የኢትዮጵያ የሙያ ማህበራት ህብረት ተመሰረተ፡፡

ጠቅላላ ጉባኤው ፕሮፌሰር ኢማና ጌቱን የጉባኤው ሰብሳቢ አድርጎ መርጧል፡፡ በመርሃ ግብሩ ላይ የመክፈቻ ንግግር ያደረጉት የተቋሙ ዋና ዳይሬክተር አቶ ጂማ ዲልቦ እንደተናገሩት በአገራችን የሙያ ማህበራት መቋቋም ረጅም ታሪክ ያለው ቢሆንም ለሙያ ማህበራት መደራጀት እና ማደግ ምቹ የሆነ የሕግ ማዕቀፍ ባለመኖሩ ምክንያት ዘርፉ በማህበራዊ፣ፖለቲካዊና ኢኮኖሚያዊ እድገት ውስጥ የሚገባውን ሚና እንዳይጫወት ማድረጉን ገልጸዋል፡፡ በአገራችን በተካሄደው አገራዊ ሪፎርም ማግስት መንግስት ቅድሚያ ትኩረት ሰጥቶ ካሻሻላቸው ሕግች መካከል የሲቪል ማህበራትን የሚመራው ሕግ ሲሆን አዋጁ ያልተገደበ የዓላማ ነፃነት እንዲያገኙ ካደረጋቸው አደረጃጀቶች አንዱ የሙያ ማህበር መሆኑን አመላክተዋ፡፡ ከዚህ ቀደም በነበረው ህግ ሙያ ማህበራት ለአባላት ጥቅም ካልሆነ በስተቀር ለሦስተኛ ወገን እንዳይሰሩ ተከልክለው የነበረው መሆኑን በመግለጽ በዚህም ሀገርና ህዝብ ከሙያ ማህበራት ማግኘት የሚገባውን ጠቀሜታ ሳያገኙ መቅረታቸውን አንስተዋል፡፡ አዋጁን ተከትሎ “የሙያ ማህበራት ድጋፍ እና አስተዳደር መመሪያ መውጣቱን አንስተው ባለሥልጣኑ በዘርፉ ከተሰማሩ የመንግስት አካላት ጋር በመተባበር የሙያ ማህበራትን ለመደገፍና ለማበረታታት የተለያዩ ድጋፎችን ሊያመቻች እንደሚችልም በግልጽ መመላከቱን አብራርተዋል፡፡

ከዚሁ ጋር በተያያዘ የሙያ ማህበራት በተሻለ ሁኔታ ለመምራትና ለመደገፍ እንዲቻል በቅርቡ ተጠንቶ በጸደቀው አዲስ የባለሥልጣን መ/ቤታችን መዋቅራዊ አደረጃጀት አንድ ራሱን የቻለ “የሙያ ማህበራት ዴስክ” ያለው መሆኑን በማንሳት ይህ ዴስክ በቀጣይ ለሙያ ማህበራት የሚደረጉ ድጋፎችን በተደራጀና በተጠና መንገድ ለማከናወን እንደሚያግዝ ይታመናል ሲሉ ተናግረዋል፡፡ በመጨረሻም በዛሬው ዕለት የሚመሠረተው የሙያ ማህበራት ህብረት (Ethiopian professional associations Alliance) ከዚህ በፊት በዘርፉ የነበሩትን ችግሮች በመቅረፍ የሙያ ማህበራት ተጠናክረውና ተደጋግፈው በችሎታና በዕውቀት የተገነቡ ተቋማት እንዲፈጠሩ፣የምርምር ስራዎች እንዲጎለብቱ በማድረግ ሳይንስና ቴክኖሎጂ ማስፋፋት አገራችንን ወደ ተሻለ ደረጃ በማድረስ ውስጥ ግንባር ቀደም ሚና እንደምትጫወቱ መንግስት ከፍተኛ እምነት አለው ሲሉ መልዕክታቸውን አስተላልፈዋል፡፡ በፕሮግራሙ ላይ የጉባኤው መተዳደሪያ ደንብን ጨምሮ በርካታ መነሻ ጹሑፎች ቀርበው ውይይት የተደረገባቸው ሲሆን በመጨረሻም ፕሮፌሰር ኢማና ጌቱ የጠቅላላ ጉባኤ ሰብሳቢ ፣አቶ ሰለሞን ደበሌ ም/ሰብሳቢ እና አቶ ሲሳይ ሳህሌ ጸሐፊ በማድረግ የመረጠ ሲሆን ከዚህ በተጨማሪ ዘጠኝ አባላት ያሉት ስራ አስፈጻሚ አካላትን በመምረጥ ተጠናቋል፡፡


ዋና ዳይሬክተር አቶ ጂማ ዲልቦ በማላዊ የፆታ፣ የማህበረሰብ ልማት እና ማህበራዊ ደህንነት ሚኒስቴር ተወካይ ወ/ሮ ሮዝሊን በቢሯቸው አግኝተው አነጋግረዋል፡፡

በማላዊ የፆታ፣ የማህበረሰብ ልማት እና ማህበራዊ ደህንነት ሚኒስቴር ተወካይ በሆኑት ወ/ሮ ሮዝሊን የተመራ ልዑክ በሲቪል ማህበረሰብ ድርጅቶች ባለስልጣን በመገኘት የልምድ ልውውጥ አድርጓል፡፡ የልምድ ልውውጡን ያደረጉት በማላዊ መንግስት መንግስታዊ ያልሆኑ ድርጅቶች ተቆጣጣሪ ባለስልጣን የስራ ኃላፊዎች ሲሆኑ በባለስልጣን መስሪያ ቤቱ በመገኘት በኢትዮጵያ የሲቪል ማህበረሰብ ድርጅቶች ታሪክ፣ እንቅስቃሴ እና ተቋሙ እያከናወነ ስላለው ተግባር በባለስልጣን መስሪያ ቤቱ ዋና ዳይሬክተር አቶ ጂማ ዲልቦ ገለጻ ተደርጎላቸዋል፡፡
ዋና ዳይሬክተሩ በማብራሪያቸው ባለስልጣን መስሪያ ቤቱ የሲቪል ማህበረሰብ ምህዳሩን ለማስፋት በርካታ ተግባራት መከናወኑን በማንሳት ባለፉት አራት አመታት ብቻ ከ2500 በላይ አዲስ የሲቪል ማህበረሰብ ድርጅቶች እንደተመዘገቡ ፣ባለስልጣን መስሪያ ቤቱ ከአጋር አካላት ጋር በመሆን ዘርፉ ለሀገር የሚጠበቅበትን እንዲያበረክት የተለያዩ የህግ ማሻሻያዎችን ማድረጉን፣መምሪያዎችንና ማኗሎችን በማዘጋጀት ግልጽና ተገማች የሆነ አገልግሎት እየሰጠ እንደሚገኝም ጠቁመዋል፡፡ ተቋማዊ የሪፎርም ስራዎች፣የበጎ ፈቃድና በጎ አድራጊነትን በማህበረሰቡ ውስጥ ለማስረጽ የተከናወኑ ስራዎች፣ቴክኖሎጂን ከመጠቀም አንጻር፣ከፈንድ አስተዳድር አንጻር የተከናወኑ ተግባራት፣የአጋርነት እና ትብብር ስራዎች፣ከድርቅና ከሰብዓዊ ድጋፍ አንጻር ድርጅቶችን በማስተባበር የተከናወኑ ተግባራት አበረታች መሆናቸውን አንስተዋል፡፡
በማላዊ የፆታ፣ የማህበረሰብ ልማት እና ማህበራዊ ደህንነት ሚኒስቴር ተወካይ የሆኑት ወ/ሮ ሮዝሊን በበኩላቸው በማላዊ ያለው የሲቪል ማህበረሰብ ድርጅቶች አደረጃጀት ኢትዮጵያ ካለው የሲቪል ማህበረሰብ ድርጅቶች አደረጃጀት የተለየ እንደሆነ አንስተዋል፡፡ አያይዘውም በማላዊ ከባለስልጣነ መስሪያ ቤቱ ጋር አቻ የሆነ ኃላፊነት የተሰጠው መንግስታዊ ያልሆኑ ድርጅቶች ተቆጣጣሪ ባለስልጣን የሚባል መሆኑን በማንሳት በዚህ ተቋም ውስጥ መንግስታዊ ያልሆኑ ድርጅቶችን የመመዝገብና የመቆጣጠር ስራዎችን እንደሚሰራ አብራርተዋል፡፡ በማላዊ መንግስታዊ ያልሆኑ ድርጅቶች ተቆጣጣሪ ባለስልጣን የኮርፖሬት ሰርቪስ ዳይሬክተር የሆኑት ወ/ሮ ሊንዳ ብሪጌት በበኩላቸው ከባለስልጣን መስሪያ ቤቱ በጣም ጠቃሚ የሆኑ ልምዶችን ማግኘት መቻላቸውን አንስተው ወደተቋማቸው ተመልሰው በባለስልጣን መስሪያ ቤቱ ያገኙትን ተመክሮ ተግባር ላይ እንደሚያውሉት አብራርተዋል፡፡


የፌደራል መንግስት መስሪያ ቤቶች መዋቅራዊ አደረጃጀት ለውጥ መሰረት የመንግስት ሰራተኞች ድልድል አፈጻጸም መመሪያ ላይ የግንዛቤ ማስጨበጫ መድረክ ተዘጋጀ፡፡

በድልድል መመሪያ ቁጥር 859/2014 ዙሪያ ስልጠና በተሰጠበት ወቅት የመክፈቻ ንግግር ያደረጉት የተቋሙ ዋና ዳይሬክተር አቶ ጂማ ዲልቦ እንደገለጹት ተቋሙ በባለፉት ሶስት ዓመታት በሪፎርም ውስጥ ማለፉን በማንሳት ለአንድ ተቋም ውጤታማነት ሃሳብ፣መዋቅር እና የሰው ሃይል መሰረታዊ ጉዳዬች መሆናቸውን አብራርተዋል፡፡ የትልልቅ ተቋማት ጅማሮ ሃሳብ ነው ያሉት ዋና ዳይሬክተሩ እኛ እንደተቋም የጠራ ሃሳብ አለን ሃሳብን ወደ ተግባር ለመለወጥ ደግሞ ግልጽ የሆነ የማህበረሰቡን የመደራጀት መብት እና የማህበረሰቡን የላቀ ተጠቃሚነት የሚያረጋግጥ መዋቅር ጸድቆ መጥቷል ሲሉ ገልጸዋል፡፡ ሃሳብ እና መዋቅር ውጤታማ እንዲሆን ደግሞ የሰው ሃይል ወሳኝ ነው፤ ይህ የድልድል መመሪያም ለሁሉም ኮሚቴዎችና የተቋሙ ሰራተኞች ግንዛቤ በማስያዝ በእውቀት፣ክህሎትና በስነምግባር የታነጸ የሰው ሃይል እና ሁልግዜ ለመለወጥ፣ለመማር እና አዳዲስ ቴክኖሎጂ ለመጠቀም ዝግጁ የሆነ የሰው ሃይል በተቋሙ እንዲኖር ይሰራል ብለዋል፡፡

አዲሱ ድልድል እንደሃገር ለየት ያሉ ጉዳዬች እንዳሉት በማንሳት እንደተቋምም በሪፎርም ውስጥ እንደቆየ ተቋም ይህ አዲስ ድልድል የተቋሙን ዓላማ ወደፊት የሚራምድ እና ወደ ሌላ ከፍታ የሚወስድ ነው ሲሉ ገልጸዋል፡፡ በመጨረሻም የተቋሙን ርዕይ መሰረት ያደረገ ድልድል እንደሚፈጸም አምናለሁ በማለት ከመመሪያው በተጨማሪ የሃገሪቱን የ10 ዓመት ስትራቴጂክ እቅድ ታሳቢ ይደረጋል ሲሉ መልዕክታቸውን አስተላልፈዋል፡፡


ADRA Ethiopia /Adventist Development and Relief Agency -Ethiopia/ በኦሮሚያ ክልላዊ መንግስት በምስራቅ ሸዋ እና በምዕራብ አርሲ ዞኖች በስልሳ ሰባት ሚሊዩን ስምንት መቶ ሺ ብር ያስገነባቸውን ትምህርት ቤቶች አስመርቋል፡፡

በምረቃ ስነስርዓቱ ላይ የኢ.ፊ.ድ.ሪ የሲቪል ማህበረሰብ ድርጅቶች ዋና ዳሬክተር አቶ ጂማ ዲልቦ እና የኦሮሚያ ክልላዊ መንግስት የትምህርት ቢሮ ሐላፊ ዶ/ር ቶላ በሪሶ ተገኝተዋል። ዋና ዳይሬክተር አቶ ጂማ ዲልቦ ባስተላለፉት መልዕክት ADRA Ethiopia በትምህርት መሰረተ ልማት ግንባታ እያበረከተ ላለው ዘርፈ ብዙ ድጋፍ አመስግነው ማህበረሰቡም ለተገነቡት ትምህርት ቤቶች ጥበቃ እና ደህንነት መስራት አለባቸው ሲሉ ገልጸዋል፡፡ አድራ ኢትዮጵያ በትምህርት መሰረተ ልማት ግንባታ የትምህርትን ተደራሽነት፣ ፍትሐዊነት እና ጥራትን ለማስጠበቅ በመስራት በክልላቸው ውስጥ ቀዳሚ መሆኑን የገለጹት የኦሮሚያ ክልላዊ መንግስት የትምህርት ቢሮ ሀላፊ ዶ/ር ቶላ በሪሶ ድርጅቱ ላበረከተው ከፍተኛ አስተዋጽኦ የላቀ ምስጋና አቅርበዋል። የአድራ የፕሮግራም እና ኦፕሬሽን ዳይሬክተር አቶ ዘሪሁን አዋኖ በበኩላቸው ኢትዮጵያ የጀመረችውን ዘርፈ ብዙ የልማት ሥራዎች አጠናክሮ እንደሚቀጥል አብራርተው የትምህርት ተደራሽነት ፣ፍትሐዊነት እና ጥራትን ለማሻሻል ጠንክሮ እንደሚሰራ ተናግረዋል፡፡

በእለቱም አምስት መቶ ሀምሳ ሺ ብር ወጪ የተደረገበት የምግብ ድጋፍ ለ50 አባወራዎች እና ቤተሰቦቻቸው የተደረገ ሲሆን ይህ ድጋፍ በቀጣይነት በዞኖቹ ውስጥ በሚገኙ ሁለት ትምህርት ቤቶች ላይ የትምህርት ቤት ምገባ ፕሮግራም ተጠናክሮ እንደሚቀጥል የድርጅቱ ፕሮግራም አስተባባሪ የሆኑት አቶ ብስራት አበራ አስታውቀዋል። የትምህርት መሰረተ ልማቶቹ ከኖርዌይ መንግስት እና ከ ADRA Norway በተገኘ የገንዘብ ድጋፍ መገንባታቸውን ድርጅቱ አስታውቋል።


ባለስልጣን መስሪያ ቤቱ ለአካል ጉዳተኞችና ዘርፈ ብዙ ተግባራት ላይ ለተሰማሩ ድርጅቶች ቅድሚያ በመስጠት መርህ ተመስርቶ እየሰራ እንደሚገኝ ተጠቆመ፡፡

የሲቪል ማህበረሰብ ድርጅቶች ባለስልጣን አዋጅ ቁጥር 1113/2011 ጸድቆ ተግባራዊ ከሆነ በኋላ ለአካል ጉዳተኞችና ልዩ ትኩረት በሚሹ ዘርፎች ላይ ለሚሰሩ ድርጅቶች ድጋፍ ሲያደርግ ቆይቷል፡፡ ይህ ተግባር ተጠናክሮ ይቀጥል ዘንድ በተቋሙ ለሚሰሩ የምዝገባ፣ ክትትልና ድጋፍ ባለሙያዎች በአካል ጉዳተኞች መብት እና አሳታፊነት ዙሪያ ከኢትዮጵያ አካል ጉዳተኛ ሴቶች ብሄራዊ ማህበር ጋር በመሆን የግንዛቤ ማስጨበጫ ስልጠና እየሰጠ ይገኛል፡፡ በስልጠናው መክፈቻ ላይ የባለስልጣን መስሪያቤቱ የምዝገባ፣ ክትትልና ድጋፍ ዳይሬክቶሬት ዳይሬክተር አቶ ተሾመ ወርቁ ባስተላለፉት መልዕክት ባለስልጣን መስሪያ ቤቱ ለአካል ጉዳተኞችና ዘርፈ ብዙ ስራዎችን ለሚሰሩ፤ ሴቶች ፣ ህጻናት፣ አረጋውያን ላይ ለሚሰሩ እና መሰል ዘርፎች ላይ ለተሰማሩ ድርጅቶች ቅድሚያ በመስጠት መርህ አገልግሎት በመስጠት ላይ እንደሚገኝ አንስተዋል፡፡

ባለስልጣን መስሪያ ቤቱ አደረጃጀቱን እየከለሰ እንደሚገኝ የገለጹት አቶ ተሾመ ወርቁ በባለስልጣን መስሪያ ቤቱ አዲሱ አደረጃጀት የአካል ጉዳተኞች ዴስክ እንደሚቋቋም አንስተው ተቋሙ የሚሰጠውን አገልግሎት ለማቀላጠፍና በተለይም አካል ጉዳተኞችን በሚመለከት ልዩ ድጋፍና ክትትል ለማድረግ ያስችለናል ሲሉ ገልጸዋል፡፡
የኢትዮጵያ አካል ጉዳተኛ ሴቶች ብሄራዊ ማህበር ዳይሬክተር የሆኑት ወ/ሮ ድባቤ እንዳሉት የቀድሞው አዋጅ ተነስቶ አዲሱ አዋጅ 1113/11 ከወጣ በኋላ ትልልቅ ፕሮጀክቶችን ከተለያዩ ባለድርሻ አካላት ጋር በመሆን እየሰሩ እንደሚገኙ ጠቁመው ለዚህም ባለስልጣን መስሪያ ቤቱን አመስግነዋል፡፡ አያይዘውም ድርጅቶች የፕሮጀክት ቅድመ ጥናት ሲያቀርቡ የአካል ጉዳተኛ ሴቶችና ህጻናትን ያካተተ መሆን ይኖርበታል ያሉት ወ/ሮ ድባቤ ስልጠናው እስከዛሬ የተገመገሙ ፕሮጀክቶች እይታዎቻችን አካል ጉዳተኛ ተኮር ናቸው ወይ የሚለውን በመመልከት በክትትልና ግምገማ ስርዓታችን የአካል ጉተኞችን መብትና ጥቅም በሚያስጠብቅ መልኩ የሚደረግ ነው ወይ የሚለውን ለመፈተሸ ያግዛል ብለዋል፡፡ የኢትዮጵያ አካል ጉዳተኛ ሴቶች ብሄራዊ ማህበር በ1995 ዓ.ም በ8 አካል ጉዳተኛ ሴቶች አማካኝነት የተመሰረተ ሲሆን በአሁን ጊዜ 555 በላይ አካል ጉዳተኛ ሴቶች አባላት እንዳሉት በማህበሩ ዳይሬክተር በወ/ሮ ድባቤ ተጠቅሷል፡፡


የቻይና ፋዉንዴሽን ፎር ሩራል ዴቨሎፕመንት 3ኛ ዓመት የኢትዮጵያ ቢሮ ምስረታ በዓል እና የስም ለዉጥ መርሃ-ግብር አካሄደ፡፡

የቻይና ፋዉንዴሽን ፎር ሩራል ዴቨሎፕመንት የኢትዮጵያ ቢሮውን እ.ኤ.አ በ2019 በአዲሱ አዋጅ የተመዘገበ ድርጅት ሲሆን በቀድሞዉ ስያሜ የቻይና ፋዉንዴሽን ፎር ፖቨርቲ አሊቬሽን በመባል ይታወቃል ነበር፡፡ የቻይና ፋዉንዴሽን ፎር ሩራል ዴቨሎፕመንት የኢትዮጵያ ቢሮ በሶስት ዓመት ቆይታዉ በርካታ ፕሮጀክቶችን መተግበር የቻለ ድርጅት ሲሆን ከነዚህም መካከል ከት/ት ሚኒስቴር ጋር በመተባበር የተማሪዎች ቦርሳ እና መማሪያ ቁሳቁሶች ከቻይና ሃገር እያስመጣ ድጋፍ ለሚያስፈልጋችዉ የመጀመሪያ ደረጃ ተማሪዎች በተለያዩ ክልሎች ሲያቀርብ ቆይቷል፡፡ በተጨማሪም የተማሪዎች ምገባ፣ ንጹህ የመጠጥ ዉሃ አቅርቦት ፣ የሴቶች ኢኮኖሚያዊ አቅም ማዳበር እና የምግብ ድጋፍ ስርጭቶችን በማከናወን ላይ ይገኛል፡፡ የድርጅቱ 3ተኛ ዓመት የኢትዮጵያ ምስረታዉ ፕሮግራም ላይ የሲቪል ማህበረሰብ ድርጅች ባለስልጣን ዋና ዳይሬክተር አቶ ጂማ ዲልቦ መልዕክት አስተላልፈዋል፡፡
ድርጅቱ በርካታ እንግዶች በተገኙበት ጠቅላላ ሪፖርት ያቀረበ ሲሆን በዕለቱም ዋና ዳይሬክተር አቶ ጂማ ዲልቦን ጨምሮ ከቻይና ኢምባሲ በኢትዮጵያ ፤የቻይና ቻምበር ኦፍ ኮሜርስ ፤ የቻይና ፋዉንዴሽን ፎር ሩራል ዴቨሎፕመንት ዋና ቢሮ ዳይሬክተር ዉ ፖንግ ፤ የግብርና ሚኒስቴር ተወካይ ፤የዉናሃ ኢነርጂ ሚኒስቴር ተወካይ ፤የገንዘብ ሚኒስቴር ተወካይ እና ሌሎች እንግዶች ተገኝተው መልዕክት አስተላልፈዋል፡፡


የህግ ማሻሻል ብቻውን ግብ አይሆንም በተሻሻለው ህግ ልክና መጠን ስራ ላይ መዋል አለበት፡፡

የሲቪል ማህበረሰብ ድርጅቶች ባለሥልጣን ከሲዳማ ብሄራዊ ክልላዊ መንግስት ጠቅላይ አቃቤ ህግ ጋር በመተባበር በሲቪል ማህረሰብ ድርጅቶች አዋጅ እና በተለያዩ ህጎች ላይ የውይይት መድረክ አካሄደ፡፡ በመድረኩ ላይ በክብር እንግድነት የተገኙት የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ በመክፈቻ ንግግራቸው እንዳሉት በአገር አቀፍ ደረጃ ባለፉት አራት ዓመታት የሪፎርም ስራዎች ሲከናወኑ እንደነበር በማስታወስ በዋናነት ሪፎርሙ ከህግ እና ከተቋማት ጋር የተያያዙ ሪፎርሞች መሆኑን አንስተዋል፡፡ ኢትዮጵያ በአለም አቀፍ ደረጃ ሲያስወቅሳት የነበሩ ህጎች ህዝብን ባሳተፈ መንገድ ማሻሻል መቻሉን ገልፀው ከነዚህ መካከል የበጎ አድራጎት ድርጅቶችና ማህበራት አዋጅ አንዱ ነው ሲሉ ገልፀዋል፡፡ ህግ ማሻሻል ብቻ ግብ አይሆንም ያሉት ዋና ዳይሬክተሩ የተሻሻሉ ህጎች ልክና መጠን ስራ ላይ መዋል፣ ዜጎችን መጥቀም መቻል፣ አለበት እንዲሁም መሬት ላይ ወርዶ የዜጎችን መብትና ጥቅም ማዳበር መቻል አለበት ሲሉ ገልፀዋል፡፡

ሌላው ያነሱት ባለስልጣን መስሪቤቱ ከፍተኛ የሆነ የሪፎርም ስራዎች ሰርቷል በተለይ ለህዝብ ቅርብ እንዲሆን የሲቪል ማህረሰብ ድርጅቶች ለአገር ግንባታ፣ለዴሞክራሲያዊ ስርዓት ግንባታ እና ለልማት የሚያደርጉትን አስተዋጽኦ በሚገባ መወጣት እንዲችሉ ለማድረግ መቻሉን ገልፀዋል፡፡ በሶስት ዓመታት ውስጥ በባለስልጣን መስሪያ ቤቱ የተመዘገቡ አዲስ ድርጅቶች ከ2500 በላይ ነው በማለት ይህ ቁጥር በቀድሞ አዋጅ በአስር ዓመትታ ውስጥ ያልተመዘገበ ውጤት ነው ሲሉ አብራርተዋል፡፡ በመጨረሻም በፌደራል ደረጃ ከፍተኛ ሪፎርሞች ቢደረጉም በሚፈለገው ደረጃ ወደክልል የማውረድ ስራ አልተሰራም ይህንንም በቀጣይ ለመስራት በጋራ መቆም አለብን በማለት ባለስልጣን መስሪያ ቤቱም ለክልሎች እያደረገ ያለውን ድጋፍ አጠናክሮ እንደሚቀጥል ተናግረዋል፡፡


የሀረሪ ብሄራዊ ክልልን ጨምሮ ሌሎቹም ክልሎች የክልል የሲቪል ማህበረሰብ ድርጅቶችን ህግ በማዘጋጀት ላይ ይገኛሉ፡፡

በሲቪል ማህበረሰብ ድርጅቶች ዘርፍ በርካታ ተግዳሮቶች የነበሩበት የበጎ አድራጎት ድርቶችና ማህበራት አዋጅ ቁጥር 621/2001 ሙሉ በሙሉ ተሽሮ የሲቪል ማህበረሰብ ድርጅቶች አዋጅ ቁጥር 1113/2011 ጸድቆ በስራ ላይ ከዋለ 3 አመታት የተቆጠሩ ሲሆን አዲሱ አዋጅ በስራ ላይ መዋሉን ተከትሎ ዘርፉ ከፍተኛ የሆነ መነቃቃት እየታየበት ይገኛል፡፡
የአዋጁ ተፈጻሚነት በፌደራል ደረጃ በተመዘገቡና በአዲስ አበባና በድሬዳዋ ከተማ አስተዳደር በሚንቀሳቀሱ ድርጅቶች ላይ ብቻ በመሆኑ በአንድ ክልል ብቻ የሚንቀሳቀሱ ድርጅቶች በፌዴራል ደረጃ የተፈጠረው ምቹ ሁኔታ ሳይፈጠርላቸው ቆይቷል፡፡ የሲቪል ማህበረሰብ ድርጅቶች ባለስልጣን በክልሎች የመደራጀት መብትን ማረጋገጥ ይቻል ዘንድ በፌዴራል ደረጃ ከወጣው የሲቪል ማህበረሰብ ድርጅቶች አዋጅ ጋር ተቀራራቢ የሆነ ህግ በክልሎች እንዲኖር ዘርፈ ብዙ ድጋፎችን እያደረገ ይገኛል፡፡ በዚህም መሰረት ሁሉም ክልሎች የሲቪል ማህበረሰብ ድርጅቶች ረቂቅ አዋጅ በማዘጋጀት ላይ የሚገኙ ሲሆን ይህንን ረቂቅ አዋጅ ካዘጋጁት ክልሎች መካከል የሀረሪ ብሄራዊ ክልላዊ መንግስትና የደቡብ ምእራብ ኢትዮጵያ ብሄራዊ ክልላዊ መንግስት የፍትህ ቢሮ እና የገንዘብና ኢኮኖሚ ልማት ቢሮዎች ከባለስልጣኑ ጋር በመተባበር ከዛሬ ጀምሮ ለ2 ቀናት ውይይቶችን በማድረግ ላይ ይገኛሉ፡፡

በሀረሪ ብሄራዊ ክልላዊ መንግስት በሀረር ከተማ እተካሄደ በሚገኘው የውይይት መርኃ ግብር ላይ የክልሉ ገንዘብና ኢኮኖሚ ትብብር ቢሮ ም/ቢሮ ሀላፊ አቶ አብዱልባሲጥ አቡበከር እንዳሉት በፌደራልና በክልል ያለው የሲቪል ማህበረሰብ ድርጅቶች ህግ ወጥነት ያለው መሆን አለበት በሚል መርህ የዜጎችን የመደራጀት መብት በክልሎች በተሟላ ሁኔታ ለማረጋገጥ እየሰሩ እንደሚገኙ ገልጸዋል፡፡

የሲቪል ማህበረሰብ ድርጅቶች ባለስልጣን የህግ ጉዳዮች ዳይሬክቶሬት ዳይሬክተር አቶ ዮናስ ምስጋናው በበኩላቸው የሲቪል ማህበረሰብ ድርጅቶች ቀደም ባለው የበጎ አድራጎትና ማህበራት አዋጅ 621/2001 በርካታ ክልከላዎች የነበሩበት እንደነበረ አንስተው በፌደራል ደረጃ በአዲሱ የሲቪል ማህበረሰብ ድርጅቶች አዋጅ 1113/2011 እነዚህ ክልከላዎች ሙሉ በሙሉ ተነስተው የዜጎችን የመደራጀት መብት ማረጋገጥ ተችሏል ብለዋል፡፡ አያይዘውም ባለስልጣን መስሪያ ቤቱ የፌደራሉ የሲቪል ማህበረሰብ ድርጅቶች አዋጅ እስከ ክልል ባለው መዋቅር ወጥነት ያለው ህግ እንዲኖርና የሲቪል ማህበረሰብ ድርጅቶች ህግን ተከትለው በየትኛውም ክልል ተንቀሳቅሰው የማህበረሰቡን ተጠቃሚነት ማረጋገጥ ይችሉ ዘንድ ትኩረት ሰጥቶ እየሰራ ይገኛል ብለዋል፡፡ የክልሉ የሲቪል ማህበረሰብ ድርጅቶች ጉዳዮች ዳይሬክተር አቶ መሀመድ ራህመቶ እንደገለጹት ከሆነ በሀረሪ ብሄራዊ ክልል ውስጥ 32 የሲቪል ማህበረሰብ ድርጅቶች ያሉ ሲሆን ከ520 ሚሊዮን ብር በላይ የሚያወጡ 36 ፕሮጀክቶችን ከክልሉ የገንዘብና ኢኮኖሚ ትብብር ቢሮ ጋር ተፈራርመው በመንቀሳቀስ ላይ ይገኛሉ፡፡

የሲቪል ማህበረሰብ ድርጅቶች ባለስልጣን ክልሎች የራሳቸውን የሲቪል ማህበረሰብ ድርጅቶች ህግ እንዲያዘጋጁ ሞዴል ረቂቅ ህግ ከማዘጋጀት ጀምሮ በርካታ የሙያና የፋይናንስ ድጋፍ እያደረገ የሚገኝ ሲሆን በሀረሪ ብሄራዊ ክልላዊ መንግስት የሲቪል ማህበረሰብ ድርጅቶች ምዝገባና አስተዳደር ረቂቅ መመሪያ ላይ የክልሉ ገንዘብና ኢኮኖሚ ትብብር ቢሮ ከክልሉ ፍትህ ቢሮና ከባለስልጣን መስሪያ ቤቱ ጋር በመሆን ግብዓት በማሰባሰብ ላይ ይገኛል ብለዋል፡፡ እስካሁን ባለው ሁኔታ ሶስት ክልሎች የራሳቸውን የክልል የሲቪል ማህበረሰብ ድርጅቶች ህግ በየምክር ቤቶቻቸው ማጽደቃቸው ተገልጿል፡፡


የኢትዮጵያ የሲቪል ማህበረሰብ ድርጅቶች የዳሰሳ ጥናት ሪፖርት ይፋ ሆነ፡፡

የሲቪል ማህበረሰብ ድርጅቶች ባለስልጣን ከአውሮፓ ህብረት የሲቪል ማህበረሰብ ድርጅቶች ፈንድ (EUCSF III) እና ከብሪቲሽ ሲቪል ሶሳይቲ ሰፖርት ፕሮግራም (CSSP II) ጋር በመሆን ያስጠናው የሲቪል ማህበረሰብ ድርጅቶች የዳሰሳ ጥናት ሪፖርት በአዲስ አበባ ይፋ ተደርጓል፡፡ የዳሰሳ ጥናቱ ሪፖርት ይፋ ሲደረግ የፍትህ ሚኒስቴር ሚንስትር ዶ/ር ጌዲዮን ጢሞትዮስን ጨምሮ የተለያዩ ሚንስትሮችና የባለስልጣን መስሪያቤቱ ከፍተኛ የስራ ኃላፊዎች እንዲሁም ጥሪ የተደረገላቸው የሲቪል ማህበረሰብ ድርጅቶች ተገኝተዋል፡፡ የባለስልጣን መስሪያ ቤቱ ዋና ዳይሬክተር አቶ ጂማ ዲልቦ የኢትዮጵያ የሲቪል ማህበረሰብ ድርጅቶች የዳሰሳ ጥናት ይፋ ሲደረግ እንዳሉት ጥናቱ የሲቪል ማህበረሰብ ድርጅቶች ቀደም ሲል ከነበረባቸው ማነቆ ተላቀው አሁን ላይ በነጻነት መንቀሳቀስ እንዲችሉ ምቹ ሁኔታዎች መፈጠር መቻላቸውን አንስተው በተለይም አዲሱ አዋጅ ከወጣ በኋላ ከ2200 በላይ አዲስ የሲቪል ማህበረሰብ ድርጅቶች በባለስልጣን መስሪያ ቤቱ ስር ተመዝገበው መንቀሳቀስ መቻላቸውን ጠቁመዋል፡፡

የሲቪል ማህበረሰብ ድርጅቶች ታሪክ 50 ዓመታትን ወደኋላ ያስቆጠረ እንደሆነ ያነሱት ዋና ዳይሬክተሩ አሁን ላይ መንግስት የፈጠረውን ምቹ ሁኔታ በመጠቀም በርካታ የሲቪል ማህበረሰብ ድርጅቶች ተመዝግበው ለሀገር፣ ለዴሞክራሲ ስርዓት ግንባታ እንዲሁም ለህብረተሰብ ተጠቃሚነት የድርሻቸውን እየተወጡ እንደሚገኙ በንግግራቸው ጠቁመዋል፡፡ ለሪፖርቱ መሳካት ከፍተኛ አስተዋጽዖ ያበረከቱትን የጥናት ቡድኑ አባላትን እንዲሁም ለጥናቱ መሳካት አስተዋጽዖ ያበረከቱ አካላትን ሁሉ ዋና ዳይሬክተሩ አመስግነዋል፡፡ በመርኃ ግብሩ ላይ የኢትዮጵያ የሲቪል ማህበረሰብ ድርጅቶች የዳሰሳ ጥናትን የተመለከተ አጭር ገለጻ በጥናት ቡድኑ መሪ አቶ ደበበ ኃይለ ገብርኤል የቀረበ ሲሆን የፍትህ ሚኒስቴር ሚንስትር ዶ/ር ጌዲዮን ጢሞቲዎስ እንዲሁም የሰላም ሚኒስቴር ሚንስትር ደዔታ አቶ ታዬ ደንደዓና ጥሪ የተደረገላቸው ሚንስትር ደኤታዎች በጋራ የጥናት ሪፖርቱን ይፋ አድርገዋል፡፡


ባለስልጣን መስሪያ ቤቱ በአገልግሎት አሰጣጡ ግልፀኝነትንና ተጠያቂነትን የተላበሰ ሞዴል ተቋም መሆን አለበት ፡፡

የሲቪል ማህረሰብ ድርጅቶች ባለስልጣን ለሁለተኛ ዙር በማህበራዊ ተጠያቂነት ላይ ስልጠና ሰጠ፡፡ በስልጠናው ላይ የተገኙት የባለስልጣን መስሪያ ቤቱ ም/ዋና ዳይሬክተር አቶ ፋሲካው ሞላ እንዳሉት መስሪያ ቤቱ ባለፉት ዓመታት በለውጥ ሂደት ውስጥ መሆኑን አንስተው በዋናነት የተቋሙ ሰራተኞች አቅማቸውን ለማጎልበትና የአመለካከት ለውጥ ማምጣት እዲችሉ፣ የአገልግሎት አሰጣጡን የተሻለ ለማድረግ የአቅም ግንባታ ስልጠናዎችን መስጠቱን ገልፀዋል፡፡ አያይዘውም አዋጅ 1113/2011 ሲወጣ በነፃነት የተደራጀ የነቃ ማህበረሰብ ለመፍጠር ጠንካራ የሆነ የሲቪል ማህበረሰብ ድርጅቶችን መገንባት አስፈላጊ ነው ይህ ሲሆን ግዴታውን የሚወጣ ማህበረሰብ መፍጠር ይቻላል ብለዋል፡:

የዛሬው ስልጠና የማህበራዊ ተጠያቂነት ፕሮግራም አንዱ የተቋማችን የለውጥ አካል ነው፡፡ ሁሉም አመራርና ባለሙያ በማህበራዊ ተጠያቂነት ላይ በቂ እውቀትና ግንዛቤ ሊኖረው እንዲሁም የስራው አካል አድርጎ መጠቀም አለበት በማለት የሲቪል ማህበረሰብ ድርጅቶች ማህበራዊ ተጠያቂነትን ተረድተው እንዲሰሩ አቅማቸውን መገንባት ያስፈልጋል ሲሉ ተናግረዋል ፡፡ ም/ዋና ዳይሬክተሩ አጽንኦት ሰጥተው የተናገሩት የሲቪል ማህበረሰብ ድርጅቶች መንግስት ተጠያቂነት ፣ግልጸኝነት እና የመልካም አስተዳደር ችግር አለበት ብሎ ለመናገር በመጀመሪያ ራሳቸው ሞዴል መሆን አለባቸው ሲሉ ተናግረዋል፡፡