የሲቪል ማህበረሰብ ድርጅቶች ባለስልጣን የአገልጋይነት ቀንን በተለያዩ ሁነቶች አከበረ፡፡
የሲቪል ማህበረሰብ ድርጅቶች ባለስልጣን ለተቋሙ ሰራተኞችና ለመላው የሲቪል ማህበረሰብ ድርጅቶችም የአገልጋይነት ቀንን በማስመልከት የእንኳን አደረሳችሁ መልዕክት አስተላልፏል፡፡ የአገልጋይነት ቀን በልዩ ሁኔታ ሲከበር የባለስልጣን መስሪያ ቤቱ ዋና ዳይሬክተር አቶ ጂማ ዲልቦ ለባለስልጣን መስሪያ ቤቱ ተገልጋዮች መረጃ በመስጠት እንዲሁም ለተቋሙ ሰራተኞችና ተገልጋዮች የእንኳን አደረሳችሁ መልዕክትን የያዙ ካርዶችን በመስጠት እና በዛሬው እለት አገልሎት ፈልገው ወደ ተቋሙ ለሚመጡ ለአዲስና ዳግም ምዝገባ ላደረጉ የተወሰኑ ድርጅቶች አገልግሎቱን ባሉበት በመሄድ እንኳን አደረሳችሁና የምዝገባ ሰርተፍኬት ሰጥተዋል፡፡ ዋና ዳይሬክተሩ ለየድርጅቶቹ የምዝገባ የምስክር ወረቀቱንና የእንኳን አደረሳችሁ መልዕክት ባስተላለፉበት ወቅት ባለስልጣን መስሪያ ቤቱ ላለፉት 4 ዓመታት በርካታ የህግ ማሻሻያዎችን በማድረግና የተቋም ግንባታ ስራዎችን ሲያከናውን መቆየቱን ገልጸው በ2015 ዓ.ም እንደሁልጊዜው ሁሉ ፍጹም የአገልጋይነትን መንፈስ በመላበስ ተገልጋዮችን የበለጠ ለማገልገል ዝግጁ መሆኑን ገልጸዋል፡፡ ድርጅቶቹ የምዝጋባ ሰርተፍኬቱን ከተቀበሉ በኋላ ባለስልጣን መስሪያ ቤቱ እየሰጠ ስላለው ፈጣንና ቀልጣፋ አገልግሎት አመስግነው ለሀገርና ለህዝብ የሚጠበቅባቸውን ለመወጣት በትጋት እንደሚሰሩም ገልጸዋል፡፡



የመንገድ ደህንነት ቀን በእግር ጉዞና በፓናል ውይይት ተከበረ፡፡
“እኛ የሲቪል ማህበረሰብ ድርጅቶች አደጋውን ለመቀነስ ድርሻ አለን` በሚል መሪ ቃል በ03/13/2014 ዓ.ም ከጠዋቱ 1፡30 ሆኖ መነሻውን መስቀል አደባባይ ፤ መድረሻውን ካዛንችስ ያደረገ የእግር ጉዞ በማድረግና በፓናል ውይይት የመንገድ ደህንነት ቀን ተከብሮ ውሏል፡፡ በመርኃ ግብሩ ላይ የባለስልጣን መስሪያ ቤቱን ከፍተኛ የስራ ሃላፊዎችን ጨምሮ ጥሪ የተደረገላቸው የተለያዩ የሲቪል ማህበረሰብ ድርጅቶች ተወካዮች ተገኝተዋል፡፡ በዕለቱ የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ ባስተላለፉት መልዕክት የመንገድ ደህንነት ቀን ከሰላም ቀን ጋር በአንድ ላይ መዋሉ ድርብ በዓል ነው ፤ስለመንገድ ደህንነት ሲነሳ ህብረተሰቡ በሰላም ወጥቶ በሰላም መግባቱ መረጋገጥ አለበት፤ ስለዚህ እነዚህን ሁለት በዓላት ስናከብር ትልልቅ መልዕክቶችን እያስተላለፍን ነው ብለዋል፡፡ በመንገድ ደህንነት ዙሪያ የሚሰሩ የሲቪል ማህበረሰብ ድርጅቶች ጥቂት ቢሆኑም ተነሳሽነታቸው ትልቅ ነው ያሉት ዋና ዳይሬክተሩ በዚህ አይነት ተግባር ላይ የተሰማሩ ድርጅቶችንም ሆነ ግለሰቦችን ማበረታታትና ማገዝ ተገቢ እንደሆነ ጠቁመዋል፡፡ ባለስልጣን መስሪያ ቤቱ በመንገድ ደህንነት ላይ የሚሰሩ የሲቪል ማህበረሰብ ድርጅቶችን የሚያበረታታ መሆኑንና ከመንገድ ደህንነትና መድኅን ፈንድ አገልግሎት ጋር በጋራ እንደሚሰራ አክለው ገልጸዋል፡፡




በፓናል ውይይቱ ላይ ተሳታፊ የሆኑት የባለስልጣን መስሪያ ቤቱ ምክትል ዋና ዳይሬክተር አቶ ፋሲካው ሞላ በበኩላቸው በመንገድ ደህንነት ችግር በርካታ የሰው ህይወት፣ የአካል ጉዳትና የሀገር ንብረት መውደሙን አንስተው ችግሩ ከእለት እለት እየጨመረና እየሰፋ መምጣቱን አንስተዋል፡፡ ጉዳዩ ሀገራዊ ጉዳይ በመሆኑ የሁሉንም ርብርብ ይሻል ያሉት ምክተል ዋና ዳይሬክተሩ የሲቪል ማህበረሰብ ድርጅቶች በመንገድ ደህንነት ጉዳይ ላይ በስፋት ሊሰሩበት እንደሚገባ አሳስበዋል፡፡ አክለውም ግንዛቤ በመፍጠር፣ በፖሊሲና በህግ ማዕቀፍ መመራት መተግበር፤ በጥናትና ምርምር ማገዝ እና ዘላቂና ቀጣይነት ያለው ስራ ማከናወን ችግሩን ለመቅረፍ ያስችላል ያሉ ሲሆን በየዘርፉ ከሚገኙ ባለድርሻ አካላት ጋር በቅንጅት መስራት ውጤታማ ያደርጋል ብለዋል፡፡ የሲቪል ማህበረሰብ ድርጅቶች ባለስልጣን ማህበራዊ ኃላፊነቱን ለመወጣት በርካታ ስራዎችን እየሰራ ሲገኝ ከጳጉሜ እስከ ጳጉሜ እንደርሳለን በሚል የመግባቢያ ሰነድ ከቀድሞው የትራንስፖርት ሚንስቴርና ከመንገድ ደህንነት ማህበር ጋር መፈረሙ የሚታወስ ሲሆን በተለያዩ የመንገድ ደህንነት የግንዛቤ ማስጨበጫ መርኃ ግብሮች ላይ በመሳተፍ ማህበራዊ ኃላፊነቱን እየተወጣ ይገኛል፡፡
ባለስልጣን መስሪያ ቤቱ የበጎ ፈቃደኝነት ቀንን በማስመልከት የደም ልገሳ መርኃ ግብር አካሄደ፡፡
በሲቪል ማህበረሰብ ድርጅቶች ባለስልጣን የበጎ ፈቃደኝነት ቀንን ምክንያት በማድረግ የደም ልገሳ መርኃ ግብር ተከናውኗል፡፡ በደም ልገሳ መርኃ ግብሩ ላይ የባለስልጣን መስሪያ ቤቱን ከፍተኛ የስራ ኃላፊዎችን ጨምሮ የተቋሙ ሰራተኞች ተሳታፊ ሆነዋል፡፡
በደም ልገሳ መርኃ ግብሩ ወቅት ያነጋገርናቸው የባለስልጣን መስሪያ ቤቱ ዋና ዳይሬክተር አቶ ጂማ ዲልቦ በማህበረሰቡ ውስጥ የበጎ ፈቃደኝነትና በጎ አድራጊነት ባህል እንዲያድግ በአዋጅ ለባለስልጣን መስሪያ ቤቱ ተሰጥቷል ያሉ ሲሆን ይህንንም ለመወጣት የተለያዩ መንገዶች መኖራቸውን አንስተዋል፡፡ ከነዚህም አንዱ የሲቪል ማህበረሰብ ድርጅቶች በበጎ ፈቃድ ስራዎች ላይ እንዲሳተፉ ማበረታታትና ማገዝ አንዱ ሲሆን ሁለተኛው ደግሞ እንደተቋም ባለስልጣን መስሪያ ቤቱ በበጎ ፈቃድ ተግባራት ላይ ተሳትፎ ማድረግ ነው ብለዋል፡፡ ባለስልጣን መስሪያ ቤቱ በአዋጅ የተሰጠውን ስልጣንና ተግባር ለመወጣት ካሁን በፊት ያልነበረ አዲስ ልምምድ ማምጣት አስፈላጊ መሆኑን ስለተግባባን የበጎ ፈቃደኝነትና በጎ አድራጊነትን ባህል ለማድረግ ራሱን የቻለ የስራ ክፍል በማቋቋም ወደ ስራ ገብተናል፡፡ በዚህ የስራ ክፍል አማካኝነት በአዋጅ የተሰጠንን ስልጣንና ኃላፊነት መሬት ላይ በማውረድ ተግባራዊ ለማድረግ በርካታ ስራዎች ተሰርቷል በማት አብራርተዋል፡፡ የበጎ ፈቃደኝነትን ለማጎልበትና ለመምራት የሚያስችል ጋይዳንስ ኖት ተዘጋጅቶ ለሲቪል ማህበረሰብ ድርጅቶችና ለሚመለከታቸው የመንግስት የስራ ኃላፊዎች የማስተዋወቅና ስልጠናዎችን መሰጠታቸውንም ጠቁመዋል፡፡ ከሴቶችና ማህበራዊ ጉዳይ ሚንስቴር ጋር በመሆን በሀገር አቀፍ ደረጃ የበጎ ፈቃድ ፖሊሲ እንዲወጣ በትኩረት እየሰራን እንገኛለን ሲሉ ገልጸዋል፡፡



የሲቪል ማህበረሰብ ድርጅቶች በበጎ ፈቃደኝነት ላይ እንዲሳተፉ እና ሌሎችንም እንዲያሳትፉ ለማድረግ በርካታ ስራዎች ተሰርቷል፡፡ ከነዚህም ውስጥ የሲቪል ማህበረሰብ ድርጅቶችን ማበረታታት፣ ስልጠናዎችን መስጠት፣ አቅማቸውን ማጎልበት በስፋት የሰራንበት ነው፡፡ ይህን ለማገዝ VIMS የሚባል ሶፍትዌር በማበልጸግ በጎ ፈቃደኛ የሆኑ ማንኛውም ግለሰብ ባለበት ሆኖ ለበጎ ፈቃድ አገልግሎት መመዝገብ የሚችልበት አሰራር ከአንድ የሲቪል ማህበረሰብ ድርጅት ጋር በመሆን ሰርተናል፡፡ እንደሀገር ለበጎ ፈቃደኝነት ትልቅ ትኩት ተሰጥቷል፡፡ወደፊት የበጎ ፋቃድ ፖሊሲ ሲወጣ የበለጠ የሚዳብር እንደሚሆን ትልቅ እምነት አለን፡፡ የዛሬውን የበጎ ፈቃደኝነት ቀንን ስናከብር ግን በጎ ፈቃደኝነት አንዱ የህይወታችን አካል እንደሆነ ማሰብ እና አንዳችን ላንዳችን እጅግ አስፈላጊ እንደሆንን፤ ሰላምን እንደሚያሰፍን፣ ጠብን እንደሚያርቅ ታሳቢ የምናደርግበት ነው፡፡ ለዚህም ነው ዛሬ የተቋማችን ሰራተኞች ደም ሲለግሱ በሰጡት ደም የዜጎችን ህይወት እየታደጉ ያሉት፡፡ የሲቪል ማህበረሰብ ድርጅቶችን በሚመለከት ግን የሲቪል ማህበረሰብ ድርጅቶች በፈቃደኝነት የሚመሰረቱና ለትርፍ ያልተቋቋሙ ከመሆናቸውም በላይ የማህበረሰቡን ችግር ለመፍታት የተቋቋሙ ናቸው፡፡ ስለዚህ በጎ ፈቃደኝነትንና በጎ አድራጊነትን የስራቸው መሰረት ማድረግ ይጠበቅባቸዋል፡፡ ሲቪል ማህበረሰብ ድርጅቶችን ከሌላው ለየት የሚያደርጋቸውም የበጎ ፈቃደኝነት እሳቤን በመያዛቸው ነው ያሉት ዋና ዳይሬክተሩ ይህን እሳቤያቸውን መሰረት አድርገው ወደፊትም መንቀሳቀስ እንደሚገባቸው መልዕክቴን ላስተላልፍ እወዳለሁ ብለዋል፡፡
የባለስልጣን መስሪያ ቤቱ ምክትል ዋና ዳይሬክተር አቶ ፋሲካው ሞላ በበኩላቸው ወቅታዊ ሀገራዊ ጉዳዮችን ተከትሎ ከበጎ ፈቃደኞች ብዙ እንደሚጠበቅ አንስተው ባለስልጣን መስሪያ ቤቱ የበጎ ፈቃደኝነት ተግባር ቀጣይነት እንዲኖረውና ባህል እንዲሆን በርካታ ስራዎችን በመስራት ላይ ይገኛል ብለዋል፡፡ በርካታ የበጎ ፈቃድ ተግባራት በባለስልጣን መስሪያ ቤቱ እንዲሁም በሲቪል ማህበረሰብ ድርጅቶች ተከናውነዋል ያሉት ምክትል ዋና ዳይሬክተሩ ይህን ተግባር ላለፉት ጊዚያት ሲወጡ ለነበሩ ድርጅቶችና ተቋማት ምስጋናቸውን አቅርበው በሰው ሰራሽና በተፈጥሮ አደጋዎች ብዙ ዋጋ እየከፈሉ ያሉ ዜጎቻችንን ለመደገፍ ከመደበኛው ወቅት በበለጠ እያንዳንዱ ዜጋ በበጎ ፈቃድ ተግባራት ላይ መሳተፍና ዜጎቻችንን መደገፍ ይኖርበታል፡፡ የባለስልጣን መስሪያ ቤቱ ሰራተኞች ዛሬ እለቱን በማስመልከት የደም ልገሳ መርኃ ግብር ላይ የተሳተፉትን እያመሰገንን የሲቪል ማህበረሰብ ድርጅቶችም የበጎ ፈቃደኝነትና በጎ አድራጊነት ተግባርን መርተውት ባህል እንዲያደርጉት በዚህ አጋጣሚ ጥሪያችንን እናስተላልፋለን ሲሉ ምክትል ዋና ዳይሬክተሩ ተናግረዋል፡፡
ዓለም አቀፍ ማህበረሰብ የኢትዮጵያን እውነታ እንዲገነዘብ የሲቪል ማህረሰብ ድርጅቶች ከወትሮ በበለጠ መስራት እንዳለባቸው ተገለፀ፡፡
ይህ የተገለፀው የሲቪል ማህረሰብ ድርጅቶች ባለስልጣን የ2014 በጀት ዓመት የእቅድ አፈጻጸም ሪፖርት እና የ2015 በጀት ዓመት ዕቅድ በሚያቀርብበት ወቅት ነው፡፡
የመክፈቻ ንግግር ያደረጉት የሲቪል ማህበረሰብ ድርጅቶች ባለስጣን ዋና ዳይሬክተር አቶ ጂማ ዲልቦ እንዳሉት ከአገራችን ፈተናዎች መካከል የዴሞክራሲ ባህል አለመጎልበት፣ ድህነትና የሰላም እጦት መሆኑን በመግለጽ በተለይም በአሸባሪው ህወሓት ቡድን የተከፈተው ተደጋጋሚ ጦርነት ለአገራዊ አንድነት ትልቁ ፈተና ሆኖ ይገኘል ሲሉ ገልፀዋል፡፡ በመንግስት በኩል የተደረገው የተናጥል የተኩስ አቁም ስምምነት በመደፍጠጥ ለሰላም የተዘረጉ እጆችን ባለመቀበል ቡድኑ ከውጪ ታሪካዊ ጠላቶች ጋር በማበር ኢትዮጵያን ለመበታተን ለሶስተኛ ጊዜ የከፈተብን ጦርነት አሁንም ለሰላማዊ ዜጎች ሞት መፈናቀልና ስደት መዳረጉን አንስተዋል፡፡ መንግስት አሁንም ለሰላም ቅድሚያ በመስጠት ይህ ቡድን የወረረውን አካባቢ በመልቀቅ ወደ ሰላም እንዲመለስና ችግሮችን በውይይት ብቻ እንዲፈቱ አሁንም ተስፋ ባለመቁረጥ ጥረት እንያደረገ መሆኑን አብራርተዋል፡፡ ሌላው ያነሱት ሀገራዊ አንድነታችንን በማጠንከር ፊታችንን ወደ ልማት ለማዞር ከጦርነት አዙሪት ውስጥ መውጣት አለብን፤ በጦርነት ውስጥ ሆኖ ዘላቂ ልማት ማሰብ አይቻልም፤ በድህነት ውስጥ ያለችን ሀገር በጦርነት አዙሪት ውስጥ ማቆየት ለኢትዮጵያ አይገባትም፣ አገራችን በብዙ መከራዎች ውስጥ ያለፈች አገር ናት፤ ያጋጠሟት ፈተናዎችና መከራዎች ሊበታትኗት ባይችሉም በርካታ ጠባሳዎችን ጥለዋል፡፡ ይህን የታሪክ ገጽ ለማረምና ለቀጣዩ ትውልድ ሰላምን፣ ልማትንና ህብረ ብሄራዊ አንድነትን ማውረስ እንዲቻል ሁሉም ኢትዮጵያዊ በተለይም የሲቪል ማህረሰብ ድርጅቶች የሚጠበቅባቸውን ሀላፊነት እንዲወጡ ጠይቀዋል፡፡



የኢፌድሪ ህገ መንግስ አንቀጽ 12 የመንግስት አሰራር ለህዝብ ግልጽ በሆነ መንገድ መከናወን አለበት በሚል በደነገገው መሰረት የሲቪል ማበረሰብ ድርጅቶች ባለስጣን የ2014 በጀት ዓመት ዕቅድ ክንውን ሪፖርት እንዲሁም የ2015 በጀት ዓመት እቅድ ለተገልጋዮች ማቅረብ የመድረኩ ዋና ዓላማ መሆኑን ገልጸዋል፡፡ ባስልጣን መስሪያ ቤቱ በ2014 በጀት ዓመት ትኩረት ያደረገባቸው የረፎርም ስራዎች አጠናክሮ መቀጠል፣የተገልጋዮችን እርካታ ማሳደግ፣አገልግሎት አሰጣጡን ዲጂታላይዝ ማድረግ፣የበጎ ፈቃደኝነትን ባህልና እንቅስቃሴ ማበረታታት፣ የበጎ ፈቃደኝነትን በተመለከተ የስርፀት ስራ መስራት ድርጅተቶች ግልፀኝነትና ተጠያቂነትን የሚያረጋግጥ የውስጥ አስተዳደር እና የራስ አስተዳደር ስርዓት እንዲኖራቸው ድጋፍ መስጠትና ተፈጻሚነታቸውን መከታተል እንዲሁም ድርጅቶች ስራዎቻቸውን በህግ አግባብ ማከናወናቸውን ለማረጋገጥ አስፈላጊውን ክትትልና ቁጥጥር ማድረግ ዋና ስራዎች መሆናቸውን ዋና ዳይሬክተሩ ገልፀዋል፡፡ አያይዘውም ዋና ዳይሬክተሩ የአገልግሎት አሰጣጡን ለማዘመን በ2014 በጀት ዓመት በርካታ ስራዎች የተሰሩ መሆኑን ገልጸው በዋናት በተቋሙ የሚሰጡ 48 አገልግሎቶችን በመለየት የኢ-ሰርቪስ አገ ልግሎቶችን መስጠት መጀመሩን አንስተዋል፡፡ በ2014 በጀት ዓመት የተቋሙ የአገልግሎት አሰጣጥ እርካታ 91.34% ማደጉን ተከትሎ ተቋማችን በሀገር አቀፍ ደረጃ የአገልግሎት ጥራት ሽልማት እጩ ተወዳዳሪ ለመሆን ችሏል ሲሉ ገልፀዋል፡፡



የመደራጀት መብት በተሟላ ሁኔታ መረጋገጥ መቻሉ እና የሲቪክ ምዕዳሩ መስፋቱ እንደተጠበቀ ሆኖ አዋጁን በተሟላ መልኩ ተግባራዊ ለማድረግ 17 የሚሆኑ መመሪያዎች በማዘጋጀት 8ቱ በቦርድ መጽደቃቸውን ጠቅሰው በ2014 በጀት አመት 545 የሚሆኑ ድርጅቶች ተመዝግበው ስርተፍኬት መውሰዳቸውን እንዲሁም ክትትልና ድጋፍን በተመለከተ 1781 ድርጅቶች የዴስክ ኦዲት ከ297 ድርጅቶችን የመስክ ክትትል የተደረገላቸው መሆኑን አንስተዋል፡፡ አያይዘውም በጥንካሬ ሊታዩ ከሚችሉት መካከል ብለው የጠቀሱት ከክሎችና ከባለድርሻ አካላት ጋር የሚደረገው ጉባኤ አማካኝነት ለክልሎች ሞዴል የሲቪል ማህበረሰብ ድርጅቶች መነሻ ህግ ተዘጋጅቶ ውይይት መደረጉን፣ ክልሎች ህግ እንዲያወጡ ድጋፍ መደረጉ፣የመረጃ ስርዓታችንን ለማጠንከር ጥረት መደረጉ፣ የበጎ ፈቃድ አተገባበር ማንዋል መዘጋጀቱ፣የአገልግሎት አሰጣጣችን እየተሻሻለ መምጣቱ፣ የማማክርት ጉባኤ መቋቋሙ፣ በፀደቁ መመሪያዎች ላይ ስልጠናችን መስጠቱ ሌሎችም በጥንካሬ የሚገለፁ እንዳሉ ተናግረዋል፡፡ በውስንነት የታዩ ጉዳዩች ብለው ያነሱት ዳግም ያልተመዘገቡ 1723 ድርጅቶች በሚኒስተሮች ም/ቤት በፀደቀው ደንብ 514/2014 መሰረት በድጋሚ እንዲመዘገቡ የተፈቀደ ቢሆነም የተመዘገቡት ቁጥራቸው አነስተኛ መሆኑ አንዳንድ ስራዎች በእቅድ ተይዘው አለመፈጻማቸውን አንስተዋል፡፡ ም/ዋና ዳይሬክተር አቶ ፋሲካው ሞላ የ2014 በጀት ዓመት ዝርዝር አፈጻጸሞችን እንዲሁም ወ/ሮ ቃልኪዳን መንግስቴ የእቅድ በጀትና ለውጥ ዳይሬክቶሬት ዳይሬክተር የ2015 በጀት ዓመት እቅድን አቅርበው ውይይት ተደርጎባቸዋል::
ከሲቪል ማኅበረሰብ ድርጅቶች ጋር ‹‹የጎለበተ የሲቪል ማህበረሰብ ድርጅቶች ተሳትፎ ለሃገር ግንባታ›› በሚል ርዕስ ውይይት ተደረገ፡፡
የሲቪል ማህበረሰብ ድርጅቶች ከለውጡ በኋላ ያከናወኗቸው በርካታ አመርቂ ስራዎችን ለማስቀጠል ፣ ያጋጠሙ ችግሮችን በመለየትና መፍትሄ በመስጠት የዳበረ የነቃና ሃላፊነቱን የሚወጣ ዘርፍ እንዲሆን ለማስቻል መድረኩ መዘጋጀቱ ተገልጿል፡፡ ዶ/ር ዓለሙ ስሜ የዴሞክራሲ ስርዓት ግንባታ ማዕከል አስተባባሪ ሚኒስትር በመክፈቻ ንግግራቸው እንደገለጹት እንደሃገር አራት ቁልፍ ሚና አላቸው ተብለው ከተለዩት ዘርፎች መካከል የሲቪል ማህበረሰብ ድርጅቶች አንድ መሆኑን በመግለጽ ይህንን የተገነዘበ እና ተመሳሳይ ምልከታ ያለው መዋቅር መኖሩንም ገልጸዋል፡፡ ሃገርን ለማሻገር የሁሉም ተዋንያን ተሳትፎ ያስፈልጋል ያሉት ሚኒስትሩ ድርጅቶች የሰሯቸው በርካታ ተግባራት አበረታች ቢሆንም በዘርፉ ካለው እውቀትና ገንዘብ አንጻር ከዚህ የበለጠ መስራት ይጠይቃል ሲሉ ጠቁመዋል፡፡ ከዚህ ቀደም የተዘራውን ጥላቻና ቂም በቀል አስወግዶ በሃገሪቱ ሰላምን ለማስፈን የሲቪል ማህበረሰብ ድርጅቶች ሚና ከፍተኛ መሆኑን በመግለጽ ይህንን ተግባራዊ ለማድረግ አቅምን አሟጦ መጠቀም ያስፈልጋል ብለዋል፡፡



ከሲቪል ማህበረሰብ ድርጅቶችም ጋር በቀጣይነት ያጋጠሙ ችግሮችን እየፈቱ ለመሄድ ተከታታይ የሆነ መድረኮች ማዘጋጀት፣በጋራ ማቀድና መስራት እንዲሁም መረጃ መለዋወጥ ያፈልጋል ሲሉ ገልጸዋል፡፡ የሲቪል ማህበረሰብ ድርጅቶች ባለስልጣን ም/ዋና ዳይሬክተር አቶ ፋሲካው ሞላ የሲቪል ማህበረሰብ ድርጅቶች ከለውጡ በኋላ በዘርፉ የተገኘ ስኬት፣ተግዳሮቶችና የቀጣይ አካሄዶች ላይ መነሻ ጽሑፍ አቅርበዋል፡፡ በቀረበው ሰነድ ላይም በርካታ ገንቢ ሃሳቦች፣ አስተያየቶችና ጥያቄዎች ተነስተው ማብራሪያ ተሰጥቶባቸዋል፡፡ በውይይቱ የፌደራል እና የሁሉም ክልል ከፍተኛ የስራ ሃላፊዎች እንዲሁም የተለያዩ የሲቪል ማህበረሰብ ድርጅቶች ሃፊዎችና ተወካዬች ተሳታፊ ሆነዋል፡፡
የኢፌዲሪ የሲቪል ማኅበረሰብ ድርጅቶች ባለስልጣን ‘ዐሻራችን ለትውልዳችን’ በሚል መሪ ቃል አራተኛውን ዙር የአረንጓዴ ዐሻራ የማስቀመጥ መርሐ ግብር በቡታጂራ አካሂዷል፡፡
በፕሮግራሙ የተቋሙ ምክትል ዋና ዳይሬክተርን ጨምሮ ሚኒስትሮች፣የደቡብ ክልል ቢሮ አመራሮችና ሰራተኞች፣የከተማዋ ከንቲባ እና ነዋሪዎች ፣የሲቪል ማህበረሰብ ድርጅቶች ምክር ቤት ሃላፊዎች እንዲሁም ጥሪ የተደረገላቸው የሲቪል ማህበረሰብ ድርጅቶች ተሳታፊ ሆነዋል፡፡ ፕሮግራሙን የዴሞክራሲ ሥርዓት ግንባታ ማዕከል አስተባባሪ ሚኒስትር ዶ/ር አለሙ ስሜ እንዳሉት የሲቪል ማኀበረሰብ ድርጅቶች ከለውጡ በኃላ በመንግሥትና በግል ባለሃብቱ የማይሸፈኑ የልማት ሥራዎችን በመተካት ወሳኝ ሚና እየተወጡ እንደሚገኙ ገልጸው ከሀገራዊ ለውጡ በፊት የሲቪል ማኅበረሰብ ድርጅቶች እንደጸረ ሰላምና ሰላይ የሚታዩበት ሁኔታ አሁን ተቀይሮ ከመንግሥትና ሌሎች ባለድርሻ አካላት ጋር በትብብርና በጋራ ሀገር የማልማት ኃላፊነታቸውን እየተወጡ ነው ሲሉ ገልጸዋል፡፡ ሀገር የምትበለፅገው አቅምና የተፈጥሮ ሃብትን አስተባብሮ ጥቅም ላይ ማዋል ሲቻል መሆኑን ጠቁመው መርሐ ግብሩ አየር ንብረትን ለመጠበቅ ዛፍ ከመትከል ባሻገር አብሮነትንና ወንድማማችነትን በማጠናከር ኢትዮጵያውያን እርስ በእርስ እንድንተዋወቅ እድል የፈጠረ ነው ሲሉ ሚኒስትሩ አክለው ተናግረዋል፡፡



የሲቪል ማህበረሰብ ድርጅቶች ባለስልጣን ም/ዋና ዳይሬክተር አቶ ፋሲካው ሞላ በበኩላቸው የሲቪል ማህበረሰብ ድርጅቶች 4ኛውን የአረንጓዴ አሻራ የማሳረፍ አገራዊ ጥሪ መሰረት በማድረግ በዛሬው እለት በቡታጅራ ከተማ ችግኝ ለመትከል መሰባሰባቸው ዘርፉ በአገር የልማት እንቅስቃሴ ላይ በንቃትና ትርጉም ባለው መልኩ እየተሳተፈ የመሆኑ ማሳያ ነው ሲሉ ገልጸዋል፡፡ በባለፉት አራት ክረምቶች የአረንጓዴ አሻራ መርሃ-ግብሮች የአረንጓዴ ልማት ውጤታማ በማድረግ ዘርፈ ብዙ ኢኮኖሚያዊ ጠቀሜት የሚኖረው ከመሆኑ ባሻገር ለመጪው ትውልድ ለምለም ምድር የማስተላለፍ ሃላፊነት የሚሰማው ዜጋ የሚያከናውነው መልካም ተግባር ነው ሲሉ አክለው ተናግረዋል፡፡ አያይዘውም ይህንን በመገንዘብ በችግኝ ተከላ ፕሮግራም ላይ የምትሳታፉ ሁሉ አረንጓዴ አሻራ የሚያሳርፈው ትውልድ አካል ስለሆናችሁ እንኳን ደስ አላችሁ በማለት መልዕክታቸውን አስተላልፈዋል፡፡



ባለስልጣን መስሪያቤቱም በአረንጓዴ አሻራ መርሃ-ግብሮች ላይ ሲቪል ማህበረሰብ ድርጅቶችን በማስተባበር ተሳትፎ ማድረጉን እና በዘንድሮው መርሃ-ግብርም በተለያዩ የአገሪቱ ክፍሎች በመንቀሳቀስ አሻራ ማሳረፍ መቻሉን አንስተዋል፡ በመጨረሻም የችግኝ መትከል ፕሮግራሙን ከአዲስ አበባ ራቅ ያሉ የክልል ከተሞች በመንቀሳቀስ ማከናዎን መቻሉ ከችግኙ ከሚገኘው ጠቀሜታ ባሻገር የአንድነት፣የአጋርነት፣ የመተሳሳብ፣ የአብሮነት፣ የትብብር እና የወንድማማችነት እሴትን በመገንባት ረገድ ከፍተኛ አስተዋጽኦ ያለው መሆኑን በማንሳት ይህንኑ በጋራና በመቀናጀት በተለያዩ የአገራችን ክፍሎት የሚደረገው የችግኝ ተከላ ዘመቻ ውጤታማ በሆነ መልኩ ሊቀጥል ይገባዋል ሲሉ መልዕክታቸውን አስተላልፈዋል፡፡
የአፍሪካ የአመራር ልህቀት ማዕከል /African Leadership Excellence Academy/ የሲቪል ማህበረሰብ ድርጅቶችን የአመራር አቅም በመገንባታ ረገድ ከፍተኛ አስተዋፅኦ ሊያበረክት እንደሚችል ተገለፀ፡፡
የተቋሙ ም/ዋና ዳይሬክተር አቶ ፋሲካው ሞላን ጨምሮ የሲቪል ማህበረሰብ ድርጅቶች አመራሮች፣ የሲማድ ምክር ቤት ኃላፊዎችና ሰራተኞች የአመራር ክህሎትና አቅምን ለመገንባት ዓላማ አድርጎ የተቋቋመውን “የአፍሪካ የአመራር ልህቀት ማዕከልን በአካል ተገኝተው ጎብኝተዋል፡፡ ይህ ጉብኝት የሲቪል ማኅበረሰብ ድርጅቶች በማዕከሉ ተጠቃሚ በመሆን በዘርፉ የአመራር አቅምን የበለጠ ማጎልበትን ታሳቢ በማድረግ በባለስልጣን መ/ቤቱ የተጀመረው ግንኙነት ቀጣይ አካል መሆኑ ተብራርቷል፡፡ በጉብኝቱ ወቅት ከማእከሉ ምክትል ዋና ስራ አስፈፃሚ ወ/ሮ ህይወት አለማየሁ ጋርም በቀጣይ በየሲቪል ማህበረሰብ ድርጅቶች በማእከሉ መጠቀም በሚችሉበት ሁኔታ ላይ ውይይት ተደርጓል፡፡ በሱሉልታ ከተማ የሚገኘው ይህ ማዕከል ከ600 በላይ ተሳታፊዎችን በአንድ ጊዜ የመያዝ አቅም ያለው እንዲሁም ዓለም አቀፍ ደረጃቸውን በጠበቁ የስብሳባ አዳራሾችና ሌሎች ግብዓቶች የተሟላ ሲሆን የመንግስት፣ የሲቪል ማህበራትንና የግሉን ሴክተር የአመራር አቅም ለመገንባት የሚንቀሳቀስ መሆኑ በባለስልጣኑ ማቋቋሚያ የሚኒስትሮች ምክር ቤት ደንብ ቁጥር 484/2013 ተደንግጓል፡፡ የባለስልጣኑ ምክትል ዋና ዳይሬክተር አቶ ፋሲካው ሞላ ማዕከሉ ደረጃው በጠበቀ መንገድ አገልግሎት የሚሰጥ የአመራር አቅም ግንባታ ማዕከል መሆኑን በመግለፅ የሲቪል ማህበረሰብ ድርጅቶች የአመራር ክህሎትና ብቃት በመገንባት በተሰማሩበት መስክ ውጤታማ እንዲሆኑ ከማድረግ አንፃር ከፍተኛ አስተዋፅኦ ያለው መሆኑን አፅንኦት ሰጥተው በመናገር ባለስልጣን መ/ቤቱም የሲቪል ማህበረሰብ ድርጅቶች በማእከሉ ተጠቃሚ እንዲሆኑ አስፈላጊውን ድጋፍ የሚያደርግ መሆኑን ገልፀዋል፡፡



የሲቪል ማህበረሰብ ድርጅቶች ምክር ቤት አመራሮች በበኩላቸው ማእከሉ ደረጃውን የጠበቀ ሆኖ የተገነባ መሆኑን አድንቀው የሲቪል ማህበራትን የአመራር ብቃት ለመገንባት እንደሲቪል ማህበራት በጋራ እንዲሁም በተናጥል በየድርጅቱ በማእከሉ ለመጠቀም ፍላጎት ያለ መሆኑን በመግለጽ ትብብሩ ስትራቴጅያዊ ሆኖ እንዲቀጥል ምክር ቤቱ ተገቢውን ተግባራት የሚያከናውን መሆኑን አብራርተዋል፡፡ የማእከሉ ምክትል ርዕሰ አካዳሚ ወ/ሮ ሕይወት አለማየሁ እንደገለጹት ማዕከሉ ለመንግስት፣ ለሲቪል ማህበራትና ለግሉ ዘርፍ የአመራር አቅም ግንባታ አስተዋፅኦ ለማድረግ ውጤታማ ተግባራትን እያከናወነ እንደሆነ እና በኢትዮጵያ የሚንቀሳቀሱ የሲቪል ማህበረሰብ ድርጅቶችም በማእከሉ በመገኘት የአመራር አቅማቸውን ሊያዳብር የሚችሉ ስልጠናዎችን መውሰድ የሚችሉ መሆኑን ገልፀዋል፡፡ በተጨማሪም ከሲቪል ማህበራት ፍላጎት የሚነሳ የስልጠና ሞጁል የማዘጋጀት እቅድ ያላቸው መሆኑን አንስተው በዓለም አቀፍ እንዲሁም በአፍሪካ ደረጃ ላሉ የሲቪል ማህበራትም ማዕከሉ የአጭር፣ የመካከለኛና የረጅም ጊዜ ስልጠናዎችን መስጠት የሚያስችል በግብዓትም ሆነ በይዘት ደረጃ የተደራጀ አቅም ያለው መሆኑን አስረድተዋል፡፡ በውይይቱም በቅርቡ በርካታ የሲቪል ማህበረሰብ ድርጅቶች አመራሮች በሚገኙበት የአመራር ወርክሾፕ በማእከሉ ለማካሄድ እንዲሁም ትብብሩን ቀጣይነት ያለው እንዲሆን ለማድረግ የጋራ መግባቢያ ስምምነት ለመፈራረም ስምምነት ላይ ተደርሷል፡፡
የባለስልጣን መስሪያ ቤቱ የአገልግሎት አሰጣጥ 91.34% መድረሱን እና ከባለፈው ተመሳሳይ ወቅት ጋር ሲነጻጸር በ4% ብልጫ ማሳየቱ ተገለጸ፡፡
ተቋሙ የ2014 በጀት ዓመት አፈጻጸሙን እና የ2015 በጀት ዓመት እቅድ በማኔጅመንት ደረጃ እንዲሁም ከአጠቃላይ ሰራተኛ ጋር እየገመገመ ይገኛል፡፡ በበጀት አመቱ 587 አዲስ የሲቪል ማህበረሰብ ድርጅቶች መመዝገባቸው፣ከክልሎችና ባለድርሻ አካላት ጋር ሞዴል የሲቪል ማህበረሰብ ድርጅቶች መነሻ ህግ ተዘጋጅቶ ውይይት መደረጉና ክልሎች ህግ እንዲያመጡ ድጋፍ መደረጉ፣የሚሰጡ አገልግሎቶችን በመለየትና ሰራተኞችን በማሰልጠን የኢ-ሰርቪስ አገልግሎት መጀመሩ፣የዴስክ ኦዲት በማድረግ መረጃዎችን መያዝ መቻሉ፣በበጎ ፈቃድ አተገባበር ማንዋል መዘጋጀቱና ለሲ.ማ.ድ ድርጅቶች የማስተዋወቂያ መድረኮች መካሄዳቸው፣አገልግሎት አሰጣጣችንን ሊመዝን የሚችል ስታንዳርድ ተዘጋጅቶ ስራ ላይ መዋሉ በተጨማሪም አገልግሎት አሰጣጣችን ከጊዜ ወደ ጊዜ እየተሻሻለ መሆኑ፣አገልግሎት አሰጣጣችንን ለማሻሻል እንዲቻል የመማክርት ጉባኤ በማቋቋም ስራ መጀመሩ፣ አቅምን ሊያሳድጉ የሚችሉ ስልጠናዎች ለሰራተኞች መሰጠቱ፣በፀደቁ መመሪያዎች ለሲቪል ማህበረሰሰብ ድርጅቶች ስልጠና መሰጠ፤በጎ ፈቃደኛንና በጎ ፈቃድ ፈላጊ ድርጅቶችን ሊያገናኝ የሚችል ሲስተም (VMIS) በልፅጎ ስራ ላይ መዋሉ፣ሁለተኛው የሲቪል ማህበረሰብ ድርጅቶች ቀን በደማቅ ሁኔታ መከበሩ፣የተለያዩ የበጎ ፍቃድ አገልግሎቶች የማስተባበርና የማከናወን ስራ መሰራቱ፣ የመማክርት ጉባኤ መቋቋሙ፣የአቅም ግንባታ ስራ ትኩረት አድርጎ መሰራቱ፣ ክልሎችን ያካተተ በዘርፉ የውጭ ሃገር ልምድ መወሰዱ እንዲሁም በሃገሪቱ በተከሰተው ጦርነትና ድርቅ ለተጎዱ ዜጎች የሲቪል ማህበረሰብ ድርጅቶችን በማስተባበር ምላሽ መሰጠቱ በበጀት ዓመቱ ከተከናወኑ ተግባራት መካከል መሆናቸውን ወ/ሮ ቃልኪዳን መንግስቴ የእቅድ፣በጀትና ክትትል ዳይሬክቶሬት ዳይሬክተር ገልጸዋል፡፡



የተቋሙ ዋና ዳይሬክተር አቶ ጂማ ዲልቦ በንግግራቸው እንደገለጹት በ2014 በጀት ዓመት እንደ ሃገር ብዙ ፈተናዎች የነበሩ መሆኑን አስታውሰው በዚሁ ሂደት በርካታ ተግባራትን በማከናወን ስኬት ያስመዘገብንበት ነው ብለዋል፡፡ ዋና ዳይሬክተሩ አክለውም አገልግሎት ሰጪ ተቋም እንደመሆናችን መጠን ስታንዳርድና ማንዋል፣የአሰራር ስርዓቶች ያስፈልጋሉ ይህንን ተግባራዊ አድርገናል ከዚህ በተጨማሪ እንደሃገር የተጀመረውን አዲስ መዋቅር አደረጃጀት መፈጸም፣የበጎ ፍቃድ ፖሊሲ እና ረቂቅ መመሪያዎችን የማጸደቅ፣የተጀመሩ ቋሚ መድረኮቻችን ማስቀጠል ትኩረት ሰጥተን የምንሰራቸው ጉዳዬች ይሆናሉ ሲሉ ተናግረዋል ፡፡ የተቋሙ ም/ዋና ዳይሬክተር አቶ ፋሲካው ሞላ በበኩላቸው በተቋሙ የተጀመረው የኦላይን አገልግሎት አጠናክሮ መቀጠል እና በተቋሙ Digitalization transformation ማረጋገጥ ቁልፍ ስራ ሆኖ መሰራት አለበት ብለዋል፡፡ ሌላው የዳግም ምዝገባ ሂደትን ማጠናቀቅ፣የእርስ በእርስ ቁጥጥርን ማጎልበት፣ለወቅታዊ ሃገራዊ ጉዳይ በሁለተኛ ዙር ቃል የገቡ ድርጅቶችን በማስተባበር ጉዳቱ ለደረሰበት አከባቢ ተደራሽ እንዲሆን ማስቻል ትኩረት ሰጥን የምንሰራቸው ጉዳዬች ይሆናሉ ሲሉ ገልጸዋል፡፡



በተቋሙ የተከናወኑ ስራዎችን በተመለከተም በተለያዩ መንገዶች ለማህበረሰቡ ተደራሽ የማድረግ ስራ ተሰርቷል፡: በዚሁ ልክ ደግሞ የተወሰኑ ተግባራ ሳይከናወኑ የቀሩ በመኖራቸው እሱን በ2015 ዓ.ም አካተን መፈጸም አለብን ሲሉ መ፤ልዕክታቸውን አስተላልፈዋል፡፡
የሲቪል ማህበረሰብ ድርጅቶች ባለስልጣን “አረንጓዴ አሻራችን ለትውልዳችን” በሚል መሪ ቃል ከፍትህ ሚንስቴር ተጠሪ ተቋማት ጋር በመሆን የችግኝ ተከላ መርኃ ግብር አካሄደ፡፡
የሲቪል ማህበረሰብ ድርጅቶች ባለስልጣን “አረንጓዴ አሻራችን ለትውልዳችን” በሚል መሪ ቃል ከፍትህ ሚንስቴር ተጠሪ ተቋማት ጋር በመሆን የችግኝ ተከላ መርኃ ግብር አካሄደ፡፡ የሲቪል ማህበረሰብ ድርጅቶች ባለስልጣን በሰሜን ሸዋ ዞን አሳግርት ወረዳ ታሞ ቀበሌ ከሶስት ሺህ በላይ ለምግብነት የሚውሉ ችግኞችን የፍትህ ሚንስቴር ሚንስትር ደዔታ አቶ አለም አንተ አግደውና የሰሜን ሸዋ ዞን ምክትል ዋና አስተዳዳሪ አቶ ክላል ሳህለማሪያም እንዲሁም ሌሎች ከፍተኛ የመንግስት ሃላፊዎች በተገኙበት አከናውኗል፡፡
የዞኑ ምክትል ዋና አስተዳዳሪ አቶ ክላል ሳህለማሪያም በአረንጓዴ አሻራው መርኃ ግብር ላይ የተሳተፉትን ሁሉ እንኳን ደህና መጣችሁ ካሉ በኋላ ዞኑ የአረንጓዴ አሻራ መርኃ ግብር ከተጀመረ ጊዜ አንስቶ በዞኑ ከጊዜ ወደ የማልማት ብቻ ሳይሆን የማጸደቅ ስራ እያደገ መምጣቱን አንስተው በአሁን ጊዜ በአንድ ቀን የችግኝ ተከላ መርኃ ግብር ብቻ ወደ 48.6 ሚሊዮን የሚጠጉ ችግኞችን መትከል መቻላቸውን ገልጸዋል፡፡ በአሁኑ ጊዜ በዞኑ ከሁለት መቶ ሰባ ሚሊዮን በላይ ችግኞችን ለመትከል ዕቅድ ተይዞ ከ180 ሚሊየን ችግኞቸ መተከሉን ምክትል ዋና አስተዳዳሪው ገልጸዋል፡፡



የፍትህ ሚኒስቴር ሚንስትር ደዔታው አቶ አለም አንተ አግደው በበኩላቸው ችግኝ ከመትከል ባሻገር አብሮ ተባብሮ ለማደግ ያለንን ፍላጎት ለመግለጽና ድጋፋችንን እንዲሁም ከወገናችን ጋር አብረን መሆናችንን ለማሳየት ጭምር መጥተናል ያሉ ሲሆን የአካባቢው ምርታማነት እንዲቀጥልና ለትውልድ እንዲሸጋገር ከተፈለገ ሁሉም አሻራውን ማኖር አለበት ብለዋል፡፡ በቀበሌው የተጀመረው ስራ ትልቅ ነው እኛ ደግሞ ዛሬ እዚህ የተገኘነው ይህንን ተግባር ለመደገፍ ነው በማለት ሚንስትር ዴኤታው አክለው ገልጸዋል፡፡ የባለስልጣን መስሪያ ቤቱ ዋና ዳይሬክተር አቶ ጂማ ዲልቦ በበኩላቸው ችግኝ መትከል በርካታ ጠቀሜታዎች እንዳሉት አንስተው ከ4 ዓመት በፊት የተጀመረው የአረንጓዴ አሻራ መርኃ ግብር እያደገና ባህል እየሆነ መምጣቱን አንስተዋል፡፡


ችግኝ መትከል ብቻ ሳይሆን መንከባከብ እንደሚገባ ያነሱት ዋና ዳይሬክተር አቶ ጂማ ዲልቦ ካሁን በፊት በዘመቻ ይደረግ የነበረው አሁን ግን አመቱን ሙሉ፤ ክረምት ደግሞ በልዩ ሁኔታ እየተሰራ ነው ሲሉ ገልጸዋል፡፡ በችግኝ ተከላ መርኃ ግብሩ ላይ የታሞ ቀበሌ ነዋሪዎችን ጨምሮ ከፍተኛ የፌደራልና የክልል እንዲሁም የዞን የስራ ኃላፊዎች ተገኝተዋል፡፡
5ተኛው የኢፌዲሪ የሲቪል ማኅበረሰብ ድርጅቶች ባለስልጣን እና የክልልና የፌደራል ባለድርሻ አካላት የጋራ ጉባኤ በአርባ ምንጭ ከተማ እየተካሄደ ይገኛል፡፡
በጉባኤው ላይ የተለያዩ ሚኒስትሮች ሚኒስትር ዴኤታ፣የፌደራልና የክልል ገንዘብና ኢኮኖሚ እና ጠቅላይ አቃቤ ህጎች፣የጋሞ አባቶች እንዲሁም የተለያዩ የፌደራል የባለድርሻ ተቋማት ሃላፊዎች በጉባኤው ላይ ተሳታፊ ሆነዋል፡፡
የጉባኤውን የመክፈቻ ንግግር ያደረጉት የኢፌዲሪ የፍትህ ሚኒስቴር ሚኒስትር ዶ/ር ጌዲዬን ጢሞቲዬስ የመድረኩ መመስረት በጣም መሰረታዊ እና አስፈላጊ መሆኑን በማንሳት እንደሃገር የሞራል ሚዛን መዛባት አጋጥሞናል ይህንን ለማስተካከል አዲስ አስተሳሰብ የተላበሰ ማህበረሰብ ለመፍጠር፣እርቅ፣ማህበራዊ እሴት እንዲዳብር እና ሰላም እንዲሰፍን የሲቪል ማህበረሰብ ድርጅቶች ሚና ከፍተኛ ነው ሲሉ ገልጸዋል፡፡ የሲቪል ማህበረሰብ ድርጅቶች ዘርፍ ውጤታማ መሆን እንደ ሃገር አስፈላጊ መሆኑን ጠቁመው ይህንን ደግሞ ወደ ተግባር ለመለወጥ የዚህ ጉባኤ እና የቅንጅታዊ አሰራሮች በጣም አስፈላጊ ነው ሲሉ መልዕክት አስተላልፈዋል፡፡
የተቋሙ ዋና ዳይሬክተር አቶ ጂማ ዲልቦ በንግግራቸው እንደገለጹት ከሲቪል ማህበረሰብ ድርጅቶች እንቅስቀሴ ጋር በተያያዘ ኃላፊነት ያላቸው የመንግስት አካላት በህግ የተሰጣቸው ስልጣንና ተግባር እንደተጠበቀ ሆኖ በዘርፋ ሃላፊነታቸውን በአግባቡ በመወጣት የሲቪል ማህበረሰብ ድርጅቶች በህግ አግባብ በመንቀሳቀስ የህዝብን የላቀ ተጠቃሚነት የሚያረጋግጥ ስራ ማከናወን እንዲችሉ እንዲሁም በሀገር ዐቀፍ ደረጃ ቅንጅታዊ አሰራርን ለማጎልበት እና ለሚያጋጥሙ ችግሮች የመፍትሄ አቅጣጫ ለማስቀመጥ የሚያስችል ጉባኤ መሆኑን ተናግረዋል፡፡



ጉባዔው የተመሰረተበትን ዓላማ ከማሳካት አኳያ አበረታች ውጤቶች የታዩ ሲሆን ከሁሉ በላይ በአስፈጻሚ አካላት መካከል መቀራረብን የፈጠረ፣ወጥነት ያለው አሰራር ከመዘርጋት አኳያም ጠቃሚ ውጤቶች ተገኝተዋል ሲሉ አብራርተዋል፡፡ በተለይም ከአራተኛው ጉባኤ በኋላ የተጀመረው የባለሙያዎች /CSO/NGO Desk ኃላፊዎች/ እንዲሁም የሲቪል ማህበረሰብ ድርጅቶች የምክክርና የልምድ ልውውጥ መድረክ ከሲቪል ማህበረሰብ ድርጅቶች አስተዳደር ጋር በተያያዘ መልካም ተሞክሮዎችን መለዋወጥ የተቻለበት መድረክ እንደነበርም አስታውሰዋል ፡፡ ዋና ዳይሬክተሩ አክለውም በዚህ ጉባዔ የተለያዩ ርዕሰ ጉዳዬች እንደሚነሱ እና በተለይም የክልል የሲቪል ማህረሰብ ድርጅቶች ረቂቅ ሕግ ላይ ትኩረት ተሰጥቶት ውይይት እንደሚደረግበት ገልጸዋል፡፡
አቶ ፋሲካው ሞላ የሲቪል ማህበረሰብ ድርጅቶች ባለስልጣን ም/ዋና ዳይሬክተር ከ4ተኛ ጉባኤ በኋላ የተከናወኑ ዋና ዋና የተቋሙ አፈጻጸሞችና ያጋጠሙ ተግዳሮቶች እንዲሁም የቀጣይ አቅጣጫን በተመለከተ ሪፖር አቅርበው ውይይት እየተደረገበት ይገኛል፡፡











