የሲቪል ማህበረሰብ ድርጅቶች ባለስልጣን የ2015 በጀት ዓመት የዘጠኝ ወራት እቅድ አፈጻጸም ከባለፈው ዓመት ተመሳሳይ ወቅት ጋር ሲነጻጸር ከፍተኛ አፈጻጸም ማስመዝገቡ ተገለጸ፡፡
የሲቪል ማህበረሰብ ድርጅቶች ባለስልጣን የ2015 በጀት ዓመት የዘጠኝ ወራት እቅድ አፈጻጸም ከባለፈው ዓመት ተመሳሳይ ወቅት ጋር ሲነጻጸር ከፍተኛ አፈጻጸም ማስመዝገቡ ተገለጸ፡፡
የሲቪል ማህበረሰብ ድጅቶች ባለስልጣን የስራ ኃላፊዎች የዘጠኝ ወራት እቅድ አፈጻጸማቸውን የገመገሙ ሲሆን በዘጠኝ ወራት የእቅድ አፈጻጸም ሪፖርት እንደተመላከተው ባለስልጣን መስሪያ ቤቱ ካለፈው ተመሳሳይ የዘጠኝ ወራት አፈጻጸም ጋር ሲነጻጸር ከፍተኛ መሻሻል እንደታየበት ተገልጿል፡፡ የድርጅቶችን ምዝገባ በሚመለከት በዘጠኝ ወራት ውስጥ 474 አገር በቀል እና 43 የውጭ ድርጅቶች በድምሩ 517 ድርጅቶች መመዝገቡን እንዲሁም 161 ድርጅቶች በምዝገባ ሂደት ላይ የሚገኙ ሲሆን ካለፈው ተመሳሳይ ወቅት ጋር ሲነጻጸር በሃምሳ ድርጅቶች (50) አብላጫ እንዳለው ተገልጿል፡፡ ከዚህ በተጨማሪም ባለፉት ዘጠኝ ወራት ዳግም ምዝገባ ያደረጉ 100 ድርጅቶች ሲሆኑ በዳግም ምዝገባ ሂደት ላይ የሚገኙ ድርጅቶችም 58 መሆናቸው ተጠቁሟል፡፡
2113 ድርጅቶችን በዴስክ ኦዲት ለመድረስ እቅድ ተይዞ ባለፉት ዘጠኝ ወራት 2100 ድርጅቶች የዴስክ ኦዲት የተደረገላቸው ሲሆን ካለፈው ተመሳሳይ ወቅት ጋር ሲነጻጸር የ33.35 ከመቶ ብልጫ እንዳለው ያሳያል፡፡ በሪፖርቱ 20/80 ባላሟሉ ድርጅቶች ላይ ግብረመልስ ከመስጠት ጀምሮ የድርጅቶቹ ኃላፊዎች ቀርበው እንዲያስረዱ እንዲሁም የተጓደሉ ማስረጃዎችን እንዲያቀርቡ የሚያስገድዱ ርምጃዎች መወሰዳቸው ተገልጿል፡፡ በመስክ ክትትል የተደረገባቸው 389 ድርጅቶች ሲሆኑ ካለፈው ተመሳሳይ ወቅት ጋር ሲነጻጸር በ140 ድርጅቶች ብልጫ ያለው መሆኑ በሪፖርቱ ተመላክቷል፡፡ በጠቅላላው የመስክና የዴስክ ኦዲት ከተደረጉ 2,489 ድርጅቶች ውስጥ ለ1883 (75.65%) የሲቪል ማህበረሰብ ድርጅቶች ግብረ መልስ የተሰጠ ሲሆን ካለፈው በጀት አመት ተመሳሳይ ወቅት ጋር ሲነፃፀር በዚህ በጀት አመት በ995 (47.16%) ድርጅቶች ብልጫ እንዳለው ሪፖርቱ ያሳያል፡፡
በሪፖርቱ ጥሩ አፈጻጸም ታይቶባቸዋል ከተባሉባቸው አንኳር ጉዳዮች መካከል የሲቪል ማህበረሰብ ድርጅቶች አዋጅን መሰረት አድርገው በወጡ መመሪያዎች ላይ የተሰጡ የአቅም ግንባታ ስልጠናዎች፣ ከክልል እና ባለድርሻ እንዲሁም ከአጋር አካላት ጋር ትብብር መጠናከሩ፣ ከባለስልጣን መስሪያ ቤቱ ጋር በተያያዘ የዲጂታል ትራንስፎርሜሽን ሂደት ስኬታማ ሂደት ላይ መገኘቱ፣ እንዲሁም የተቋሙን ውስጣዊ የአፈጻጸም አቅምን ማጎልበት መቻሉ የሚጠቀሱ ናቸው፡፡ ከነዚህ በተጨማሪም የተገልጋይ እርካታ መሻሻል የታየበት እንደሆነና ብልሹ አሰራርንና የስነምግባር መጓደል የሚያስከትሉ ጉዳዮችን በሚመለከት ለተቋሙ ሰራተኞች የተለያዩ የግንዛቤ ማስጨበጫ ስልጠናዎች መሰጠታቸው እንደመልካም አፈጻጸም ከተነሱት ውስጥ የሚካተቱ ናቸው፡፡
የሲቪል ማህበረሰብ ድርጅቶች ባለስልጣን ዋና ዳይሬክተር ባለፉት ዘጠኝ ወራት የታዩ ስኬታማ አፈጻጸሞች ቀጣይነት እንዲኖራቸው እንዲሁም ክፍተት ናቸው ተብለው በሪፖርቱ የቀረቡ ጉዳዮች በቀጣዮቹ ሶስት ወራት እንዲቀረፉ በትጋትና በሙሉ አቅም መስራት እንደሚገባ አቅጣጫ ሰጥተዋል፡፡ በተለይም በሂደት ላይ ያሉ ስራዎች ሲጠናቀቁ የተቋሙን አፈጻጸም በእጅጉ የሚያሻሽሉ ስለሆነ ከምንግዜውም በላይ በትኩረት መስራት እንደሚጠበቅ ጠቁመዋል፡፡ የሲቪል ማህበረሰብ ድርጅቶች ባለስልጣን ምክትል ዋና ዳይሬክተር አቶ ፋሲካው ሞላ በበኩላቸው ባለስልጣን መስሪያ ቤቱ በሁለተኛው የለውጥ ሂደት ላይ እንደመገኘቱ ስኬታማ ስራዎቻችንን ማጽናት፤ ማላቅና በዲጂታል ትራንስፎርሜሽን ማገዝ ይገባናል ያሉ ሲሆን የታዩት አፈጻጸሞቻችን ጥሩ ናቸው በቀጣይ ግን የበለጠ ስኬታማ ለመሆን በትጋት መስራት እንደሚጠበቅ አንስተዋል፡፡
በኢትዮጵያ ለረጅም ጊዜ የቆዩ ቻይናውያን የሲቪል ማህበረሰብ ድርጅት አቋቁመው ማህበራዊ ሃላፊነታቸውን መወጣት እንደሚፈልጉ ገለጹ፡፡
በኢትዮጵያ ለረጅም ጊዜ የቆዩ ቻይናውያን የሲቪል ማህበረሰብ ድርጅት አቋቁመው ማህበራዊ ሃላፊነታቸውን መወጣት እንደሚፈልጉ ገለጹ፡፡
በተለያዩ ዘርፎች ላይ የሚሰሩ በርካታ ቻይናውያን በኢትዮጵያ የሲቪል ማህበረሰብ ድርጅት አቋቁመው መንቀሳቀስ እንደሚፈልጉ ከሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ ጋር ባደረጉት ውይይት ገልጸዋል፡፡ ውይይቱን ያደረጉት ከቻይና ኤምባሲ የመጡ የስራ ኃላፊዎችና ሩሎ ዴቨሎፕመንት ፋውንዴሽን የተባለ በቻይና ሀገር የሚንቀሳቀስ ድርጅት ኃላፊዎች ናቸው፡፡ በርካታ ድርጅቶች ወደ ኢትዮጵያ መጥተው መንቀሳቀስ ይፈልጋሉ፤ ሆኖም ግን የምዝገባ ሂደቱ ምን እንደሆነ በቂ መረጃ የለንም ያሉት ተወካዮቹ በተለይም ለረጅም ጊዜ በተለያዩ የስራ ዘርፎች ላይ ተሰማርተው የሚገኙ ቻይናውያን ማህበራዊ ኃላፊነታቸውን ለመወጣት የሲቪል ማህበረሰብ ድርጅት ማቋቋም ይይልጋሉ ብለዋል፡፡
የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ ለኤምባሲው ተወካዮችና ለሩሎ ዴቨሎፕመንት ፋውንዴሽን ሃላፊዎች ስለ የሲቪል ማህበረሰብ ድርጅቶች ምዝገባ እና አዋጅ ቁጥር 1113/2011 መሰረት በማድረግ ማሟላት ስለሚገባቸው ቅድመ ሁኔታዎች ማብራሪያ ሰጥተዋል፡፡ ድርጅቶች የማህበረሰቡን ፍላጎት መሰረት አድርገው እንዲሰሩ እንፈልጋለን በዚህ ረገድ ቻይናውያን በኢትዮጵያ የማህበረሰቡን ችግር መሰረት ያደረጉ ስራዎችን ስለሚሰሩ ትልቅ አክብሮት እንዳላቸው ገልጸዋል፡፡ ዋና ዳይሬክተሩ አክለውም ቻይናውያኑ በባለስልጣን መስሪያ ቤቱ መጥተው መመዝገብ የሚችሉ መሆኑን አንስተው ባለስልጣን መስሪያ ቤቱ ከቻይና ለሚመጡም ሆነ እዚሁ አገር ሆነው መመዝገብ ለሚፈልጉ አስፈላጊውን ትብብር ያደርጋል ብለዋል፡፡

የሲቪል ማኅበረሰብ ድርጅቶች ባለስልጣን CERFODES ከተባለው ዓለም አቀፍ አማካሪ ድርጅት ጋር የመግባቢያ የስምምነት ሰነድ ተፈራረመ ፡፡
የሲቪል ማኅበረሰብ ድርጅቶች ባለስልጣን CERFODES ከተባለው ዓለም አቀፍ አማካሪ ድርጅት ጋር የመግባቢያ የስምምነት ሰነድ ተፈራረመ ፡፡
የባለስልጣን መስርያቤቱ ዋና ዳይሬክተር አቶ ጂማ ዲልቦ ፣ምክትል ዋና ዳይሬክተር አቶ ፋሲካው ሞላና የተቋሙ ከፍተኛ አመራሮች በተገኙበት ከአማካሪው ድርጅት የስራ ሃላፊዎች ጋር ውይይት አድርጓል ፡፡ ቀደም ሲል የሲቪል ማህበረሰብ ድርጅቶች ባለስልጣን ከፈረንሳይ መንግስት የልማት ድርጅት (AFD) ጋር በመተባበር (To Strengthen the Institutional Capacity of ACSO) የሚል ፕሮጀክት በመቅረጽ የውጭ አማካሪ ድርጅቶችን የማወዳደር ስራ የተከናወነ ሲሆን በዚሁ መሰረት (CERFODES) ዓለም አቀፍ አማካሪ ድርጅት አሸናፊ መሆን ችሏል፡፡ ከአሸናፊ ድርጅቱ ጋር ውይይት የተደረገ ሲሆን በውይይቱም የተቋሙን አቅም ለመገንባት ፣ ለማዘመን እና በቀጣይ በጋራ መከናወን ስለሚገባቸው ጉዳዬች ውይይት በማድረግ የስራውን ማስጀመርያ የመግባቢያ ስምምነት ሰነድ ተፈራርመዋል፡፡

የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ የአየርላንድ አምሳደር ብሬናን ኒኮላን በጽህፈት ቤታቸው ተቀብለው አነጋግረዋል፡፡

የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ የአየርላንድ አምሳደር ብሬናን ኒኮላን በጽህፈት ቤታቸው ተቀብለው አነጋግረዋል፡፡
የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ የአየርላንድ አምባሳደር የሆኑትን አምባሳደር ብሬናን ኒኮላን በጽህፈት ቤታቸው ተቀብለው አነጋግረዋል፡፡ ዋና ዳይሬክተሩ ከአንባሳደር ብሬናን ጋር ባደረጉት ቆይታ የሲቪል ማህበረሰብ ድርጅተቶች ባለስልጣን የሲቪል ማህበረሰብ ድርጅቶች ዘርፍ እንዲጎለብት ያደረጋቸውን መጠነ ሰፊ ስራዎችን በሚመለከት ገለጻ አድርገውላቸዋል፡፡
የአየርላንድ መንግስት በሲቪል ማህበረሰብ ድጋፍ ፕሮግራም ሁለት በ(CSSPII) በኩል ዘርፉን በከፍተኛ ሁኔታ እየደገፈ እንደሚገኝና ይህም ለባለስልጣን መስሪያ ቤቱም ሆነ ለሲቪል ማህበረሰብ ድርጅቶች ትልቅ እገዛ እያደረገ እንደሚገኝ አንስተው ለዚህም የአየርላንድ መንግስት አስተዋጽዖ ከፍተኛ ምስጋና አቅርበዋል፡፡ባለስልጣን መስሪያ ቤቱ በቀጣይ ትኩረት ሰጥቶ የሚሰራባቸውን የምዕራፍ ሁለት ተቋማዊ የለውጥ አጀንዳዎችን የገለጹ ሲሆን በተለይም ስኬታማ ስራዎችን ማጽናት፣ ማላቅና ባለስልጣን መስሪያ ቤቱ የሚሰጣቸውን አገልግሎቶች በኢንፎርሜሽን ቴክኖሎጂ የታገዙ እንዲሆኑ ማድረግ ላይ በትኩረት እንደሚሰራ ገልጸዋል፡፡አያይዘውም በተቋሙ የሴቶችን ተሳትፎ በማሳደግ በአመራር ደረጃ ያላቸውን ተሳትፎ ሃምሳ ከመቶ ለማድረስ በትጋት እየሰራ እንደሚገኝ ገልጸው የአየርላንድ መንግስትም ድጋፉን አጠናክሮ እንዲቀጥል ጥሪ አቅርበዋል፡፡
የአየርላንድ አምባሳደር ብሬናን ኒኮላን በበኩላቸው የአየርላንድ መንግስት ከኢትዮጵያ ጋር የዲፐሎማሲ ግንኙነት ከጀመረ 30 ዓመታት እንዳስቆጠረ አንስተው በሰብዓዊ መብት፣ በሰላም ግንባታ እና በሴቶች መብት ላይ እንዲሁም ከሀገራዊ ምክክር ጋር በተያያዘ በርካታ ስራዎችን እየሰሩ እንደሚገኙ አንስተዋል፡፡
አዲሱ የሲቪል ማህበረሰብ ድርጅቶች አዋጅ ከወጣ በኋላ ዘርፉ ትልቅ መነቃቃትን እያሳየ እንደሚገኝ ያነሱት አምባሳደሯ ከበርካታ የሲቪል ማህበረሰብ ድርጅቶች ጋርም በቅርበት እየሰሩ እንደሚገኝ አንስተዋል፡፡
የሲቪል ማህበረሰብ ድርጅቶች ከግብር ነጻ አገልግሎት ስለሚያገኙበት ሁኔታ ውይይት ተደረገ፡፡
የሲቪል ማህበረሰብ ድርጅቶች ከግብር ነጻ አገልግሎት ስለሚያገኙበት ሁኔታ የተደረገ ውይይት

የሲቪል ማህበረሰብ ድርጅቶች ከግብር ነጻ አገልግሎት ስለሚያገኙበት ሁኔታ ውይይት ተደረገ፡፡
የሲቪል ማህበረሰብ ድርጅቶች ባለስልጣን ከሲቪል ማህበረሰብ ድርጅቶች ምክር ቤት ጋር በመተባበር የተለያዩ የመንግስት ተቋማት ተወካዮችና የሲቪለ ማህበረሰብ ድርጅቶች ኃላፊዎች በተገኙበት የሲቪል ማህበረሰብ ድርጅቶች ከታክስ ነጻ አገልግሎት ማግኘት ስለሚችሉበት ሁኔታ ውይይት አድርገዋል፡፡ በውይይቱ ላይ የሲቪል ማህበረሰብ ድርጀቶች ባለስልጣን ዋና ዳይሬክተር አቶ ጂማ ዲልቦን ጨምሮ በገንዘብ ሚንስቴር የፊሲካልና ፖሊሲ ጉዳዮች ዳይሬክቶሬት ዳይሬክተር አቶ ሙላይ ወልዱ ተገኝተዋል፡፡
የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ ድርጅቶች ዓላማቸውን ሳይስቱ የህብረተሰብን ጥቅም ማዕከል አድርገው እንዲሰሩ ሁለት መስረታዊ የሆኑ የክትትልና የድጋፍ ሥርዓቶች እንዳሉ አንስተው አንደኛው በሲቪል ማህበረሰብ ድርጅቶች ባለስልጣን ወይም በመንግስት በኩል የሚደረግ መንግስታዊ የክትትልና የድጋፍ ሥርዓት ሲሆን ሌላኛው በሲቪል ማህበረሰብ ድርጅቶች ምክር ቤት በኩል የሚደረግ የርስ በርስ የቁጥጥርና የድጋፍ ሥርዓት ነው ሲሉ ጠቅሰዋል፡፡
ሁለቱም የክትትልና የድጋፍ ሥርዓት ዋንኛ ዓላማ ማህበራዊ መስረት ያለው፤ በነጻነት የተደራጀ፤ በህብረተሰቡ ዘንድ ተዓማኒነትን ያተረፈ፤ የሕብረተሰቡን ሁለንተናዊ ተጠቃሚነት ያረጋገጠ፤ የዳበረ የሲቪል ማህበረሰብ ተፈጥሮ ማየት እንደሆነ የገለጹት የባለስልጣን መስሪያ ቤቱ ዋና ዳይሬክተር ከቅርብ ጊዜ ወዲህ የገንዘብ ሚኒስቴር የቀረጥ ነፃ አጠቃቀምን አስመልክቶ ካወጣው መመሪያ ቁጥር 942/2015 ጋር በተያያዘ የሲቪል ማህበረሰብ ድርጅቶች የአፋፃፀም ችግር እየገጠማቸው ስለመሆኑ በተለያዩ የምክክርና የውይይት መድረኮች ላይ ሲነሳ በመቆየቱና በርካታ ሪፖርቶችና ቅሬታዎች ጭምር ለባለስልጣን መስሪያ ቤቱ እየቀረበ በመሆኑ ይህንን ጉዳይ ማዕከል በማድረግ ጉዳዩ በቀጥታ ከሚመለከታቸው አካላት ጋር ውይይት በማድረግ የመፍትሄ አቅጣጫ የሚቀመጥበትን መንገድ ማመቻቸት አስፈላጊ ሆኖ በመገኘቱ የምክክር መድረኩ ሊዘጋጅ መቻሉን ገልጸዋል፡፡
የሲቪል ማህበረሰብ ድርጅቶች ምክር ቤት ዋና ዳይሬክተር አቶ ሄኖክ መለሰ በበኩላቸው በሰብአዊ ድጋፍና በልማት ላይ የሚሳተፉ ድርጅቶች የህብረተሰቡን ኑሮ ለማሻሻልና በአደጋ የተጎዱ ዜጎችን መልሶ በማቋቋም እንዲሁም ድንገተኛ አደጋ ሲከሰት የአስቸኳይ ግዜ ድጋፍ በማቅረብ ረገድ አይተኬ ሚና እንደሚጫወቱ እሙን ነው ፤ እነዚህ ድርጅቶች ለህብረተሰቡ የሚሰጡት አገልግሎት ክፍያ የሚጠየቅበት ወይም ትርፍ የሚገኝበት ስራ አይደለም፤ አገልግሎቶቹ ሰብአዊ ከመሆናቸው አንጻር ቁልፍ የንግድ መርህ የሆነውን ትርፍ የሚለውን ጽንሰ ሀሳብ እንደማይከተሉ አንስተዋል፡፡
ይህ አስራር በመላው ዓለም ስለሚታውቅ በርካታ ሀገሮች የሰብአዊ ድጋፍ ላይ ለሚሰሩ ድርጅቶች የቀረጥ ነጻ መብትን ጨምሮ በርካታ ማበረታቻዎችን ይሰጣሉ ያሉት ዋና ዳይሬክተሩ በሀገራችንም በተወሰነ መልኩ ይህ ድጋፍ እንደሚደረግ አስታውሰው ይህ ምክክር በቅርቡ በገንዘብ ሚኒስቴር በኩል በጸደቀው አዲስ መመርያ ቁጥር 942/2015 ላይ እና የመመርያውን አፈጻጸም ተከትሎ በተከሰቱ የአሰራር ችግሮች ላይ ሀሳብ ለመለዋወጥ የተዘጋጀ የተዘጋጀ መሆኑን ገልጸዋል፡፡
በባለስልጣን መስሪያ ቤቱ ምክትል ዋና ዳይሬክተር አቶ ፋሲካው ሞላ በመድረኩ መነሻ የውይይት ሃሳብ እንዲሁም አቶ ጎሳ ተፈራ በገንዘብ ሚንስቴር ቀጥታ ያልሆኑ ታክሶች ቡድን መሪ ከታክስ ነጻ የአገልግሎት አሰጣጥን በሚመለከት መነሻ ጽሑፍ አቅርበው ውይይት ተደርጎበታል፡፡
በገንዘብ ሚንስቴር የታክስ ፖሊሲ ዳይሬክቶሬት ዳይሬክተር አቶ ሙላይ ወልዱ ለቀረቡላቸው ጥያቄዎችና ማብራሪያዎች ምላሽ እና ማብራሪያ የሰጡ ሲሆን በተለይም መንግስት የሲቪል ማህበረሰብ ድርጅቶች ዘርፍ ዋነኛ የልማት አጋር እንደሆኑ ጠቅሰው ዘርፉን ሊያግዙና ሊደግፉ የሚችሉ በርካታ ምቹ የአሰራር ሁኔታዎች እንዳሉ ገልጸዋል፡፡
የሲቪል ማህበረሰብ ድርጅቶች ባለስጣን ከማሪ ስቶፕስ ኢንትርናሽናል ኢትዮጵያ ጋር በመተባበር ለተቋሙ ሴት ሰራተኞች በአመራር ክህሎት ላይ ስልጠና ሰጠ፡፡

የሲቪል ማህበረሰብ ድርጅቶች ባለስጣን ከማሪ ስቶፕስ ኢንትርናሽናል ኢትዮጵያ ጋር በመተባበር ለተቋሙ ሴት ሰራተኞች በአመራር ክህሎት ላይ ስልጠና ሰጠ፡፡
የሲቪል ማህበረሰብ ድርጅቶች ባለስልጣን ከማሪ ስቶፕስ ጋር በመተባበር ለተቋሙ ሴት ሰራተኞች በአመራር ጥበብና ስራ አመራር ክህሎት ዙሪያ ለተከታታይ ሁለት ቀናት የሚቆይ ስልጠና በመስጠት ላይ ይገኛል፡፡ በስልጠና መርኃግብሩ ላይ የተገኙት የባለስልጣን መስሪያ ቤቱ ዋና ዳይሬክተር አቶ ጂማ ዲልቦ እንዳሉት የሲቪል ማህበረሰብ ድርጅቶች ባለስልጣን ስኬታማና ምሳሌ የሚሆን ተቋም እንዲሆን የተለወጠ እና ተነሳሽነት ያለው የሰው ኃይል ያስፈልገዋል ለዚህም ከድርጅቶች ጋር መርህን መሰረት ባደረገ ግንኙነት ላይ ተመስርተን በትብብር ስልጠናዎችን እየሰጠን እንገኛለን ሲሉ ተናግረዋል፡፡
የሚሰጡ ስልጠናዎች ባለስልጣን መስሪያ ቤቱን ለመለወጥ የሚያስችልና ውጤቱም የሚበረታታ መሆኑን ያነሱት ዋና ዳይሬክተሩ የተለወጠና የነቃ የሰው ሃይል እንዲኖረን ራስን መለወጥና በራሳችን ላይ መስራት ያስፈልጋል ብለዋል፡፡
አክለውም ባለስልጣን መስሪያ ቤቱ በሴቶች ላይ ያልዋዠቀና የጸና ትልቅ እምነት አለው ያሉ ሲሆን የተሰጣቸውን ስራ በአግባቡ የሚወጡ ስኬታማ ሴት ሰራተኞች እንዳሉም ጠቅሰው ቁጥራቸው ከፍ እንዲልና ሙሉ አቅማቸውን እንዲያሳዩ እንፈልጋለን ብለዋል፡፡ ማሪ ስቶፕስ የሀገር ውስጥ ተወካይ ዶ/ር አበበ አሸብር በበኩላቸው ሴቶችን ውኃ በማይቋጥር ምክንያት ወደፊት እንዲመጡ ማድረግ ባለመቻላችን ብዙ ዋጋ አስከፍሎናል ያሉ ሲሆን ማሪ ስቶፕስ በቀጣዮቹ ሶስትና አምስት አመታት ሴቶችን ቢያንስ 50 ከመቶ ሴቶችን ወደአመራር ለማምጣት እየሰራን እንገኛለን ብለዋል፡፡ የሲቪል ማህበረሰብ ድርጅቶች ባለስልጣንን ለሴቶች የተመቸ የስራ አካባቢ ከማድረግ አንጻር ሴቶች ትልቅ ሚና አላቸው ያሉት ዶ/ር አበበ ይህ ስልጠና የሴቶችን ተደማጭነት ለማስፋት እንዲሁም እርስ በርስ የሚደጋገፉበትንና ወደፊት የሚመጡበትን አቅጣጫ የሚጠቁም እንደሆነ አንስተዋል፡፡ ስልጠናውን የሲቪል ማህበረሰብ ድርጅቶች ባለስልጣን ከማሪ ስቶፕስ ኢንተርናሽናል ጋር በጋራ የተዘጋጀ ሲሆን ሴተር ፎር ክርኤቲቭ ሊደርሽፕ (center for creative leadership) ደግሞ ስልጠናውን የሚሰጠው ተቋም ነው፡፡
የአማራ ብሔራዊ ክልላዊ መንግስት የሲቪል ማኅበረሰብ ድርጅቶች የሚተዳደሩበት ረቂቅ አዋጅ ለውይይት አቅርቧል፡፡
የአማራ ብሔራዊ ክልላዊ መንግስት የሲቪል ማኅበረሰብ ድርጅቶች የሚተዳደሩበት ረቂቅ አዋጅ ለውይይት አቅርቧል፡፡
የሲቪል ማህበረሰብ ድርጅቶች ባለስልጣን በአዋጅ 1113/2011 በተሰጠው ስልጣን መሰረት ክልሎች የሚጠቀሙባቸው አዋጆች እንዲያወጡና እንዲያፀድቁ ድጋፍ ሲያደርግ ቆይቷል፡፡ የአማራ ክልል የፍትሕ ቢሮ ምክትል ቢሮ ሃላፊ ዶ/ር አያሌው ቢሻው ከእንኳን ደህና መጣችሁ መልዕክታቸው በኋላ ባስተላለፉት መልዕክት የወጣው ረቂቅ ህጉ አሳሪ የሆኑ አሰራሮችን በማስተካከል ድርጅቶቹ ለማህበረሰቡ የላቀ አገልግሎቶችን እንዲሰጡ የሚያስችል መሆኑን አስረድተዋል። በውይይቱ ላይ የተገኙት የሲቪል ማህበረሰብ ድርጅቶች ባለስልጣን ምክትል ዋና ዳይሬክተር አቶ ፋሲካው ሞላ እንደገለፁት አዋጁ የሲቪል ማህበረሰብ ድርጅቶች ያነሷቸው የነበሩ ቅሬታዎችን ሊፈታ የሚችልና ዘርፈ ብዙ ተግባራትን በሀላፊነት እንዲያከናውኑ የሚያስችል ነው ብለዋል።
አያይዘውም ባለስልጣን መስሪቤቱ ከክልልና ከፌደራል ባለድርሻ አካላት ጋር በየአራት ወሩ በሚያደርገው ጉባኤ ላይ አምስት ክልሎች ባለስልጣኑ ከሚጠቀምባቸው አዋጆች ጋር ተመሳሳይ የሆኑ አዋጆችን አፅድቀው ወደ ስራ መግባታቸውን እንዳነሱ ገልጸዋል፡፡ የሲቪል ማህበረሰብ ድርጅቶች ለልማት፣ ለዴሞክራሲያዊ ስርዓት ግንባታ እና ለሀገረ መንግስት ግንባታ አጋር ናቸው ያሉት ምክትል ዋና ዳይሬክተሩ ለድርጅቶቹ ምቹ ሁኔታን መፍጠርና ድጋፍ ማድረግም ከመንግስት ይጠበቃል ሲሉ ተናግረዋል። በመጨረሻም የአማራ ክልል ፍትህ ቢሮ እና ፋይናንስ ቢሮ ረቂቅ አዋጁን በትኩረት ሰርተው በማዘጋጀታቸው ምስጋናቸውን አቅርበዋል፡፡

ሶስተኛ ዙር የሚዲያ ሃላፊዎች የመስክ ምልከታ የሐረር ካቶሊክ ሰርቪስ እና የDRA ስራዎችን በመመልከት ተጠናቋል፡፡
ሶስተኛ ዙር የሚዲያ ሃላፊዎች የመስክ ምልከታ የሐረር ካቶሊክ ሰርቪስ እና የDRA ስራዎችን በመመልከት ተጠናቋል፡፡
ከተለያዩ የመገናኛ ብዙኃን የተውጣጡ ሃላፊዎችና ባለሙያዎች የተሳተፉበት የመስክ ጉብኝት በድሬዳዋ፣ ሀረር እና ጅግጅጋ ለተከታታይ አምስት ቀናት ሲካሄድ ቆይቶ በስኬት ተጠናቋል፡፡ በጉብኝቱ በተለያዩ ዘርፎች ላይ የተሰማሩ ሀገር በቀልና የውጪ ድርጅቶች ስራዎቻቸውን ለሚዲያ አካላት ያስጎበኙ ሲሆን በተለይም በስደተኞችና ህጻናት ላይ፣ በኢኮኖሚ አቅም ግንባታ እና የስራ እድል ፈጠራ፣ ቁጠባ፣በውኃና በአካባቢ ጥበቃ፣ በትምህርትና መሰረተ ልማት እንዲሁም በጎዳና ህጻናት ጤናና ትምህርት ላይ የሚሰሩ የተለያዩ ፕሮጀክቶች በጉብኝቱ ተዳሰዋል፡፡
የጉብኝቱ ማጠቃለያ በጅግጅጋ ከተማ ሲካሄድ የክልሉ ፋይናንስ ቢሮ ምክትል ቢሮ ሀላፊ አቶ ሙሁዲን እንዲሁም የኢትዮጵያ መገናኛ ብዙኃን ባለስልጣን ምክትል ዋና ዳይሬክተር አቶ ዮናታን ተስፋዬ ተገኝተዋል፡፡ የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ እንደገለጹት በዚህ የመገናኛ ብዙኃን ባለሙያዎች የመስክ ምልከታ ከሌላው ጊዜ በተለየ የተለያዩ የመንግስት ኃላፊዎችን አሳትፈን ስኬታማ ጉብኝት አድርገናል ያሉ ሲሆን በተለይም የሲቪል ማህበረሰብ ድርጅቶች ከሪፖርት ባለፈ በማህበረሰቡ ውስጥ የሚያከናውኗቸውን ተግባራት እንዲመለከቱና ተገንዝበው ለማህበረሰቡ ግንዛቤ እንዲፈጥሩ ጠይቀዋል፡፡ ከእኛ የተሻለ የዚህችን ሀገር ችግር ሊፈታ የሚችል የለም ያሉት ዋና ዳይሬክተሩ በትብብር መስራት እንዲሁም ማህበረሰቡን ታች ድረስ ወርዶ ማገልገል ትልቅ ስኬት መሆኑን አንስተዋል፡፡ ለዚህም የታዩት ፕሮጀክቶች ትልቅ ማሳያ እንደሚሆኑ አንስተው ሚዲያውም ቀረብ ብሎ ለህዝብ ማስተዋወቅ ይጠበቅበታል ሲሉ ተናግረዋል፡፡
አያይዘውም የሲቪል ማህበረሰብ ድርጅቶች ባለስልጣን ዘርፉ በተሻለ ቁመና ላይ እንዲገኝ በርካታ ጥረቶችን እያደረገ እንደሚገኝ አንስተው ዘርፉ ለሀገር ልማትና እድገት ከዚህ በተሻለ ውጤታማ ስራ እንዲሰራ ሚዲያው ሊያግዝ ይገባል ብለዋል፡፡ የሲቪል ማህበረሰብ ድርጅቶች ምክር ቤት ዋና ዳይሬክተር አቶ ሄኖክ መለሰ በበኩላቸው በሲቪል ማህበረሰብ ድርጅቶች እና በመንግስት መካከል ሰፊ መጠራጠሮች እንደነበሩ አንስተው አሁን ግን ከምንግዜውም በላይ ተቀራርበን እየሰራን ነው ሲሉ ገልጸዋል፡፡ በሲቪል ማህበረሰብ ድርጅቶች ባለስልጣንና በሲቪል ማህበረሰብ ድርጅቶች ምክር ቤት መካከል ጠንካራ ግንኙነት በመኖሩ በርካታ ስራዎች እየተሰሩ መሆኑን አንስተው የሚዲያ ተቋማትም ከምክር ቤቱ እና ከባለስልጣን መስሪያ ቤቱ ጋር በጋራ በመስራት የሲቪል ማህበረሰብ ዘርፉን የሚመለከቱ መርኃ ግብሮችን በመቅረጽ በሚኖራቸው ፕሮግራም ላይ ቢያካትቷቸው የሚል መልዕክት አስተላልፈዋል፡፡ የሶማሌ ብሄራዊ ክልላዊ መንግስት የፋይናንስ ቢሮ ምክትል ቢሮ ሃላፊ አቶ ሙሁዲን ባስተላለፉት መልዕክት የመገናኛ ብዙኃን ትክክለኛ መረጃ ለህብረተሰቡ ማድረስ እንደሚጠበቅባቸው አንስተው በተለይ ማህበረሰቡ በርካታ ስራዎች እንዲሰሩለት ይፈልጋል፤ ይህንንም ባለንበት ቦታ ሁሉ በኃቀኝነትና ህብረተሰቡን ሊጠቅም በሚችል መንገድ ልንሰራ ይገባል ብለዋል፡፡
የመገናኛ ብዙኃን ኃላፊዎችና ባለሙያዎች በተመለከቱት የሲቪል ማህበረሰብ ድርጅቶች እንቅስቃሴ መደሰታቸውን ገልጸው ከፕሮጀክት ዘላቂነት እና አሳታፊነት፣ ከአሰራር ስርዓት፣ ከፕሮጀክት አተገባበር፣ ከመገናኛ ብዙኃን ጋር ስላለ ግንኙነት፣ መረጃን ለህዝብ ከማድረስ፣ ስለሲቪል ማህበረሰብ ድርጅቶች የክትትል ስርዓት ጋር በተያያዘ እንዲሁም ግንዛቤን ከመፍጠር ጋር የተያያዙ በርካታ ጥያቄዎችን አንስተው በሃላፊዎቹ ምላሽ ተሰጥቶባቸዋል፡፡
3ኛ ቀኑን የያዘው የሚዲያ አካላት የመስክ ጉብኝት እንደቀጠለ ነው፡፡


በሲቪል ማህበረሰብ ድርጅቶች ባለስልጣን እና በሲቪል ማህበረሰብ ድርጅቶች ምክር ቤት የጋራ ትብብር እየተካሄደ የሚገኘው የሚዲያ አካላት የመስክ ጉብኝት 3ኛ ቀኑን ይዟል፡፡
የሚዲያ ቡድኑ በ3ኛ ቀን የመስክ ምልከታው አዎንታዊ ምላሽ ለልማት (PAD) የተባለ ሀገር በቀል የሲቪል ማህበረሰብ ድርጅት በታዳሽ ሃይል ላይ ወጣቶችን አሰልጥኖና አደራጅቶ እየሰራ የሚገኘውን ስራ እንዲሁም ዎርልድ ቪዥን (world vision) የተባለ የውጭ የሲቪል ማህበረሰብ ድርጅት በትምህርት፣ በአካባቢ ጥበቃ እንዲሁም በቁጠባ ማህበረሰቡ ተጠቃሚ እንዲሆን ያከናወናቸውን ተግባራት ተመልክቷል፡፡ ጉብኝቱ የተካሄደው በምስራቅ ሀረርጌ ዞን መልካ ጀልዱ ቀበሌ እንዲሁም በአወዳይ ከተማ እና በሀረሪ ክልል ሃኪም ጋራ ላይ በዎርልድ ቪዥን ኢትዮጵያ እየተሰሩ የሚገኙ ስራዎች የታዩ ሲሆን በእነዚህ ቦታዎች በተለይም በጃርሶ አካባቢ ፕሮግራም 72.523 እና በቡርቃ ኢኒሼቲቭ ፕሮጀክት 54.984 የማህበረሰብ ክፍሎችን እንዲሁም አዎንታዊ ምላሽ ለልማት (PAD) በተባለው ሀገር በቀል የሲቪል ማህበረሰብ ድርጅት በአወዳይ ከተማ ደረቅ ቆሻሻን መልሶ ጥቅም ላይ የማዋል ስራ ላይ ለተሰማሩ በሁለት ማህበራት ለተደራጁ 60 ከስደት ተመላሽ የማህበረሰብ ክፍሎች ቋሚ የስራ እድል በመፍጠር በቀጥታ ተጠቃሚ እንዲሆኑ ማድረግ የቻሉ ፕሮጀክቶች ናቸው፡፡ በጉብኝቱ ላይ የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ በድርጅቶቹ ስራዎች መደሰታቸውን ገልጸው መንግስት፣ የግሉ ዘርፍ እና የሲቪል ማህበረሰብ ድርጅቶች ዘርፍ በቅንጅት ሲሰሩ ለሀገር ልማትም ሆነ ለህብረተሰቡ የላቀ ተጠቃሚነት ትልቅ አስተዋጽዖ እንዳለው የቡርቃ ኢኒሼቲቭ ፕሮጀክት ትልቅ ማሳያ እንደሚሆን ገልጸዋል፡፡ የሲቪል ማህበረሰብ ድርጅቶች ምክር ቤት ዋና ዳይሬክተር አቶ ሄኖክ መለሰ በበኩላቸው በመልካ ጅልዱ ትምህርት ቤት እንዲሁም በሀኪም ጋራ የተሰሩ ማህበረሰቡን ተጠቃሚ ያደረጉ ፕሮጀክቶች ማህበረሰቡን ያሳተፉ መሆናቸው እና ውጤታማ እንደሆኑ መመልከታቸውን ጠቅሰው የፕሮጀክቶቹ ዘላቂነት ለማስቀጠል ድርጅቶቹ የሄዱበት የአሳታፊነት መንገድ እጅግ የሚበረታታ መሆኑን ጠቅሰዋል፡፡
ሶስተኛ ዙር የሚዲያ ምልከታ በድሬደዋ፣ሐረር እና ጂግጂጋ ብሔራዊ ክልላዊ መንግስት እየተካሄደ ይገኛል፡፡

ሶስተኛ ዙር የሚዲያ ምልከታ በድሬደዋ፣ሐረር እና ጂግጂጋ ብሔራዊ ክልላዊ መንግስት እየተካሄደ ይገኛል፡፡
በሲቪል ማህበረሰብ ድርጅቶች ባለስልጣንና በሲቪል ማህበረሰብ ድርጅቶች ምክር ቤት የጋራ አዘጋጅነት የሚዲያ አካላት የመስክ ምልከታ በመካሄድ ላይ ይገኛል፡፡ የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ ለሚዲያ ተቋማት ሃላፊዎች የእንኳን ደህና መጣችሁ ንግግር ባደረጉበት ወቅት እንደገለጹት ማህበረሰቡ ውስጥ ስለ የሲቪል ማህበረሰብ ድርጅቶች የተለያዩ እሳቤዎች መኖራቸውን ገልጸው ጥሩውን ከመጥፎው የመለየትና ህብረተሰቡ ስለዚህ ዘርፍ ትክክለኛ ግንዛቤ እንዲኖረው በማድረግ ሂደት ውስጥ ሚዲያ ከፍተኛ ሚና እንዳለው ተናግረዋል፡፡
አክለውም ከለውጡ በኋላ እንደ የሲቪል ማህበረሰብ ድርጅቶች ሁሉ ለሚዲያ ዘርፉም መንግስት ልዩ ትኩረት በመስጠት የህግና የአሰራር ማሻሻያዎች ማድረጉን አንስተው ከዚህ የተነሳ በዴሞክራሲ ሥርዓት ግንባታ፣ በመልካም አስተዳደር፣ በሰብአዊ መብት አያያዝ፣ ሙስናንና ብልሹ አሰራሮችን ከመዋጋት አኳያ ሚዲያና የሲቪል ማህበረሰብ ድርጅቶች የበኩላቸውን አስተዋኦ በማበርከት ላይ ይገኛሉ ከዚህ የበለጠም እንዲያበረክቱ ይጠበቃል ሲሉ ገልጸዋል፡፡ የሀሳብ ብዝሃነት እንዲዳብር፤ ፖለቲካዊና አገራዊ ችግሮች በሠላማዊ መንገድ እንዲፈቱ፤ በውይይትና በምክንያታዊነት የሚያምን ትውልድ እንዲፈጠር በተለይ ሚዲያ አይተኬ ሚና እንዳለው በመግለጽ ማህበረሰባችን በመረጃ እጦት ወይም በተዛባ መረጃ ምክንያት ለችግር እንዳይጋለጥ የበኩላችሁን አስተዋጽኦ እንድትወጡ በዚሁ አጋጣሚ አደራ ለማለት እወዳለሁ ሲሉ ዋና ዳይሬክተር አቶ ጂማ ዲልቦ መልዕክታቸውን አስተላልፈዋል፡፡ የመስክ ምልከታው በድሬደዋ አስተዳደር የሚንቀሳቀሱትን አዎንታዊ ምላሽ ለልማት (PAD) እና ቸሻየር ኢትዮጵያ የተባሉ ሁለት ሀገር በቀል ድርጅቶችን እንዲሁም በሶማሌ ብሄራዊ ክልል ሽንሌ ወረዳ ኢንተርናሽናል ሬስኪዩ ኮሚቴ (IRC) የተባለ የውጪ ድርጅት እያደረገ የሚገኘውን የስራ እንቅስቃሴ በመመለልከት ተጀምሯል፡፡ ከመስክ ምልከታው አስቀድሞ የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ በባለስልጣን መስሪያ ቤቱ ባለፉት 4 አመታት የተሰሩ የለውጥ ስራዎችን እንዲሁም በዘርፉ የታዩ መሻሻሎችን በሚመለከት ገለጻ አድርገዋል፡፡ የሲቪል ማህበረሰብ ድርጅቶች ምክርቤት ዋና ዳየሬክተር አቶ ሄኖክ መለሰ በበኩላቸው የሲቪል ማህበረሰብ ድርጅቶች ምክር ቤትን በሚመለከት ለተሳታፊዎች ገለጻ ያደረጉ ሲሆን ከመገናኛ ብዙኃን ባለሙያዎች ለተነሱላቸው ጥያቄዎችና አስተያየቶች በጋራ ምላሽ ሰጥተዋል፡፡
ምልከታ የተደረገባቸው ድርጅቶች በስደተኞች፣በእናቶች፣ ህጻናት ፣ውሃ፣ በስራ እድልና አቅም ግንባታ እንዲሁም በአካል ጉዳተኞች ላይ የሚሰሩ ድርጅቶች ናቸው፡፡ ቡድኑ በቀጣይ ሶስት ቀናት በሀረሪ ብሄራዊ ክልል እንዲሁም በሶማሌ ብሄራዊ ክልሎች የሚንቀሳቀሱ የሲቪል ማህበረሰብ ድርጅቶችን የስራ እንቅስቃሴ የሚመለከቱ ይሆናል፡፡ ለሦስተኛ ጊዜ የተዘጋጀው የሚዲያ ምልከታ የሲቪል ማህበረሰብ ድርጅቶችን ስራ በማስተዋወቅ የዘርፉን ሚና ለማጎልበትና የሁለቱን ተቋማት ተግባርና ሃላፊነት ለሚዲያ አካላት ማስተዋወቅ ነው፡

















