለመመስረት መሆኑን ጠቁመው የኮቪድ በኢትዮጵያ መከሰትና የአስቸኳይ ጊዜ አዋጅ መታወጁ ሌላው እንደምክንያት የሚጠቀስ ነው ብለዋል፡፡

ዋና ዳይሬክተሩ አያይዘው እንዳሉት የሲቪል ማህበረሰብ ድርጅቶች እንቅስቃሴያቸውን ግልጸኝነትና ተጠያቂነትን በተላበሰ መልኩ በማድረግ በስራዎቻቸው የህብረተሰቡን የላቀ ተጠቃሚነት ማረጋገጥ የቅድሚያ አጀንዳቸው አድርገው መስራት አለባቸው ብለዋል፡፡

ካሁን ቀደም አምስት ረቂቅ መመሪያዎችን አዘጋጅቶ ውይይት ካደረገ በኋላ  ለምክር ቤቱ ያቀረበ ሲሆን በተመሳሳይምእነዚህ አዲስ አምስት መመሪያዎች ውይይት ተደርጎባቸው ለምክር ቤት የሚቀርቡ መሆናቸውን አንስተዋል፡፡ ካሁን በፊት ለውይይት የቀረቡት ረቂቅ መመሪያዎች የሲቪል ማህበረሰብ ድርጅቶች የአስተዳድር ወጪ አፈጻጸም የወጣ ረቂቅ መመሪያ፣ ስለሲቪል ማህበረሰብ ድርጅቶች የሂሳብ አጣሪ፣ ስለድርጅት ንብረት ግዢ፣ ሽያጭና አወጋገድ የወጣ ረቂቅ መመሪያ፣ የሲቪል ማህበረሰብ ፈንድ ለማስተዳደር የወጣ ረቂቅ መመሪያ፣ የሙያ ማህበራትን ለመደገፍና ለማስተዳደር የወጣ ረቂቅ መመሪያ እንዲሁም የሲቪል ማህበረሰብ ድርጅቶች በገቢ ማሰገኛ ስራዎች ስለሚሰማሩበት የወጣ ረቂቅ መመሪያ የሚሉ ሲሆኑ በዚህኛው ዙር ደግሞ የሲቪል ማህበረሰብ ድርጅት ምዝገባ እና አስተዳደር የወጣ ረቂቅ መመሪያ፣ የሲቪል ማህበረሰብ ድርጅቶች የኦዲትና የስራ ክንውን ሪፖርት አቀራረብን ለመወሰን የወጣ ረቂቅ መመሪያ፣

በሲቪል ማህበረሰብ ድርጅቶች ላይ ስለሚደረግ ክትትል፣ ቁጥጥር እና ምርመራ የወጣ ረቂቅ መመሪያ፣ ስለሲቪል ማህበረሰብ ድርጅቶች መዋሀድ፣ ስለድርጅት መከፋፈል፣ መለወጥ መፍረስ እና መተዳደሪያ ደንብ ስለማረጋገጥና ስለመመዝገብ የወጣ ረቂቅ መመሪያ እንዲሁም ስለጥቅም ግጭት የወጣ ረቂቅ መመሪያዎች ላይ ውይይት ተደርጎባቸዋል፡፡ በውይይቱ በይዘቱ፣ በዓላማው፣ እንዲሁም የቋንቋ አጠቃቀምን ጨምሮ ከተሳታፊዎች አስተያየትና ጥያቄ ተነስቶ ማብራሪያ እና ምላሽ ተሰጥቶባቸዋል፡፡

የመዝጊያ ንግግር ያደረጉት የኤጀንሲው ምክትትል ዋና ዳይሬክተር አቶ ፋሲካው ሞላ በበኩላቸው ኤጀንሲው በተቻለው መጠን ድርጅቶችን ለማገዝና የህብረተሰብን ተጠቃሚነትን ብሎም የሀገርን ጥቅም ለማረጋገጥ በርካታ ስራዎችን እየሰራ መሆኑን ጠቁመው ለዚህ ደግሞ የሲቪል ማህበረሰብ ድርጅቶቾች ከፍተኛ ሚና ያላቸው መሆኑን ጠቁመዋል፡፡ አያይዘውም በዚህ መድረክ የሚነሱ ሀሳቦች እንደ ግብዓት የሚወሰዱ መሆናቸውን ጠቁመው ምናልባት እንደግብዓት ያልተጠቀምናቸው ከሆነ ከነምክንያቱ የሚገለጽ ይሆናል ያሉ ሲሆን ለዚህ ፕሮግራም አስተባባሪዎችም ምስጋናቸውን አቅርበዋል፡፡

የሲቪል ማህበረሰብ ድርጅቶች ኤጀንሲ የህግ አገልግሎት ዳይሬክቶሬት ዳይሬክተር ወ/ሮ ሓርነት በበኩላቸው ውይይቱ እዚሁ የሚቀር ሳይሆን ከአባላቶቻቸው ጋር ውይይት አድርገው ሰፊ ሀሳቦችን ማካተት የሚችሉበት ሁኔታ ያለ መሆኑን ጠቁመው ህብረቶቹ አባል ድርጅቶቻቸውን አወያይተው ተጨማሪ ግብዓት ይሆናል ያሉትን ከሰኔ 9/2013 ዓ.ም ጀምሮ ባሉ 15 የስራ ቀናት በኤጀንሲው የህግ ክፍል ወይም በኤጀንሲው የኢሜይል አድራሻ መላክ እንደሚችሉ ገልጸዋል፡፡


የሲቪል ማህበረሰብ ድርጅቶች ኤጀንሲ ከፍተኛ የስራ ኃላፊዎች ዎርልድ ቱጌዜር (world together) ኢትዮጵያ የተሰኘ ግብረሰናይ ድርጅትን የስራ እንቅስቃሴ ጎበኙ፡፡

የሲቪል ማህበረሰብ ድርጅቶች ኤጀንሲ ሰሚት በሚገኘው ኤል ጂ ኮይካ ሆፕ ቲቬት ኮሌጅ (LG-KOIKA HOPE TVET COLLEGE) በመገኘት የድርጅቱን የስራ እንቅስቃሴ ምልከታ አድርጓል፡፡

 

በእለቱ የኤጀንሲው ዋና ዳይሬክተር አቶ ጂማ ዲልቦና የኤጀንሲው የምዝገባና ፈቃድ ዳይሬክቶሬት ዳይሬክተር አቶ ተሾመ ወርቁ በቲቬት ኮሌጁ በመገኘት የተቋሙን የስራ እንቅስቃሴ ቅኝት አድርገዋል፡፡ በእለቱ ለኤጀንሲው የስራ ኃላፊዎች በካንትሪ ዳይሬክተሩ እና በባለሞያዎች በኩል ወርልድ ቱጌዘር (world together Ethiopia) ምን እየሰራ እንደሆነ ገለጻ የተደረገ ሲሆን በቲቬት ኮሌጁ እየተሰሩ ያሉ ስራዎች አንድ በአንድ አስቃኝተዋል፡፡

 

ዎርልድ ቱጌዘር ኢትዮጵያ (world together Ethiopia) በፈረንጆቹ አቆጣጠር ከ2005ዓ.ም ጀምሮ በኢትዮጵያ ሲንቀሳቀስ የቆየ እና ከ2007ዓ.ም ጀምሮ በኤጀንሲው ተመዝግቦ እየተንቀሳቀሰ ያለ ግብረ ሰናይ ድርጅት ነው፡፡ ድርጅቱ ሲመሰረት የተለያዩ የህክምና ድጋፎችን ለማድረግ የተቋቋመ ቢሆንም በሂደት በትምህርት፣ በኢፍራስትራክቸር ልማት እንዲሁም በማህበረሰብ አቀፍ ድጋፍ ላይ እየሰራ የሚገኝ ከአምስት በላይ አጋር ድርጅቶች ያሉት ግብረ ሰናይ ድርጅት ነው፡፡

በእለቱ አቶ ዶንግሆ ኪም (Mr. Dongho Kim) የኮይካ ኢትዮጵያ ካንትሪ ዳይሬክተር እንዳሉት በተለይ ዎርልድ ቱጌዘር ኢትዮጵያ (world together Ethiopia) በሚሰራው ማህበራዊ ግልጋሎት ለኮርያ ዘማች አርበኞች ልዩ ድጋፍ እያደረገ እንደሚገኝ የገለጹ ሲሆን በአሁን ጊዜ ድርጅቱ ከ105 በላይ በተለያየ አካባቢ የሚገኙ የኮሪያ ዘማች ቤተሰቦችን እየደገፈ የሚገኝ መሆኑን አንስተው በትምህርት ሴክተሩም በኤል ጂ ኮይካ ሆፕ ቲቬት ኮሌጅ (LG-KOIKA HOPE TVET COLLEGE) በኩል በርካታ ስራዎችን እየሰራ መሆኑን ገልጸዋል፡፡

አያይዘውም ድርጅቱ ከሰባት በላይ ሀገራት ውስጥ እየተንቀሳቀሰ የሚገኝ መሆኑን ጠቁመው ከነዚህ ውስጥም በኢትዮጵያ እያደረገ ያለው እንቅስቃሴ ከሌሎች ሀገሮች አንጻር ሲታይ ከፍተኛውን ድርሻ ይይዛል ብለዋል፡፡

የድርጅቱን የስራ እንቅስቃሴ የተመለከቱት የሲቪል ማህበረሰብ ድርጅቶች ኤጀንሲ ዋና ዳይሬክተር አቶ ጂማ ዲልቦ ድርጅቱ እየሰራ ባለው ነገር መደሰታቸውን ገልጸው በተለይም በሚሰጣቸው ስልጠናዎች ተማሪዎች ከትምህርቱ ባሻገር ስራ ፈጣሪና በተለይም ደግሞ በሰብዕና ግንባታ ላይ እያደረገ ያለው እንቅስቃሴ የሚበረታታ ነው ብለዋል፡፡

.