3ተኛው የሲቪል ማኅበረሰብ ድርጅቶች ባለስልጣን እና የፌዴራልና ክልል ባለድርሻ የመንግስት ተቋማት የጋራ ጉባኤ ተሳታፊዎች የይርጋለም የተቀናጀ የግብርና ማቀነባበሪያ ኢንዱስትሪ ፓርክን ጎበኙ፡፡

የኢንዱስትሪ ፓርኩ ስራ አስኪያጅ አቶ ብሩ ወልዴ በገለጻቸው የስራ እድል ፈጠራ፣የቴክኖሎጂ ሽግግር፣የውጭ ምንዛሬ እና ግብርናን ማዘመን የኢንደስትሪ ፓርኩ አራት መሰረታዊ ጥቅሞች እንደሆኑ ለጎብኚዎች አስረድተዋል፡፡ የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ በበኩላቸው የሲዳማ ብ/ክ/መንግስትን እንደዚህ አይነት የጉብኝት መርሃ ግብር በማዘጋጀት ተሳታፊዎቹ የልማት ስራዎችን እንዲመለከቱ በማድረጋቸው ምስጋናቸውን አቅርበዋል፡፡ ጎብኚዎቹም ባዩት ነገር እጅግ መደሰታቸውን ገልጸዋል፡፡


3ተኛው የሲቪል ማኅበረሰብ ድርጅቶች ባለስልጣን እና የፌዴራልና ክልል ባለድርሻ የመንግስት ተቋማት የጋራ ጉባኤ በሐዋሳ ከተማ እየተካሄደ ነው፡፡

በመድረኩ ላይ በርካታ የክልል እና የፌዴራል የሚመለከታቸው የባለድርሻ አካላት እና የኢትዬጵያ የሲቪል ማኅበረሰብ ድርጅቶች ምክርቤት ሃላፊዎች ተሳታፊ ሆነዋል፡፡ የኢፌዴሪ የፍትህ ሚኒስቴር ሚኒስትር ዶ/ር ጌዲዬን ጢሞቲዬስ ባስተላለፉት መልዕክት በባለፉት ሶስት ዓመታት መንግስት ልዩ አጽንኦት በመስጠት ህጉን ማሻሻል መቻሉን ገልጸው በአንድ ሃገር የፖለቲካና ኢኮኖሚ ተዋናዬች በተጨማሪ ያለትርፍ ለበጎ አድራጎት ተግባር ተሰባስበው እና ተደራጅተው የሚሰሩ የሲቪል ማህበረሰብ ድርጅቶች ሚና ከፍተኛ ነው ሲሉ ገልጸዋል፡፡ አሁን ባለው ሃገራዊ ሁኔታ የሲቪል ማኅበረሰብ ድርጅቶች ሚና ሲገልጹ በሃገሪቱ በግጭት ምክንያት የወደሙ መሰረተ ልማቶችና ንብረቶችን ከበፊቱ በተሻለ ሁኔታ መልሶ የመገንባት፣ቁሳዊ ያልሆነውን የወንድማማችነትና አብሮነት በተመለከተ እርቅ ላይ ትኩረት በማድረግ መስራት እንዲሁም እንደዚህ ዓይነት የግጭት ምንጭ የሆኑ ጉዳዬችን በመለየት መፍትሄ ለመስጠት የተቋቋመውን የሃገራዊ የምክክር ኮሚሽን በሚጠራው የውይይት መድረኮች ላይ ተሳታፊ መሆን እና የማገዝ ስራ መስራት እንደሚገባ ሚኒስትሩ አጽንኦት ሰጥተው ተናግረዋል፡፡

የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ በመክፈቻ ንግግራቸው እንደገለጹት የምክክር መድረኩ ዓላማ ባለፈው አንድ ዓመት ውስጥ የተከናወኑ ዐበይት ሥራዎችን በመገምገም፣ጠንካራና ደካማ ጎኖችን በመለየት ማረም፤ ማጽናትና ማላቅ በሚገቡን ጉዳዮችና ቀጣይ አቅጣጫዎችን ጉባኤው ተወያይቶ ማስቀመጥ ብሎም በዘርፉ ሚታዩ ክፍተቶችንም በመለየት የጋራ የመፍትሔ አቅጣጫዎችን ማስቀመጥና ምርጥ ተሞክሮዎችን መለዋወጥም መሆኑን ገልጸዋል፡፡ አያይዘውም በሰሜኑ የሃገራችን ክፍል በተፈጠረው ችግር በርካታ ችግሮች የደረሱ መሆኑን ገልጸው ይህንን ከፍተኛ ጉዳት የደረሰባቸውንና በከፋ ችግር ውስጥ የሚገኙትን ወገኖቻችን መደገፍ ከሁሉም ዜጋ የሚጠበቅ ቢሆንም የሲቪል ማህበረሰብ ድርጅቶች ከዚህ አንጻር ሚናቸው ከፍተኛ መሆኑን አንስተዋል፡፡ ከዚህ አንጻር የሲቪል ማኅበረሰብ ድርጅቶች የሰብዓዊ ዕርዳታና ድጋፍ በማሰባሰብ “እኔም ለወገኔ” በሚል ከቀዬቸው ለተፈናቀሉ ወገኖቻችን ድጋፍ የሚውል ሀብት በማሰባሰብና በቦታው በማድረስ ጭምር ያደረጉት ርብርብና አሁንም በማድረግ ላይ የሚገኙት ድርጅቶች ቁጥር ከፍተኛ ነው ያሉት ዋና ዳይሬክተሩ ከመንግስት ጎን በመቆም ሀገርን ከአደጋ ለመታደግ ያሳዩት ጥረት ተጠናክሮ ሊቀጥል ይገባል ብለዋል፡፡ በመጨረሻም ለሲዳማ ብ/ክ/መንግስት እዲሁም ወጪውን በመሸፈን ተባባሪ ለሆነው CSSP2 ምስጋናቸውን አቅርበዋል፡፡


የተቋሙ ሰራተኞች በሰሜን ሸዋ ዞን ሞረትና ጅሩ ወረዳ በመገኘት የዘማች ቤተሰቦችን ሰብል ሰበሰቡ፡፡

የሲቪል ማህበረሰብ ድርጅቶች ባለስልጣን አመራሮችና ሰራተኞች በአማራ ብሄራዊ ክልላዊ መንግስት ሰሜን ሸዋ ዞን ሞረትና ጅሩ ወረዳ በመገኘት ወራሪውን የትግራይ ቡድን ለመመከት በግንባር ሲዋደቁ የነበሩ አርሶ አደር ዘማቾችን ሰብል ሰብስበዋል፡፡ በዚህ የሰብል ስብሰባ መርሃ ግብር ላይ የባለስልጣን መስሪያ ቤቱ ምክትል ዋና ዳይሬክተር አቶ ፋሲካው ሞላን ጨምሮ የወረዳው ዋና አስተዳዳሪና የወረዳው የግብርና ጽህፈት ቤት ኃላፊዎች ተገኝተዋል፡፡ ወራሪው ቡድን በርካታ ወንጀሎችን ሲሰራ ቆይቷል፤ እኛም ስንመክት ቆይተናል ያሉት የባለስልጣን መስሪያ ቤቱ ምክትል ዋና ዳይሬክተር አቶ ፋሲካው ሞላ፤ ይህ ወራሪ ቡድን የቃጣብንን ጥቃት መላው ኢትዮጵያውያን ከጫፍ እስከ ጫፍ በመነቃነቅና በጋራ በመሆን ከወረራቸው የአፋርና የአማራ ክልሎች ተጠራርጎ እንዲወጣ በማድረግ ኢትዮጵያን አሸናፊ አድርገዋል ብለዋል፡፡ ማክትል ዋና ዳይሬክተሩ አክለውም አሸባሪ ቡድኑ ዳግም እንዳይነሳና መልሶ ወረራ እንዳይፈጽም እስከወዲያኛው የማጥፋት ስራ በመንግስት በቀጣይ የሚሰራበት መሆኑን ጠቁመው ኢትዮጵያ ትፈርሳለች ብለው የሚያስቡ  የውስጥም የውጪ ጠላቶችን ያሳፈረ፤ ኢትዮጵያ መቼም ቢሆን የማትፈርስ ሀገር መሆኗንና የትኛውም ችግር ቢመጣ ኢትዮጵያውያን የውስጥ ችግሮቻቸውን ወደጎን በመተው ለጋራ አላማቸው የሚሰለፉ መሆናቸውን ያስመሰከሩበት ድል እንደሆነም ገልጸዋል፡፡

የባለስልጣን መስሪያ ቤቱ ምክትል ዋና ዳይሬክተር በንግግራቸው እንደገለጹት አጋጣሚው ኢትዮጵያውያን የእርስ በርስ ግንኙነታችንን እንድናጠናክር እድል ሰጥቶናል፤ በርካታ ማህበራዊ ኢኮኖሚያዊና ፖለቲካዊ ችግሮች አሉብን፤ ጥቃቅን የሆኑትን የዘርና መሰል የሆኑ ልዩነቶቻችንን ትተን በጋራ ከሰራን ፖለቲካውንም ኢኮኖሚውንም እንዲሁም ማህበራዊ መስተጋብራችንን ማስተካከል የምንችል መሆኑን ያየንበት ነው፡፡ ጠላቶቻችን እርስ በርስ ይበላላሉ፤ ይጫረሳሉ ብለው ለ30 አመታት የሰሩልንን የልዩነት ግንብ ትተን የአንድነት ግንብ የሰራንበት ወቅት ነው ብለዋል፡፡ አያይዘውም ይህን ጦርነት ለመመከት ግንባር ድረስ በመዝመት ከፍተኛ ተጋድሎ ሲያደርጉ የነበሩትን የሞረትና ጅሩ ወረዳ ሚሊሻዎችን ሰብል ለመሰብሰብ ከመሃል አዲስ አበባ ድረስ ስንመጣ አንድ መሆናችንን፤ የእናንተ ጉዳት የእኛም ጉዳት ነው ለማለትና ሁልም ቢሆን ኢትዮጵያውያን ከጎናችሁ ነን ለማለት ነው፡፡የወደመውን ማህበራዊ ኢኮኖሚያዊና ፖለቲካዊ ድቀቶችን የማስተካከል ብዙ የቤት ስራዎች ይጠበቁብናል፡፡ጦርነቱ አሁን ባለበት ሁነኔታ የኛ መፈክር ሊሆን የሚገባው እናልማ፣እንገንባ፣ እንዘጋጅ ነው፡፡ ኢኮኖሚያችንን መልሶ ለመገንባት መረባረብ ያለብን ወቅት ነው፡፡ በዚህ አካባቢ ዛሬ መጥተን እንዳየነው በሚያስደንቅ ሁኔታ አደለም ይህን ወረዳና ዞን ድፍን ኢትዮጵያን መመገብ የሚችል ትልቅ የእርሻ አቅም ያለው መሆኑን አይተናል፡፡ በመላው ኢትዮጵያ የግብርና ምርታችን አመርቂ የሚባል ነው፡፡ የወደሙ ከተሞችን መልሶ በመገንባትም ከፍተኛ ርብርብ ማድርግ ከሁላችንም የሚጠበቅ ነው፡፡ ዛሬ እዚህ የተገኘንበት አንዱና ትልቁ ምክንያትም ለእኛ ሲሉ ነው ግንባር ድረስ ዘምተው የቆሰሉት፣ የተጎዱት፣ ብለን ህመማቸው ህምማችን ቁስላቸው ቁስላችን መሆኑን ለመግለጽ ስንመጣ ሀብታቸውን በመሰብሰብ ኢኮኖሚያቸው ወደተሻለ ደረጃ ከፍ እንዲል የበኩላችንን አስተዋጽዖ እያበረከትን ነው ሲሉ ጠቁመዋል፡፡ ጦርነቱ ገና ነው አላለቀም፡፡ ስለዚህ ከመቼውም ጊዜ በላይ መዘጋጀት ያስፈልጋል፡፡ ለሀገር ውስጥም ሆነ ለውጪ ጠላት የማይበገር ሰራዊት መገንባት፤ ስለሰላም እየሰበኩ ጎን ለጎን መዘጋጀት ያስፈልጋል፡፡ ስለዚህ እናልማ፣ እንገንባ፣ እንዘጋጅ አንድነታችንን እናጠናክር ለዚህም ነው ወደዚህ የመጣነው፡፡የሲቪል ማህበረሰብ ድርጅቶች ባለስልጣን በስሩ የሚንቀሳቀሱ ድርጅቶችን በማስተባበር በአንድ ቀን ጥሪ ብቻ ከ140 ሚሊዮን ብር በላይ ለተጎጂ ወገኖቻችን አሰባስበናል፤ በቀጥታም ለተጎጂዎች እንዲደርስም እያደረግን ነው፡፡ ለተቋሙ ሰራተኞች በቢሮ ከሚሰራው ስራ በተጨማሪ ብዙ መንገድ አቋርጣችሁ ለዘማቾቹ አለን ከጎናችሁ ነን በማለታችሁ እጅግ የከበረ ምስጋናየን አቀርባልሁ ሲሉ ምክትል ዋና ዳይሬክተሩ አክለው ገልጸል፡፡

የሞረትና ጅሩ ወረዳ ዋና አስተዳዳ አቶ ሙሉጌታ በበኩላቸው ወረዳው በስንዴና በጤፍ እንዲሁም በጥራጥሬ ሰብሎች በምስርና በባቄላ የሚታወቅ መሆኑን ጠቁመው ክቡር ጠቅላይ ሚንስትሩም የአካባቢውን የሰብል ሀብት መጥተው የጎበኙት እንደሆነ አንስተዋል፡፡ ወራሪው የህውኃት ቡድን ይህን አካባቢ ለማጥፋት አጎራባች ወረዳዎች ድረስ ተጠግቶ ነበር ያሉት ዋና አስተዳዳሪው በመላው ኢትዮጵያውያን ርብርብ ወደመጣበት እንዲመለስ ተደርጓል ብለዋል፡፡ የሲቪል ማህበረሰብ ድርጅቶች ባለስልጣን ይህ አካባቢ መደገፍ ይገባዋል ብላችሁ ብዙ ኪሎሜትር አቋርጣችሁ በመምጣታችሁ እንዲሁም ሰራተኛ ጭምር ቀጥራችሁ የዘማቾችን ስለሰበሰባችሁና ድጋፍ ስላደረጋችሁልን ከልብ እናመሰግናለን ብለዋል፡፡ የሲቪል ማህበረሰብ ድርጅቶች ባለስልጣን ለሁለተኛ ጊዜ ባደረገው በዚህ የሰብል መሰብሰብ መርኃ ግብር ከ3.5 ሄክታር በላይ በስንዴና በጤፍ የተሸፈነ ሰብል የተሰበሰበ ሲሆን በወረዳው ለችግር ለተዳረጉ የማህበረሰብ ክፍሎች ድጋፍ ይሆን ዘንድ የተለያዩ አልባሳትንም ለወረዳው ዋና አስተዳዳሪ ምክትል ዋና ዳይሬክተር አቶ ፋሲካው ሞላ አስረክበዋል፡፡


ዶክተርስ ዊዝ አፍሪካ ኩኣም እና እዩ ኢትዮጵያ የተባሉ የሲቪል ማኅበረሰብ ድርጅቶች በሽብርተኛው የትግራይ ወራሪ ቡድን ጉዳት ለደረሰባቸው አካባቢዎች የመድኃኒት ድጋፍ አደረጉ፡፡

ዶክተርስ ዊዝ አፍሪካ ኩኣም እና እዩ ኢትዮጵያ የተባሉ የሲቪል ማኅበረሰብ ድርጅቶች በሽብርተኛው የትግራይ ወራሪ ቡድን ጉዳት ለደረሰባቸው አካባቢዎች ከ754 ሺህ ብር በላይ የሚገመት የመድኃኒት ድጋፍ አድርገዋል፡፡በባሕር ዳር ተገኝተው ድጋፉን ያስረከቡት የዶክተርስ ዊዝ አፍሪካ ኩኣም የፕሮግራም ኀላፊ ዶክተር አደም ፀጋዬ ድርጅታቸው ያደረገው ድጋፍ የመጀመሪያው መሆኑን ጠቁመዋል፡፡ በቀጣይም የተጎዱ የጤና ተቋማትን መልሶ በመገንባት እና ሥራ ለማስጀመር ድርጅታቸው የበኩሉን ድርሻ እንደሚወጣ ገልጸዋል፡፡ የዶክተርስ ዊዝ አፍሪካ ኩኣም ፕሮግራም በጤናው ዘርፍ በጠረፍ አካባቢዎች ላይ እየሠራ ያለ ድርጅት መኾኑን ጠቅሰዋል፡፡

ድርጅቶችን በማስተባበር ድጋፍ እያሠባሰቡ የሚገኙት የኢፌድሪ የሲቪል ማኅበረሰብ ድርጅቶች ባለሥልጣን ምክትል ዋና ዳይሬክተር አቶ ፋሲካው ሞላ አሸባሪው የትግራይ ወራሪ ቡድን ወረራ በፈጸመባቸው አካባቢዎች የከፋ ሰብዓዊ፣ አካላዊ እና ቁሳዊ ውድመት አድርሷል ብለዋል፡፡ ውድመቱ በአማራ እና በአፋር ክልሎች ይሁን እንጅ ጉዳቱ የሁሉም ኢትዮጵያዊ ነው ያሉት ምክትል ዋና ዳይሬክተሩ መልሶ ለመገንባት የሁሉንም ርብርብ ይጠይቃል ብለዋል፡፡ በፌዴራል ደረጃ የተመዘገቡ 3 ሺህ 500 የሲቪል ማኅበረሰብ ድርጅቶች አሉ ያሉት አቶ ፋሲካው እነዚህ ድርጅቶች በተደረገላቸው ጥሪ መሠረት 142 ሚሊየን ብር ድጋፍ ለማድረግ ቃል ገብተዋል ነው ያሉት፡፡ በገቡት ቃል መሠረት ድጋፍ እያደረጉ መሆኑን ጠቅሰዋል፡፡ ሌሎችም ድጋፋቸውን አጠናክረው እንዲቀጥሉ ጥሪ አቅርበዋል፡፡ ከእዩ ኢትዮጵያ ድጋፍ ይዘው የመጡት ታሪኩ ወንዴ ድርጅታቸው 175 ሽህ ብር የሚገመት ድጋፍ ማድረጉን ገልጸዋል፡፡ ድጋፉን የተረከቡት የአማራ ክልል ጤና ቢሮ ኀላፊ ዶክተር መልካሙ አብቴ ለተደረገው ድጋፍ ምስጋና አቅርበዋል፡፡ ድጋፉ ተቋማቱን አገልግሎት እንዲሰጡ ያግዛል ብለዋል፡፡ ሌሎችም ድጋፋቸውን አጠናክረው እንዲቀጥሉ ጥሪ አቅርበዋል፡፡

ዘገባው የአማራ ሚድያ ኮርፖሬሽን ነው፡፡


የሲቪል ማህበረሰብ ድርጅቶች ባለስልጣን በሃዋሳ ከተማ ለሚገኙ ባለድርሻ አካላት ስልጠና ሰጠ፡፡

የሲቪል ማህበረሰብ ድርጅቶች ባለስልጣን በሲዳማ ብሄራዊ ክልላዊ መንግስት በሃዋሳ ከተማ ለሚገኙ ባለድርሻ አካላት ስልጠና ሰጥቷል፡፡ ስልጠናውን የሲቪል ማህበረሰብ ድርጅቶች ባለስልጣን DEC ከተባለ የሲቪል ማህበረሰብ ድርጅት ጋር በጋራ በመሆን ያዘጋጀው ነው፡፡ በስልጠናው ላይ የባለስልጣን መስሪያ ቤቱን ከፍተኛ የስራ ኃላፊዎች ጨምሮ በሲዳማ ክልል የሚገኙ ባለድርሻ የመንግስት ተወካዮችና የሲቪል ማህበረሰብ ድርጅቶች ተወካዮች ተገኝተዋል፡: የስልጠናው ዋነኛ አላማ በመንግስት ተቋማት፣ በግልና በሲቪል ማህበረሰብ ድርጅቶች የበጎ ፈቃድና የበጎ አድራጊነት ተግባራትን በተቀናጀና በተደራጀ አግባብ ለመምራት እንዲረዳ በባለስልጣኑ የተዘጋጀውን `volunteerism promotion and management guidance note ለማስተዋወቅና ግንዛቤ ለማስጨበጥ ታልሞ ነው፡፡ ከዚህ በተጨማሪም በሀገር ዓቀፍ ደረጃ የበጎ ፈቃድ ተግባራትን ተቋማዊ አሰራር ለመፍጠር እና ከባለድርሻ አካላት ጋር ምክክር ለማድረግ የሚያስችል ዓይነተኛ ዓላማ ያለው ስልጠና እንደሆነ በመድረኩ ተጠቁሟል፡፡

የሲቪል ማህበረሰብ ድርጅቶች ባለስልጣን ዋና ዳይሬክተር ክቡር አቶ ጂማ ዲልቦ በመክፈቻ ንግግራቸው ላይ እንዳሉት አንድነታችንን፣ አብሮነታችንን ለማጠናከር የበጎ ፈቃደኝነትና የበጎ አድራጊነት ባህል እጅጉን አስፈላጊ ነው ብለዋል፡፡ እንደሀገር ያጋጠሙንን ችግሮች ለመፍታት መነጋገር፣ መግባባት አንዳችን ለሌላችን መልካም ማድረግ አለብን፤ ለምናስበው ልማትና ብልፅግና እንዲሁም አሁን ከገባንበት ውጥንቅጥ ለመውጣት የበጎ ፈቃደኝነትና የበጎ አድራጊነት እሳቤ እጅግ አስፈላጊ ነው ሲሉ ገልፀዋል፡፡ የበጎ ፈቃደኝነትና በጎ አድራጊነት እሳቤ እንክብካቤ የሚሻ በመሆኑ መንከባከብና ማሳደግ ተገቢ ነው ሲሉ ዋና ዳይሬክተሩ አክለው ገልፀዋል፡፡ የበጎ ፈቃደኝነትና በጎ አድራጊነት በኢትዮጵያ ባህል አልሆነም፤ በዘመቻ መልክ የሚከናወን በመሆኑም ለሀገሪቱ ያለው አበርክቶ ምን ያህል እንደሆነ በትክክል አይታወቅም፡፡ የበጎ ፈቃድ ተግባራትን የመሰነድ ባህል ባለመኖሩ በበጎ ፈቃድ የተከናወኑ ተግባራት ምን ያህል እንደሆኑና በሀገሪቱ ኢኮኖሚ፤ ፖለቲካ እና ማህበራዊ ዘርፍ ያበረከተው አስተዋፅዖ የሚታወቅና በስርዓት የሚመራ አይደለም፡፡ ባለስልጣን መስሪያ ቤቱ ይህን በመረዳት ዘርፉ በስርዓት ይመራ ዘንድ ያለውንም አበርክቶ በትክክል ለማመላከትና ለማስተካከል እየሰራ ነው ሲሉ ተናግረዋል፡፡ በሲዳማ ብሄራዊ ክልላዊ መንግስት የፋይናንስ ቢሮ ሃላፊ አቶ አራርሶ ገረመው በበኩላቸው ባለስልጣን መስሪያ ቤቱ በሲዳማ ክልል ለሚገኙ ባለድርሻ አካላት እንዲህ አይነት ስልጠና ማዘጋጀቱ እንዳስደሰታቸው ጠቁመው እንደ ክልል የሲዳማ ብሄራዊ ክልላዊ መንግስት የበጎ ፈቃድ አገልግሎትን በመዋቅር ደረጃ እስከታች ድረስ በመዘርጋት ስራዎችን እንሰራለን ብለዋል፡፡ አያይዘውም ጋይድ ላይኑን በሲዳምኛ ለማስተርጎም ፋይናንስ ቢሮ ኃላፊነቱን የሚወስድ መሆኑን አንስተው ማህበረሰባችን ጥልቅ የሆነ የበጎ ፈቃድ ባህል ያለው በመሆኑ ይህን ከልብ በሚገባ ልንጠቀምበት ይገባል ሲሉ መልዕክታቸውን አስተላልፈዋል፡፡


ወቅታዊ ሀገራዊ ጉዳይ ላይ ለሲቪል ማህበረሰብ ድርጅቶች እና ባለድርሻ አካላት የግንዛቤ ማስጨበጫ እና የድጋፍ ማሰባሰቢያ መርሃ ግብር ተካሄደ፡፡

በመድረኩ በክብር እንግድነት የተገኙት የኢፌዴሪ የፍትህ ሚኒስቴር ሚኒስትር ዴኤታ አቶ ፍቃዱ ጸጋው በንግግራቸው እንደገለጹት ሲቪል ማህበረሰብ ድርጅቶች በተናጥል በርካታ ስራዎችን ስትሰሩ እንደነበር ይታወቃል ይሁን እና በችግሩ ልክ መፍትሄ ለመስጠት እንዲያስችል በእቅድ መመምራት አስፈላጊ ሆኗል ብለዋል:: ሲቪል ማህበረሰብ ድርጅችም የተቋቋሙበት ዓላማ ሰብዓዊ ድጋፍ ላይ መስራት ማገዝ ስለሆነ በተናጥል ከመሄድ በጋራ ሆኖ መስራት አስፈላጊ በመሆኑ በተናጥል የነበረውን ስራ የምናቀናጅበት መድረክ እንደሚሆን ተስፋ አደርጋለሁ ሲሉ ገልጸዋል፡፡ የተራበ ዜጋ እንዳይኖር ተረባርበን የፈረሰውን መገንባት ከቻልን ድላችንን ሙሉ እናደርገዋን ብለዋል፡፡

ይህ ጦርነት ምንም ያህል ጉዳቱ የከፋ ቢሆንም አንድ ያደረገን ፣የሰበሰበን እና ያጠናከረን ጦርነት ነው ጀግኖች ለሃገር እየተሰው ባሉበት ሁኔታ ፕሮጀክቶችንም ቢሆን አጥፈን ሃገር እንድትቀጥል፣የተራበ እንዳይኖር እና የፈረሰን መገንባት ይኖርብናል ሲሉ መልዕክታቸውን አስተላልፈዋል፡፡ የባለስልጣን መስሪያ ቤቱ ዋና ዳይሬክተር አቶ ጂማ ዲልቦ በበኩላቸው አሸባሪው ቡድን የፈጸመውን የክህደት ተግባር ለመመከትና ኢትዬጵያን በብልጽግና ጎዳና ለማስኬድ በግንባር ሕይወቱንና አካሉን መስዋእት እያደረጉ ካሉት ከጀግኖቹ የጸጥታ ኃይሎች ጥምረት ጎን ለጎን በጦርነቱ ምክንያት የተጎዱ ወገኖችን መርዳትና መልሶ ማቋቋም አንዲሁም የወደሙ መሰረተ ልማቶችን መልሶ መገንባት የዜግነት ሲያልፍም የሰብዓዊነት ግዴታ ነው ብለዋል፡፡ በጦርነቱ በግፍ የተቀጠፈውን ውድ የሆነውን የሰው ልጅ ሕይወት መመለስ ባይቻልም የደረሰውን የሰብዓዊ እና ቁሳዊ ውድመት ለመመለስ የሚያስችል መጠነ ሰፊ ስራ ምናልባትም ለሃገር ሉዓላዊነት ለማዳን ከተሰጠው ትኩረት ባልተናነሰ መልኩ ትኩረት ሰጥቶ መስራት እንደሚያስፈልግ ገልጸዋል፡፡

በዚህ ችግር የደረሰው የሰብዓዊና ቁሳዊ ጉዳት በመንግስት ብቻ የሚሸፈን ሳይሆን የብዙ ባለድርሻ አካላትን ርብርብ ይፈልጋል በማለት በተለይም የሲቪል ማህበረሰብ ድርጅቶች ከተቋቋሙለት ዓላማ መካከል የሰብዓዊ ቀውሶች ላይ ምላሽ መስጠት መሆኑን አብራርተዋል፡፡ ይህንን ሃገራዊ ጥሪ ተቀብላችሁ በቅንነት የሰብዓዊ ድጋፍ ለማድረግ ለተገኛችሁ የሲቪል ማህበረሰብ ድርጅቶች እና አጋር ድርጅቶች በባለስልጣን መስሪያቤቱ እና በራሴ ስም በቅድምያ ስለምታደርጉት የበጎነት ስራ ምስጋናዬን አቀርባለሁ ሲሉ ገልጸዋል፡፡ ከፌዴራል ብሔራዊ የአደጋና ስጋት ስራ አመራር ኮሚሽን ተወክለው የተገኙት አቶ ቢሊየን ሙዳ አጠቃላይ በሃገሪቱ ድጋፍ የሚያስፈልጋቸውን የማህበረሰብ ክፍሎች ብሎም ከሲቪል ማህረሰብ ድጀቶች የሚጠበቅ እገዛ ዙሪያ ማብራሪያ ሰጥተዋል፡፡

ወቅታዊ ሃገራዊ ሁኔታ የሲማድ ሚና በተመለከተ እንዲሁም የአማራ፣የኦሮሚያ እና አፋር ክልል ተወክለው የተገኙ ሃላፊዎች በክልሎቹ እየተከናወኑ ስላሉ ተግባራት እና ድጋፍ የሚሹ ዘርፎች ላይ ማብራሪያ አቅርበዋል:: በመድረኩ ከተገኙ 250 የሲቪል ማህበረሰብ ድርጅቶች መካከል ከመቶ አርባ ሁለት ሚሊየን ብር በላይ በአይነትና በገንዘብም ቃል ተገብቷል፡፡


የበጎ ፍቃድ ስራ እንደ ሃገር በህዝቦች መካከል ያለውን አንድነት ለማጠንከር፣መልካም እሴቶችን ለማዳበር፣ሰላምን ለማስፈን ያለው ሃገራዊ ፋይዳ ከፍተኛ ነው ተባለ፡፡

ይህ የተባለው ለደቡብ ብ/ብ/ሕ/ክልል በበጎ ፍቃድ ስርጸትና አመራር ማኑዋል ላይ ማስተዋወቂያና የአቅም ግንባታ ስልጠና በተሰጠበት ወቅት ነው:: በስልጠናው የሚመለከታቸው የመንግስት ቢሮ ሃላፊዎች፣የሲቪል ማኅበረሰብ ድርጅቶች እና የተቋሙ ሃላፊዎችና ባለሙያዎች ተሳታፊ ሆነዋል፡፡ የሲቪል ማኅበረሰብ ድርጅቶች ባለስልጣን ምክትል ዋና ዳይሬክተር አቶ ፋሲካው ሞላ በውይይት መድረኩ ላይ ባስተላለፉት መልዕክት የበጎ ፍቃድ ስራ ትኩረት እንዲሰጠው በሁሉም ክልሎች የግንዛቤ ማስጨበጫ ስራ ለመስራት እና በተለይም የበጎ ፍቃድ ስራ የብዙ ችግሮች መፍቻ ሊሆን ስለሚችል ይህ ስልጠና ተዘጋጅቷል ብለዋል፡፡ እንደሃገር የመፈናቀል፣የጦርነት የሰብዓዊ መብት ጥሰቶችና ሌሎች ብዙ ስብራቶች አሉብን ያሉት ም/ዋና ዳይሬክተሩ እነዚህን ስብራቶች በበጎ ፍቃድ ስራ ልንጠግናቸው እንችላለን ከዚህም በተጨማሪ እንደሃገር በደንብ ከሰራንበት የበጎ ፍቃድ ስራ ውጤት የምናመጣበት ዘርፍ ነው ብለዋል፡፡ የበጎ ፍቃድ ስራ እንደ ሃገር በህዝቦች መካከል ያለውን አንድነት ለማጠንከር፣መልካም እሴቶችን ለማዳበር፣ሰላምን ለማስፈን ያለው ሃገራዊ ፋይዳ ከፍተኛ በመሆኑ ይህንን መረዳት ያስፈልጋል ብለዋል፡፡ በቀጣይም የበጎ ፍቃድ ስራ ወቅታዊ ሳይሆን ዘላቂ ስራ እንዲሆን ፣የሚለካ፣ፖሊሲና ህግ ያለው፣ከፌደራል እስከ ክልል በተናበበ መልኩ የሚከናወን ተግባር እንዲሆን መስራት አለበት ሲሉ ገልጸዋል፡፡

ይህንን ተፈጻሚ ለማድረግም በተቋሙ የንቅናቄ ስራዎችን አጠናክሮ መቀጠል እና የአሰራር ስርዓት መዘርጋት እንደሚያስፈልግ ገልጸዋል፡፡ ስልጠናውን ከወሰዱ አካላትም ከስልጠናው አንጻር ተቋማቸውን መፈተሽ እና ማስተካከያ ማድረግ፣ቅንጅታዊ አሰራርን ማጎልበት ፣ የበጎ ፍቃድ ስራን ሜንስትሪም ማድረግ መቻል ፣ህግ ማውጣትና አሰራር ስርዓት መዘርጋት እንደሚያስፈልግ ተናግረዋል፡፡ በተቋሙ ላይ ስለመጡ ሪፎርሞችና ውጤቶች እዲሁም በአዲሱ የሲቪል ማኅበረሰብ ድርጅቶች አዋጅ 1113/2011 የበጎ ፍቃድ እና በጎ አድራጊነት በዓልን በሃገሪቱ እንዲጎለብት ከማድረግ አንጻር የተሰጡ ተግባርና ሃላፊነቶች እንዲሁም ከዚህ አንጻር የተከናወኑ ተግባራትን ም/ዋና ዳይሬክተሩ ለሰልጣኞች አብራርተዋል፡፡ በመጨረሻም ይህንን ፕሮግራም ላስተባበሩ አካላት እና ለቪኤስኦ /VSO/ ምስጋናቸውን አቅርበዋል፡፡ በመድረኩ በርካታ መነሻ ጽሑፎች ቀርበው ውይይት እየተደረገባቸው ይገኛል፡፡


የሲቪል ማኅበረሰብ ድርጅቶች ባለሥልጣን ከፍተኛ አመራርና ሰራተኞች ዓለም አቀፍ የሙስና መከላከል ቀንን አከበሩ፡፡

በዓለም አቀፍ ደረጃ ለ18ኛ ግዜ በኢትዮጵያ ለ 17ኛ ግዜ ‹‹በስነምግባር የታነፀ ከሙስና ለፀዳች ኢትዮጵያ›› በሚል መሪ ቃል ተከብሮ ውሏል ፡፡በፕሮግራሙ ላይ የዓለምአቀፍ ሁለንተናዊ ጫናን ለመቀነስ የተጀመረውን #NO MORE ወይም በቃ ንቅናቄን ተቀላቅለዋል፡፡ በዓሉን ምክንያት በማድረግ የመክፈቻ ንግግር ያደረጉት የሲቪል ማኅበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ ባስተላለፉት መልዕክት ሙስና ልማትን በማዳከም የሃገርን እድገት የሚያቀጭጭ፣ ሞራልና ስነምግባር ቀውስ እንዲባባስ የሚያደርግ፣ ሰላምና መረጋጋት እንዳይኖር ምክንያት የሆነ፣ ለፍትህ መጓደል ፣ለሰብዓዊ መብት ጥሰት እና ለተለያዩ ከፍተኛ አላስፈላጊ ጉዳቶች የሚዳርግ ወንጀል ነው ብለዋል፡፡ ሙስና በዋናነት በማደግ ላይ ያሉ ሃገሮች ላይ ከፍተኛ ውድመት የሚያስከትል መሆኑን በመግለጽ ሃገራችን ኢትዮጵያም የዚሁ ችግር ተጠቂ ነች ይህንን ችግር ከግንዛቤ ውስጥ በማስገባትና በሁሉም ደረጃ ሃላፊነት በመውሰድ ከሙስና የፀዳና ስነምግባር የተላበሰ ዜጋን ማፍራት ይጠበቅብናል ሲሉ ገልጸዋል፡፡

ተቋማችንን ከዚህ ብልሹ አሰራር በማፅዳት ሞዴል የሆነ የመንግስት ተቋም ለመገንባት መስራት ላይ ነን ያሉት ሃላፊው ሁላችሁም የተቋሙ አመራሮችና ባለሞያዎች የበኩላችሁን ሃላፊነት እንድትወጡ ጥሪዬን አስተላልፋለው በማለት ተናግረዋል ፡፡ የባለስልጣን መስሪያቤቱ ምክትል ዋና ዳይሬክተር አቶ ፋሲካው ሞላ በውይይቱ ወቅት እንደገለጹት በዓሉን ስናከብር በተቋማችን ውስጥ መነቃቃት ፈጥረን አሁን ሃገራችን ያለችበትን ሁኔታ በመገንዘብ ከሙስና የፀዳና ስነምግባር የተላበሰ ሁላችንም ተግተን መስራት እንድንችል ሁኔታዎችን መፍጠር አለብን ብለዋል ፡፡ እንዲሁም ለቃሉና ለህሊናው ታማኝ የሆነ አመራርና ባለሙያ እንዲኖርና እንዲፈጠር እንፈልጋለን በማለት በግንባር የሃገራችንን ጠላቶች ለማጥፋት ለሚዋደቁ የህግ አስከባሪዎች ሁላችንም ደጀን ልንሆናቸው ይገባል በማለት መልዕክታቸውን አስተላልፈዋል ፡፡ ሰነዱን የሲቪል ማህበረሰብ ድርጅቶች ባለስልጣን የስነምግባርና ሙስና መከታተያ ዳይሬክቶሬት ዳይሬክተር ወ/ሮ ትግስት አቡዬ አቅርበው ሰፊ ውይይት ተደርጎበታል፡: በመጨረሻም የሲቪል ማኅበረሰብ ድርጅቶች ባለስልጣን #NO MORE ወይም በቃ የሚለውን ንቅናቄ በመቀላቀል ሃገራችን ላይ የሚደረግ ማንኛውንም ዓይነት ጣልቃ ገብነት በቃ በማለት ድምፃቸውን አሰምተዋል ፡፡


ዓለማቀፍ የበጎ ፍቃደኞች ቀንን ከፓናል ውይይት በተጨማሪ ስለ እናት የበጎ አድራጎት ድርጅትን በመጎብኘት እና የቁሳቁስ ድጋፍ በማድረግ ተከብሯል፡፡

በጉብኝቱ የተቋሙ ዋና ዳይሬክተር እና ም/ዋና ዳይሬክተርን ጨምሮ የተለያዩ የሲቪል ማህበረሰብ ድርጅት ተወካዬች ተገኝተዋል፡፡ ፕሮግራሙ የተዘጋጀው የበጎ ፍቃድ ቀን ሲከበር ከንግግር በዘለለ በተግባር ሆኖ ለማሳየት መሆኑ ተገልጷል፡፡
ስለእናት የበጎ አድራጎት ድርጅት ‹‹የተሻለ የልጅነት ጊዜ ለሁሉም ህጻናት›› የሚል መሪ ቃል ያለሁ እና ህጻና ላይ በተለይም የአካል ጉዳት ያለባቸው ህጻናት ላይ የሚሰራ ሃገር በቀል ድርጅት ነው፡፡ ድርጅቱ ከተመሰረተ 20 ዓመታትን ያስቆጠረ ሲሆን በዚህ የአገልግሎት ቆይታ ብዙ ስኬቶችን እና ውጣ ውረዶችንም ማሳለፉን ከገለጻ ለመረዳ ተችሏል፡፡

ዋና ዳይሬክተር አቶ ጂማ ዲልቦ እንደገለጹት በዓለም ዓቀፍ የበጎ ፍቃደኞች ቀን ሲከበር ድርጅቱን በመጎብኘታቸው ደስተኛ መሆናቸውን በመግለጽ የሲቪል ማህበረሰብ ድርጅቶች ዘርፍ ለሃገር ልማት፣ዴሞክራሲ፣ሰላም እና መንግስት የማይሸፍናቸውን ዘርፎች ተደራሽ የሚያደርግ ዘርፍ መሆኑን አብራርተዋል፡: ከኩሶ ኢንተርናሽናል ድርጅት ጋር በጋራ በመሆን ለድርጅቱ የሚሆኑ የተለያዩ ቁሳቁሶችን ስናመጣ ፍቅራችንን ለመግለጽ እንጂ ለድርጅቱ የተለየ ለውጥ ያመጣል በሚል ያለመሆኑን አብራርተዋል፡፡ አያይዘውም ሃገር የምትቀጥለው በበጎ ፍቃደኞች ነው፡፡ ዛሬ የህይወት መስዋትነት እየከፈሉ ያሉት በበጎ ፍቃደኝነት እና ሃገር ወዳድነት ነው፡፡ ስለሆነም ኢትዬጵያ እንደ ሃገር ጥሪ እያደረገች ባለችበት በዚህ ወቅት ሁሉም አካል የድርሻውን ሊወጣ ይገባል ሲሉ መልዕክታቸውን አስተላልፈዋል፡፡


ዓለማቀፍ የበጎ ፍቃደኞች ቀን ‹‹በጎ ፍቃደኝነት ለመልካም ትውልድ ግንባታ›› በሚል መሪ ቃል ተከበረ፡፡

“የዓለም አቀፍ የበጎ ፍቃደኞች ቀን ስናከብር በመድረክም ሆነ በተለያዩ ሚዲያች የማናውቃቸው ነገር ግን ከእኛ በላይ ለሃገራቸው ሉዓላዊነት፣ አንድነት፣ ሰላምና መረጋጋት ማንም ሳያስገድዳቸው በበጎ ፍቃደኝነት አገራቸውንና ህዝባቸውን እያገለገሉ የሚገኙ በርካታ ልበ-ሙሉ ጀግኖቻችንን ልናመሰግናቸው ይገባል፡፡“ ክብርት ዶ/ር ኤርጎጌ ተስፋዬ

ዓለማቀፍ የበጎ ፍቃደኞች ቀን ‹‹በጎ ፍቃደኝነት ለመልካም ትውልድ ግንባታ›› በሚል መሪ ቃል እየተከበረ ይገኛል፡፡ ክብርት ዶ/ር ኤርጎጌ ተስፋዬ የኢ.ፌ.ዴ.ሪ የሴቶችና ማህበራዊ ጉዳይ ሚኒስቴር ሚንስትር በመክፈቻ ንግግራቸው እንደገለጹት ውዷ ሃገራችን ኢትዬጵያ በፈተና ውስጥ ብትገኝም በቁርጥ ቀን ልጇቿ አንድነትና ትብብር ሉዓላዊነቷን አስከብራ ወደ ከፍተና ብልጽግና መንገዷን ጀምራለች ፡፡ የእናት ጡት ነካሾችና ባንዳዎች አንገታችንን ለማስደፋት እና ውስጣዊ አንድነታችንና መቻቻላችን ለመሸርሸር ያለመውን እኩይ ዓላማ በቅርጥ ቀን ልጆቿ እየፈረሰ ይገኛል ብለዋ፡፡ በዚህ ዓይነት ስሜት ውስጥ ሆነን ‹‹በጎ ፍቃደኝነት ለመልካም ትውልድ ግንባታ›› በሚል መሪ ቃል የዓለም በጎ ፍቃደኝነት ቀን ማክበራችን ትልቅ እንድምታ ይኖረዋል የሚል እምነት አለኝ ምክንያቱም አገር የምትገነባው በስርዓት ታንጾ ባደገ ትውልድ እንዲሁም ቅን ልብ ፣በጎ አድራጊ ፣አስተዋይና ታታሪ ህዝቦች ነው ለዚህም ነው እኛም ይህን ቀን የምናከብረው ሲሉ አብራርተዋል፡፡

ሚኒስትሯ አክለውም እንደዛሬው አይነት የዓለም አቀፍ የበጎ ፍቃደኞች ቀን አጋጣሚዎችን ደግሞ እንደ ሃገር ለመደጋገፍ ለመረዳዳት ለመከባበር ውስጣዊ አንድነታችንን ለማጠናከር በጎ ፍቃደኞቻችንን ለማመስገንና ለማበረታታት ትልቅ አቅም ይሆናል ብዬ አስባለሁ ሲሉ ተናግረዋል፡፡ የዓለም አቀፍ የበጎ ፍቃደኞች ቀን ስናከብር በመድረክም ሆነ በተለያዩ ሚዲያች የማናውቃቸው ነገር ግን ከእኛ በላይ ለሃገራቸው ሉዓላዊነት፣ አንድነት፣ ሰላምና መረጋጋት ማንም ሳያስገድዳቸው በበጎ ፍቃደኝነት አገራቸውንና ህዝባቸውን እያገለገሉ የሚገኙ በርካታ ልበ-ሙሉ ጀግኖቻችን ልናመግናቸው ይገባል ሲሉ ገልጸዋል፡፡
በመጨረሻም የበጎ ፍቃድና በጎ አድራጊነት ባህል እንዲዳብር ሁላችንም በያገባኛል ስሜት ርብርብ እንድናደርግ በጎ ፍቃደኝነት ከዘመቻ ስራ ተላቆ በስርዓት፣በፖሊሲና በመዋቅር እንዲመራ ክትትልና ድጋፍ እንድታደርጉ እንድንተጋገዝ እየጠየቅኩ ይህንን ፕሮግራም ላስተባበረው የሲቪል ማህበረሰብ ድርጅቶች ባለስልጣንና ሌሎች አጋዥ ድርጅቶችን አመሰግናለሁ ብለዋል፡፡

የተቋሙ ዋና ዳይሬክተር ክቡር አቶ ጂማ ዲልቦ በበኩላቸው ባስተላለፉት መልዕክት ሀገራችን የገጠማትን የህልውና ዘመቻ በድል ለማጠናቀቅና በጦርነቱም ምክንያት የተፈናቀሉ ወገኖቻችንን ለመታደግ ከህይወት መስዋትነት ጀምሮ አስፈላውን የህይወት አድን ድጋፎችን በማድረግ ረገድ ዜጎች የሚመለከተውን ሁሉ አስተዋጽኦ በበጎ ፍቃደኝነት በማበርከት ላይ እንደሚገኝ ገልጸዋል፡፡

ይህንኑ የበጎ ፍቃደኝነት ባህል ለማዳበር ተከታታይነት ያለውና የማያቋርጥ ስራ መስራት ያስፈልጋል በተለይም ስራውን ተቋማዊ ማድረግና ዘርፉን በሚገባ የሚመራ የፖሊሲ ሰነድ በመንግስት እንዲጸድቅ ማድረግ ትኩረት ሊሰጠው የሚገባ አብይ ጉዳይ ነው ያሉ ሲሆን ፖሊሲው እስኪጸድቅ ድረስ ግን ይህንኑ ዘርፍ ሊመራ የሚችል ቮለንተሪዝም ፕሮሞሽን ኤንድ ማኔጅመንት ጋይዳንስ ኖት ከተባባሪ አካላት ጋር በማዘጋጀት ስራ ላይ እዲውል ተደርጓል ብለዋል:: በመጨረሻም የዘንድሮው ዓለማቀፍ የበጎ ፍቃደኞች ቀን ከሌላው ጊዜ በተለየ መልኩ ሀገራችን የገጠማትን የመፍረስ አደጋ የምንታደግበት ፣የተፈናቀሉ ወገኖቻችንን የምናቋቁምበት፣በጦርነቱ የወደሙ መሰረተ ልማቶችን አቅማችን በፈቀደው ሁሉ የምንገነባበት ክብረበዓል እንዲሆን በማለት መልዕክታቸውን አስተላልፈዋል፡፡ በፕሮግራሙ የተለያዩ ሰነዶች ቀርበው ውይይት ይደረግባቸዋል፡፡