"ደማችን ለመከላከያ ሰራዊታችን"

ደም የማይሸጥ የማይለወጥ የላቀ ውድ ስጦታ ነው፡፡ ሌላ ሊተካው የሚችል ምንም ነገር የለም፤ በፋብሪካም አይመረትም፡፡ የሲቪል ማህበረሰብ ድርጅቶች ባለስልጣን አመራሮችና ሰራተኞችም ይህን ውድ ስጦታ “ደማችን” ለመከላከያ ሰራዊታችን በሚል መሪ ቃል ለ5ኛ ጊዜ የደም ልገሳ መርሀ ግብር አካሂደዋል፡፡ አገራችን አሁን እያካሄደች ባለው የህልውና ጦርነት ጀግናው የመከላከያ ሰራዊታችንን ከማገዝ አንጻር ህዝባችን ከኋላ ደጀን በመሆን የተለያዩ ድጋፎችን በማድረግ ከጎኑ መሆኑን ሲያረጋግጥ ቆይቷል፤ እያረጋገጠም ይገኛል፡፡ የሲቪል ማህበረሰብ ድርጅቶች ባለስልጣን አመራርና ሰራተኞችም ከመከላከያ ጎን መሆናቸውን በገንዘብ፣ በአይነት እና ደም በመለገስ ድጋፋቸውን እያሳዩ ይገኛሉ፡፡

የባለስልጣኑ ዋና ዳይሬክተር አቶ ጂማ ዲልቦ በደም ልገሳ መርኃግብሩ ላይ እንዳሉት ባለስልጣን መስሪያ ቤቱ ለሀገር መከላከያ ሰራዊትና በደም እጦት ችግር ላይ ለወደቁ ወገኖች አመራሩንና ሰራተኞቹን በማስተባበር ሲሰጥ ቆይቷል፡፡ ይሄኛውን የደም ልገሳ ለየት የሚያደርገው ለሀገር ህልውና ዘመቻ ላይ ለሚገኙት የመከላከያ ሰራዊትና ለክልል ልዩ ኃይል፣ ፋኖና ሚኒሻ፣ በጦርነቱ ተጎጂ ለሆኑ ወገኖቻችን እንዲሁም አካባቢያቸውን በመጠበቅ ላይ ለሚገኙ ዜጎቻችን የምናደርገው በመሆኑ ነው ብለዋል፡፡ አያይዘውም እንደባለስልጣን መስሪያ ቤት ከሲቪል ማህበረሰብ ድርጅቶች ጋርም ከሚያስማማን ጉዳይ አንዱ ደም በገንዘብ የማይተመን ውድ ስጦታ መሆኑ ነው፡፡ በደም ውስጥ ህይወት አለ፣ ስለዚህም ደም ስንሰጥ ህይወት እየሰጠን ነው፡፡ ስለሆነም ሁሉም የሲቪል ማህበረሰብ ድርጅቶች የዚህ ዘመቻ አካል ሊሆኑ ይገባል ሲሉ ተናግረዋል፡: እንደሚታወቀው የሲቪል ማህበረሰብ ድርጅቶች ጥምረት ከሚባል የሲቪል ማህበረሰብ ድርጅት ጋር በመሆን የ21 ቀን የደም ልገሳ ንቅናቄ ማስጀመራችን ይታወሳል፡፡ ይህም የዚህ ንቅናቄ አካል ተደርጎ ሊወሰድ የሚችል ነው በማለት አብራርተዋል፡፡

ለመከላከያ ሰራዊቱም የምናደርገው ድጋፍ በዚሁ ብቻ የሚቆም ባለመሆኑ የተለያዩ ድጋፎችን በዓይነትና በገንዘብ እያሰባሰብን እንገኛለን፡፡ እስካሁን ከ7 ሚልየን ብር በላይ በዓይነትና በገንዘብ ድጋፍ የሲቪል ማህበረሰብ ድርጅቶችን በማስተባበር በአጭር ጊዜ ማሰባሰብ ችለናል፡፡ የባለስልጣን መስሪያ ቤቱ ሰራተኞችና አመራሩም ደሞዛቸውን እስከመለገስ የዘለቀ ድጋፍ እያደረጉ ይገኛሉ ሲሉ ዋና ዳይሬክተሩ አክለው ገልጸዋል፡፡ ድግፋችን ጦርነቱ እሰከሚጠናቀቅና ሀገራችን ሰላሟ ተመልሶ ፊቷን ወደልማቱ እስክታዞር ድረስ ተጠናክሮ የሚቀጥል ነው ያሉት ዋና ዳይሬክተሩ ይህን ድጋፍ ማሰባሰብ እንድንችል ድጋፍ ላደረጋችሁልን የባለስልጣን መስሪያ ቤቱ ሰራተኞችና አመራሮች እንዲሁም የሲቪል ማህበረሰብ ድርጅቶች ባለስልጣን መስሪያ ቤቱ ምስጋናው ላቅ ያለ ነው ሲሉ ተናግረዋል፡፡

በደም ልገሳ መርሃ ግብሩ ላይ የታደሙት የሲቪል ማህበረሰብ ድርጅቶች ባለስልጣን ሰራተኞችና አመራሮችም በቀጣይ የአገራችን ህልውና እስኪረጋገጥና ሰላም ሰፍኖ ሀገራችን ወደልማቱ ፊቷን እስክታዞር ድረስ የማያቋርጥ ድጋፋቸውን አጠናክረው እንደሚቀጥሉም ገልፀዋል፡፡

_ አካባቢህን ጠብቅ፣
_ ወደ ግንባር ዝመት፣
_ መከላከያን ደግፍ።\
የመደራጀት መብት፤ ሰብዓዊነት፤ የህብረተሰቡ የላቀ ተጠቃሚነት!!!
የሲቪል ማህበረሰብ ድርጅቶች ባለስልጣን!!!
Authority for civil society organizations (ACSO)


በዴሞክራሲና በሰብዓዊ መብት ላይ ለተሰማሩ የሲቪል ማኅበረሰብ ድርጅቶች ስልጠና ተሰጠ፡፡

የሲቪል ማህበረሰብ ድርጅቶች ባለስልጣን ከፕሮጀስቲስ ሪሰርች ኤንድ ትሬኒንግ ሴንተር ጋር በመተባበር በዴሞክራሲና በሰብዓዊ መብት ላይ ለተሰማሩ የሲቪል ማህበረሰብ ድርጅቶች በተለያዩ ዙሮች በሲቪል ማህበረሰብ ድርጅቶች ህግና አስተዳደር ዙሪያ ስልጠና እየተሰጠ ይገኛል፡፡ በስልጠናው ላይ የመክፈቻ ንግግር ያደረጉት የባለስልጣኑ ዋና ዳይሬክተር አቶ ጂማ ዲልቦ እንደተናገሩት የቀድሞው አዋጅ ቁጥር 621/2001 በርካታ ክፍተቶች የነበሩበት መሆኑን ጠቁመው በተለይም ድርጅቶች ቦርዱ በወሰነው ውሳኔ ላይ ይግባኝ ብለው ወደ ፍርድ ቤት የማይሄዱበትና የገቢ ምንጫቸው ከውጪ የሆኑ ድርጅቶችንም እንቅስቃሴ በእጅጉ የገደበ ነበር ሲሉ ገልፀዋል፡፡ አያይዘውም ለውጡ ይዟቸው ከመጣቸው ቱርፋቶች አንዱ ሴክተሩ ነጻና ገለልተኛ ሆኖ መንቀሳቀስ እንዲችል ገዳቢ እና አሳሪ የነበረውን ህግ ማሻሻልና መለወጥ ነው፡፡ ይህ የሆነበት ዋና ምክንያትም የሲቪል ማህበረሰብ ድርጅቶች በሀገር ልማት፣ እድገትና ብልጽግና እንዲሁም ሰላም ትልቅ ሚና ያላቸው በመሆኑና በህገ መንግስቱ የተቀመጠውን የመደራጀት መብት ድንጋጌ ለመፈጸም ነው ሲሉ አብራርተዋል፡፡

ይሁንና በሀገራችን የታየውን የለውጥ ሂደት ተከትሎ የህግ ማሻሻያ ከተደረገ በኋላ ዜጎች በሰብዓዊና በመልካም አስተዳደር ስራዎች ላይ ተደራጅተው እንዲሰሩ ምቹ ሁኔታዎች መፈጠራቸውን አንስተዋል፡፡ የተሻሻለውን ህግ በተሟላ ሁኔታ ተግባራዊ ለማድረግ በሚደረገው ሂደት ውስጥ በርካታ ስራዎች ሲሰሩ መቆየታቸውን የጠቀሱት ምክትል ዋና ዳይሬክተሩ ስልጠናውም የዚሁ አንዱ አካል ተደርጎ ይወሰዳል ብለዋል፡፡ በስልጠናው ማጠናቀቂያ ላይ በስልጠናው ለተሳተፉ የሲቪል ማህበረሰብ ድርጅቶች የሰርተፍኬት ስጦታ ተበርክቶላቸዋል፡፡

የመደራጀት መብት፣ ሰብዓዊነት፣ የህብረተሰቡ የላቀ ተጠቃሚነት!!!

የሲቪል ማህበረሰብ ድርጅቶች ባለስልጣን የኮሚዩኒኬሽን ቴክኖሎጂ ዳይሬክቶሬት!!!


"ለ21 ቀን የደም መስጠት ድጋፍ ለወገናችን"

የሲቪል ማህበረሰብ ድርጅቶች ጥምረት ለኢትዮጵያ (ኮክሲ) "ለ21 ቀን የደም መስጠት ድጋፍ ለወገናችን" በሚል መሪ ቃል በኢሊሊ ሆቴል ከመንግስት አካላት ጋር የመግባቢያ ሰነድ ተፈራርሟል፡፡ የባለስልጣኑ ከፍተኛ ሃላፊዎችን ጨምሮ የሰለም ሚኒስቴር ሚንስትር ደኤታ አቶ ታዬ ደንደዓ፣የአዲስ አበባ ከተማ አስተዳደር የባህል፣ኪነጥበብና ቱሪዝም ቢሮ ሀላፊ ሂሩት ካሳ(ዶ/ር)፣ የብሄራዊ ደም ባንክ ዋና ደይሬክተር አቶ ያረጋል ባንቲእን፣የመከላከያ ሚኒስቴር የህዝብ ግንኙነት ዳይሬክቶሬት ዳይሬክተር ኮኖሬል ጌትነት አዳነ እንዲሁም ሌሎች ተጋባዥ እንግዶች በመድረኩ ላይ ተገኝተዋል፡፡ በመርሀ ግብሩ ላይ ንግግር ያደረጉት የባለስልጣን መስሪያ ቤቱ ዋና ዳይሬክተር አቶ ጂማ ዲልቦ እንዳሉት የሲቪል ማህበረሰብ ድርጅቶች ጥምረት ለኢትዮጵያ ለ21 ቀን ደም መስጠት መርሀግብር ግንባር ቀደም የሆነ ሰብዓዊ ድጋፍ ለማድረግ በመንቀሳቀሱ የሚያስመሰግን ተግባር ነው ሲሉ በመግለጽ ህይወቱን ቀብድ አስይዞ የትግራይ ህዝብን ይጠብቅ የነበረው የመከላከያ ሰራዊታችን ላይ በአሸባሪው ህወሐት የተፈፀመው ግፍ ታሪክ ይቅር የማይለው መሆኑን አንስተዋል፡፡

ለ21 ቀን የሚለገሰው ደም በጦርነት ለተጎዱ ወገኖቻችን ያለው ጠቀሜታ የጎላ መሆኑን የጠቀሱት  ዋና ዳይሬክተሩ ደም የሚሰጥ ሰው የሰውን ደም በከንቱ አያፈስም በማለት ይህ ድጋፍ ተጠናክሮ እንዲቀጥል ሌሎችም የሲቪል ማህበረሰብ ድርጅቶችም አርአያውን ተከትለው እንደሚሰሩ እምነቴ ነው ብለዋል፡፡ የአዲስ አበባ ባህል፣ኪነጥበብና ቱሪዝም ቢሮ ሀላፊ ሂሩት ካሳ(ዶር) በበኩላቸው የማይተካ ህይወቱን ለሚሰጠን ለጀግናው መከላከያ ሰራዊታችን ደም ለመስጠት ጥምረቱ እያደረገ ላለው እንቅስቃሴ ምስጋናቸውን አቅርበዋል፡፡ ዶ/ር ሂሩት አያያዘውም የሲቪል ማህበረሰብ ድርጅቶች ብዙ ሀሳብ፣ብዙ ራዕይ፣ ብዙ ነገር ለመስራት የሚፈልግ ሀይል ነው ግን ለመስጋል፤ ሃገር ከሌለች ምንም ነገር የለም ፤ኢትዮጵያ የአፍሪካ ቁልፍ ነች ቁልፉ ከተሰበረ አፍሪካም በውጪ ሀይል የመቀራመት እድሏ ስፊ ነው ሲሉ ገልፀዋል፡፡
አገራችን ሰላም፣ፍቅር፣አንድነት ተመልሶ እንዲመጣ ኢትዮጵያውያን ሁሉ በአንድነት ሀላፊነታችንን መወጣት አለብን ሲሉ ጥሪ አስተላልፈዋል፡፡ራት ብቻ ሳይሆን ለማሰብም አገር ያስፈልጋል፡፡ ሌላው በክብር እንግድነት የተገኙት የሰላም ሚኒስቴር ሚኒስትር ደኤታ የተከበሩ ታዬ ደንደዓ እንደተናገሩት በአገራችን በግል መሮጥ ባህል ሆኖ ለመደራጀት አስቸጋሪ እንደነበር በማንሳት ጥምረቱ ግን ለሌሎች በጋር መስራት ያለው ጥቅምን በማሳየቱ ምስጋናቸውን አቅርበዋል፡፡ ሚኒስትር ዴኤታው አያይዘውም ሁላችንም በመደራጀት በአገራችን ላይ ከውጭም ሆነ ከውስጥ የሚመጣውም ጥቃት ለመመከት ጠቀሜታው የጎላ እንደሆነ በመግለፅ ኢትዮጵያውያን በአንድነት ተደምረው ለአገራቸው በጋራ ይቆማሉ እንጂ ለገንዘበ ብለው የውጭ ጠላት መንገድን አንከተልም ስላላችሁ ይህ ደግሞ የኢትዮጵያ ስሜት ስለሆነ በሁሉም ዘንድ ሊተገበር ይገባል ሲሉ ተናግረዋል፡:
ሁሉም ኢትዮጵያዊ ከቃል በላይ በተግባር ከመከላከያ ጎን በመቆም ደጀንነቱን እየገለፀ እንደሚገኝ በመግለጽ ይህንንም አጠናክሮ መቀጠል አለበት ተብሏል፡፡ በመርሀ ግብሩ ላይም የሲቪል ማህበረሰብ ድርጅቶች ጥምረት ለኢትዮጵያ (ኮክሲ) ከተለያዩ የመንግስት ተቋማት ጋር የመግባቢያ ስምምነት በመፈራረም የመጀመሪያ ዙር የደም ልገሳ ከአዲስ አበባ ከተማ አስተዳደር እንደሚጀመር እና በቀጣይ በሁሉም ክለሎችና የመንግስት ተቋማት ጋር እንደሚከናወን ተገልጿል፡፡

 

የመደራጀት መብት፣ ሰብዓዊነት፣ የህብረተሰቡ የላቀ ተጠቃሚነት፡፡

የሲቪል ማህበረሰብ ድርጅቶች ባለስልጣን የኮሚዩኒኬሽን ቴክኖሎጂ ዳይሬክቶሬትRead more


በወቅታዊ ሃገራዊ ጉዳይ ላይ የኤጀንሲው አመራርና ሰራተኞች ውይይት አደረጉ፡፡

ውይይቱ በዋናነት በወቅታዊ ሃገራዊ ጉዳይ ላይ የመንግስት ሰራተኛው ሚና ምንድን ነው የሚል ሲሆን በዚህ ዙሪያ የተዘጋጀ ሰነድ ቀርቦ ሰፊ ውይይት ተደርጎበታል፡፡ ከውይይቱ በኋላ የባለስልጣን መስሪያቤቱ አመራርና ሰራተኞች 9 የአቋም መግለጫዎችን አውጥተዋል፡፡

    1. አሸባሪው ትህነግ/ህውሃት በአገራችን ህዘብ ትግል የተረጋገጠውን ለውጥ እንዲቀለበስ ከለውጡ መባቻ ጀምሮ ሳያሳልስ ሰው ሲገድል፣ ሲያፈናቅል አገራችን እንደትበታተን ሲሰራ የነበረውን እኩይ ተግባር ቀጥሎበት የአገር መከታ የሆነውን መከላከያችን በተለይም በሰሜን እዝ ላይ ያደረሰውን ጥቃት በፅኑ እናወግዛለን፤
    2. አሸባሪው ትህነግ/ህውሃት በአገራችን ላይ የጀመረውን ጥቃት አጠናክሮ በመቀጠል በአማራና አፋር ክልል እያደረገ ያለውን ወራር እንዲሁም እያደረሰ ያለውን ውድመት በከፍተኛ ደረጃ እናወግዛለን፤ ይህ ወረራ እንዲቀለብስ በአስፈላጊው ሁሉ እንፋለማለን፤
    3. በባለስልጣኑ መስሪያ ቤት ተመዝግበው በአገራችን የሚንቀሳቀሱ የአገር በቀል እና የውጭ ሲቪል ማህበረሰብ ድርጅቶች የአገራችንን ህልውና የማስጠበቅ እንቅስቃሴው ጎን በመቆም የሚጠበቅባቸውን እንዲወጡ እናሳስባለን፤ ህግን የሚተላለፉት ላይ ደግሞ ተገቢውን የእርምት እርምጃ የምንወስድ መሆኑን እናሳውቃለን፡፡
    4. ምእራብውያን እና አንዳንድ ዓለም አቀፍ ተቋማት ከአሸባሪው ጎን በመቆም አገር በማፍረስ ሂደት ላይ በመሳተፍ በአሳፋሪ የታሪክ መስመር ላይ እንዳይሰለፉ አካሄዳቸው ቆም ብለው እንዲመረምሩ እና ከኢትዮጵያ ህዝብ ጎን እንዲቆሙ ጥሪያችንን እናስተላልፋለን፤
    5. በአሸባሪው ትህነግ እና ተላላኪዎች ጭምር በውሸት ሀገርን ለማፍረስ የሚያደርጉትን ተግባርና እኩይ ሴራ ለማጋለጥ ዝግጁ መሆናችንን እናረጋግጣለን፡፡
    6. ሁላችንም የተቋማችንን እና የአከባቢያችንን ሰላም እና ጸጥታ ዘብ ሆነን ለመጠበቅ ዝግጁ መሆናችንን እናረጋግጣለን፡፡
    7. በተቋማችን የተሰጠንን ተግባርና ኃላፊነት በአግባቡ ለመወጣት፤ ከመንግስት የስራ ሰዓት ውጭ ለመስራት ዝግጁ መሆናችንን እናረጋግጣለን፡፡
    8. የሀሰት የመረጃ ምንጮችን ላለመጠቀም እና እውነተኛ መረጃን ለማሰራጨት ቃል እንገባለን፡፡
    9. ሃገራችን በምትፈልገን በማንኛውም አይነት ተልዕኮ ለመሰማራት ዝግጁ መሆናችንን እናረጋግጣለን፡፡

አልረሳውም፤ እኔም የኢትዮጵያ ወታደር ነኝ!!!

በባለስልጣን መስሪያቤቱ የህወሃት የሽብር ቡድን በመከላከያ ሰራዊት ሰሜን እዝ ላይ ጥቃት የፈጸመበት ቀን “አልረሳውም! እኔም የኢትዮጵያ ሰራዊት ነኝ!” በሚል መሪ ቃል አክብሯል፡፡ መንግስት የህወሃት የሽብር ቡድን በመከላከያ ሰራዊት ሰሜን እዝ ላይ ጥቃት የፈጸመበት ቀን “አልረሳውም! እኔም የኢትዮጵያ ሰራዊት ነኝ!” በሚል መሪ ቃል ታስቦ እንዲውል መወሰኑ ይታወቃል፡: የባለስልጣን መስሪያቤቱ ዋና ዳይሬክተር አቶ ጂማ ዲልቦ በፕሮግራሙ ላይ ባስተላለፉት መልዕክት የዛሬዋ ቀን ሕይወቱን ቀብድ አስይዞ የትግራይን ሕዝብና የኢትዮጵያን ዳር ድንበር ሲጠብቅ በነበረው የሰሜን ዕዝ የመከላከያ ሰራዊታችን ላይ የተፈጸመውን ታሪክ ይቅር የማይለውን የሕወሃትን የክህደት ተግባር በቁጭት የምናስታውስበት ቀን ነው፡፡ ይህ ድርጊት አስጸያፊ መሆኑ ብቻ ሳይሆን በሰው ልጆች ታሪክ ውስጥ ምናልባትም ለመጀመሪያ ጊዜ የተፈጸመና በሰው ልጆች ታሪክ በድጋሚ ሊፈጸም የማይችል ክስተት ነው ተብሎ ይገመታል፡፡ የሚጠብቀውን ሰራዊት አዘናግቶ የሚገድል ጤነኛ ህሊና ያለው ሰብዓዊ ፍጡር አለ ለማለት አያስደፍርም፡፡ የህወሃት ጁንታው ቡድን ግን ይህንን ክህደት በመከላከያ ሰራዊታችን ላይ ያለርህራሄ ፈጽሞታል ሲሉ ገልጸዋል፡፡

አያይዘውም አሁንም ይህንኑ የክህደት ተግባሩን በማጠናከር ከኢትዮጵያ ታሪካዊ ጠላቶች ጋር በማበር በህዝባችን ላይ መከራና ሰቆቃ በማድረስ ላይ ይገኛል፡፡ በመሆኑም የህዝባችንን ሰቆቃ ለማስቆምና የሀገራችንን ሉዓላዊነት ለማስጠበቅ ሁላችንም የበኩላችንን ልንወጣ ይገባል፡፡ በዚህ አጋጣሚ ከጁንታው ጋር በማበር በውስጣችን ሆነው መረጃ በማቀበልና አመቺ ጊዜ ፈልገው ጥቃት የሚፈጽሙብንን ጸንተን ያለርህራሄ ልንታገላቸው ይገባል፡፡ የጠላት መሣሪያ የሆኑ መንግስታዊ ያልሆኑ ድርጅቶችንም እየለየን ተገቢውን ህጋዊ እርምጃ መውሰድ ለነገ የሚባል ጉዳይ አይደለም፡፡ ከአትዮጵያ የምናስቀድመው ምድራዊ ሃይል ሊኖር አይገባምና! ድላችንን እውን እስኪሆን ድረስ እንደ አንድ ልብ መካሪ፣ እንደ አንድ ቃል ተናጋሪ በመሆን አሸባሪንና ወራሪውን ጁንታ ልንዋጋው ይገባል፡፡ የምንኖርበትና የምንሠራበትን አካባቢዎች ነቅተን መጠበቅ ይኖርብናል፡፡ ይህንን ከሃዲ ጁንታ የመዋጋት ኃላፊነት የጥቂቶች ብቻ ሳይሆን የሁላችንም መሆኑን በመገንዘብ መላው የተቋማችን ሰራተኞችና አመራሮች በምንችለው መንገድ ሁሉ ሀገራችንን እንድንታደግና ለመከላከያ ሰራዊታችንና ለመላው የጸጥታ ኃይሎች አስፈላጊን ድጋፍ እንድናደርግ ጥሪዬን አስተላልፋለሁ በማለት መልዕክት አስተላልፈዋል፡፡

በመጨረሻም በዚሁ አጋጣሚ ድላችንን ለማፋጠን ሲባል በትናትናው ዕለት የወጣውን የአስቸኳያ ጊዜ አዋጅ በማክበርና በማስከበር የበኩላችንን መወጣት እንደሚገባን ለማሳሰብ እወዳለሁ በማለት ገልጸዋል፡፡


ለአገር ባለውለታ የሆኑ አረጋውያን እድሜያቸው ሲገፋና አቅማቸው ሲዳከም እንዳገለገለ እቃ መጣል የለባቸውም ተባለ፡፡

የባለስልጣኑ ም/ዋና ዳይሬክተር አቶ ፋሲካው ሞላ በድሬዳዋ ከተማ የሚገኙ ሁለት አረጋውያን ላይ የሚሰሩ የበጎ አድራጎት ድርጅቶችን በጎበኙበት ወቅት የተናገሩት ነው፡፡ በድሬዳዋ ከተማ የሚገኙ የአሰገደች በጎ አድራጎት ድርጅት እና ዳዊት የአረጋውያን በጎ አድራጎት ድርጅት በከተማው ጧሪ ቀባሪ ያጡ አቅመ ደካማ አረጋውያንን በመንከባከብ ለረጅም ዓመታት ያገለገሉ ድርጅቶች ናቸው፡፡
በጉብኝቱ ላይ የተገኙት የባለስልጣኑ ም/ዋና ዳይሬክተር አቶ ፋሲካው ሞላ እንዳሉት ድርጅቶቹ ለአቅመ ደካማ አረጋውያን እያደረጉት ያለው እንክብካቤ ለማየት በመቻላቸው መደሰታቸውን በመግለፅ ለአገር ባለውለታ የሆኑ አረጋውያን እድሜያቸው ሲገፋና አቅማቸው ሲዳከም እንዳገለገሉ እቃ መጣል የለባቸውም ሲሉ ተናግረዋል፡፡ አክለውም መንግስት ለአረጋውያን እየሰጠ ያለው ትኩረት ከፍተኛ ነው ያሉት ም/ዋና ዳይሬክተሩ ክቡር ጠ/ሚኒስትሩም ለአረጋውያን እያደረጉት ያለው ድጋፍ ምን ያህል ትኩረት እንደተሰጠው አመላካች ነው ሲሉ ገልፀዋል፡፡

አያይዘውም ድርጅቶቹ አቅመ ደካማ አረጋውያን ወድቀው እንዳይቀሩ ሰብስበው በማቆየታቸው ምስጋና ይገባቸዋል በማለት ይህን ጥሩ ስራ ቀጣይነት እንዲኖረው ባለስልጣኑም በሀሳብም ሆነ በቁሳቁስ ድጋፍ እንደሚያደርግ መልዕክታቸውን አስተላልፈዋል፡፡ አሰገደች የበጎ አድራጎት ድርጅት በ1980 ዓ.ም በአንድ ትንሽ ቤት ውስጥ ሁለት አረጋውያንን በመንከባከብ የተጀመረ ሲሆን ድርጅቱ አሁን ላለበት ደረጃ ለመድረስ ከፍተኛ ውጣ ውረዶችን ማሳለፉን የድርጅቱ ስራ አስኪያጅ አቶ ገዘኸኝ ወርቁ ገልፀውልናል፡፡ አሰገደች የበጎ አድራጎት ድርጅት ዓላማ አድርጎ የተነሳው ጧሪ ቀባሪ ያጡ አረጋውያንን መንከባከብ፣የምግብ እና የጤና አገልግሎቶችን መስጠት ሲሆን አሁን ላይ በድርጅቱ 90 እንዲሁም ቤት ለቤት እንክብካቤ የሚደረግላቸው 20 አረጋዊያን መኖራቸውን አብራርተዋል፡፡ ዳዊት የአረጋውያን በጎ አድራጎት ድርጅትም በ1998 ዓ.ም ከኤጀንሲው ህጋዊ ሰውነት አግኝቶ የተቋቋመ ድርጅት ነው፡፡

የድርጅቱ መስራች አቶ ዳዊት በማዘር ትሬዛ ድርጅት ውስጥ ለረጅም ዓመታት የበጎ ፈቃድ አገልግሎት በመስጠት ልምድ ያላቸው መሆኑን በመግለጽ የራሳቸውን ድርጅት ለማቋቋም መሰረት የሆናቸው አንድ ጎዳና ላይ የወደቁ አረጋዊን ለመርዳት ካላቸው ፍላጎት የመነጨ መሆኑን ስራ አስኪያጁ አቶ ዳዊት ተናግረዋል፡፡ ዳዊት የአረጋውያን በጎ አድራጎት ድርጅት በአንድ አረጋውያን የተጀመረ ቢሆንም በአሁን ወቅት ከሁለት መቶ በላይ ለሆኑ አቅመ ደካማ አረጋውያንን የመንከባከብ፣ የምግብ እና የጤና አገልግሎቶችን በመስጠ ላይ መሆኑን ለመመልከት ተችሏል፡፡ ዳዊት የአረጋውያን በጎ አድራጎት ድርጅት ከተቋቋመ ጊዜ አንስቶ ሙሉ ወጪውን የሚሸፍነው የድሬደዋ ከተማ ህብረተሰብና መስተዳደሩ ሲሆን ምንም አይነት ድጋፍ ከውጪ እንደማያገኝ አቶ ዳዊት ገልፀውልናል፡፡ በጉብኝቱ ላይ የተገኙት የባለስልጣኑ ም/ዋና ዳይሬክተር አቶ ፋሲካው ሞላ እንዳሉት ድርጅቶቹ ለአቅመ ደካማ አረጋውያን እያደረጉት ያለው እንክብካቤ ለማየት በመቻላቸው መደሰታቸውን በመግለፅ ለአገር ባለውለታ የሆኑ አረጋውያን እድሜያቸው ሲገፋና አቅማቸው ሲዳከም እንዳገለገሉ እቃ መጣል የለባቸውም ሲሉ ተናግረዋል፡፡

አክለውም መንግስት ለአረጋውያን እየሰጠ ያለው ትኩረት ከፍተኛ ነው ያሉት ም/ዋና ዳይሬክተሩ ክቡር ጠ/ሚኒስትሩም ለአረጋውያን እያደረጉት ያለው ድጋፍ ምን ያህል ትኩረት እንደተሰጠው አመላካች ነው ሲሉ ገልፀዋል፡፡ አያይዘውም ድርጅቶቹ አቅመ ደካማ አረጋውያን ወድቀው እንዳይቀሩ ሰብስበው በማቆየታቸው ምስጋና ይገባቸዋል በማለት ይህን ጥሩ ስራ ቀጣይነት እንዲኖረው ባለስልጣኑም በሀሳብም ሆነ በቁሳቁስ ድጋፍ እንደሚያደርግ መልዕክታቸውን አስተላልፈዋል፡፡


የሲቪል ማህበረሰብ ድርጅቶች ባለስልጣን ዳይሬክተር የብሪቲሽ ኤንባሲ የልማት ዳይሬክተር የሆኑትን ፖል ዋልተርስን በጽህፈት ቤታቸው ተቀብለው አነጋግረዋል፡፡

የባለስልጣኑ ዋና ዳይሬክተር አቶ ጂማ ዲልቦ በባለፉት ሁለት አመታት በርካታ የሪፎርምና የአቅም ግንባታ ስራዎችን ሲሰራ የቆየ መሆኑን ጠቁመው የሲቪል ማህበረሰብ ድርጅቶች ከተጽዕኖ ነጻ ሆነው የህብረተሰቡ ሁለንተናዊ ተጠቃሚነት እንዲረጋገጥ ለማድረግ እየሰራን እንገኛለን ብለዋል፡፡ የባልስልጣኑ ምክትል ዋና ዳይሬክተር አቶ ፋሲካው ሞላ በበኩላቸው የባለስልጣኑን የስራ እንቅስቃሴ አብራርተው በተለይ የተቋሙ ስም እንዲታደስና የተቀላጠፈ አገልግሎት እንዲሰጥ በማድረግ ረገድ በርካታ ስራዎች ተሰርቷል ሲሉ ገልጸዋል፡፡

የአዋጁ ለውጥና የተካተቱ መሰረታዊ ጉዳዬች፣የምዝገባ ስርዓቱ ቀላልና ግልጽ መሆኑን፣ስለ ካውንስሉ ምስረታ፣ስለቦርድ አወቃቀር፣ግልጽ የአሰራር ስርዓት ለመዘርጋት በርካታ አዲስ መመሪያዎችን ተቋሙ እያዘጋጀ ስለመሆኑ፣ከክልል እና ከፌደራል ባለድርሻ አካላት ጋር እንዴት በቅንጅት እንደሚሰራ እንዲሁም ከአጋር ድርጅቶች ጋር በጋራ ተቋሙ እየሰራ ስለመሆኑ በተለይም CSSP2 የሁልግዜ ተባባሪ ስለመሆኑ ሃላፊዎቹ በገለጻቸው አመላክተዋል፡፡ ፖል ዋልተርስም የቀረበላቸው ገለጻ ግልጽ መሆኑን በማንሳት በቀድሞው አዋጅ ድርጅቶች ሲገጥማቸው የነበረውን ችግር አውቃለሁ አሁን ችግሩ ተቀርፎ ለውጥ በማየቴ ደስተኛ ነኝ ብለዋል፡፡


የስነ-ምግባር ተምሳሌትና አርበኞች ሆነን መገኘት ይኖርብናል::

ለኤጀንሲው የማኔጅመንት አባላት በስነ ምግባር ዙሪያ ስልጠና ተሰጥቷል፡፡
በስልጠናው ላይ የተገኙት የኤጀንሲው ዋና ዳይሬክተር አቶ ጂማ ዲልቦ እንደገለጹት ተቋማችንን ሞዴል ለማድረግ የስነ ምግባር ተምሳሌትና አርበኞች ሆነን መገኘት ይኖርብናል ብለዋል፡፡ በገለጻው ላይ ‹‹ትኩረት ለትውልድ ለስነምግባር ግንባታ›› በሚል የተገለጸው መልዕክት እንደግለሰብ ሁላችንም የኔ ድርሻ ምንድነው? የሚለውን ጥያቄ እንድናነሳ ያደርጋል ያሉ ሲሆን ያለማንም ቀስቃሽ ስለ ስነምግባር ማሰብ፣መጠንቀቅ እና ማነጽ ያስፈልጋል ሲሉ አብራርተዋል፡፡ የሆነ ተቋም ወይም ግለሰብ ስለሚቆጣጠረን ሳይሆን በሃላፊነት ስሜት ለሰራተኞቻችን ተከታታይ ስልጠናዎችን በመስጠት በስነምግባር የታነጸ ተቋም መፍጠር ይጠይቀናል ለዚህም ደግሞ ስነ ምግባር ላይ ትኩረት አድርገን እንሰራለን ብለዋል፡፡

የስልጠናው ዓላማ ማሻሻያ ተደርጎበት ስራ ላይ የዋለውን የፌዴራል የስነ-ምግባርና ፀረ-ሙስና ኮሚሽን ማቋቋሚያ አዋጅ ቁጥር 1236/2ዐ13 ለኤጀንሲው አመራሮች ማስተዋወቅ፣የኮሚሽኑን አዋጅ መነሻ በማድረግ እንደ አዲስ የተደራጀውን የስነ-ምግባር መከታተያ ክፍሎች ተጠሪነት፣ የአሰራርና አደረጃጀት ማሳወቅ፣የስነ-ምግባር መከታተያ ክፍል የተቋቋመበትን ዓላማ የኤጀንሲው አመራሮች አውቀውት ቅንጅታዊ አሰራርን ለመዘርጋት፣መከታተያ ክፍሉ ስራውን በሚያከናውንበት ጊዜ በግልጽነት፣ በተጠያቂነትና በገለልተኝነት መርህ መፈፀም እንዲችል ከተቋሙና ከኮሚሽኑ ጋር የሚኖረውን አሰራርና ግንኙነት ግልጽ ማድረግ በማስፈለጉ እንዲሁም ሙስናና ብልሹ አሰራርን መከላከል የአንድ ክፍል ስራ ብቻ ሳይሆን ቅንጅታዊ አስራርና ትብብር የሚጠይቅ በመሆኑ ስልጠናው መዘጋጀቱን ወ/ሮ ትግስት አቡዬ የስነ ምግባር መከታተያ ዳይሬክቶሬት ዳይሬክተር አብራርተዋል፡፡


ኤጀንሲው ከኢስት አፈሪካ ፖሊሲ ሪሰርች ኢኒስቲቲዩት ጋር በጋራ በመሆን በሲቪል ማህበረሰብ ድርጅቶች ዙሪያ በጋራ ጥናት ለመስራት የመግባብያ ሰነድ ተፈራረሙ፡፡

ዓላማውም የሲቪል ማህበረሰብ ድርጅቶች ለሃገር ያላቸውን አስተዋጽኦ አጉልቶ ማውጣትና ያሉባቸውን ችግሮች በመለየት አማራጭ ሃሳቦች እንዲቀርቡ ለማድረግ ብሎም የማህበራዊና ኢኮኖሚያዊ ተሳትፎአቸውን ለማሳየት መሆኑ ተገልጿል፡፡


በኢትዮጵያ የሲቪል ማህበራት ይዘት ጥናት ሪፖርት ላይ ውይይት ተደረገ፡፡

የሲቪል ማህበረሰብ ድርጅቶች ባለስልጣን ከcivil society fund III እና CSSP II ጋር በመሆን በሀገር አቀፍ ደረጃ ባዘጋጁት የኢትዮጵያ ሲቪል ማህበራት ይዘት ጥናት ረቂቅ ሪፖርት ላይ በኢንተር ኮንቲኔንታል ሆቴል ውይይት አድርገዋል፡፡ በውይይቱ ላይ የሲቪል ማህበረሰብ ድርጅቶች ባለስልጣን ዋና ዳይሬክተርን ጨምሮ በርካታ የአውሮፓ ህብረትና ዓለም ዓቀፍ  ድርጅቶች ተወካዮች እንዲሁም የክልልና የፌዴራል ባለድርሻ አካላት ታድመዋል፡፡

በመርኃ ግብሩ ላይ የመክፈቻ ንግግር ያደረጉት የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ እንዳሉት ሀገራችን ምንም እንኳ በበርካታ ውጫዊና ውስጣዊ ጫናዎች ውስጥ ብትሆንም በእውነትና በትጋት በመስራት የሀገራችንን ብልጽግና ለማረጋገጥ በመስራት ላይ እንገኛለን ብለዋል፡፡ ዋና ዳይሬክተሩ አክለውም መንግስት የተቋማችንን የመፈጸምና የማስፈጸም አቅም ከፍ ለማድረግ ወደ ባለስልጣን መስሪያ ቤት ያሳደገው በመሆኑ የኢትዮጵያን የሲቪል ማህበረሰብ ዘርፍ እንዲጎለብት ለማስቻልና የጀመራቸውን ስራዎች በበለጠ ውጤታማ ለማድረግ ዘርፉን በሚመለከቱ ጉዳዮች ላይ በራስ አቅምና በአጋር አካላት ድጋፍ ጥናት ማድረጉን አንስተዋል፡፡

ይህ አገራዊ የCSO mapping ጥናት በዘርፉ በጥናት ላይ የተመሰረተ መረጃ ለማግኘት እንዲቻልና፣ ተቋማችንም ሆነ በአጠቃላይ የክልል መንግስታት ለሚያከናውኗቸው ስራዎች መነሻና ማጣቀሻ ሆኖ ያገለግላል በማለት ገልጸዋል፡፡ በተጨማሪም የሲቪል ማህበረሰብ ድርጅቶች፣ ዓለም አቀፍ ድርጅቶች፣ እንዲሁም አጋር ድርጅቶች መንግስት በፈጠረው ምቹ ሁኔታ በመጠቀም በአገር ልማትና ዴሞክራሲ የበኩላቸውን ሃላፊነት እንዲወጡ፤ በዚህ ጥናት የቀረቡ ማጣቀሻዎችን በመጠቀም ለዘርፉ ድጋፍ እንዲያደርጉ የሚያስችላቸው ይሆናል ሲሉ በመክፈቻ ንግግራቸው ገልጸዋል፡፡ የኢትዮጵያ የሲቪል ማህበራት ይዘት ጥናት 2013/14 (Ethiopian civil society mapping 2021)   የሲቪል ማህበረሰብ ድርጅቶች ኤጀንሲ ከአውሮፓ ህብረት የሲቪል ሶሳይቲ ፈንድና (CSF III) ከሲቪል ሶሳይቲ ሰፖርት ፕሮግራም (CSSP II) ድጋፍ በዓለም ዓቀፍ አማካሪዎችና ከባለድርሻ አካላት ጋር በመሆን ያዘጋጀው የዳሰሳ ጥናት ሪፖርት ነው፡፡

በዚህ ጥናት ላይ ሁሉም ክልሎች የተሳተፉ ሲሆን አጠቃላይ የኢትዮጵያ የሲቪል ማህበረሰብ ዘርፍ ዳሰሳ ጥናት የመጨረሻ ግብዓት የሚሰበሰብበት እንደሆነም ታውቋል፡፡ በጥናቱ ላይ የተለያዩ ዓለም ዓቀፍ ድርጅቶች፣ አማካሪዎች እንዲሁም የኤጀንሲው ባለሙያዎች እና የክልል የስራ ሃላፊዎች ተሳትፎ ያደረጉበት እንደሆነም የጥናት ቡድኑ መሪ አቶ ደበበ ኃይለጊዮርጊስ የጥናቱን ይዘት ባብራሩበት ወቅት ገልጸዋል፡፡ የባለስልጣኑ ዋና ዳይሬክተር አቶ ጂማ ዲልቦ በእለቱ ከኢ.ዜ.አ ጋር በነበራቸው ቆይታ መንግስት የሲቪል ማህበረሰብ ድርጅቶችን በሚመለከት ባደረገው የአዋጅ ማሻሻያ ምቹ ሁኔታ መፈጠሩን አንስተው የተቋቋሙለትን ዓላማ ከግብ ማድረስ የሚገባቸው መሆኑን ጠቅሰው ከዚህ ውጪ ግን የሀገርን ሉዓላዊነት አደጋ ላይ በሚጥል ተግባር ላይ በሚሳተፉና ከዓላማቸው ውጪ በሚንቀሳቀሱ ድርጅቶች ላይ እርምጃዎችን ሲወስድ ቆይቷል፤ ወደፊትም አጠናክሮ የሚቀጥል ይሆናል ብለዋል፡፡

ባለስልጣን መስሪያ ቤቱ ካሁን በፊት ሲያደርጋቸው የነበሩ ማጣሪያዎችን ያጠናቀቀ መሆኑን የጠቀሱት ዋና ዳይሬክተሩ በቅርቡ ምርመራውን ይፋ እንደሚያደርግና ይህን መሰረት አድርጎም እርምጃዎችን የሚወስድ እንደሆነ ለኢ.ዜ.አ ተናግረዋል፡፡