ተቋሙ አሁን የደረሰበትን የሪፎርም ምዕራፍ የሚመጥን እውቀትና ክህሎት በመያዝ ለቀጣይ ውጤታማ ተቋማዊ የለውጥ ሂደት ዝግጁ መሆን የሚጠበቅ መሆኑ ተገለፀ፡፡

የሲቪል ማህበረሰብ ድርጅቶች ባለስልጣን ከCSSP-2 ጋር በመተባበር ለአገልግሎት ሰጪ ባለሙያዎቹ በተቋሙ ተዘጋጅቶ ወደ ተግባር ለመግባት በሂደት ላይ በሚገኘው ከጥቃት ጥበቃ መምሪያ /Safeguarding Guideline/ እና በቡድን ግንባታ (Team Building) ዙሪያ ስልጠና ሰጥቷል፡፡ በስልጠና መድረኩ ላይ በመገኘት የመክፈቻ ንግግር ያደረጉት ምክትል ዋና ዳይሬክተር አቶ ፋሲካው ሞላ ባለስልጣን መ/ቤቱ ላለፉት የሪፎርም ዓመታት በበርካታ የለውጥ ሂደት ውስጥ ያለፈ መሆኑን በማውሳት በሂደቱም አበረታች ስኬቶች ማስመዝገብ መቻሉን ገልፀው በአሁኑ ወቅት አዲስ መዋቅራዊ አደረጃጀት በማዘጋጀት ሰራተኞችን ደልድሎ ወደ ሁለተኛ የተቋማዊ የሪፎርም ምእራፍ ውስጥ እየገባ ስለሆነ መላው የተቋሙ ባልደረቦች አሁን ያለንበትን ሁኔታና ተቋማዊ የትኩረት መስኮችን ለማሳካት የሚያስፈልገውን እውቀት፣ ክህሎትና ስነ-ምግባር በመያዝ ዝግጁ መሆን ይኖርባቸዋል ብለዋል፡፡ አያይዘውም አሁን የምንገኝበት የሪፎርም ምእራፍ ያለፉትን የለውጥ ስኬቶች የበለጠ የምናፀናበት፣ በአፈፃፀማችን ስፔሻላይዝ የምናደርገበት እንዲሁም ዲጂታል ተቋም የምንገነባበት ይሆናል ብለዋል፡፡

ስለሆም በተቋሙ በተከታታይ እየተሰጡ ያሉ የአቅም ግንባታ ስልጠናዎችን ብቁ፣ ውጤታማና መንግስትና ህዝብ የሰጠውን ተልዕኮ በአግባቡ በመወጣት መልካም ስም ያተረፈ ተቋም የመገንባት አካል መሆኑን በመገንዘብ ስልጠናዎችን ራስን በማሻሻል፣ ሃላፊነትን ከመቼውም ጊዜ በተሻለ መንገድ በመወጣት በተግባር መተርጎም ከእያንዳንዱ አመራርና ባለሙያ የሚጠበቅ መሆኑን አስመረውበታል፡፡ በSafeguarding Guideline ዙሪያ የሚሰጠው ስልጠናም በማናቸውም መንገድ የሚፈፀም ጥቃትና ትንኮሳን የሚጠየፍና ለእነዚህ ተግባራት ቦታ የሌለው ለሰራተኞቹም ሆነ ለተገልጋዮች ምቹ የሆነ ተቋም የመገንባት አካል ነው ሲሉ ገልፀዋል፡፡


የሲቪል ማህበረሰብ ድርጅቶች ሳምንት ላይ መሳተፍ የሚፈልጉ የሲቪል ማህበረሰብ ድርጅቶች ፋላጎታቸውን ከዚህ ሳምንት ጀምሮ ማሳወቅ እንደሚችሉ ተገለጸ፡፡

የሲቪል ማህበረሰብ ድርጅቶች ሳምንት “የሲቪል ማህበረሰብ ድርጅቶች ንቁ ተሳትፎ ለዘላቂ ሰላም፣ ሰብዓዊ መብቶች መከበርና መልካም አስተዳደር ግንባታ” በሚል መሪ ቃል ዘንድሮም ለ3ኛ ጊዜ በሀገር ዓቀፍ ደረጃ ይከበራል፡፡ ይህንኑ አስመልክቶ የሲቪል ማህበረሰብ ድርጅቶች ባለስልጣንና የሲቪል ማህበረሰብ ድርጅቶች ምክር ቤት ካውንስል በጋራ 3ኛውን የሲቪል ማህበረሰብ ድርጅቶች ሳምንት አስመልክቶ ጋዜጣዊ መግለጫ ሰጥተዋል፡፡ በጋዜጣዊ መግለጫው መንግስት ዘርፉን ለማጠናከር ከተሰሩ ስራዎች አንዱ የሲቪል ማህበረሰብ ድርጅቶች ሳምንትን በማዘጋጀት የሲቪል ማህበረሰብ ድርጅቶች ስራዎቻቸውን እንዲያስተዋውቁ፣ የርስ በርስ ትስስርና መስተጋብርን ለማጠናከር እንዲችሉ እንዲሁም ልምድ ልውውጥ ለማድረግ ትልቅ እድል የፈጠረ እንደሆነ የሲቪል ማህበረሰብ ድርርቶች ባለስልጣን ዋና ዳይሬክተር አቶ ጂማ ዲልቦ ገልጸዋል፡፡ መንግስት በርካታ የህግና ተቋማዊ ሪፎርም ካደረገባቸው ዘርፎች በግንባር ቀደምትነት የሚጠቀሰው የሲቪል ማህበረሰብ ድርጅቶች ዘርፍ ነው ያሉት ዋና ዳይሬክተሩ የሲቪል ማህበረሰብ ድርጅቶች የግሉንና የመንግስት ሴክተሩን በማስተሳሰር ሚዛናዊ ለማድረግና ድምጽ ለሌላቸው ድምጽ መሆን ይችላሉ የሚል እምነት በመኖሩ ዘርፉን ለማጠናከር በርካታ ስራዎች እየተሰሩ እንደሚገኝም ጠቁመዋል፡፡ የሲቪል ማህበረሰብ ድርጅቶች ባለስልጣን የመንግስት ተቋም እንደመሆኑ ድርጅቶችን የመመዝገብና ድጋፋዊ ክትትል የማድረግ እንዲሁም የህግ ጥሰት ሲኖር የእርምት እርምጃ የሚወስድ መሆኑን አንስተው በሚቀጥሉት አምስት አመታት የሲቪል ማህበረሰብ ድርጅቶች ቁጥር አሁን ካለበት ወደ አስር ሺህ ለማድረስ እየሰራ እንደሚገኝም አንስተዋል፡፡

የሲቪል ማህበረሰብ ድርጅቶች ምክር ቤት ዳይሬክተር አቶ ሄኖክ መለሰ በበኩላቸው የሲቪል ማህበረሰብ ድርጅቶች ምክር ቤት ለሲቪል ማህበረሰብ ዘርፉ ድምጽ ከመሆንና ዘርፉን ከማስተባበር ባለፈ የሲቪል ማህበረሰብ ድርጅቶች ለሀገሪቱ እያበረከቱ ያሉትን የማይተካ ሚና የማስተዋወቅና መድረኮችን በማመቻቸት በቂ ግንዛቤን የመፍጠር ኃላፊነት ያለበት መሆኑን አንስተው ሳምንቱ መከበሩ ድርጅቶች ከባለድርሻ አካላት ጋር ያላቸውን ትስስር አጠናክረው በጋራ መስራት እንዲችሉ ምቹ ሁኔታን ይፈጥራል ብለዋል፡፡ በግንቦት ወር ይከበራል ተብሎ በሚጠበቀው የሲቪል ማህበረሰብ ድርጅቶች ሳምንት አጋርነትን፣ ትስስርንና ትብብርን የበለጠ ለማጠናከር ከልማት አጋሮች እና ከህዝቡ ጋር መስተጋብር መፍጠር፣ የሲቪል ማህበረሰብ ድርጅቶችን አስተዋጽዖ ለህዝብና ለሚመለከታቸው ባለስድርሻ አካላት ማሳየት፤ በሲቪል ማህበረሰብ ድርጅቶች መካከል እና በሌሎች የልማት ተዋናዮች መካከል የልምድ ልውውጥን ማሳደግ እና በመንግስት፣ በሲቪል ማህበረሰብ ድርጅቶች እና በግሉ ዘርፍ መካከል ለበለጠ ትብብር መድረክ መፍጠር ከሚከናወኑ ተግባራት መካከል የሚጠቀሱት ናቸው፡፡ ከዚህ ሳምንት ጀምሮ በሲቪል ማህበረሰብ ድርጅቶች ሳምንት ላይ መሳተፍ የሚፈልጉ የሲቪል ማህበረሰብ ድርጅቶች ፍላጎታቸውን ማሳወቅ እንደሚችሉ የተገለጸ ሲሆን ስኬታም ሳምንት ለማሳለፍና ዘርፉ ይበልጥ ጎልቶ እንዲተዋወቅ በሚል ቅድመ ዝግጁቱ ከወዲሁ እንዲጀመር እንደተደረገ ተጠቁሟል፡፡


የሲቪል ማህበረሰብ ድርጅቶች በአገራችን ሁለንተናዊ ልማትና እድገት ላይ አዎንታዊ ሚና እንዳላቸው ተገለፀ::

አገራዊ ለውጡን ተከትሎ ከተሻሻሉ ህጎች ውስጥ የሲቪል ማህበረሰብ ድርጅቶች አዋጅ 1113/2011 አንዱ ነው፡፡ አዋጅ 1113/2011 በተሟላ መልኩ ለማስፈጸም በባለስጣን መስሪያ ቤቱ አስራ ሰባት መመሪያዎች ተዘጋጅተዋል፡፡ ከተዘጋጁት መመሪያዎች ውስጥ ስምንት መመሪያዎች በቦርዱ ፀድቀው ወደስራ አስገብቷል፡፡ በሁሉም ክልሎችና በሁለቱ ከተማ አስደተዳደሮች ለሚገኙ ለፋይናንስ ቢሮ ዴስክ ባለሙዎችና ለተፈራራሚ አካላት በጸደቁ መመሪያዎች ዙሪያ የግንዛቤ ማስጨበጫ ስልጠናዎች ለመስጠት እቅድ የተያዘ ሲሆን አስካሁን በአርባምንጭ፣በድሬደዋ እና በቤኒሻንጉል ብሔራዊ ክልላዊ መንግስት በመመሪያዎቹ ላይ ውይይት ተደርጎባቸዋል:: ከፀደቁት መመሪያዎች ውስጥ የጥቅም ግጭት ለማስቀረት የወጣ መመሪያ ቁጥር 936/2015፣ የገቢ ማስገኛ ስራዎች ላይ የሚሰማሩበት ሁኔታ የወጣ መመሪያ ቁጥር 936/2015 እና የአገር በቀል ድርጅቶች ለመመዝገብና ለማስተዳደር የወጣ መመሪያ ቁጥር 938/2015 እንዲሁም ስለድርጅቶች መዋሀድ፣መከፋፈል፣መለወጥና መፍረስ የወጣ መመሪያ ቁጥር936/2015 ናቸው፡፡ እነዚህን መመሪያዎች ለሁሉም ክልሎችና ለሁለቱ ከተማ አስተዳደሮች ለፋይናንስ ቢሮ ዴስክ ባለሙዎች ለተፈራራሚ አካላት የግንዛቤ ማስጨበጫ ስልጠናዎች አዘጋጅቶ በመስጠት ላይ ይገኛል፡፡

በደቡብ ብ/ብ/ህ/ክልላዊ መንግስት ለፋይናንስ ቢሮ ዴስክ ባለሙዎች በአርባምንጭ ከተማ በተዘጋጀው ስልጠና ላይ የተገኙት የባለስልጣኑ ዋና ዳይረፌክተር አቶ ጂማ ዲልቦ እንዳሉት በአገራችን የመጣውን ለውጥ ተከትሎ የዜጎች የመደራጀት መብት ሙሉበሙሉ ያከበረ፣ዴሞክራሲያዊ ባህል ያጎለበተ እንዲሁም የነቃና የተደራጀ ማህበረሰብን ለመፍጠር ወሳኝ የሆነና የሲቪል ማህበረሰብ ድርጅቶች በአገር ልማት በዴሞክራሲያዊ ስርዓት ግንባታ ላይ ያላቸውን ሚና ለማጎልበት የሲቨል ማህበረሰብ ድርጅቶች አዋጅ 1113/2011 ወጥቶ ተግባራዊ ሆኗል ሲሉ ገልፀዋል፡፡ አያይዘውም አዋጁ ከፀደቀ ቀን አንስቶ በባለስልጣን መስሪያ ቤቱ ከ2200 በላይ አዳዲስ ድርጅቶች ተመዘገበው ወደስራ መግባታቸውን ጠቁመዋል፡፡ የሲቪል ማህበረሰብ ድርጅቶች ለአገራችን ሁለንተናዊ እድገትና ልማት፣ በዴሞክራሲያዊ ስርዓት፣ በአገረ መንግስት ግንባታና ለተጀመረው የብልፅግና ጉዞ አዎንታዊ ሚና እንዳላቸው በመጥቀስ ዘርፉ እንዲጠናከርና የሲቪል ማህበረሰብ ድርጅቶች ከመንግስት ጋር የነበራቸውን አሉታዊ ግንኙነት ወደ አዎንታዊ በመለወጥ የልማት አጋርነት መሰረት በማድረግ መልካም አስተዳደር ችግሮች፣ግልፀኝነትን፣ ተጠያቂነትን ለማረጋገጥ የተደራጀ የሲቪል ማህረሰብ ድርጅቶች መኖር አስፈላጊ መሆኑን ዋና ዳይሬክሩ አንስተዋል፡፡ ሌላው ያነሱት የሲቪል ማህበረሰብ ድርጅቶች ራሳቸውን በራሳቸው የሚያስተዳድሩበት የለውጥ ስራዎች መሰራታቸውን፣ የምዝገባና የክትትል ስራዎች ሙሉ በሙሉ ወደ ኢ-ሰርቪስ አግልግሎት መቀየራቸውን እንዲሁም ከፌደራልና ከክልል ባለድርሻ አካላት ጋር ጉባኤ ተመስርቶ በርካታ ስራዎች መሰራታቸውን አንስተዋል፡፡ ዋና ዳይሬክተሩ እነዚህን መመሪያዎች በሁሉም ክልሎችና በሁለቱ ከተማ አስደተዳደሮች ለሚገኙ ለፋይናንስ ቢሮ ዴስክ ባለሙዎችና ለተፈራራሚ አካላት የግንዛቤ ማስጨበጫ ስልጠናዎች ለማዘጋጀት ድጋፍ ያደረጉ አካላትንም አመስግነዋል፡፡ ቀድመው በጸደቁ አራት መመሪያዎች ላይም የግንዛቤ ማስጨበጫ ስልጠናዎች መሰጠታቸው ይታወቃል::


የውጪ ድርጅቶች ሀገር በቀል ድርጅቶችን በመደገፍና በማገዝ በቅንጅት መስራት እንደሚገባቸው ተጠቆመ፡፡

የሲቪል ማህበረሰብ ድርጅቶች ባለስልጣን ከsave the children እና ከMSF Holland የተገኙ ተሽከርካሪዎችን ለተለያዩ ሀገር በቀል ድርጅቶች አስተላልፏል፡፡ ተሽከርካሪዎቹ የተላለፉት ለፈለገ አረጋዊያን መርጃ ማህበር፣ ለሰሊሆም የአእምሮ ህሙማን መርጃ ድርጅት፣ የኢትዮጵያ የልብ ህሙማን መርጃ ማህበር፣ ለመቄዶንያ የአረጋውያንና የአእምሮ ህሙማን መርጃ ድርጅት፣ አቡነ ዜና ማርቆስ የህጻናትና አረጋውያን መርጃ ድርጅት፣ አክሽን ፎር ዘ ኒዲ እና ፌዝ ኢን አክሽን ለተባሉ ሰባት ሀገር በቀል ድርጅቶች ነው፡፡ ተሸከርካሪዎቹን ቦታው ድረስ በመሄድ ያስተላለፉት የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ ሀገር በቀል ድርጅቶች የማህበረሰቡን ስነ ልቦናና ባህል የሚያውቁና ተደራሽነታቸውም ላቅ ያለ በመሆኑ ከውጪ ድርጅቶች ጋር በቅንጅትና በትብብር መስራት ይኖርባቸዋል ያሉ ሲሆን በርካታ የውጪ ድርጅቶች ሀገር በቀል ድርጅቶችን እየደገፉ እንደሚገኝም አንስተዋል፡፡ ኢትዮጵያ ባለፉት ጊዚያት በበርካታ ፈተናዎች ውስጥ ማለፏን ያወሱት ዋና ዳይሬክተሩ እንደ MSF Holland ያሉ ድርጅቶች ያለእረፍት ሁኔታዎች እንዲስተካከሉ ማድረግ መቻላቸውንና አሁን ላይ ከባለስልጣን መስሪያ ቤቱ ጋር በርካታ ስራዎችን በጋራ መስራት በመቻላቸው መደሰታቸውን ገልጸዋል፡፡ ከSave the children አምስት እንዲሁም ከMSF Holland ሁለት መኪኖች የተላለፉ ሲሆን የሁሉም ድርጅቶች የስራ ኃላፊዎችና ተወካዮች በተገኙበት ተረክበዋል፡፡ ሀገር በቀል ድርጅቶቹም ባለስልጣን መስሪያ ቤቱና ሴቭ ዘ ቺልድረን እንዲሁም MSF Holland ላደረጉላቸው ድጋፍ ምስጋናቸውን አቅርበዋል፡፡


የባለስጣን መስሪያ ቤቱ ዋና ዳይሬክተር አቶ ጂማ ዲልቦ የኢትዮጵያ ኮሪያ ዘማቾች ማህበርን ጎበኙ::

የኢትዮጵያ ኮሪያ ዘማቾች ማህበረን በሲቪል ማህበረሰብ ድርጅቶች ባለስልጣን ተመዝግቦ እየተንቀሳቀሰ የሚገኝ ማህበር ነው፡፡ የኢትዮጵያ ኮሪያ ዘማቾች ማህበር ፕሬዝዳንት ኮሎኔል እስቲፋኖስ ገ/መስቀል ማህበሩ በቀዳማዊ ኃይለስላሴ ጊዜ በኮሪያ ዘምተው የነበሩ ወታደሮች ለማስታወስና ቤተሰቦቻቸውን ለመደገፍ የተቋቋመ ማህበር መሆኑን አብራርተዋል፡፡ የማህበሩን አጠቃላይ የስራ እንቅስቃሴ ለዋና ዳይሬክተሩ ያብራሩ ሲሆን በዋናነት ማህበሩ ከኮሪያ መንግስት የሚያገኘው ድጋፍ ከፍተኛ መሆኑን ገልፀዋል፡፡ በጉብኝቱ ላይ የተገኙት የባለስልጣን መስሪያቤቱ ዋና ዳይሬክተር አቶ ጂማ ዲልቦ እንዳሉት ይህ ማህበር የኢትዮጵያዊነት፣ የጀግንነት እና ለሌሎች መስዋት የከፈሉ ጀግኖች ያቀፈ እንዲሁም ኢትዮጵያን በአለም መድረክ ላይ እንድትታወቅ ስሟ እንዲጠራ ያደረጋችሁ ጀግኖቻችን ናቹ ሲሉ አሞካሽተዋል፡፡ ዋና ዳይሬክተሩ አክለውም በጀግንነት ምሳሌ እንድትሆን ፣ ለብዙ አገራት መስዋት የሆነች ስሟ በአለም አደባባይ በጀግነንነት እንድትጠራ፣ የብዙ ታሪክ ባለቤት እንድትሆን ካደረረጉ ጀግኖች መካከል የኮሪያ ዘማቾች ተጠቃሽ ናቸው በማለት በናንተ መካከል በመገኘቴ ታላቅ ኩራትና ክብር ይሰማኛል ሲሉ መልዕክታቸውን አስተላልፈዋል፡፡ ሌላው ያነሱት ዋና ዳይሬክተሩ አገራችን በጦርነት ያሳየችውን ጀግንነት በልማት ለመድገም ተግታ እየሰራች መሆኑን አንስተዋል፡፡

የደቡብ ኮሪያ መንግስት ውለታን የማይረሳ መንግስት ነው የዛሬ 70 ዓመት ኢትዮጵያ ጀግኖች የከፈሉላትን ውለታ በማስታወስ አሁን አድገናል ብለው ለመደገፍ በማሰባቸው ሊመሰገኑ ይገባል ብለዋል፡፡ የባለስልጣን መስሪያ ቤቱ ለማህበሩ የሚችለውን ነገር ሁሉ ያደርጋል ያሉት ዋና ዳይሬክተሩ በዋናነት እናንተ ጀግኖቻችን፣ እናንተ የነጻነት ቀንዲሎች፣ የኩራታችን ምንጮች፣ በናንተ ውስጥ የማሸነፍ ምሳሌን ያየን በናንተ ጀግንነት ውስጥ ኢትጵያን እናያለን፣ ተስፋን እናያለን፣ ኢትዮጵያ የነጻነት ምልክት ሆና እንደቆየችው በልማትና በዴሞክሲያዊ ስርዓት ግንባታ ወደፊት እንደምትመጣ አንጠራጠርም ሲሉ ገልፀዋል፡፡


የዜጎች የጎዳና ሕይወት ተጋላጭነት ላይ የተቀናጀ ምላሽ ለመስጠት የፖሊሲ አውጪዎች፣አስፈፃሚና የባለድርሻ አካላት መድረክ ተካሄደ፡፡

በኢፌዲሪ ሴቶችና ማኅበራዊ ጉዳይ ሚኒስቴር እና በሜሬጆይ ኢትዮጵያ አስተባባሪነት በዜጎች የጎዳና ተጋላጭነት ላይ የተቀናጀ ምላሽ ለመስጠት የፖሊሲ አውጪዎች፣አስፈፃሚና የባለድርሻ አካላት መድረክ ዛሬ በስካይ ላይት ሆቴል ተካሄዷል ፡፡ በመድረኩ መልዕክት ያስተላለፉት የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ እንዳሉት በሀገራችን ኢትዮጵያ የዜጎችን ደህንነትና የመኖር ዋስትና ከማስጠበቅ አኳያ ከመንግስት ጎን ለጎን የሲቪል ማህበረሰብ ድርጅቶች አይተኬ ሚና ሊኖራቸው እንደሚገባ በአዋጅ ቁጥር 1113/2011 ሃላፊነት የተጣለባቸው ሲሆን በዋነኝነት በማህበራዊ ጥበቃ ፖሊሲው ማዕቀፍ ላይ የተጠቀሱትን የህብረተሰቡን የስራ እድልና የኑሮ ሁኔታን ማሻሻል፣ የማህበራዊ መድን አገልግሎትንና ልማታዊ ሴፍቲኔትን ማስፋፋት፣የመሰረታዊ አገልግሎትንና ፍትሃዊ ተጠቃሚነትን ማሳደግና ለጥቃትና ለችግር ተጋላጭ የሆኑ ዜጎች የህግ ጥበቃና ድጋፍ እንዲያገኙ ማድረግ የበኩላቸውን ሚና ሊወጡ እንደሚገባ አመላክተዋል ፡፡

የሲቪል ማህበረሰብ ድርጅቶች የሚያከናውናቸው ሥራዎች ዘላቂ ልማትን የሚያመጡና ዲሞክራሲያዊ ስርዓትን ለመገንባት የሚያስችሉ በተለይም ለጠቅላላው ሕዝብ ወይም ለሦስተኛ ወገን ጥቅም መሥራትን ዓላማ አድርጎ የተቋቋመ ድርጅት፣ የሴቶችን፣ ህጻናትን፣ የአካል ጉዳተኞችን፣ የአረጋውያንንና ሌሎች ለጉዳት ተጋላጭ ወይም ለችግር ተጋላጭ የሆኑ የሕብረተሰብ ክፍሎች ጥቅምን ማካተቱን ማረጋገጥ አለበት ብለዋል ፡፡ የሲቪል ማህበረሰብ ድርጅቶች የዜጎችን ጎዳና ተጋላጭ ለመቀነስ እና የማህበረሰቡን ማህበራዊ ደህንነት ዋስትና በሚያረጋግጡ ተግባራት ላይ በመሳተፍ በህግ የተጣለባቸውን ሀላፊነት እንዲወጡ አደራ በማለት እንደባለስልጣን መስሪያቤታችን ከሴቶችና ማህበራዊ ጉዳይ ሚኒስቴር ጋር ያለንን አጋርነት በማጠናከር የማህበረሰቡን ማህበራዊ ደህንነት ዋስትና ለማረጋገጥ ያለኝን ቁርጠኝነት እገልጻለሁ ሲሉ መልዕክታቸውን አስተላልፈዋል፡፡ በመድረኩም የኤ.ፌ.ድሪ የሴቶችና ማህበራዊ ጉዳይ ሚኒስቴር ክብርት ዶክተር ኤርጎግን ጨምሮ የተለያዩ የመንግስት ሃላፊዎችና የግል ባለሃብት እንዲሁም የተለያዩ ተጋባዥ እንግዶች ተሳታ ሆነዋል ፡፡


የሲቪል ማኅበራት እና የመንግስት አካላት ትስስር ለተሻለ ሕጻናት እና የሴቶች መብቶች ጥበቃ በሚል ርዕስ ውይይት እየተካሄደ ይገኛል፡፡

ተቋሙ ከጀስቲስ ፎር ኦል ጋር በመተባበር የተዘጋጀ ሲሆን በውይይቱም በሴቶችና ህጻናት ላይ የሚሰሩ ድርጅቶች የተለያዩ የሚመለከታቸው መንግስታዊ ተቋማት ሃላፊዎችና ተወካዬች ተሳታፊ ሆነዋል፡፡ የጀስቲስ ፎር ኦል መስራችና ፕረዘዳንት ፓስተር ዳንኤል ገ/ስላሴ እንዳሉት ድርጅቱ በፍትህ ስርዓት ውስጥ ለባለፉት 30 ዓመታት የሴቶች፣ የህጻናት እና የእስረኞች መብት ላይ በመስራት እና የህግ ዘርፉ በስርዓት እንዲመራ ለማስቻል የራሱን አሻራ አኑሯል ሲሉ ገልጸዋል፡፡ የሲቪል ማህበረሰብ ድርጅቶች በሴቶችና ህጻናት ላይ ብቻ ሳይሆን በሰላም ላይ መስራት አለብን ከዚህ አንጻር እዚህ ውይይት ላይ የተሳተፍን የሲቪል ማህበረሰብ ድርጅቶች የሃገራችንን ሰላም ለማስጠበቅ መስራት ይጠበቅብናል ሲሉ መልዕክታቸውን አስተላልፈዋል፡፡ የተቋሙ ዋና ዳይሬክተር አቶ ጂማ ዲልቦ ባደረጉት ንግግር የኢፌድሪ ህገ መንግስት ካረጋገጣቸው መብቶችንና ጥቅሞች መካከል አንደኛው ሴቶች ከወንዶች ጋር እኩል መብት እንዳላቸው የሚደነግገው ክፍል አንዱ መሆኑን አንስተው ይህንኑ የህገ መንግስቱ ድንጋጌዎች ተከትሎ መንግስት በሴቶችና በሕጻናት ላይ አሉታዊ ተጽዕኖ ሲያደርሱ የነበሩ ህጎችን በማሻሻል ተጨባጭ የድጋፍ እርምጃዎች በመውሰድ ሥር ሰድዶ የቆየውን ችግር ለማቃለል ብሎም የተዛቡ አመለካከቶችን ለማረም ከፍተኛ ጥረቶች ሲያደርግ ቆይቷል ብለዋል፡፡

አክለውም ኢትዮጵያ የስርዓተ ፆታ እኩልነትን ለማስፈንና የሴቶችን ሁለንተናዊ ብቃት ለማረጋገጥ በርካታ እርምጃዎች የወሰደች ሲሆን እነዚህ እርምጃዎችም የሴቶችን ኢኮኖሚያዊ አቅም ማሳደግ፤ ሴት ልጆች እንዲማሩ ጥረት ማድረግ፤ ሴቶችንና ሕጻናትን ከጥቃት መከላከል፤ ሴቶችን ወደ ውሳኔ ሰጪነት ማምጣት፤ ጠንካራ ተቋማዊ አደረጃጀቶችን በመፍጠር ሕጎችን በተገቢው ሁኔታ ተግባራዊ ማድረግ የሴቶችንና የሕጻናትን መብት ከማስከበር አኳያ አጽንኦት የተሰጣቸው ጉዳዮች መሆናቸውን ገልጸዋል፡፡ ሴቶችና ሕጻናትን ማዕከል ያደረጉ እንቅስቃሴዎች ወደ ውጤት ለመቀየር ከመንግስትና ከግሉ ሴክተር ባልተናነሰ መልኩ መንግስተዊ ያልሆኑ ተቋማት በተለይም የሲቪል ማኅበረሰብ ድርጅቶች ጉልህ ሚና እንደላቸውም ይታመናል ሲሉ ተናግረዋል፡፡

ዋና ዳይሬክተሩ አክለውም የሴቶችንና የሕጻናትን ሁለንተናዊ ተጠቃሚነት ለማረጋገጥ የህጎች መሻሻል ብቻውን ውጤታማ ሊያደርገን ስለማይችል ሕጎች በጥብቅ ዲሲፒሊን እንዲመሩ የብዙ ተዋንያን ርብርብ ያስፈልጋል በተለይም የሲቪል ማህበረሰብ ድርጅቶች ያለባቸው ከፍተኛ ኃላፊነት በመገንዘብ ውጤታማ ሴቶች ወደ ፊት በማምጣት፤ ለሴቶች መብት መከበር ማነቆ ወይም እንቅፋት የሆኑ በማህበሰረቡ ውስጥ ያሉ ስር የሰደዱ የተዛቡ አመለካከቶችን በማረም፤ የስርዓት ጾታ እኩልነትን ለማረጋገጥ በሚደረገው ጥረት ውስጥ የወንዶች ተሳትፎን በማበረታታት ረገድ የበኩላቸውን ሚና ሊጫወቱ ይገባል ሲሉ አብራርተዋል፡፡በመጨረሻም የሴቶችና የሕጻናት መብቶችን ለማስከበር የተቋቋሙ ድርጅቶች ጠንካራ ሕብረት በመመስረት በተበታተነ ሁኔታ የሚያካሄዱትን ትግል በተደራጀ፤ በተናበበና ተጽዕኖ ሊፈጥር በሚችል መልኩ መደራጀትና መንቀሳቀስ ያስፈልጋቸዋል ሲሉ መልዕክታቸውን አስተላልፈዋል፡፡ የሴቶች መብቶች፣ትግበራና ክፍተቶች በኢትዮጵያ በሚል ርዕስ ወ/ሮ አሸነፈች አበበ የፌደራል መጀመሪያ ደረጃ ፍርድ ቤት ም/ፕረዝዳንት የጥናት ሰነድ ቀርቦ ውይይት እየተደረገበት ይገኛል፡፡


የሲቪል ማህበረሰብ ድርጅቶች ለዘላቂ ሰላምና አብሮነት ትኩረት በመስጠት በአገር ግንባታ ሂደት ላይ ሚናቸውን ሊወጡ ይገባል::

አዲስ አበባ (ኢዜአ) ታህሳስ 19/2015 የሲቪል ማህበረሰብ ድርጅቶች ለዘላቂ ሰላምና አብሮነት ትኩረት በመስጠት በአገር ግንባታ ሂደት ላይ ሚናቸውን ሊወጡ እንደሚገባ ተጠየቀ። ሀገር በቀል የሲቪል ማህበረሰብ ድርጅቶች “በሀገር ግንባታ የምሁራን ሚና” በሚል ርዕሰ ጉዳይ በአዲስ አበባ ውይይት አካሂደዋል። በውይይቱም በሕዝብ ተወካዮች ምክር ቤት የመንግስት ተጠሪ ሚኒስትር ተስፋዬ በልጂጌ፣ የፕላንና ልማት ሚኒስትር ዶክተር ፍጹም አሰፋ፣ የሴቶችና የማህበራዊ ጉዳይ ሚኒስትር ዶክተር ኤርጎጌ ተስፋዬ እንዲሁም የሀገር በቀል የሲቪል ማህበረሰብ ድርጅቶች አመራሮችና ተወካዮች ተገኝተዋል። የሲቪል ማህበረሰብ ድርጅቶች ባለስልጣን ዋና ዳይሬክተር ጂማ ዲልቦ፤ ሀገራዊ ለውጡን ተከትሎ የሲቪል ሚህበረሰብ ድርጅቶች በሀገሪቱ ልማት ሰላምና ዴሞክራሲ ላይ ያላቸውን ሚና ለማጠናከር መንግስት የአሰራርና የህግጋት ማሻሻያ ማድረጉን ጠቅሰዋል።

ይህን ተከትሎም የሲቪል ማህበረሰብ ድርጅቶች ድህነትን እና ኋላቀርነትን ለማስወገድ በማህበረሰብ ማንቃት በድጋፍና በምርምር መስክ እየሠሩ መሆኑን ጠቅሰዋል። የፕላንና ልማት ሚኒስትር ዶክተር ፍጹም አሰፋ፤ ባቀረቡት የመወያያ ፅሑፍ መንግስት ምቹ የፖለቲካ ምህዳር ለመፍጠር ካከናወናቸው የለውጥ ስራዎች መካከል የሲቪል ማህበራት አዋጅ ማሻሻያም ተጠቃሽ ነው ብለዋል። ይህን ተከትሎም ሀገር በቀል ሲቪል ማህበራት ድርጅቶች በሀገራቸው የሰላምና የልማት ሂደት በጎ ሚና እንዲጫወቱ በር ከፍቷል ነው ያሉት። ከዚህ አኳያ የሲቪል ማህበረሰብ ድርጅቶች የሀገርን ጥቅም በማስጠበቅና በሰላምና ዴሞክራሲ መጠናከር ላይ አተኩረው መሥራት እንዳለባቸው በመጠቆም። በህዝብ ተወካዮች ምክር ቤት የመንግስት ተጠሪ ሚኒስትር ተስፋዬ በልጂጌ፤ ጠንካራ ሀገር እውን ለማድረግ የሲቪል ማህበረሰብ ድርጅቶች የሀሳብ ብዝሃነት እንዲዳብርና ዴሞክራሲ እንዲጎለብት ሰፊ የግንዛቤ ማስጨበጫ ስራዎችን ማከናወን እንዳለባቸው ተናግረዋል፡፡ በሌላ በኩል መንግስት በሁሉም የሀገሪቱ ክፍል ዘላቂ ሰላም እንዲሰፍን በከፍተኛ ቁርጠኝነት እየሰራ መሆኑን አንስተው፤ የሀገር ግንባታው እውን እንዲሆን ሁሉም ዜጋና ተቋማት ለሰላም ቀናኢ ሆነው ሊንቀሳቀሱ እንደሚገባ በአፅነኦት ተናግረዋል።

የሲቪል ማህበረሰብ ድርጅቶች የኢትዮጵያን የብልፅግና ጉዞ በሚፈለገው ልክ ለማስቀጠል ብቁ ተቋማትን ለመፍጠር ራሳቸው አርዓያ ሆነው እንዲሰሩም ጠይቀዋል። የሴቶችና ማህበራዊ ጉዳይ ሚኒስትር ዶክተር ኤርጎጌ ተስፋዬ፤ ኢትዮጵያ እንደ ሀገር ህልውናውን አስጠብቃ እንድትቀጥል የሲቪል ማህበረሰብ ድርጅቶች በጎ ሚና መጫወታቸውን አንስተዋል። ሆኖም ሀገርን ከድህነትና ከኋላ ቀርነት በማላቀቅ ረገድ ግን የሚጠበቅበቸውን እንዳልተወጡ አንስተው፤ የሀገር ግንባታ ሂደቱ ላይ በጎ ሚናቸውን ለመወጣት በቅንጅትና በአንድነት እንዲሰሩ ጥሪ አቅርበዋል። በውይይቱ የተሳተፉ የሲቪል ማሀብረሰብ ድርጅት ተወካዮች በበኩላቸው ከሀገራዊ ለውጡ ወዲህ ለሲቪል ማህበረሰብ ድርጅቶች ምቹ የህግና የአሰራር ምህዳር መፈጠሩን አድንቀዋል። በመሆኑም የአገርና ህዝብ ጥቅምን በማስጠበቅ ጠንካራ አገር ለመገንባት ዝግጁ ነን ብለዋል፡፡


የህዝባችን ሁለንተናዊ ተጠቃሚነት ለማረጋገጥ በእውቀት የዳበረና በስነምግባር የታነፀ አገልጋይ መፍጠር ይገባል ተባለ::

የሲቪል ማህረሰብ ድርጅቶች ባለስልጣን የተቀላጠፈ የአገልግሎት አሰጣጥ ለመዘርጋትና በአዋጅ የተሰጠውን ሀላፊነት በአግባቡ ለመወጣት ለተቋሙ ባለሙያዎች የአቅም ግንባታ ስልጠናዎችን እየሰጠ ይገኛል፡፡ በስልጠናው ላይ ንግግር ያደረጉት የባለስልጣኑ ዋና ዳይሬክተር አቶ ጂማ ዲልቦ እንዳሉት ባለስልጣን መስሪያ ቤቱ የአስር አመት ስትራቴጂ እቅድ በማዘጋጀት ወደስራ መግባቱን ገልፀው በእቅዱ ውስጥ አምስት ግቦች የተቀመጡ ሲሆን እነሱም ምቹ የፖሊሲና የቁጥጥር ስርዓት፣ የበጎ ፈቃድና የበጎ አድራጊነት ባህልን ማዳባር፣ የአገልግሎት ተደራሽነት ስርዓት፣ በየዘርፉ ያሉ ተቋማት ጋር አጋርነት መፍጠር እና የባለስልጣን መስሪያቤቱ ውስጣዊ አቅም ማጎልበት እንደሆነ ገልፀዋል፡፡ ዋና ዳይሬክተሩ አክለውም የህዝባችን ሁለንተናዊ ተጠቃሚነት ለማረጋገጥ እንዲሁም የዳበረ የሲቪል ማህበረሰብ ድርጅቶች ለመፍጠር በእውቀትና በስነምግባር የታነፀ እንዲሁም ማገልገል ክብር መሆኑን የሚያውቅ ባለሙያ ሲኮን መሆኑን አንስተዋል፡: ሌላው ያነሱት በአራት ዓመታት ውስጥ ተቋማችንን የተሻለ የስራ አፈጻጸም እንዲኖረው ለሰራተኛው የተለያዩ የአቅም ግንባታ ስልጠናዎች መሰጠቱን አስታውሰው በቀጣይም ተጠናክሮ እንደሚቀጥል ገልፀዋል፡፡ በመጨረሻም ከባለስልጣን መስሪያ ቤቱ ጎን በመሆን ስልጠናዎችን በመስጠት ድጋፍ ያደረገ ያለውን CCP2 አመስግነዋል፡፡ ስልጠናው team building, communication organization effectives እና safeguard ያተኮረ ነው፡፡


ዋና ዳይሬክተር አቶ ጂማ ዲልቦ አፋር ክልል የሚገኘውን Development Expertise Center (DEC) የስራ እንቅስቃሴ በአካል ተገኝተው ተመልክተዋል፡፡

በጉብኝቱ የተቋሙ ዋና ዳይሬክተር አቶ ጂማ ዲልቦን ጨምሮ የተለያዩ ስራ ክፍል ሃላፊዎች ተገኝተዋል፡፡ ድርጅቱ በአፋር ክልል ፣ኦሮሚያ ፣ጋንቤላ ፣ቤኒሻንጉል ጉሙዝ፣ትግራይ ክልልና አዲስ አበባን ጨምሮ በትምህርት፣ በስርዓተ-ፆታ፣ በአድቮኬሲና የሰብዓዊ ድጋፍ ላይ ትኩርት በማድረግ የሚሰራ ድርጅት መሆኑን የ Development Expertise Center (DEC) ኤክስኪዩቲቭ ዳይሬክተር አቶ ብርሃኑ ደምሴ ገልጸዋል፡፡ ዋና ዳይሬክተር አቶ ጂማ ዲልቦ ድርጅቱ በተለያዩ ዘርፎች ላይ የሰራቸውን ስራዎች አድንቀው የጉብኝቱ ዓላማም ድርጅቱ መሬት ላይ ያከናወናቸውን ተግባራት በመመልከት ለመደገፍ፣ከፕሮጀክቱም የተጠቀሙ ማህበረሰብ ክፍሎችን ሃሳብ ለመውሰድና በጋራ በክልሉ የሚሰሩ የመንግስት ተቋማትን አስተያየት ለመቀበል እንደሚረዳ አብራርተዋል፡፡ በቀጣይም ይህን አበረታች ስራዎችን በማጠናከር መንግስት ሊደርስባቸው የማይችሉትን ልማቶች ከማህበረሰቡ ጎን በመሆን አጠናክራችሁ መቀጠል ይኖርባችዋል በማለት ባለስልጣን መስርያቤቱም በተቻለው አቅም አስፈላጊውን ድጋፍ ሁሉ እንደሚያደርግ አንስተዋል፡፡ በመጨረሻም የልማቱ ተጠቃሚ ማህበረሰብም በአካባቢው የተሰራውን ማንኛውንም ልማት በተገቢው መንገድ በመንከባከብ መጠቀም እንዳለበት በአካባቢው በጉብኝቱ ወቅት ለተገኙ የመንግስት ሃላፊዎችና የልማቱ ተጠቃሚ ማህበረሰብ መልዕክታቸውን አስተላልፈዋል ፡፡