የሲቪል ማህበረሰብ ድርጅቶች ለዘላቂ ሰላምና አብሮነት ትኩረት በመስጠት በአገር ግንባታ ሂደት ላይ ሚናቸውን ሊወጡ ይገባል::

አዲስ አበባ (ኢዜአ) ታህሳስ 19/2015 የሲቪል ማህበረሰብ ድርጅቶች ለዘላቂ ሰላምና አብሮነት ትኩረት በመስጠት በአገር ግንባታ ሂደት ላይ ሚናቸውን ሊወጡ እንደሚገባ ተጠየቀ። ሀገር በቀል የሲቪል ማህበረሰብ ድርጅቶች “በሀገር ግንባታ የምሁራን ሚና” በሚል ርዕሰ ጉዳይ በአዲስ አበባ ውይይት አካሂደዋል። በውይይቱም በሕዝብ ተወካዮች ምክር ቤት የመንግስት ተጠሪ ሚኒስትር ተስፋዬ በልጂጌ፣ የፕላንና ልማት ሚኒስትር ዶክተር ፍጹም አሰፋ፣ የሴቶችና የማህበራዊ ጉዳይ ሚኒስትር ዶክተር ኤርጎጌ ተስፋዬ እንዲሁም የሀገር በቀል የሲቪል ማህበረሰብ ድርጅቶች አመራሮችና ተወካዮች ተገኝተዋል። የሲቪል ማህበረሰብ ድርጅቶች ባለስልጣን ዋና ዳይሬክተር ጂማ ዲልቦ፤ ሀገራዊ ለውጡን ተከትሎ የሲቪል ሚህበረሰብ ድርጅቶች በሀገሪቱ ልማት ሰላምና ዴሞክራሲ ላይ ያላቸውን ሚና ለማጠናከር መንግስት የአሰራርና የህግጋት ማሻሻያ ማድረጉን ጠቅሰዋል።

ይህን ተከትሎም የሲቪል ማህበረሰብ ድርጅቶች ድህነትን እና ኋላቀርነትን ለማስወገድ በማህበረሰብ ማንቃት በድጋፍና በምርምር መስክ እየሠሩ መሆኑን ጠቅሰዋል። የፕላንና ልማት ሚኒስትር ዶክተር ፍጹም አሰፋ፤ ባቀረቡት የመወያያ ፅሑፍ መንግስት ምቹ የፖለቲካ ምህዳር ለመፍጠር ካከናወናቸው የለውጥ ስራዎች መካከል የሲቪል ማህበራት አዋጅ ማሻሻያም ተጠቃሽ ነው ብለዋል። ይህን ተከትሎም ሀገር በቀል ሲቪል ማህበራት ድርጅቶች በሀገራቸው የሰላምና የልማት ሂደት በጎ ሚና እንዲጫወቱ በር ከፍቷል ነው ያሉት። ከዚህ አኳያ የሲቪል ማህበረሰብ ድርጅቶች የሀገርን ጥቅም በማስጠበቅና በሰላምና ዴሞክራሲ መጠናከር ላይ አተኩረው መሥራት እንዳለባቸው በመጠቆም። በህዝብ ተወካዮች ምክር ቤት የመንግስት ተጠሪ ሚኒስትር ተስፋዬ በልጂጌ፤ ጠንካራ ሀገር እውን ለማድረግ የሲቪል ማህበረሰብ ድርጅቶች የሀሳብ ብዝሃነት እንዲዳብርና ዴሞክራሲ እንዲጎለብት ሰፊ የግንዛቤ ማስጨበጫ ስራዎችን ማከናወን እንዳለባቸው ተናግረዋል፡፡ በሌላ በኩል መንግስት በሁሉም የሀገሪቱ ክፍል ዘላቂ ሰላም እንዲሰፍን በከፍተኛ ቁርጠኝነት እየሰራ መሆኑን አንስተው፤ የሀገር ግንባታው እውን እንዲሆን ሁሉም ዜጋና ተቋማት ለሰላም ቀናኢ ሆነው ሊንቀሳቀሱ እንደሚገባ በአፅነኦት ተናግረዋል።

የሲቪል ማህበረሰብ ድርጅቶች የኢትዮጵያን የብልፅግና ጉዞ በሚፈለገው ልክ ለማስቀጠል ብቁ ተቋማትን ለመፍጠር ራሳቸው አርዓያ ሆነው እንዲሰሩም ጠይቀዋል። የሴቶችና ማህበራዊ ጉዳይ ሚኒስትር ዶክተር ኤርጎጌ ተስፋዬ፤ ኢትዮጵያ እንደ ሀገር ህልውናውን አስጠብቃ እንድትቀጥል የሲቪል ማህበረሰብ ድርጅቶች በጎ ሚና መጫወታቸውን አንስተዋል። ሆኖም ሀገርን ከድህነትና ከኋላ ቀርነት በማላቀቅ ረገድ ግን የሚጠበቅበቸውን እንዳልተወጡ አንስተው፤ የሀገር ግንባታ ሂደቱ ላይ በጎ ሚናቸውን ለመወጣት በቅንጅትና በአንድነት እንዲሰሩ ጥሪ አቅርበዋል። በውይይቱ የተሳተፉ የሲቪል ማሀብረሰብ ድርጅት ተወካዮች በበኩላቸው ከሀገራዊ ለውጡ ወዲህ ለሲቪል ማህበረሰብ ድርጅቶች ምቹ የህግና የአሰራር ምህዳር መፈጠሩን አድንቀዋል። በመሆኑም የአገርና ህዝብ ጥቅምን በማስጠበቅ ጠንካራ አገር ለመገንባት ዝግጁ ነን ብለዋል፡፡


የህዝባችን ሁለንተናዊ ተጠቃሚነት ለማረጋገጥ በእውቀት የዳበረና በስነምግባር የታነፀ አገልጋይ መፍጠር ይገባል ተባለ::

የሲቪል ማህረሰብ ድርጅቶች ባለስልጣን የተቀላጠፈ የአገልግሎት አሰጣጥ ለመዘርጋትና በአዋጅ የተሰጠውን ሀላፊነት በአግባቡ ለመወጣት ለተቋሙ ባለሙያዎች የአቅም ግንባታ ስልጠናዎችን እየሰጠ ይገኛል፡፡ በስልጠናው ላይ ንግግር ያደረጉት የባለስልጣኑ ዋና ዳይሬክተር አቶ ጂማ ዲልቦ እንዳሉት ባለስልጣን መስሪያ ቤቱ የአስር አመት ስትራቴጂ እቅድ በማዘጋጀት ወደስራ መግባቱን ገልፀው በእቅዱ ውስጥ አምስት ግቦች የተቀመጡ ሲሆን እነሱም ምቹ የፖሊሲና የቁጥጥር ስርዓት፣ የበጎ ፈቃድና የበጎ አድራጊነት ባህልን ማዳባር፣ የአገልግሎት ተደራሽነት ስርዓት፣ በየዘርፉ ያሉ ተቋማት ጋር አጋርነት መፍጠር እና የባለስልጣን መስሪያቤቱ ውስጣዊ አቅም ማጎልበት እንደሆነ ገልፀዋል፡፡ ዋና ዳይሬክተሩ አክለውም የህዝባችን ሁለንተናዊ ተጠቃሚነት ለማረጋገጥ እንዲሁም የዳበረ የሲቪል ማህበረሰብ ድርጅቶች ለመፍጠር በእውቀትና በስነምግባር የታነፀ እንዲሁም ማገልገል ክብር መሆኑን የሚያውቅ ባለሙያ ሲኮን መሆኑን አንስተዋል፡: ሌላው ያነሱት በአራት ዓመታት ውስጥ ተቋማችንን የተሻለ የስራ አፈጻጸም እንዲኖረው ለሰራተኛው የተለያዩ የአቅም ግንባታ ስልጠናዎች መሰጠቱን አስታውሰው በቀጣይም ተጠናክሮ እንደሚቀጥል ገልፀዋል፡፡ በመጨረሻም ከባለስልጣን መስሪያ ቤቱ ጎን በመሆን ስልጠናዎችን በመስጠት ድጋፍ ያደረገ ያለውን CCP2 አመስግነዋል፡፡ ስልጠናው team building, communication organization effectives እና safeguard ያተኮረ ነው፡፡


ዋና ዳይሬክተር አቶ ጂማ ዲልቦ አፋር ክልል የሚገኘውን Development Expertise Center (DEC) የስራ እንቅስቃሴ በአካል ተገኝተው ተመልክተዋል፡፡

በጉብኝቱ የተቋሙ ዋና ዳይሬክተር አቶ ጂማ ዲልቦን ጨምሮ የተለያዩ ስራ ክፍል ሃላፊዎች ተገኝተዋል፡፡ ድርጅቱ በአፋር ክልል ፣ኦሮሚያ ፣ጋንቤላ ፣ቤኒሻንጉል ጉሙዝ፣ትግራይ ክልልና አዲስ አበባን ጨምሮ በትምህርት፣ በስርዓተ-ፆታ፣ በአድቮኬሲና የሰብዓዊ ድጋፍ ላይ ትኩርት በማድረግ የሚሰራ ድርጅት መሆኑን የ Development Expertise Center (DEC) ኤክስኪዩቲቭ ዳይሬክተር አቶ ብርሃኑ ደምሴ ገልጸዋል፡፡ ዋና ዳይሬክተር አቶ ጂማ ዲልቦ ድርጅቱ በተለያዩ ዘርፎች ላይ የሰራቸውን ስራዎች አድንቀው የጉብኝቱ ዓላማም ድርጅቱ መሬት ላይ ያከናወናቸውን ተግባራት በመመልከት ለመደገፍ፣ከፕሮጀክቱም የተጠቀሙ ማህበረሰብ ክፍሎችን ሃሳብ ለመውሰድና በጋራ በክልሉ የሚሰሩ የመንግስት ተቋማትን አስተያየት ለመቀበል እንደሚረዳ አብራርተዋል፡፡ በቀጣይም ይህን አበረታች ስራዎችን በማጠናከር መንግስት ሊደርስባቸው የማይችሉትን ልማቶች ከማህበረሰቡ ጎን በመሆን አጠናክራችሁ መቀጠል ይኖርባችዋል በማለት ባለስልጣን መስርያቤቱም በተቻለው አቅም አስፈላጊውን ድጋፍ ሁሉ እንደሚያደርግ አንስተዋል፡፡ በመጨረሻም የልማቱ ተጠቃሚ ማህበረሰብም በአካባቢው የተሰራውን ማንኛውንም ልማት በተገቢው መንገድ በመንከባከብ መጠቀም እንዳለበት በአካባቢው በጉብኝቱ ወቅት ለተገኙ የመንግስት ሃላፊዎችና የልማቱ ተጠቃሚ ማህበረሰብ መልዕክታቸውን አስተላልፈዋል ፡፡


የሲቪል ማኅበረሰብ ድርጅቶች ባለስልጣን ለአፋር ክልል ከ179 ሚሊዮን ብር በላይ የሚገመት የዓይነትና የገንዘብ ድጋፍ አደረገ፡፡

የሲቪል ማኅበረሰብ ድርጅቶች ባለስልጣን የሲቪል ማህበረሰብ ድርጅቶችን በማስተባበር በተለያዩ ጊዚያት ድጋፍ ማድረጉ ተገልጷል፡፡ የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ የክልሉን ፕረዝዳንት አቶ አወል አርባ ጨምሮ ሌሎች የስራ ሃላፊዎች ጋር በዚሁ ዙሪያ ውይይት አድርገዋል፡፡ ዋና ዳይሬክተሩ በንግግራቸው እንደገለጹት በሃገራችን በተከሰተው ጦርነት የደረሰውን አደጋ ለመቅረፍ እንዲሁም ለተፈናቀሉ ወገኖቻችንን ድጋፍ ለማድረግ የባለስልጣን መስርያቤቱ በተለያዩ ግዚያት የሲቪል ማህበረሰብ ድርጅቶችን ጥሪ በማድረግ ጉዳቱ ለደረሰባቸው ክልሎች በአይነትና በጥሬ ገንዘብ ድጋፍ ሲያደርግ መቆየቱን ተናግረዋል፡፡ በዚሁም መሰረት ባለስልጣን መስርያቤቱ በአፋር ብሄራዊ ክልላዊ መንግስት መኪናን ጨምሮ የተለያዩ የምግብ፣፣መድሃኒትና የህክምና መገልገያ መሳሪያዎች በድምሩ ከ 179,520,000 (አንድ መቶ ሰባ ዘጠኝ ሚሊዮን አምስት መቶ ሃያ ሺ ብር) የሚገመት ድጋፎችን ማድረጋቸውን አቶ ጂማ ዲልቦ አክለው ገልጸዋል ፡፡ የአፋር ብሄራዊ ክልላዊ መንግስት ርዕሰ መስተዳደር አቶ አወል አርባ በበኩላቸው የአፋር ክልል ከ2012 ዓ.ም ጀምሮ በርካታ ፈተናዎች ውስጥ ማለፉን ገልጸው በችግራችን ግዜ ሁሉ የሁሉም ክልሎች እንዲሁም አንዳንድ የሲቪል ማህበረሰብ ድርጅቶች በኩል የተደረገላቸውን ድጋፍ አመስግነዋል፡፡ ዛሬም በሲቪል ማህበረሰብ ድርጅቶች ባለስልጣን የተደረገልን ድጋፍ ይህንኑ የሚያመላክትና ኢትዮጵያዊነትንና ወንድማማችነትን የሚያሳይ ነው በማለት በክልሉ በጦርነቱ በደረሰው ከፍተኛ ጉዳትና የተፈናቀለው ማህበረሰብ ቁጥር አንፃር ድጋፍ እንደሚያስፈልግ ተናግረዋል፡፡


ሴቶችን በሁሉም መስክ በማሳተፍ ብቃታቸውን መጠቀም መቻል አለብን ተባለ::

የሲቪል ማህበረሰብ ድርጅቶች ባለስልጣን አመራሮችና ሰራተኞች “ሴትን አከብራለሁ ጥቃቷንም እከላከላለሁ” በሚል መሪ ቃል ዓለም አቀፍ የፀረ ፆታ ጥቃት ቀንን በደመቀ ሁኔታ አከበሩ፡፡ በበዓሉ ላይ የተገኙት የባለስልጣኑ ዋና ዳይሬክተር አቶ ጂማ ዲልቦ እንዳሉት በሴቶች ላይ የሚደርሰውን ፆታዊ ጥቃት ለመከላከል በአመት አንድ ጊዜ ብቻ መወያየት ሳይሆን የሁልጊዜ ተግባራችን መሆን እንደለበት ተናግረዋል፡፡ አክለውም ሴቶችን በሁሉም መስኮች በማሳተፍ ብቃታቸውን መጠቀም መቻል አለብን ሲሉ ገልጸዋል፡፡ ሴቶችን የማክበር አንዱ መገለጫ ጥቃቷን በመከላከል ነው ያሉት ዋና ዳይሬክተሩ ከፆታዊ ጥቃት ነጻ የሆነ ተቋም በመፍጠር ለሌሎች ሞዴል መሆን አለብን ብለዋል፡፡ ይህንንም ተግባራዊ ለማድረግ safeguarding policy መውጣቱን ገልጸዋል፡፡ ይህን በዓል ስናከብር ባለፉት ሁለት አመታት በአገራችን በነበረው ጦርነት የጥቃት ሰለባ የሆኑ ሴቶቻችን አሁን በተደረገው የሰላም ስምምነት መሰረት ሰላማቸውን ባገኙበት ወቅተ መሆኑ ለየት ያደረገዋል ብለዋለ፡፡ አለም አቀፍ የፀረ ፆታ ጥቃት ቀን በዓለም አቀፍ ደረጃ ለ31ኛ ጊዜ በአገራችን ደግሞ ለ17ኛ ጊዜ ተከብሮ ውሏል፡፡


የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ population service International Ethiopia (PSI Ethiopia) እየተሰሩ ያሉ የተለያዩ ፕሮጀክቶችን ጎብኝተዋል፡፡

የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ የተቋሙ የስራ ሀላፊዎችና ባለሙያዎች በጉብኝቱ ተሳትፈዋል፡፡ ጉብኝቱ የተደረገው በኦሮሚያ ክልል ምዕራብ አርሲ ዞን ሻሸመኔ ከተማ፣ በሲዳማ ክልል ሀዋሳ ከተማ እንዲሁም በዎላይታ ሶዶ ዞን ሶዶ ከተማ እና ዳሞትሶሬ ወረዳ የሚገኙና ፒኤስ አይ ኢትዮጵያ (PSI Ethiopia) በቅንጅት በሚሰራባቸው ፕሮጀክቶች ነው፡፡ በጉብኝቱ የአፍላ ወጣቶችን እርግዝና ለመቀነስ በሻያንባ ቅሌና ቀበሌ ጤና ኬላ እየተሰራ ያለውን የብልህ ጅማሮ ፕሮግራም እንዲሁም የኤች አይ ስርጭትን ለመቀነስና በወሲብ ንግድ ላይ የተሰማሩ ሴቶችን መደገፍና የምክር አገልግሎት መስጠትን ዓላማ ያደረገው የሙሉ ፕሮጀክት፣ ተላላፊ ባልሆኑ በሽታዎች ላይ ትኩረት በማድረግ በተለይ በሀዋሳ ከተማ በሚሊኒየም ጤና አጠባበቅ ጣቢያ እየተሰሩ ያሉ ስራዎች ትኩረት ያገኙ ናቸው፡፡ የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ ከጉብኝቱ መጠናቀቅ በኋላ በሰጡት አስተያየት በማህበረሰብ አቀፍ የጤና አጠባበቅ ላይ የተሻሻሉ የሽንት ቤት ሳኖፓትሪዎችን በማቅረብ የማህበረሰቡን የጤና አጠባበቅ ዘይቤ ለመቀየር እና ለወጣቶችም የስራ እድል ለመፍጠር የተሄደበትን ርቀት እንዲሁም በአፍላ እድሜያቸው በወሲብ ንግድ በተሰማሩ ሴቶች ላይ ትኩረት በማድረግ የኤች አይቪ ምርመራና የምክር አገልግሎት እንዲሁም ለቫይረሱ የተጋላጭነት ደረጃ ለመቀነስ ድርጅቱ እያደረገ የሚገኘው ጥረት የሚደነቅ መሆኑን አንስተዋል፡፡

መንግስት የሲቪክ ምህዳሩ እንዲሰፋ ከፍተኛ ትኩረት ሰጥቶ እየሰራ እንደሚገኝና የሲቪል ማህበረሰብ ድርጅቶች በሀገር ልማትና በዴሞክራሲ ስርዓት ግንባታ ላይ ጉለህ ድርሻ እንዲኖራቸው ባለስልጣን መስሪያ ቤቱ የተለያዩ የአሰራር ስርዓቶችን ከመዘርጋት ባለፈ ድርጅቶች የሚሰሯቸውን ፕሮጀክቶች መስክ ድረስ ወርዶ በማየት ያለባቸውን ችግር ለመፍታት ጥረት እያደረገ እንደሚገኝ ጠቅሰዋል፡፡ የሲቪል ማህበረሰብ ድርጅቶች በየደረጃው ከሚገኙ የመንግስት መዋቅሮች ጋር በትብብር መስራት መቻላቸው ውጤታማ እንደሚያደረጋቸው በዎላይታ ሶዶ ዞን የተሰሩ ስራዎች ትልቅ ማሳያ መሆናቸውን ያነሱት ዋና ዳይሬክተሩ ከተለያዩ የመንግስት ተቋማትና የሲቪል ማህበረሰብ ድርጅቶች ጋር በትብብርና በቅንጅት መስራት ውጤታማ እና የተሻለ እንደሚያደርግ ጠቁመው በብልህ ጅማሬ በተለይ ሴቶች በአፍላ እድሜያቸው ለእርግዝና እንዳይጋለጡ ከማንቃት ባሻገር ወደትምህርታቸው እንዲመለሱ እንዲሁም በወሲብ ንግድ ላይ የተሰማሩ ሴቶች ከወሲብ ንግድ ወጥተው ድርጅቱ በዘላቂነት ገቢ የሚያገኙበትን ዘዴ ቢመለከት የሚል አስተያየት ሰጥተዋል ፡፡

የፒኤስ አይ ኢትዮጵያ population service International Ethiopia (PSI Ethiopia) የኢትዮጵያ ተወካይ የሆኑት ዶክተር ዶሮቲ PSI Ethiopia የተለያዩ ስልጠናዎችንና ቴክኒካል ድጋፎችን በማድረግ በማህበረሰቡ ውስጥ ያሉትን ችግሮች ለመፍታት እየሰራ እንደሚገኝ አንስተው በህብረተሰብ ጤና፣ ስነተዋልዶ ጤና፣ የስራ እድል ፈጠራና የገበያ ትስስር ላይ የተለያዩ ስለልጠናዎችን በመስጠትና የቴክኒክ እገዛዎችን እንደሚያደርግ አንስተዋል፡፡ በጉብኝቱ እጅግ መደሰታቸውን የገለጹት ዶክተር ዶኸርቲ በጉብኝቱ ወቅት የተሰጡ ገንቢ አስተያየቶች ወደፊት በስፋት እንደሚሰሩባቸው ጠቁመው ከተለያዩ የመንግስት ተቋማት ጋር ያላቸውንም ቅንጅት አጠናክረው በመቀጠል የህብረተሰቡን ችግር በዘላቂነት ሊፈቱ የሚችሉ ስራዎችን ትኩረት ሰጥተው እንደሚሰሩ ተናግረዋል፡፡ ፒኤስ አይ ኢትዮጵያ population service International Ethiopia (PSI Ethiopia) በፈረንጆቹ አቆጣጠር በ2003 የተቋቋመና በሲቪል ማህበረሰብ ድርጅቶች ባለስልጣን ተመዝግቦ በተለያዩ የኢትዮጵያ ክፍሎች በመንቀሳቀስ ላይ የሚገኝ የሲቪል ማህበረሰብ ድርጅት ሲሆን በስነ ተዋልዶ ጤና፣ በማህበረሰብ ጤና አጠጠባበቅ እንዲሁም ተላላፊ ባልሆኑ በሽታዎች ላይ የሚሰራና መሰል ስራዎችን የሚደግፍ ነው፡፡ ሀዋሳ በሚገኘው ቢሮው በሲዳማ፣ እና በደቡብ ብሄር ብሄረሰቦችና ህዝቦች ክልል ብቻ ከ71 በላይ ወረዳዎችን በፕሮግራሞቹ የደረሰ ሲሆን በርካታ የማህበረሰብ ክፍሎችን ተጠቃሚ እያደረገ የሚገኝ የሲቪል ማህበረሰብ ድርጅት ነው፡፡


"በጎ ፈቃደኝነት ለአብሮነት" በሚል መሪ ቃል ዓለም አቀፍ የበጎ ፈቃደኛነት ቀን ተከብሮ ዋለ፡፡

የሲቪል ማህበረሰብ ድርጅቶች ባለስልጣን ከሴቶችና ማህበራዊ ጉዳይ ሚኒስቴር ጋር በመተባበር በአዳማ ከተማ ፕሮግራሙን አዘጋጅተዋል፡፡ በበዓሉ በክብር እንግድነት የተገኙት የሴቶችና ማህበራዊ ጉዳይ ሚኒስቴር ሚኒስትር ዴኤታ ወ/ሮ ሙና አህመድ እንደተናገሩት በጎ ፈቃደኝነት ዜጎች ከራስ ወዳድነት እና ፍላጎት ወደጎን ብለው የዘር ስብጥር አስተዳደግና አመለካከት አልያም የድንበር ወሰን ሳያግዳቸው ከቅን ልቦና በመነጨ ያለምንም ክፍያ በራሳቸው ተነሳሽነት ጊዜያቸውን፣ ጉልበታቸውን እና እውቀታቸውን ተጠቅመው የሰውችን ሰብዓዊ ህይወት ለማሻሻል ማህራዊ ተሳትፎን እና ማህራዊ ትስስርን ለማጠናከር የሚውል በጎ ተግባር ነው፡፡ ሚኒስትር ዴኤታዋ ቀኑን ማክበር ያስፈለገበት ዓብይ ምክንያት ብለው ያነሱት በአሁኑ ወቅት በአገራችን ውስጥ በተፈጥሮአዊና በሰው ሰራሽ ክስተቶች ሳቢያ በአስቸጋሪ ሁኔታ ውስጥ የሚገኙ ወገኖቻችን በመኖራቸው ችግሮቻቸውን ለመቅረፍ ሁላችንም በጋራ መቆም ይገባናል ሲሉ ገልጸዋል፡፡ ሌላው ያነሱት በአገራችን የበጎ ፈቃደኝነት አገልግሎት ከህዝባች ታሪክ ባህል ወግና እሴቶችን ከማህበራዊ መስተጋብሮች ጋር የተቆራኘ የረጅም ጊዜ ታሪክ መሆኑን አንስተዋል፡፡

የበጎ ፈቃደኝነት አገልግሎት በአገር ደረጃ በተበጣጠሰ መንገድ ሳይሆን ወጥ እንዲሆን እና የዘርፉን እንቅስቃሴና የወጣቶችን ተሳትፎ ወደላቀ ደረጃ ለማሸጋገር ብሄራዊ የወጣቶች የበጎ ፈቃድ አገልግሎት ፖሊሲ እና የወጣቶች የዜግነት አገልግሎት አዋጅ በረቂቅ ደረጃ እየተዘጋጀ መሆኑን በመግለጽ የበጎ ፋቃደኝነት አስተሳሰብ በማህበረሰቡ ዘንድ በማስረጽ ዜጎች በአገልግሎት ላይ በንቃት እንዲሳተፉ ጥሪአቸውን አስተላልፈዋል፡፡ የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ እንዳሉት የበጎ ፈቃደኝነት ቀን ከመሪ ቃሉ ስንነሳ በጎ ፈቃደኝነት ለአገር አንድነትና አብሮነት ቁልፍ ሚና እንዳለው የሚገልጽ ነው በማለት በአሁኑ ወቅት አገራዊ አንድነትን ለማጠናከር እየተደረገ ካለው አኳያ ትልቅ እንድምታ አለው ሲሉ ገልጸዋል፡፡ አክለውም የአገራችን ኢትዮጵያ አንድነትና አብሮነት የሚረጋገጠው በስርዓት ታንጾ ባደገ ቅን ልብ እና በጎ አድራጊነትና አስተዋይ ልቦች ነው በማለት የበጎ ፈቃድ አገልግሎት በእድሜ፣ በፆታ፣ በዘር፣ በሃይማኖት እና በድንበር ሳይገደብ ሰብዓዊ መልክ ብቻ በመከተል የሚከናወን ተግባር መሆኑን አንስተዋል፡፡ የሲቪል ማህበረሰብ ድርጅቶች ባለስልጣን በአዋጅ 1113/2011 መሰረት በህገ መንግስቱ የተረጋገጠውን የመደራጀት መብት በተሟላ መንገድ በማክበር የሲቪል ማህበረሰብ ድርጅቶች ህግን አክብረው እንዲንቀሳቀሱ ክትትልና ድጋፍ በማድረግ ፤በአገራችን የበጎ አድራጊነትና የበጎ ፈቃደኝነት ባህል በህብረተሰቡ ውስጥ በማስረጽ ፤ድርጅቶች በአገር ልማትና ዴሞክራሲያዊ ስርዓት ግንባታ ላይ አስተዋጽኦ እንዲኖራቸው በማስቻል የተደራጀ ማህበረሰብ በመፍጠር የህብረተሰቡን የላቀ ተጠቃሚነት እና የአገራችንን ብልጽግና ለማረጋገጥ ከባለድርሻ አካላት ጋር እየተሰራ ነው ሲሉ መልዕክታቸውን አስተላልፈዋል፡፡ ሌለዋው ዋና ዳይሬክተሩ ያነሱት የበጎ ፈቃድ አገልግሎት ሳይቆራረጥ ተቋማዊ አሰራር ተዘርግቶለት እንዲከናወን ስራዎች እየተከናወኑ መሆኑን በመግለጽ የበጎ ፈቃድ አገልግሎት ለአገራችን ልማት ፣አንድነት፣ ሰላምና መረጋጋት ቁልፍ ሚና እዳለው በመረዳት ሁሉም የህብረተሰብ ክፍል እና ተቋማ በጋራ መስራት እንደለባቸው አንስተዋል፡፡ የበጎ ፈቃድ አድራጊዎች እና በጎ ፈቃድ ፈላጊዎች ለማገናኘት የሚያስችል /VMSI/ የተባለ የመመዝገቢያ ድህረገጽ ተዘጋጅቶ በዛሬው እለት ተመርቆ ተከፍቷል ፡፡ በመጨረሻም በዚህ ተግባር በጎ አስተዋጽኦ ላበረከቱ ድርጅቶች የምስጋና የምስክር ወረቀት ተሰጥቷቸዋል፡፡


የሲቪል ማህበረሰብ ድርጅቶች ባለስልጣን ከCSSP2 ጋር በመተባበር በአካል ጉዳተኞች መብትና አካታችነት ላይ ለተቋሙ አመራሮች ስልጠና ሰጠ::

የሲቪል ማህረሰብ ድርጅቶች ባለስልጣን በአዋጅ 1113/2011 የተሰጠውን ተግባርና ኃላፊነት ለመወጣት እና በተቋሙ የተጀመረውን ለውጥ ለማስቀጠል አዲስ መዋቅራዊ አደረጃጀት በመፍጠር የሲቪል ማህበረሰብ ድርጅቶችን ለመደገፍ፣ ለመከታተል ብሎም የህረተሰቡን ተጠቃሚነት ለማረጋገጥ እየሰራ ይገኛል፡፡ በዛሬው ዕለት ተቋሙ ከCSSP2 ጋር በመተባበር በአካል ጉዳተኞች መብትና አካታችነት ላይ ለተቋሙ አመራሮች ለሁለት ቀናት የሚቆይ ስልጠና እየሰጠ ይገኛል፡፡ በስልጠናው ላይ የተገኙት የባለስልጣን መስሪያ ቤቱ ም/ዋና ዳይሬክተር አቶ ፋሲካው ሞላ እንዳሉ ባለስልጣን መስሪያ ቤቱ ለአራት ዓመታት በለውጥ እንቅስቃሴ ውስጥ መሆኑን በመጥቀስ በአሁን ጊዜ አዲስ የለውጥ ስሜት እና አዲስ አደረጃጀት መፍጠር መቻሉን ገልጸዋል፡፡ አክለውም በተቋሙ አዲስ በተደራጀው መዋቅር ውስጥ የአካል ጉዳተኞችን የሚከታተል ዴስክ መካተቱን አንስተው በርካታ በአካል ጉዳተኞች ላይ የሚሰሩ የሲቪል ማህረሰብ ድርጅቶች በመኖራቸው እነዚህ ድርጅቶች የአካል ጉዳተኞችን መብትና ጥቅማቸውን ለማስጠበቅ በተሟላ መልኩ ጠንክረው መስራት እንዳለባቸው አንስተዋል፡፡ የባለስልጣን መስሪያ ቤቱ የአገልግሎት አሰጣጡን ለማሻሻል የሰራተኛውን አቅም ማጎልበት ቀዳሚ ተግባር ነው ያሉት ምክትል ዋና ዳይሬክተሩ በአካል ጉዳተኞች መብትና አካታችነት ላይ የተሰጠውን ስልጠና እንዲካሄድ ለተባበረው CSSP2 ምስጋናቸውን አቅርበዋል፡፡


የሲቪል ማህበረሰብ ድርጅቶች ባለስልጣንና የሲቪል ማህበረሰብ ድርጀቶች ምክር ቤት በጋራ ከ1 ቢሊየን ብር በላይ የሚሆን የዓይነትና የገንዘብ ድጋፍ ለማሰባሰብ እና ለተጎጂዎች ለማድረስ እየሰሩ እንደሚገኙ ተገለጸ፡፡

የሲቪል ማህበረሰብ ድርጅቶች ባለስጣንና የሲቪል ማህበረሰብ ድረጅቶች ምክር ቤት ጉዳት በደረሰባቸው አካባቢዎች ከሚንቀሳቀሱ 4 ሀገር በቀል የሲቪል ማህበረሰብ ድርጅቶች ጋር በገንዘብ የተሰበሰበውን ድጋፍ ለተጎጂዎች ለማድረስ የሚያስችል የመግባቢያ ስምምነት ተፈራርመዋል፡፡ ስምምነቱ የተፈረመው በሰሜኑ የሀገሪቱ ክፍል ተፈጥሮ በነበረው ግጭት ጉዳት ለደረሰባቸው የማህበረሰብ ክፍሎች የተሰበሰበውን የገንዘብ ድጋፍ በቀጥታ ለማድረስ እንዲያስችል መሆኑ ተገልጿል፡፡ በፊርማ ስነስርዓቱ ላይ የተገኙት የሲቪል ማህበረሰብ ድርጅቶች ባለስልጣን ምክትል ዋና ዳይሬክተር አቶ ፋሲካው ሞላ የሲቪል ማህበረሰብ ድርጅቶች ባለስልጣንና የሲቪል ማህበረሰብ ድርጅቶቸ ካውንስል በተናጠል ከሚያደርጉት ድጋፍ በተጨማሪ ከተወሰኑ የሲቪል ማህበረሰብ ድርጅቶች ጋር ስምምነት በማድረግ የተሰበሰበው የገንዘብ ድጋፍ በቀጥታ ለተጎጂዎች እንዲደርስ እምነት ያለን በመሆኑ ይህን ስምምነት ጉዳት በደረሰባቸው አካባቢዎች ከሚንቀሳቀሱ 4 ሀገር በቀል የሲቪል ማህበረሰብ ድርጅቶች ጋር ሊደረግ እንደተቻለ ጠቁመዋል፡፡ አክለውም ባለስልጣን መስሪያ ቤቱ ከሲቪል ማህበረሰብ ድርቶች ምክር ቤት ጋር በመሆን ወደ 1 ቢሊየን ብር የሚጠጋ ድጋፍ ለተጎጂዎች ለማሰብሰብ ኮሚቴ ተዋቅሮ እየሰራ መሆኑን አንስተው ሁሉም የሲቪል ማህበረሰብ ድርጅቶች ካሁን በፊት ሲያደርጉ እንደነበረው ድጋፋቸውን አጠናክረው እንዲቀጥሉ ጥሪ አድርገዋል፡፡

መንግስት ያደረገው ስምምነት መሬት ላይ ወርዶ ፍሬያማ እንዲሆን የሲቪል ማህበረሰብ ድርጅቶች ትልቅ ኃላፊነት አለባቸው ያሉት ምክትል ዋና ዳይሬክተሩ ማህበረሰቡ በሚያጋጥመው ማንኛውም ሰው ሰራሽም ሆነ ተፈጥሮአዊ ችግር ቀድሞ በመድረስ የመደገፍና የማገዝ የህግም ሆነ የሞራል ግዴታ ያለባቸው መሆኑን አንስተዋል፡፡ የሲቪል ማህበረሰብ ድርጅቶች ምክር ቤት ዳይሬክተር የሆኑት አቶ ሄኖክ መለሰ በበኩላቸው የሲቪል ማህበረሰብ ድርጅቶች ምክር ቤት በትግራይ ክልል የሚንቀሳቀሱ ድርጅቶችን ለማገዝ እየሰራ እንደሚገኝ አንስተው በቅርቡ በትግራይ የሚንቀሳቀሱ ድርጅቶች ያቀፈ ኢኒሼቲቭ ለማቋቋም ጥረት እያደረገ እንደሚገኝ አንስተዋል፡፡ ከባለስልጣን መስሪያ ቤቱ ጋር በቅርበት እየሰራን እንገኛለን ያሉት አቶ ሄኖክ መለሰ ዛሬ የተደረገው ስምምነት ትልቅ ኃላፊነትን የሚሰጥና ለተጎጂዎችዎች በትክክል ለመድረስ የሚያግዝ እንደሆነም አንስተዋል፡፡ ስምምነቱ የተፈረመው ፋና አዲስ ትውልድ ኢትዮጵያ፣ ሪዲም ዘ ጀነሬሽን፣ ሴቭ ዩር ሆሊ ላንድ አሶየሽን እንዲሁም ተጋሩ ኢኒሼቲቭ ፎር ፒስ ኤንድ ሪሃብሊሽን ፎር ኢትዮጵያ ከተባሉ ሀገር በቀል ድርጅቶች ጋር ሲሆን በስምምነቱ መሰረት በጥሬ ገንዘብ የተሰበሰበው ድጋፍ በነዚህ አራት ድርጅቶች በኩል ለተጎጂዎች እንዲደርስ የሚያስችል ነው፡፡

ስምምነቱ በሲቪል ማህበረሰብ ድርጅቶችና በመንግስት መካከል ትልቅ መተማመንን የሚፈጥር እንደሆነና የተጣለባቸውን አደራ በትክክል ለመወጣት ስምምነቱን የፈረሙት ድርጅቶች ተወካዮች የገለጹ ሲሆን በቀጣይም በርካታ ስራዎችን ተጎጂዎች ባሉበት አካባቢ ሁሉ ለመስራት ትልቅ መነሳሳትን እንደፈጠረላቸው ጠቁመዋል፡፡ በመርኃ ግብሩ ላይ የሲቪል ማህበረሰብ ድርጅቶች ከመቼውም ጊዜ በላይ ድጋፋቸውን አጠናክረው እንዲቀጥሉ ጥሪ የቀረበ ሲሆን ለዚሁ ዓላማ የሲቪል ማህበረሰብ ድርጅቶች የሰብዓዊ ድጋፍ አሰባሳቢ ኮሚቴ ተቋቁሞ እየሰራ እንደሚገኝ ተጠቁሟል፡፡


ዓለም ዓቀፍ የአካል ጉዳተኞች ቀን በድሬደዋ አስተዳደር በድምቀት ተከብሯል ::

በዓለም ለ31ኛ ጊዜ እንዲሁም በኢትዮጵያ ለ30ኛ ጊዜ “አካታች የፈጠራ የስራና ሽግግራዊ መፍትሄ ለኢትዮጵያ አካል ጉዳተኞች ሁለንተናዊ ተደራሽነት” በሚል መሪ ቃል በድሬደዋ አስተዳደር ሚንስትሮች፣ የአስተዳደሩ ከፍተኛ ኃላፊዎች እንዲሁም በርካታ ታዳሚዎች በተገኙበት በከፍተኛ ድምቀት ተከብሮ ውሏል፡፡ ከዋዜማው ጀምሮ በበርካታ ሁነቶች የታጀበው ዓለም ዓቀፉ የአካል ጉዳተኞች ቀን በድምቀት የተከበረ ሲሆን በአካል ጉዳተኞች ዙሪያ በትብብር እየሰሩ ለሚገኙ አካላትና ለበዓሉ መሳካት አስተዋጽዖ ላበረከቱ የሲቪል ማህበራት እውቅናና ምስጋና ተሰጥቶበታል፡፡ በመክፈቻ መርኃ ግብሩ የተለያዩ ተቋማት አካል ጉዳተኞችን በሚመለከት እየሰሩ ያሉትን ስራ ያቀረቡ ሲሆን በሲቪል ማህበረሰብ ድርጅቶች ባለስልጣን ምክትል ዋና ዳይሬክተር አቶ ፋሲካው ሞላ በባለስልጣን መስሪያ ቤቱ በኩል አካል ጉዳተኞችን መሰረት አድርገው ለሚቋቋሙ ድርጅቶች ስለሚሰጥ ድጋፍና በኢትዮጵያ ስላለው እንቅስቃሴ እንዲሁም ባለስልጣን መስሪያ ቤቱ አካል ጉዳተኞችን በሚመለከት እየሰራቸው ስለሚገኙ ስራዎች ገለጻ አድርገዋል፡፡

በክብርት ሚንስትር ደኤታ ወ/ሮ አየለች አወያይነት በተካሄደው በዚህ የፓናል ውይይት ላይ የባለስልጣን መስሪያ ቤቱ ምክትል ዋና ዳይሬክተር አቶ ፋሲካው ሞላ ባለስልጣን መስሪያ ቤቱ በሚያወጣቸው ህጎችና መመሪያዎች ላይ አካል ጉዳተኞችን ተሳትፎ እያደረጉ እንደሚገኙ አንስተው በአካል ጉዳተኞች ዙሪያ ለሚሰሩ ድርጅቶች የድጋፍና ክትትል ዴስክ በማደራጀት በልዩ ሁኔታ በእቅድ እየሰራበት እንደሚገኝ አንስተዋል፡፡ የሲቪል ማህበረሰብ ድርጅቶች ባለስልጣንን ጨምሮ ከተለያዩ አካላት የተሰባሰቡና በአስተዳደሩ የሚገኙ አካል ጉዳተኞች የሚገለገሉባቸው ቁሳቁሶች በሴቶችና ማህበራዊ ጉዳይ ሚንስቴር በኩል ለአስተዳደሩ የሴቶችና ማህበራዊ ጉዳይ ቢሮ ተበርክቷል፡፡ በነበረው መርኃ ግብር የባለስልጣን መስሪያ ቤቱ ምክትል ዋና ዳይሬክተር አቶ ፋሲካው ሞላ በተገኙበት ቸሻየር ኢትዮጵያ የተባለ በሲቪል ማህበረሰብ ድርጅቶች ባለስልጣን የተመዘገበ የሲቪል ማህበረሰብ ድርጅት በድሬደዋ አስተዳደር እየሰራ ያለው ስራ ተጎብኝቷል፡፡