በፀደቁ አራት መመሪያዎች ላይ ስልጠና ተሰጠ፡፡

ለክልል ፋይናንስ ቢሮ ሃላፊዎችና ለባለስልጣን መስርያቤቱ የተለያዩ የስራ ክፍል ሃላፊዎች በፀደቁ አራት መመሪያዎች ላይ ስልጠና ተሰጠ፡፡ ከአራቱ መመሪያዎች በተጨማሪ ከዚህ ቀደም በየክልሎቹ በመመሪያዎች ላይ የተሰጡ ስልጠናዎች በተመለከተ ግምገማ ተደርጓል፡፡ በስልጠናው ላይ የመክፈቻ ንግግር ያደረጉት የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ ባስተላለፉት መልዕክት ባለፉት አራት ዓመታት የሲቪል ማህበረሰብ ድርጅቶች ዘርፍ በተሻለ መልኩ ለመምራት ያስችል ዘንድ በርካታ የሪፎርም ስራዎች እንደተሰሩ እንዲሁም የሲቪል ማህበረሰብ ድርጅቶች እንቅስቃሴ ምህዳር በተሻለ መልኩ ክፍት ለማድረግና ለሀገር ልማትና ዲሞክራሲ ግንባታ ከግዜ ወደ ግዜ እየጨመረ እንዲሄድ ለማድረግ ስንሰራ ቆይተናል ብለዋል ፡፡ አዋጅ በሚወጣበት ወቅት ጥቅል ፖሊሲውን ይዞ ነው የሚወጣው አዋጁን ተከትሎ የሚወጡ ደንብና መመሪያዎች ደግሞ አዋጁን በደንብ ግልጽ ያደርጋሉ ብለዋል ፡፡ አያይዘውም ደንቡ በተለያዩ ምክንያቶች በተፈለገው ጊዜ አልወጣም ነገር ግን ደንቡ እስኪፀድቅ ድረስ በመጠባበበቅ ሴክተሩ ላይ ሊደርስ የሚችለውን ተፅህኖ ግምት ውስጥ በማስገባት ለባለስልጣን መስሪያቤቱ በተሰጠው ስልጣን መሰረት መመሪያዎችን በማውጣት ስራ ላይ መዋሉን ተናግረዋል ፡፡ በመጨረሻም እነዚህ መመሪያዎች ለአገልግሎት ሰጪውም ሆነ አገልግሎት ለሚያገኘው ብልሹ አሰራርን ከመከላከል አኳያ ከፍተኛ ጠቀሜታ ያለው በመሆኑ መመሪያውን በተገቢው ተረድተን እና ተገንዝበን መጠቀም ይኖርብናል በማለት መልዕክታቸውን አስተላልፈዋል፡፡
‹‹ሙስናን መታገል በተግባር›› በሚል መሪ ቃል በዓለም ዓቀፍ ደረጃ ለ19ኛ ግዜ በሃገራችን ደግሞ ለ18ኛ ግዜ የዓለም ዓቀፍ የጸረ ሙስና ቀን በዓል በተቋሙ ከአጠቃላይ ሰራተኛ ጋር ተከብሯል፡፡
የባለስልጣን መስሪያ ቤቱ ዋና ዳይሬክተር አቶ ጂማ ዲልቦ በመክፈቻ ንግግራቸው እንደገለጹት ሀገራችን ኢትዮጵያ የተባበሩት መንግሥታት የፀረ-ሙስና ኮንቬንሽንን ከማርቀቅ ጀምሮ እሰከ ማፅደቅ በነበረው ሂደት ንቁ ተሳትፎ ስታደርግ መቆየቷ እና በኋላም በዓለምአቀፍ ደረጃ እየተካሄደ ለሚገኘው የፀረ-ሙስና ትግል አጋርነቷን በማሳየት ላይ እንደምትገኝ ገልጸዋል፡፡ ይሁንና ነው ያሉት ዋና ዳይሬክተሩ በድህነት ውስጥ ባለች ሀገር “በእንቅርት ላይ ጆሮ ደግፍ” እንዲሉ ሙስናና ሌብነት የእድገታችን ማነቆ ሆኖ ከፍተኛ ተጽዕኖ እያደረሰብን ይገኛል፡፡ በተለይም ሕዝብን ለማገልገል የተቋቋሙ አገልግሎት ሰጪ የሆኑ መንግስታዊ ተቋማት ከሌብነትና ብልሹ አሠራር በፀዳ መልኩ በታማኝነትና በቅንነት ማገልገል ሲገባቸው ይህንን ኃላፊነታቸውን ለጊዜያዊ ጥቅም አሳልፈው በመሸጥ የሀገራችንን እድገት በእጅጉ ወደ ኋላ እየጎተቱ ይገኛሉ ብለዋል፡፡ በተቋማችን አገልግሎት ስንሰጥ ያስቀመጥናቸውን ተቋማዊ እሴቶቻችን ባከበረ መልኩ በአጋርነት እና በትብብር በመስራት፣ግልጽነት እና ተጠያቂነት፣በማስፈን ቅንነት እና ታማኝነት በመላበስ፤ፕሮፈሽናሊዝምን ባከበረ መልኩ እንዲሁም፣ምላሽ ሰጪነትንና ሰብአዊነት ማዕከል አድርገን ማገልገል የሚጠበቅብን ሲሆን እንደተቋም ሌብነትና ብልሹ አሰራርን በተመለከተ ዜሮ ቶለራንስ (zero-Tolerance) የሆነ መሪህን የምንከተል መሆናችንን በዚህ አጋጣሚ ለማረጋገጥ እወዳለሁ ሲሉ ገልጸዋል፡፡

በአሁኑ ጊዜ ህዝቡ በመልካም አስተዳደር ዕጦት ክፉኛ መማረሩን አንስተው ለዚህ ደግሞ አፋጣኝ መፍትሔ ካልሰጠን መጨረሻው ትልቅ ቀውስና ትርምስ ይሆናል፤በመሆኑም መንግስት ይህንን ችግር ለመታገል ባለው ቁርጠኝነት በቅርቡ በአገር አቀፍ ደረጃ ብሔራዊ ፀረ-ሙስና ኮሚቴ በማቋቋም ሌብነትን ትርጉም ባለው መልኩ ለመታገል መጠነ ሰፊ እንቅስቃሴ የተጀመረ መሆኑን አንስተው ሁሉም ዜጋ ተጨባጭ መረጃ በመስጠት ሌቦችን ማጋለጥና ለሕግ እንዲቀርቡ ለማድረግ በቁርጠኝነት መሥራት ይኖርብና ሲሉ መልዕክታቸውን አስተላልፈዋል፡፡ ወ/ሮ ትግስት አቡዬ የስነምግባር መከታተያ ዳይሬክቶሬት ዳይሬክተር በበኩላቸው ስለበዓሉ ባስተላለፉት መልዕክት የዘንድሮው የጸረ ሙስና ቀን ‹‹ሙስናን መታገል በተግባር›› በሚል መሪ ቃል በዓለም አቀፍ ደረጃ ለ19 ግዜ በሃገራን ደግሞ ለ18ኛ ግዜ እየተከበረ መሆኑን በመግለጽ በሀገራችን ኢትዬጵያ በውስጥና በውጭ ጠላቶቿ የተከፈተባትን የሕልውና አደጋ በጽናት ተቋቁማ ወደብልጽግና የምታደርገውን ጉዞ በሙስናና ብልሹ አሰራር ከቶውን እንዳይደናቀፍ በየደረጃው ከሚገኘው የመንግስት አመራና ሰራተኛ በተጨማሪ ከመላው ህብረተሰብ ብዙ ይጠበቃል ብለዋል፡፡ አያይዘውም በየዕርከኑ የምትገኙ የባለስልጣን መስሪያ ቤቱ አመራሮችና ሰራተኞች ሙስና ውስብስብና አስቸጋሪ እንዲሁም የሚያደርሰውም ጉዳት ከፍተኛና ልዩ ባህሪ ያለው ወንጀል መሆኑን በመረዳ ከቃል ባለፈ ተግባራዊ ትግል ማድረግ ከሁላችንም የሚጠበቅ ተግባር ነው ሲሉ መልዕክታቸውን አስተላልፈዋል፡፡
የተቋሙ ም/ዋና ዳይሬክተር አቶ ፋሲካው ሞላ የፕሮግራሙ ዓላማ፣ሀገራችን አለማቀፉ የፀረ-ሙስና ኮንቬንሽን አመሰራረት ታሪካዊ ዳራ፣የሙስና ምንነትና ትርጉም፣የሙስና ልዩ ባህሪያት፣የሙስና የህግ ማዕቀፎች፣በኢትየጵያ የጸረ-ሙስና ትግል እንቅስቃሴ፣የጸረ-ሙስና ትግል ቀጣይ የትኩረት አቅጣጫዎች፣የጸረ-ሙስና ትግል ቀጣይ አቅጣጫዎችና የባለድርሻ አካለት ሚና እንዲሁም ሌሎች ርዕሰ ጉዳዬችን ያካተተ ሰነድ አቅርበዋል፡፡ ከዚህም በተጨማሪ የዓለማቀፍ የጸረ ሙስና ትግልን እና ጥናቶችን መሰረት ያደረገ ጽሑፍ በኢትዮጵያ ሰብዓዊ መብት ድርጅቶች ጥምረት ቀርቦ ውይይት ተደርጎበታል፡፡
6ተኛው የኢፌዴሪ የሲቪል ማህበረሰብ ድርጅቶች ባለስልጣን፣የፌደራልና የክልል ባለድርሻ የመንግስት ተቋማት የጋራ ጉባኤ በጅግጅጋ ከተማ እየተካሄደ ይገኛል፡፡
የክልሉ ምክትል ፕረዝዳንት አቶ ኢብራሂም ዑስማን በጉባኤው ባስተላለፉት መልዕክት የሲቪል ማህረሰብ ድርጅቶች ህብረተሰቡን በማህበራዊ፣ ኢኮኖሚያዊና ፖለቲካዊ ጉዳዬች ላይ ያለው ግንዛቤ እንዲዳብር ማድረግን ጨምሮ በሚሰሯቸው ሌሎች ዘርፈብዙ ስራዎች ለሃገር ሁለንተናዊ እድገት ከፍተኛ ሚና እንደሚጫወቱ እሙን ነው ብለዋል፡፡ በዚህ ረገድ በባለፈው ዓመት በክልላችን አስከፊ ድርቅ መከሰቱን ተከትሎ ድርቁን ለማቋቋም በተደረገው ርብርብ የሲቪል ማህበረሰብ ድርጅቶች አስቸኳይ ሰብዓዊ ድጋፍ በማቅረብና የተለያዩ ድጋፎችን በማድረግ የጉዳቱን መጠን ለመቀነስ ያደረጉትን አስተዋጽኦ በመጥቀስ በድርቁ ወቅት ላሳዩት አጋርነትና ድጋፍ ከፍተኛ ምስጋና አቅርበዋል፡፡ የሶማሌ ክልልም የሲቪክ ማህበረሰብ ድርጅቶችን ያላሳተፈ እድገት እንዲሁም የዲሞክራሲ ስርዓት ግንባታ የሚፈለገውን ውጤት እንደማያመጣ ይገነዘባል በማለት ሁሉንም የማህበረሰብ ክፍሎች በእኩልነት ተጠቃሚ የሚያደርግ ዘላቂነት ያለው ሰላምና ልማት እንዲረጋገጥ ለሚደረገው ጥረት የሲቪል ማህበረሰብ ድርጅቶች በአግባቡ ሚናቸውን መወጣት የሚችሉበትን ምቹ ሁኔታ እንዲኖር በቁርጠኝነት ይሰራል ሲሉ መልዕክታቸውን አስተላልፈዋል፡፡



የፍትህ ሚኒስቴር ሚኒስትር ዴኤታ አቶ ፍቃዱ ጸጋ በበኩላቸው መንግስት በዘርፉ ለውጥ እንዲመጣ የህግ ማሻሻያዎችን ብሎም የአመራር ለውጥ በማድረግ ከፍተኛ የሆነ ለውጥ አስመዝግቧል ያሉ ሲሆን ሲሲቪል ማህበረሰብ ድርጅቶችም በሃገሪቱ የልማትና የመልካም አስተዳድር ጉዳዬች የማይተካ ሚና አላቸው ብለዋል፡፡ አያይዘውም ለዚህ ሃገር ፈተና የሆነውን የመልካም አስተዳድር ፈተና ዜጎች ተጋላጭ እንዳይሆኑ በማንቃት ረገድም ትልቅ ሚና አላቸው ሲሉ ገልጸዋል፡፡ የሲቪል ማበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ ባስለተላለፉት መልዕክት ይህ የጋራ ጉባኤ በዋናነት የሲቪል ማኅበረሰብ ዘርፉን ለማሳደግ እና የተሻለ ድጋፍና ክትትል ሥርዓት ለመዘርጋት፣ የዜጎች የመደራጀት መብት ለማረጋገጥ የሚመለከታቸው የፌደራልና የክልል መንግስታት በቅንጅት መስራት፣ በተቋማችንና በፌደራልና በክልል ተቋማት መካከል ዘመናዊና ፈጣን የመረጃ ልውውጥ መፍጠር፣ አገር በቀል ድርጅቶችን በማጠናከር በዘርፉ የሚደረገው አስተዋፅኦ ዘላቂና አስተማማኝ እንዲሆን ማስቻል፣ የጥናትና ምርምር ስራዎችን በማከናወን የሲቪል ማህበረሰብ ድርጅቶች በልማትና በዲሞክራሲ ሥርዓት ግንባታ ውስጥ ያላቸውን ሚና ማጎልበት እና ድርጅቶች የሚሰሯቸው የልማት ስራዎች ከመንግስት የልማት ዕቅዶች ጋር የተጣጣሙ መሆናቸውን ማረጋገጥ ዋናዎቹ ናቸው ብለዋል፡፡

በሰሜኑ ጦርነት ምክንያት ለተፈናቀሉ የማህበረሰብ ክፍሎች በሶስት ዙር በተደረገ የገቢ ማሰባሰቢያ መርሃ ግብር በአጠቃላይ ከአምስት መቶ አርባ አራት ሚሊየን ብር በላይ በዓይነትና በጥሬ ገንዘብ ድጋፍ መደረጉንም በንግግራቸው አካተው ገልጸዋል፡፡ ከአምስተኛው ጉባኤ በኋላ በሲቪል ማህበረሰብ ድርጅቶች ባለስልጣን የተከናወኑ ዋና ዋና ተግባራት ያጋጠሙ ችግሮችና የወደፊት የትኩረት አቅጣጫን የያዘ ሪፖርት በምክትል ዋና ዳይሬክተር አቶ ፋሲካው ሞላ ቀርቦ ውይይት እየተደረገበት ይገኛል፡፡
የሲቪል ማህበረሰብ ድርጅቶች ባለስልጣን ከህ.ወ.ሓት ጋር ስለተደረሰው ስምምነት ለሲቪል ማህበረሰብ ድርጅቶች ገለጻ አደረገ፡፡
የፍትህ ሚንስቴር ሚንስትር ዶ/ር ጌዲዮን ጢሞቲዎስ በተገኙበት በደቡብ አፍሪካ ስለተደረገው ስምምነት ለሲቪል ማህበረሰብ ድርጅቶች ገለጻ ተደርጓል፡፡ ስምምነቱ ምን ምን ጉዳዮችን እንዳካተተ ፣ በቀጣይ ስለሚወሰዱ ርምጃዎች እንዲሁም የሲቪል ማህበረሰብ ድርጅቶች ስምምነቱ ተግባራዊ እንዲሆን ማድረግ ስለሚገባቸው አስተዋጽዖ ሰፊ ገለጻ ተሰጥቷል፡፡ በተለይም የሲቪል ማህበረሰብ ድርጅቶች በስምምነቱ ላይ አሉታዊ ተጽዕኖ የሚፈጥሩ ቅስቀሳዎችን ወደጎን በመተው በስምምነቱ መሰረት ተግባራዊ እንዲሆን በጎ ተጽዕኖ ማድረግ ብሎም በጦርነቱ የተጎዱ የማህበረሰብ ክፍሎችንና የወደሙ መሰረተ ልማቶችን መልሶ በማቋቋም ማገዝ እንደሚጠበቅባቸው ዶ/ር ጌዲዮን ጠቁመዋል፡፡ አያይዘውም መንግስት ዘላቂ ሰላምን ለማረጋገጥ የሚያደርገው ጥረት ስኬታማ እንዲሆን በሀገራዊ ምክክሩ ላይ ንቁ ተሳትፎ በማድረግ ለሀገራዊ መግባባትና ለዘላቂ ሰላም የሲቪል ማህበረሰብ ድርጅቶች የበኩላቸውን መወጣት ይጠበቅባቸዋል ብለዋል፡፡



በመድረኩ ላይ ከሰላምና ከሀገራዊ ምክክር ጋር በተያያዘ የሲቪል ማህበረሰብ ድርጅቶች ትልቅ ኃላፊነት እንዳለባቸው የተጠቀሰ ሲሆን ከዚህ በተጨማሪም ከጊዜ ወደጊዜ ስር እየሰደደ የመጣውን ሙስና በመረጃና በማስረጃ በመሞገትና በማጋለጥ የሲቪል ማህበረሰብ ድርጅቶች የበኩላቸውን እንዲወጡ ጥሪ ቀርቧል፡፡ የመድረኩ ተሳታፊዎች መንግስት እየወሰደ ያለውን ርምጃ አድንቀው የሲቪል ማህበረሰብ ዘርፉ ለስምምነቱ መሳካት የድርሻውን እንደሚወጣ ገልጸዋል፡፡
የኢትዮጵያ ሕይወት ብርሃን ቤተክርስቲያን የልማት ድርጅት ከ20.6 ሚሊዮን ብር በላይ በሆነ ወጪ 18 ትምህርት ቤቶችን መልሶ ማቋቋም ትግበራ ላይ መሆኑ ተገለጸ፡፡
የኢትዮጵያ ሕይወት ብርሃን ቤተክርስቲያን የልማት ድርጅት ከኮምፓሽን ኢንተርናሽናል ባገኘው የ20.6 ሚሊየን ብር የገንዘብ ድጋፍ በጦርነቱ ጉዳት በደረሰባቸው የሰሜን ሸዋ፣ ደቡብ ወሎ እና ሰሜን ወሎ ዞኖች 18 ትምህርት ቤቶችን መልሶ የማቋቋም ፕሮጀክት በትግበራ ላይ እንደሚገኝ የድርጅቱ ዋና ስራአስኪያጅ አቶ ታገለ ማቴዎስ ገለጹ፡፡ የድርጅቱ ስራስኪያጅ አቶ ታገለ ማቴዎስ እንደገለጹት በጦርነቱ ምክንያት ጉዳት የደረሰባቸው ትምህርት ቤቶችን መልሶ ለማቋቋም እየተሰራ መሆኑን አንስተው ድጋፉ በዋናነት ኮምፒውተር፣ የተማሪዎች መቀመጫ ወንበር፣ ፎቶ ኮፒ ማሽን፣ ፕሪንተር እና የፈተና ማባዣ ማሽኖችን ያካተተ ነው ያሉ ሲሆን በሸዋ ሮቢት፣ በደሴ፣ በኩታበር፣ በሀይቅ፣ በወልዲያ፣ በቆቦ ከተሞች የተማሪ መቀመጫ ወንበሮች ደርሰዋል ብለዋል፡፡ ቀሪ ስራዎችም በሚቀጥሉት ሳምንታት እንደሚጠናቀቁ አክለው አብራርተዋል፡፡



የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ የኃይማኖት ተቋማት ለረጅም ዘመናት ከሃይማኖታዊ ተግባራቶቻቸው ጎን ለጎን ኅብረተሰቡን ለማገዝ በልማት ስራዎች ላይ ሲሳተፉ ቆይተዋል ያሉ ሲሆን ባለስልጣን መስሪያ ቤቱ እንዲህ ያለውን ተግባር በእጅጉ እንደሚያበረታታ ገልጸዋል፡፡ ባለስልጣን መስሪያ ቤቱ በጦርነቱ ጉዳት ለደረሰባቸው አካባቢዎች የሲቪል ማህበረሰብ ድርጅቶችን በማስተባበር የተለያዩ ድጋፎችን ለተጎጂዎች እያደረሰ እንደሚገኝ ጠቅሰው የኢትዮጵያ ሕይወት ብርሃን ቤተክርስቲያን የልማት ድርጅት ከኮምፓሽን ኢንተርናሽናል ባገኘው የገንዘብ ድጋፍ 18 ትምህርት ቤቶችን መልሶ በማቋቋም እያደረገ ያለው ድጋፍ ተጠናክሮ መቀጠል አለበት ሲሉ መልዕክታቸውን አስተላልፈዋል፡፡ የኢትዮጵያ ሕይወት ብርሃን ቤተክርስቲያን የልማት ድርጅት ከ1992 ዓ.ም ጀምሮ በርካታ የልማት ስራዎችንና የአስቸኳይ ጊዜ ድጋፎችን ሲያደርግ የቆየ ሲሆን በአሁኑ ጊዜ ከ140 ሚሊዮን በላይ አመታዊ በጀት በመመደብ ከ10 አጋር ድርጅቶች ጋር በዘርፈ ብዙ የልማት ስራዎችን በመስራት ላይ ይገኛል፡፡ በፕሮጀክት ገለጻው ላይ የባለስልጣን መስሪያ ቤቱ ዋና ዳይሬክተር አቶ ጂማ ዲልቦን ጨምሮ የአማራ ክልል ትምህርት ቢሮ እና ፋይናንስ ቢሮ ተወካዮች እንዲሁም የኮምፓሽን ኢትዮጵያ ተወካይ ተሳታፊዎች ሆነዋል፡፡
ባለስልጣን መስሪያ ቤቱ ተፈናቃዮች ወደቀያቸው ተመልሰው የተረጋጋ ኑሮ እስኪጀምሩ ድጋፍ ማድረጉን እንደሚቀጥል ገለጸ፡፡
በሲቪል ማኅበረሰብ ድርጅቶች ባለሥልጣን አስተባባሪነት ከአንድ ሚሊዮን ብር በላይ ግምት ያላቸው የምግብና የንጽህና መጠበቂያ ቁሳቁሶችን እንዲሁም አልባሳትን በደብረብርሃን ከተማ ተጠልለው ለሚገኙ ተፈናቃዮች ድጋፍ ተደርጓል፡፡ በሶስተኛው ዙር የሲቪል ማኀበረሰብ ድርጅቶች ባለስልጣን የሰብዓዊ ድጋፍ ማሰባሰቢያ መርሃ ግብር ላይ ለበርካታ የሲቪል ማህበረሰብ ድርጅቶች በተለያዩ የጸጥታ መደፍረስ ምክንያቶች ከቀያቸው ለተፈናቀሉ ዜጎች የሰብዓዊ ድጋፍ እንዲያደርጉ ጥሪ መተላለፉ የሚታወስ ነው፡፡ ይህንኑ ተከትሎ ኤስ አይ ኤም ኢትዮጵያ (SIM-Ethiopia) ከተባለ የውጪ የሲቪል ማህበረሰብ ድርጅት ጋር በመተባበር ከአንድ ሚልየን ብር በላይ ግማታዊ ዋጋ ያላቸው የምግብ፣ የአልባሳትና የንጽህና መጠበቂያ ቁሳቁስ ድጋፍ ተደርጓል፡፡ በድጋፉ ወቅት ንግግር ያደረጉት የሲቪል ማህበረሰብ ድጅቶች ባለስልጣን የጽህፈት ቤት ኃላፊ አቶ በፍቃዱ በሀገሪቱ ክፍሎች በተለያዩ ምክንያቶች ተፈናቅለው ለሚገኙ ዜጎች ባለስልጣን መስሪያ ቤቱ የሲቪል ማህበረሰብ ድርጅቶችን በማስተባበር የተለያዩ ሰብዓዊ ድጋፎችን ሲያቀርብ መቆየቱን አውስተው ካሁን በፊት ወደዚህ አካባቢ በመምጣት በገባንው ቃል መሰረት ለዚሁ ዓላማ ከተቋቋመ ኮሚቴ ጋር በመነጋገር ድጋፉን ይዘን መጥተናል ብለዋል፡፡



አክለውም ባለስልጣን መስሪያ ቤቱ የሲቪል ማህበረሰብ ድርጅቶችን በማስተባበር በተለያዩ የመጠለያ ጣቢያዎች ለሚገኙ ዜጎች ድጋፍ የሚያደርግ መሆኑን አንስተው ተፈናቃዮች ወደቀያቸው ተመልሰው የተረጋጋ ኑሮ እስኪጀምሩ ድረስ ድጋፍ ማድረጉን አጠናክሮ እንደሚቀጥል አክለው ገልጸዋል፡፡ የደብረ ብርሃን ከተማ አስተዳደር የስራ እድል ፈጠራና ምግብ ዋስትና ጽሕፈት ቤት ኃላፊ የሆኑት አቶ ግርማ ድባቤ፤ በወይንሸት መጠለያ ጣቢያ ከ6800 በላይ ተፈናቃዮች እንደሚገኙ አንስተው ከወር በፊት የባለስልጣን መስሪያ ቤቱ ከፍተኛ የስራ ኃላዎች በገቡት ቃል መሰረት ቃላቸውን ጠብቀው ከኤስ አይ ኤም ኢትዮጵያ (SIM-Ethiopia) ጋር በመሆን ድጋፉን ይዘው በመምጣታቸው ምስጋናቸውን አቅርበዋል፡፡ በመንግስትና በተለያዩ ድጋፍ አድራጊ አካላት ድጋፍ እየተደረገ ቢሆንም በቂ አይደልም ያሉት አቶ ግርማ በሁሉም የመጠለያ ጣቢያዎች የምግብና የንጽህና መጠበቂያ ቁሳቁስ እጥረት ያለ በመሆኑ ይህ ጊዜ እስኪያልፍ እንድንረዳዳ መልዕክቴን አስተላልፋለሁ ብለዋል፡፡ ኤስ አይ ኤም ኢትዮጵያ (SIM-Ethiopia) በሲቪል ማህበረሰብ ድርጅቶች ባለስልጣን ተመዝግቦ በተለያዩ የሰብዓዊ ድጋፍና ልማት ስራዎች ላይ የተሰማራ የውጪ የሲቪል ማህበረሰብ ድርጅት ሲሆን በኦሮሚያ፣በደቡብና በአማራ ክልል በተለይም በባህርዳርና በእንጅባራ፣ የተለያዩ የልማት ፕሮጅክቶችን እየሰራ ይገኛል፡፡ የኤስ አይ ኤም ኢትዮጵያ (SIM-Ethiopia) ሲኒየር ሚኒስትሪ ማናጀር የሆኑት አቶ ነብዩ ኃይሌ እዚህ ደብረብርሃን ላይ ከፍተኛ ቁጥር ያለው ተፈናቃይ ያለ መሆኑን ስንሰማ ከባለስልጣን መስሪያ ቤቱ ጋር በመነጋገር የስንዴ ዱቄትና የምግብ ዘይት ድጋፍ አድርገናል ያሉ ሲሆን ማህበረሰባችን ከገጠመው ችግር እስኪወጣ ድረስ አቅም በፈቀደ መጠን ድጋፍ ማድረጋችንን እንቀጥላለን ብለዋል፡፡
አለም አቀፍ ድርጅቶች አህጉር አቀፍ ቢሮዎቻቸውን በኢትዮጵያ እንዲከፍቱ ጥሪ ቀረበ፡፡

መሰረቱን እንግሊዝ አገር ያደረገው ችልድረንስ ኢንቨስትመንት ፈንድ ፋውንዴሽን (children’s investment fund foundation (CIFF UK)) የተባለ የውጪ ድርጅት የአፍሪካ ክልላዊ ቢሮውን (The CIFF UK Africa Regional office) በአዲስ አበባ ለመክፈት የሚያስችለውን የመግባቢያ ስምምነት ከሲቪል መማህበረሰብ ድርጅቶች ባለስልጣን ጋር ተፈራርሟል፡፡ በስምምነቱ ላይ የሲቪል ማህበረሰብ ድርጅቶች ባለስልጣን ም/ዋና ዳይሬክተር አቶ ፋሲካው ሞላን ጨምሮ የባለስልጣን መስሪያ ቤቱ የስራ ኃላፊዎችና የCIFF የስራ ኃላፊዎች ተገኝተዋል፡፡ ስምምነቱን የተፈራረሙት የሲቪል ማህበረሰብ ድርጅቶች ባለስልጣን ምክትል ዋና ዳይሬክተር አቶ ፋሲካው ሞላ፤ ኢትዮጵያ ውስጥ ያለው የሲቪል ማህበረሰብ ድርጅቶች አጠቃላይ ህጋዊና ተቋማዊ ማዕቀፍ መሻሻሉንና የሲቪል ማህበረሰብ ድርጅቶች ኢትዮጵያ ውስጥ የልማት አጋር እንደሆኑ የሚያሳይ የህግና የፖሊሲ ማዕቀፍ መኖሩን አንስተው ባለስልጣን መስሪያ ቤቱ ይህን ለማስፈጸም ከፍተኛ ጥረት እያደረገ ይገኛል ብለዋል፡፡ የሚያሰራና ምቹ የሆነ የስራ ሁኔታ በመፈጠሩ የውጪ ድርጅቶችም ሆኑ ሀገር በቀል ድርጅቶች ከጊዜ ወደጊዜ ቁጥራቸው እየጨመረ መጥቷል ያሉት ምክትል ዋና ዳይሬክተሩ በርካታ የውጪ ድርጅቶች ክልላዊ ቢሯቸውን (Regional office) በኢትዮጵያ እየከፈቱ እንደሚገኙና የልማት አጋሮቸቻችን እየሆኑ እንደሆነ አንስተው CIFF UKም የዚሁ መሻሻል ማሳያ እንደሆነ ተናግረዋል፡፡
አቶ ፋሲካው በንግግራቸው ድርጅቶችን ህግ አውጥቶ ከማስተዳደር ባሻገር እንደ CIFF UK ያሉ የተለየ ባህሪ ያላቸውን ድርጅቶች መፍትሄ የሚሰጥ አሰራር መዘርጋት ያስፈልጋል ያሉ ሲሆን ይህ የመግባቢያ ስምምነት የተፈረመው ድርጅቱ ያለውን ነባራዊ ሁኔታ ከግምት ውስጥ በማስገባት ለማስተዳደር እንዲያመችና ድርጅቱም በተሻለ ሁኔታ መንቀሳቀስ እንዲችል እድል የሚሰጥ ነው ሲሉ ገልጸዋል፡፡ በአፍሪካም፣ በእሲያም ሆነ በተለያዩ አህጉራት የሚንቀሳቀሱ ድርጅቶች ኢትዮጵያ ውስጥ መጥተው አህጉር አቀፍ እና ክልል አቀፍ ቢሮዎችን ቢከፍቱ መንግስት እጁን ዘርግቶ እንደሚቀበላቸው ያነሱት አቶ ፋሲካው ለዚህም የተሻለና ሊያሰራ የሚችል የህግ ማዕቀፍና ፖሊሲ ያለ መሆኑን በመጠቆም አለም አቀፍ ድርጅቶች አህጉር አቀፍ ቢሮዎቻቸውን በኢትዮጵያ እንዲከፍቱ ጥሪያቸውን አቅርበዋል፡፡

ችልድረንስ ኢንቨስትመንት ፈንድ ፋውንዴሽን (children’s investment fund foundation (CIFF UK)) በፈረንጆቹ አቆጣጠር በ2020 በሲቪል ማህበረሰብ ድርጅቶች ባለስልጣን ተመዝግቦ በእናቶችና ህጻናት ጤና፣ በቤተሰብ ምጣኔና በአካባቢ ጥበቃ እንዲሁም በስነ ምግብ ላይ የሚሰራ የውጪ ድርጅት ሲሆን ከባለስልጣን መስሪያ ቤቱ ጋር ባደረገው ስምምነት መሰረት የምስራቅ እና ደቡባዊ አፍሪካ ቢሮውን በአዲስ አበባ የሚከፍት ይሆናል፡፡ድርጅቱ በዓመት ከ500 ሚሊዮን ዶላር በላይ ገንዘብ በመላው ዓለም ኢንቨስት እያደረገ የሚገኝ ድርጅት ሲሆን በኢትዮጵያ ክልላዊ ቢሮውን በመክፈቱ ከ230 ሚሊዮን ዶላር በላይ በኢትዮጵያ ኢንቨስት የሚያደርግ ይሆናል፡፡ በሰሜኑ የሀገሪቱ ክፍል ከተከሰተው ወቅታዊ ሁኔታ ጋር በተያያዘም በዩኒሴፍ በኩል ከ15-20 ሚሊዮን የሚደርስ ድጋፍ እንግሊዝ በሚገኘው ዋና ቢሮው አማካኝነት ድጋፍ ማድረጉንና በቅርቡ ለተጎጂዎች በዩኒሴፍ በኩል እንደሚደርስ የድርጅቱ የአፍሪካና የኢትዮጵያ ተወካይ ዶ/ር አብርሃም አስማረ ገልጸዋል፡፡
የቮለንተሪዝም ኢንፎርሜሽን ማኔጅመንት ሲስተም (VIMS) ተጨማሪ ማሻሻያዎችን በማድረግ አገልግሎት እየሰጠ ይገኛል፡፡

የሲቪል ማህበረሰብ ድርጅቶች ባለስልጣን በአዋጅ ቁጥር 1113/11 በተሰጠው ስልጣንና ኃላፊነት የበጎ ፈቃደኝነትንና በጎ አድራጊነትን ባህል ለማድረግ የሚያስችሉ በርካታ ስራዎችን እየሰራ ይገኛል፡፡ ከነዚህ ስራዎች መካከል በጎ ፈቃደኞች ባሉበት ሆነው በፈለጉት የበጎ ፈቃድ ዘርፍ ላይ መሰማራት እንዲችሉ አስቻይ ሁኔታዎችን መፍጠር ነው፡፡ በዚሁ መሰረት በባለስልጣን መስሪያ ቤቱ የበጎ ፈቃድ ማጎልበትና ፈንድ አስተዳደር አማካኝነት ስራ ላይ የነበረው በጎ ፈቃደኞች ባሉበት ሆነው ለበጎፈቃድ አገልግሎት መመዝገብ እንዲችሉ የሚያግዝ የቮለንተሪዝም ኢንፎርሜሽን ማኔጅመንት ሲስተም (VIMS) ዘርግቶ ሲሰራ ቆይቷል፡፡ ይህን አሰራር በማዘመን የበጎ ፈቃድ አገልግሎት ሰጪ ዜጎችን የሚፈልጉ ተቋማት በቀጥታ ባሉበት ሆነው በጎ ፈቃደኞችን ማግኘት እንዲችሉ ለማድረግ ሲስተሙ ላይ ማሻሻያ አድርጓል፡፡ ይህም ካሁን ቀደም ድርጅቶችና ተቋማት ጥሪ ተደርጎላቸው በደብዳቤ ጠይቀው ይወስዱበት የነበረው አሰራር ተቀይሮ በኦንላይን በፈለጉበት የሙያ ዘርፍ በጎ ፈቃደኞችን ማግኘት እንዲችሉ የሚያስችል ነው፡፡ የቮለንተሪዝም ኢንፎርሜሽን ማኔጅመንት ሲስተም በፕሪሚየም (volunteerism information management system) ደረጃ መበልጸጉን አስመልክቶ ከተቋሙ የስራ ኃላፊዎች ጋር በተደረገ የትውውቅና የግብዓት ማሰባሰቢያ መርሃ ግብር ላይ የባለስልጣን መስሪያ ቤቱ ምክትል ዋና ዳይሬክተር አቶ ፋሲካው ሞላ እንዳሉት፤ በጎ ፋቃደኝነትን እንደሀገር ባህል ለማድረግ ሁሉም ጠንክሮ መስራት እንደሚጠበቅበት አንስተው አሁን ተሻሽሎ በፕሪሚየም ደረጃ የቀረበው የቮለንተሪዝም ኢንፎርሜሽን ማኔጅመንት ሲስተም የበጎ ፈቃደኝነትና በጎ አድራጊነት ባህልን በማህበረሰቡ ውስጥ ለማስረጽ ትልቅ ሚና እንደሚኖረው ገልጸዋል፡፡
የቮለንተሪዝም ኢንፎርሜሽን ማኔጅመንት ሲስተም ካሁን በፊት የበጎ ፈቃድ አገልግሎት መስጠት የሚፈልጉ በጎፈቃደኞችን በድህረ ገጽ የሚመዘግብ ሲስተም ሲሆን አሁን በተደረገለት ማሻሻያ ከበጎ ፈቃደኞች በተጨማሪ በጎ ፈቃደኛ ፈላጊ ድርጅቶችና ተቋማትም ተመዝግበው የፈለጉትን በጎ ፈቃደኛ ማግኘት እንዲችሉ የሚያስችል ነው፡፡
ጣምራ ለማህበራዊ ልማት 25ኛ ዓመት የምስረታ በዓሉን አከበረ፡፡

በስነስርዓቱ ላይ የመክፈቻ ንግግር ያደረጉት የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ እንደተናገሩት ድርጅቱ በበጎ ፈቃደኛና ልበ ብሩሃን በሆኑ ወጣቶች ከዘሬ ሃያ አምስት ዓመታት በፊት ለተለያዩ ማህበራዊ ችግሮች የተጋለጡ የማህበረሰብ ክፍሎችን መደገፍ ዓላማ አድርጎ “ጣምራ የፀረ-ኤድስ ክበብ” በሚል ስያሜ የተቋቋመ እና በሲቪል ማኅበረሰብ ድርጅቶች ባለሥልጣን ተመዝግቦ በመንቀሳቀስ ላይ የሚገኝ መሆኑን ተናግረዋል፡፡ ዋና ዳይሬክተሩ አክለውም አፍላ ወጣቶቹ በወቅቱ የነበራቸውን እምቅ የኪነ-ጥበብ ተሰጥዖ እንደ አብይ መሳሪያ ተጠቅመው በትምህርት ቤቶች፣ በስፖርት ሜዳዎች በከተማ ጎዳናዎች እና በየመንደሩ እየተዘዋወሩ ስለ ኤች.አይ.ቪ ኤድስ በሽታ አስከፊነት ህብረተሰቡን በማስተማርና የታመሙትን በመንከባከብ እንቅስቃሴያቸውን መጀመራቸውን አስታውሰው ቀስ በቀስ ወደ ሌሎች የጤናና ማህበራዊ ጉዳዮችም በማስፋት ህብረተሰቡን በተለይም ሴቶችን፣ ወጣቶችንና አቅመ ደካሞችን ትኩረት አድርጎ መስራቱ በአብነትነት የሚያስጠቅሰውና የሚያስመሰግነው ጉዳይ ነው ሲሉ ገልጸዋል፡፡ በመጨረሻም የምስረታ ባህላቸውን ምክንያት በማድረግ የእንኳን አደረሳችሁ መልዕክት በማስተላለፍ ጣምራ ለማህበራዊ ልማት ወጣቶች ማህበር በ25 ዓመታት ውስጥ ያሳካቸውን ዓላማዎች የበለጠ በማስፋት፣የህብረተሰቡን ሁለንተናዊ ተጠቃሚነት እንዲረጋገጥ ከዚህ የተሻለ ስራ እንደምትሰሩ ተስፋ አደርጋለሁ በማለት መልዕክታቸውን አስተላልፈዋል::

የሲቪል ማህበረሰብ ድርጅቶች ባለስልጣን NABU ከተባለ ውጭ ድርጅት ጋር የመግባቢያ ሰነድ ተፈራረመ፡፡

THE NATURE AND BIODIVERSITY CONSERVATION UNION /NABU/ ሪጅናል ቢሮውን መክፈት የሚያስችለውን የስምምነት ሰነድ ነው ከባለስልጣን መስሪያቤቱ ጋር የተፈራረመው፡፡ ድርጅቱ በተፈጥሮ ሃብት ጥበቃ ላይ ተሰማርቶ የሚሰራ ሲሆን ማህበረሰቡን ተጠቃሚ ለማድረግ እና የተፈጥሮ ሃብትም ያለአግባብ እንዳይወድም ተገቢውን እንክብካቤ የሚያደርግ ድርጅት መሆኑን ተገልጷል፡ የመግባቢያ ሰነድ ዋና ዓላማ በአፍሪካ ሪጂናል ቢሮ እንዲኖረው ለማስቻል ብሎም ከሌሎች የሲቪል ማህበረሰብ ድርጅቶች ጋር በቅርበት ለመስራት እንዲያስችል መሆኑን በአፍሪካ ሪጅናል ኦፊስ አክቲንግ ዳይሬክተር አቶ ሲሳይ አስፋው ተናግረዋል፡፡








