በምክትል ዋና ዳይሬክተር አቶ ፋሲካው ሞላ የሚመራ ልዑካን ቡድን በባንግላዴሽ ሃገር የልምድ ልውውጥ በማድረግ ላይ ይገኛል፡፡

በምክትል ዋና ዳይሬክተር አቶ ፋሲካው ሞላ የሚመራ ልዑካን ቡድን በባንግላዴሽ ሃገር የልምድ ልውውጥ በማድረግ ላይ ይገኛል፡፡

በCSSP2 ድጋፍ የተዘጋጀው የልምድ ልውውጥ ላይ ከተቋሙ ም/ዋና ዳይሬክተር በተጨማሪ ከተለያዩ ክልሎች የተውጣጡ ዘርፉን የሚመሩ ሃላፊዎች ተሳታፊ ሆነዋል፡:
ልዑካን ቡድኑ ባንግላዴሽ የሲቪል ማህበረሰብ ድርጅቶችን የሚመዘግብና የሚቆጣጠር ተቋማት ጋር ውይይት ያደረገ ሲሆን ከዚህ በተጨማሪ የተለያዩ የሲቪል ማህበረሰብ ድርጅቶች የሚያከናውኗቸውን ተግባራት ተመልክተዋል፡፡
በልምድ ልውውጡ ወቅት ምክትል ዋና ዳይሬክተር አቶ ፋሲካው ሞላ በ ኢትዮጵያ ከ2018 ጀምሮ በዘርፋ በርካታ የህግና የአሰራር ሪፎርም መደረጉን እና በዘርፉም ከዚህ ረገድ ለውጦች እየተመዘገቡ መምጣታቸውን አስረድተዋል፡፡
አሁን ያለውን ለውጥ ለማስቀጠልና ዘርፉን የበለጠ ለማሳደግ የሌሎች ሃገራት ተሞክሮን ለመውሰድ የክልል አስፈጻሚ አካላትን ያካተተ የልምድ ልውውጥ በባንግላዴሽ ሃገር ማድረግ ማስፈለጉን አያይዘው ገልጸዋል፡፡


ሶስተኛው የሲቪል ማህበረሰብ ድርጅቶች ሳምንት ዛሬ ተጠናቋል፡፡

ሶስተኛው የሲቪል ማህበረሰብ ድርጅቶች ሳምንት ዛሬ ተጠናቋል፡፡

በአዲስ አበባ ጊዮን ሆቴል ሲካሄድ የቆየው ሶስተኛው የሲቪል ማህበረሰብ ድርጅቶች ሳምንት ዛሬ የተጠናቀቀ ሲሆን በማጠቃለያ ፕሮግራሙ የትምህርት ሚኒስቴር ሚኒስትሩ ፕሮፌሰር ብርሃኑ ነጋን ጨምሮ በርካታ እንግዶች ተሳታፊ ሆነዋል፡፡
በመድረኩ መልዕክት ያስተላለፉት ሃላፊዎች የሲቪል ማህበረሰብ ድርጅቶች ሳምንት አስፈላነትና በቀጣይ ድርጅቶቹ ተጠናክረው ስለሚሰሩበት ጉዳይ ተናግረዋል፡፡
በሶስት ቀናት ቆይታ የተለያዩ ርዕሰ ጉዳዬች በፓናል ውይይት የተዳሰሱ ሲሆን ከዚህ በተጨማሪ የሲቪል ማህበረሰብ ድርጅቶች ለበርካታ ጎብኚዎች ስራቸውን ማስተዋወቃቸውን ገልጸዋል፡፡
በየዓመቱ የሚካሄደው ይህ የሲቪል ማህበረሰብ ድርጅቶች ሳምንት ዓላማ የሲቪል ማህበረሰብ ድርጅቶች የሚያከናውኗቸውን ተግባራት ለማህበረሰቡ ማስገንዘብ እና ከተለያዩ ባለድርሻ አካላት ጋር ቅንጅታዊ አሰራሮችን ለማጎልበት ያለመ ነው፡፡


የትግራይ ክልልን መልሶ በማቋቋም ሂደት የሲቪል ማህበረሰብ ድርጅቶች የሚጠበቅባቸውን እንዲወጡ አስፈላጊ ድጋፍ ሁሉ ይደረጋል ሲሉ ዋና ዳይሬክተር አቶ ጂማ ዲልቦ ገለጹ፡፡

የትግራይ ክልልን መልሶ በማቋቋም ሂደት የሲቪል ማህበረሰብ ድርጅቶች የሚጠበቅባቸውን እንዲወጡ አስፈላጊ ድጋፍ ሁሉ ይደረጋል ሲሉ ዋና ዳይሬክተር አቶ ጂማ ዲልቦ ገለጹ፡፡

ዋና ዳይሬክተር አቶ ጂማ ዲልቦ በAssociation of CSOs in Tigray አስተባባነት በትግራይ ክልል ከሚገኙ የሲቪል ማህረሰብ ድርጅቶች ጋር ውይይት አድርገዋል፡፡
በውይይቱ 90 በመቶ የሚሆነው የማህበረሰብ ክፍል የሰብዓዊ እርዳታ ተጠቃሚ መሆኑን እና ከ2ሚሊየን በላይ የሀገር ውስጥ ተፈናቃዮች በክልሉ እንደሚገኙ ተገልጷል፡፡
Association of CSOs in Tigray ኤክስክዩቲቭ ዳይሬክተር አቶ ያሬድ በትግራይ ክልል ስላለው ነባራዊ ሁኔታ ሲያብራሩ ሲማዶች ጦርነቱ እንዲቆምና ሰብዓዊ ድጋፍ እንዲደርስ ጥረት ሲያደርጉ መቆየታቸውን ገልጸው በክልሉ ያሉ የሲቪል ማህበረሰብ ድርጅቶች ወደቀደመው ስራቸው እንዲመለሱ ከሲቪል ማህበረሰብ ድርጅቶች ባለስልጣን እና ከሲቪል ማህበረሰብ ድርጅቶች ምክር ቤት አፋጣኝ ድጋፍ እንደሚሹ ገልጸዋል፡፡
በውይይቱ በተነሱ ርዕሰ ጉዳዬች ላይ ምላሽ የሰጡት ዋና ዳይሬክተር አቶ ጂማ ዲልቦ እንደገለጹት በጦርነቱ ምክንያት ሪፖርት ባላቀረቡ ድርጅቶች ላይ የስረዛ ውሳኔ አለመውሰዱ እና በቂ ጊዜ አግኝተው የሚጠበቅባቸውን እንዲያደርጉ ሁኔታዎች እየተመቻቹ ስለመሆኑ፤ ከሰላም ስምምነቱ በኋላ የባንክ ሂሳብ መክፈት እና የፈራሚ ለውጦች መደረጉ፤በክልሉ ለሚገኙ ሲማዶች በአዋጅና መመሪያዎች ላይ በቅርቡ ስልጠና እንደሚሰጥ፤ተቋሙ ከሲቪል ማህበረሰብ ድርጅቶች ምክር ቤት ጋር በመተባበር በአዲስ አበባ እና በክልሉ ሰፋፊ የውይይት መድረኮች እንደሚዘጋጁ እና በአጠቃላይ ክልሉን መልሶ በማቋቋም ሂደት ሲማዶች የሚጠበቅባቸውን እንዲወጡ አስፈላጊ ድጋፍ ሁሉ እንደሚደረግ ተናግረዋል፡፡
የጊዜያዊ አስተዳደር ም/ፕሬዚዳንት ጄኔራል ጻድቃን ገ/ተንሳይ በበኩላቸው ሲማዶች የሰላም ስምምነቱ ዘላቂ እንዲሆን እና የሽግግር ፍትሁ ውጤታማነት ከፍተኛ ሚና እንዳላቸው ገልጸው ሕዝቡ ለከፍተኛ ጉዳት የተጋለጠ በመሆኑ ድጋፉ ተጠናክሮ መቀጠል አለበት ሲሉ መልዕክታቸውን አስተላልፈዋል፡፡
በመጨረሻም በመቀሌ ቅርብ ርቀት በሚገኘው ሰባካ የስደተኞች ካምፕና በመቀሌ ከተማ ዐዲ ሃቂ ት/ቤት ውስጥ የሀገር ውስጥ ተፈናቃዮች /IDPs/ በአካል በመገኘት ተመልክተዋል፡፡


ኦርጋናይዜሽን ፎር ሰስተነብል ዴቬሎፕመንት (Organization for sustainable Development) በአፋር ክልል ለተፈናቀሉ የማህበረሰብ ክፍሎች መልሶ ማቋቋሚያ የሚውል ድጋፍ አደረገ ፡፡

ኦርጋናይዜሽን ፎር ሰስተነብል ዴቬሎፕመንት (Organization for sustainable Development) በአፋር ክልል ለተፈናቀሉ የማህበረሰብ ክፍሎች መልሶ ማቋቋሚያ የሚውል ድጋፍ አደረገ ፡፡

ኦርጋናይዜሽን ፎር ሰስተነብል ዴቬለሎፕመንት (Organization for sustainable Development) የተባለ ሀገር በቀል የሲቪል ማህበረሰብ ድርጅት በሲቪል ማህበረሰብ ድርጅቶች ባለስልጣን በሰርተፍኬት ቁጥር 2319 ተመዝግቦ በመንቀሳቀስ ያለ ድርጅት ሲሆን በአካባቢ ጥበቃ ፣በጤና፣ ትምህርትና አቅም ግንባታ ላይ መሰረት በማድረግ ይሰራል፡፡
ቀደም ሲል በሀገራችን ተከስቶ በነበረው ግጭት ከተለያዩ አካባቢዎች ለተፈናቀሉ የማህበረሰብ ክፍሎች መልሶ ማቋቋሚያ የሚውል ለአንድ ሺ አምስት መቶ አባወራ የማብሰያ ቁሳቁሶችን፣ አልባሳትን፣ምግብና ምግብ ነክ የሆኑ ቁሳቁሶችን፣የብሎኬት ማምረቻ ማሽንን ጨምሮ የልብስ ስፌት ማሽን ድጋፍ አድርጓል፡፡
በፕሮግራሙ ላይ በሲቪል ማህበረሰብ ድርጅቶች ባለስልጣን የሲቪል ማህበረሰብ ድርጅቶች ድጋፍና አገልግሎት መሪ ስራ አስፈጻሚ አቶ ብርሃኑ አባተን ጨምሮ የባለስልጣን መ/ቤቱ የስራ ሃላፊዎች ፣የአፋር ክልል ፋይናንስ ቢሮ ሃላፊዎችና የኦርጋናይዜሽን ፎር ሰስተነብል ዴቬለሎፕመንት (Organization for sustainable Development) የቦርድ ዓባላትና የስራ ሃላፊዎች ተገኝተዋል፡፡
ከድጋፍ መርኃ ግብሩ ጎን ለጎን ድርጅቱ በአፋር ክልል አሳኢታ ከተማ የገነባውን የጭስ አልባ ከሰል ማምረቻ ፕሮጀክት ለተሳታፊዎች ያስጎበኘ ሲሆን በዚህ ፕሮጀክት ከሃምሳ በላይ ለሚሆኑ ስራ አጥ ወጣቶች የስራ እድል መፍጠር የቻለ መሆኑ ተገልጿል፡፡
የድርጅቱ መስራችና ዋና ስራ አስኪያጅ አቶ መሃመድ አህመድ ድርጅቱን በሚመለከት ባደረጉት ገለጻ ወጣቶቹ ራሳቸውን እንዲችሉ ለማድረግ ማሽኖችን ከውጭ ሀገር በማስመጣት የስልጠና እና የግብዓት ድጋፍ አድርገንላቸዋል ብለዋል ፡፡
የድርጅቱ የቦርድ ሰብሳቢ አቶ ሁንልኝ ጥጋቡ በበኩላቸው ድርጅቱ በልማቱ ማህበረሰቡን ተጠቃሚ ለማድረግ በርካታ ፕሮጀክቶችን ቀርጾ እየተንቀሳቀሰ መሆኑን በመናገር በይበልጥ በአፋር ክልል ወጣቱን ተጠቃሚ የሚያደርጉ ፕሮጀክቶችን ጨምሮ በአካባቢ ጥበቃ ላይ ሰፋ ያለ ስራ እየሰራ እንደሚገኝ ተናግረዋል፡፡ አክለውም ፕሮጀክቱን በተጠናከረ መልኩ ለማስኬድና ከክልሉ ጋር በጋራ ተናቦ ለመስራት ተገቢው ድጋፍ ሊደረግ ይባል ሲሉ ገልጸዋል፡፡
በሲቪል ማህበረሰብ ድርጅቶች ባለስልጣን የሲቪል ማህበረሰብ ድርጅቶች ድጋፍና አገልግሎት መሪ ስራ አስፈጻሚ አቶ ብርሃኑ አባተ በበኩላቸው ድርጅቱ ስላደረገው ድጋፍ አመስግነው ድርጅቱ የሚሰራቸው ፕሮጀክቶች ዘላቂነት እንዲኖራቸው ከክልሉ አስፈጻሚ አካላት ጋር በቅንጅት መስራት እንደሚጠበቅበት እንዲሁም ከማህበረሰቡ ጋር በማስተሳሰር ዘላቂነቱ ላይ ትኩረት ሊደረግ እንደሚገባ ጠቁመዋል፡፡


ሀገራችን የማደግና የመልማት ህልሞቿን ለማሳካት እንደ አንድ የኢኮኖሚ ተዋናይ ከተቀበለቻቸው መካከል አንዱ የሲቪል ማህበረሰብ ዘርፍ ነው ተባለ፡፡

ሀገራችን የማደግና የመልማት ህልሞቿን ለማሳካት እንደ አንድ የኢኮኖሚ ተዋናይ ከተቀበለቻቸው መካከል አንዱ የሲቪል ማህበረሰብ ዘርፍ ነው ተባለ፡፡

ቤዛ ፖስቴሪቲ ዴቬሎፕመንት ኦርጋናይዜሽን የተባለ የሲቪል ማህበረሰብ ድርጅት በሀገረ መንግስት ግንባታና ተያያዥ ጉዳዮች ላይ ለሦስት ቀናት የሚቆይ ግንዛቤ ማስጨበጥ ስልጠና በመስጠት ላይ ነው፡፡
በስልጠናው ላይ በክብር እግድነት የተገኙት የሲቪል ማህበሰብ ድርጅቶች ባለስልጣን ዋና ዳይሬክተር አቶ ጂማ ዲልቦ እንደተናገሩት ሀገራችን ኢትዮጵያ ከዚህ ቀደም ዘርፉን በተመለከተ በተከተለችው የተሳሳተ ፖሊሲ ከዚህ ዘርፍ ማግኘት የሚገባትን ጥቅም ሳታገኝ መቅረቷን በማንሳት ሀገራዊ ለውጡን ተከትሎ ትኩረት ተሰጥቷቸው ሪፎርም ከተደረጉ ዘርፎች መካከል አንዱ የሲቪል ማህበረሰብ ድርጅቶች ዘርፍ ነው ሲሉ ተናግረዋል፡፡
የሲቪል ማህበረሰብ ድርጅቶች ዘርፍ በሀገረ መንግስት ግንባታ ውስጥ በተለይም ጠንካራ ተቋማት እንዲፈጠሩ፤ዴሞክራሲያዊ ስርዓት እንዲገነባ፤ሰብዓዊ መብቶች እንዲከበሩ፤ዘላቂ ሰላም እንዲሰፍን ጉልህ ድርሻ አላቸው ያሉት ዋና ዳይሬክተሩ ዘርፉ በአግባቡ ከተመራ የሲቪክ ባህሉ የዳበረ ማህበረሰብ እንዲገነባ ከፍተኛ አስተዋጽኦ ሊያበረክት እንደሚችል እና ዘርፉ ከስሜት ይልቅ በምክንያታዊነት የሚያምን፤ ለንግግርና ለውይይት ቅድሚያ የሚሰጥ ማህበረሰብ እንዲፈጠር በማድረግ ረገድም ጉልህ ሚና ይኖረዋል ብለዋል፡፡
አያይዘውም የሀገር ልማት በጽኑ መሰረት ላይ መቆም የሚችለው የሚመለከታቸው አካላት በሙሉ በመተባበርና በመናበብ ህብረተሰቡን በማንቃት እንደሀገር የማደግ ተስፋችን ብሩህ ቢሆንም ሁሉም የህብረሰተብ ክፍል ለሀገሩ ልማትና ዕድገት ካልሰራ በስተቀር የምንፈለገውን ለውጥ ማምጣት አንችልም፤ የውስጥ አቅማችንን በማጤን ያለንን ሀብትና ዕውቀት በመጠቀም ሀገራችንን ካለችበት ችግር ውስጥ ለማውጣት በመተማመንና በመተጋገዝ ስንሰራ ነው ሲሉ መልዕክታቸውን አስተላልፈዋል፡፡
ከሰላም ሚኒስቴር የመጡት ሚኒስትር ዴኤታ አቶ ታዬ ደንደኣ ለሰልጣኞች ባስተላለፉት መልዕክት አገራችን በፅኑ መሰረት ላይ ለመገንባትና ወደ ተሻለ አቅጣጫ ለመጓዝ የውይይት መድረኮች አስፈላጊ ናቸው ሲሉ ገልፀዋል፡፡
አክለውም የሲቪል ማህበረሰብ ድርጅቶች ከመንግስት አካላት ጋር ተቀራርበው በመስራት የተለያዩ አገራትን ልምዶች በመቅሰም በጋራ ለማቀድ፣በጋራ ለመስራት ትልቅ እድል መፍጠር እንደሚቻል በማንሳት ቀድሞ የነበረው ህግ የሲቪል ማህበረሰብ ድርጅቶች የገንዘብ ምንጫቸው ላይ ገደብ በማደረግ ብዙ ድርጅቶች ሊከስሙ መቻላቸውን ገልፀዋል፡፡
ቤዛ ፖስቴሪቲ ዴቬሎፕመንት ኦርጋናይዜሽን ስራ አስኪያጅ አቶ ሰይድ እንዳሉት ድርጅቱ ሰባት በሚሆኑ ልበ ብርሃን በጎ ፈቃደኞች የተመሰረተ ሲሆን ዓላማውም በወቅቱ የብዙዎችን ሕይወት እየቀጠፈ የነበረውን የኤች አይ ቪ ቫይረስ ሥርጭት ለመቀነስና የበኩላቸውን አስተዋጽኦ ለማበርከት የተቋቋመ መሆንኑ በመግለጽ ድርጅቱ የእንቅስቃሴ አድማሱን በማስፋት በአሁኑ ጊዜ በጤና በማህበራዊና ኢኮኖሚያዊ ጉዳዮች እንዲሁም በሀገረ መንግስት ግንባታ እና በሰላም ግንባታ ሥራዎች ላይ ውጤታማ ሥራዎቸን በማከናወን ላይ እንደሚገኝ ገልፀዋል፡፡


ሚዲያና ኮሙኒኬሽን የጋራ መግባባትን ለማምጣት ትልቁ መሳሪያ ነው ሲሉ የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ ገለጹ፡፡

ሚዲያና ኮሙኒኬሽን የጋራ መግባባትን ለማምጣት ትልቁ መሳሪያ ነው ሲሉ የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ ገለጹ፡፡

የሲቪል ማህበረሰብ ድርጅቶች ባለስልጣን ለከፍተኛና መካከለኛ አመራሮቹ በተግባቦትና ተቋማዊ ውጤታማነት (communication and organizational effectiveness) እንዲሁም የሲቪል ማህበረሰብ ድርጅቶች ባለስልጣን የህዝብ ግንኙነትና ኮሙዩኒኬሽን አሁናዊ ሁኔታ የተመለከተ የግንዛቤ ማስጨበጫ ስልጠና ተሰጥቷል፡፡ የስልጠናው ዋነኛ ዓላማ የህዝብ ግንኙነት እና ኮሙኒኬሽን እንደተቋም ምን ፋይዳ እንዳለው እንዲሁም ተቋማዊ የህዝብ ግንኙነትና ኮሙኒኬሽን ፖሊሲ ለማዘጋጀት ግብዓት ለማሰባሰብ ነው፡፡
በመርኃ ግብሩ መክፈቻ ላይ የሲቪል ማህበረሰብ ድርጅቶች ባለስልጣን ዋና ዳይሬክተር አቶ ጂማ ዲልቦ እንዳሉት ሚዲያና ኮሙኒኬሽን የጋራ መግባባትን ለማምጣት ትልቁ መሳሪያ መሆኑን አንስተው በዚህ ረገድ እንደተቋም ትኩረት ሰጥተን እየሰራን ነው ብለዋል፡፡
ወደማህበረሰቡ መረጃን አደራጅተን መላክ የምንችለው በኮሙኒኬሽን ነው ያሉት ዋና ዳይሬክተሩ የተቋሙን ራዕይ፣ እሴት እና ተልዕኮ መሰረት በማድረግ ስለተቋማችን የተሻለ ምስል መፍጠር መቻል አለብን ብለዋል፡፡ አክለውም ስለሲቪል ማህበረሰብ ድርጅቶች የተሳሳተ አረዳድ ያላቸው አካላትንም መረጃ ለመስጠት ሚዲያና ኮሙኒኬሽን በአግባቡ መጠቀም አለብን ብለዋል፡፡
በ Communication and organizational effectiveness ዙሪያ አቶ ነጻነት ሃይሉ የህዝብ ግንኙነት፣ሚዲያና ኮሙኒኬሽን አማካሪ ስልጠናውን የሰጡ ሲሆን ከዚህ በተጨማሪ የባለስልጣን መስሪያቤቱ የህዝብ ግንኙነትና ኮሙኒኬሽን ስራ አስፈጻሚ ወ/ሮ ትዕግስት በሲቪል ማህበረሰብ ድርጅቶች ባለስልጣን የተሰሩ የህዝብ ግንኙነትና ኮሙኒኬሽን ስራዎች እና የሚታዩ ክፍተቶች ፣ የመደመር ትርክት፣የቀውስ ግዜ እቅድ እና አጀንዳ ሴቲንግ አቅርበው ውይይት ተደርጎባቸዋል፡፡
አክለውም በባለስልጣን መስሪያ ቤቱ የኮሙኒኬሽን ስትራቴጂ አስፈላጊነት እንዲሁም የቀውስ ጊዜ እቅድ በመንደፍ መምራትና ተቋሙ የመንግስት ተቋም እንደመሆኑ መጠን በዚሁ ማዕቀፍ ውስጥ መንቀሳቀስ ስለሚችልበት ሁኔታዎች ገለጻ አድርገዋል፡፡


የሲቪል ማህበረሰብ ድርጅቶች ባለስልጣን ለመካከለኛና ከፍተኛ አመራሮች በስነ ምግባር፣ በፕሮፌሽናሊዝምና በሙስና ላይ ያተኮረ ስልጠና ተሰጠ፡፡

የሲቪል ማህበረሰብ ድርጅቶች ባለስልጣን ለመካከለኛና ከፍተኛ አመራሮች በስነ ምግባር፣ በፕሮፌሽናሊዝምና በሙስና ላይ ያተኮረ ስልጠና ተሰጠ፡፡

የሲቪል ማህበረሰብ ድርጅቶች ባለስልጣን ለተቋሙ መካከለኛና ከፍተኛ አመራሮች በስነ ምግባር፣ በፕሮፌሽናሊዝም እንዲሁም በሙስና ላይ ትኩረቱን ያደረገ ስልጠና እየሰጠ ሲሆን በስልጠናው ላይ የሁሉም ስራ ክፍል ሃላፊዎችና የዴስክ ሃላፊዎች ተሳታፊዎች ናቸው፡፡
በመርኃ ግብሩ መክፈቻ ላይ መልዕክት ያስተላለፉት በባለስልጣን መስሪያ ቤቱ የስራ አመራር ስራ አስፈጻሚ አቶ ተስፋዬ ሽፈራው እንዳሉት ባለስልጣን መስሪያ ቤቱ በሁለተኛው ተቋማዊ ለውጥ ሂደት ውስጥ ትኩረት ከተደረገባቸው ጉዳዮች የውስጥ አቅም ማሳደግ አንዱ እንደሆነ አንስተው በስነ ምግባር የታነጸ ብቁ የሰው ኃይል እንዲኖር የተለያዩ የአቅም ግንባታ ስልጠናዎች እየተሰጡ እንደሆነ ገልጸዋል፡፡
የተቋሙን የስትራቴጂክ እቅድ ውጤታማ ለማድረግ ሁሉም የተቋሙ ሰራተኞች በቁርጠኝነት መስራት እንደሚጠበቅባቸው ያነሱት አቶ ተስፋዬ በተለይም የተቋሙ ሰራተኞች የሚጠበቅባቸውን ኃላፊነት ለመወጣት ራስን መመልከትና ስነ ምግባርን መላበስ እንዲሁም በቅንነት መስራት ያስፈልጋል ብለዋል፡፡
የስነምግባር መከታተያ ስራ አስፈጻሚ የሆኑት ወ/ሮ ትዕግስት አቡዬ በበኩላቸው ስልጠናው ለሁሉም የተቋሙ ሰራተኞች በተከታታይ ለአራት ዙር ሲሰጥ መቆየቱን አንስተው ሰራተኞች የሚሰጡት አገልግሎት ውጤታማ እንዲሆንና ከሙስና የጸዳ እንዲሆን የሚያስችል ስልጠና መሆኑን አንስተዋል፡፡
የሲቪል ማህበረሰብ ድርጅቶች ባለስልጣን ሰራተኞቹን በአዲስ መልክ ካደራጀበት ህዳር ወር ጀምሮ ተከታታይ የአቅም ግንባታ ስልጠናዎችን ለተቋሙ ሰራተኞች በመስጠት የውስጥ አቅሙን በማሳደግ ላይ የሚገኝ ሲሆን በተለይም የተቋሙን የአገልግሎት አሰጣጥ ከብልሹ አሰራር የጸዳና ተቋሙ የሚታወቅበትን ቀልጣፋ አሰራር ለማላቅ የሚያስችሉ በርካታ ስራዎች በመከናወን ላይ ይገኛሉ፡፡


ስታንድ ፎር ቨልነረብል (Stand for vulnerable organization) የተባለ ሀገር በቀል ድርጅት በገቢ ማስገኛ ላይ የሰራቸውን ስራዎች ለባለስልጣኑ የስራ ኃላፊዎች አስጎበኘ፡፡

ስታንድ ፎር ቨልነረብል (Stand for vulnerable organization) የተባለ ሀገር በቀል ድርጅት በገቢ ማስገኛ ላይ የሰራቸውን ስራዎች ለባለስልጣኑ የስራ ኃላፊዎች አስጎበኘ፡፡

በፕሮግራሙ የአንቦ ከተማ ከንቲባ አቶ ሃጫሉ ገመቹን ጨምሮ በርካታ የስራ ሃላፊዎች ተገኝተዋል፡፡ በባለስልጣኑ ዋና ዳይሬክተር አቶ ጂማ ዲልቦ የተመራው ልዑክ በቡራዩ እና አንቦ ከተማ ድርጅቱ ያከናወናቸውን የተለያዩ የገቢ ማስገኛ ስራዎች ተመልክቷል፡፡
የድርጅቱ መስራችና ስራ አስኪያጅ አቶ ምስጋናው ድርጅቱ ዓላማ አድርጎ የሚሰራው በተለያዩ አካባቢዎች ወላጅ አልባ ህጻናትን በአንድ ማዕከል በማሰባሰብ ማሳደግ እና ሴቶችን በኢኮኖሚ እንዲበቁ የተለያዩ ድጋፎችን ማድረግ መሆኑን አብራርተዋል፡፡ አክለውም የድርጅቱን ቀጣይነት ለማረጋገጥ የሲቪል ማህበረሰብ ድርጅቶች አዋጅ 1113/2011 በፈቀደው መሰረት ኤግል የሚል የንግድ ስያሜ በማውጣት የገቢ ማስገኛ ስራ ላይ መሰማራታቸውን ገልጸዋል፡፡
በጉብኝቱ ላይ የተገኙት የአምቦ ከተማ አስተዳደር ከንቲባ አቶ ሃጫሉ ገመቹ በንግግራቸው እንዳሉት ድርጅቱ በከተማው ሴቶችና ህፃናት ላይ ትርጉም ያለው ስራ እየሰራ መሆኑን በመግለጽ እንደከተማ አስተዳደር በተቻለ መጠን ድጋፍ እየተደረገላቸው እንደሚገኝ ተናግረዋል፡፡ አያይዘውም በገቢ ማስገኛነት እየሰሯቸው ያሉ ስራዎች ማህበረሰቡን ጥራት ያለው አገልግሎት እንዲያገኝ ማስቻሉን እና ለበርካታ ሴቶች የስራ ዕድል በመፍጠር ትልቅ ሚና መጫወታቸውንም አያይዘው ገልጸዋል ፡፡
የሲቪል ማህበረሰብ ድረጅቶች ባለስልጣን ዋና ዳይሬክተር አቶ ጂማ ዲልቦ በጉብኝቱ ማጠቃለያ ባደረጉት ንግግር ድርጅቱ ከተቋቋመ በርካታ ዓመታትን ያስቆጠረ መሆኑን በማስታወስ ይህ ሆኖም በፅናት የማህበረሰቡን የልማት ተጠቃሚነት በማስቀጠል ዛሬ መድረሱ ያለውን ጥንካሬ ያሳያል ሲሉ ገልጸዋል፡፡ አሁንም በገቢ ማስገኛ የሰሯቸው ስራዎች ለበርካታ የስራ አጥ ዜጎች የስራ ዕድል ከመፍጠሩም በላይ ለተሰማራበት የበጎ አድራጎት ስራ ከፈንድ ጠባቂነት በማላቀቅ በራሱ መቆም እንዲችል ያደርገዋል ሲሉ መልዕክታቸውን አስተላልፈዋል፡፡


የመፈጸምና የማስፈጸም አቅምን ለማጎልበት በስነ ምግባር የታነፀ ባለሙያ ማፍራት አስፈላጊ ነው ተባለ::

የመፈጸምና የማስፈጸም አቅምን ለማጎልበት በስነ ምግባር የታነፀ ባለሙያ ማፍራት አስፈላጊ ነው ተባለ::

የሲቪል ማህበረሰብ ድርጅቶች ባለስልጣን በስነምግባር ምንነት እና በስነምግባር እሴቶች ዙሪያ ለባለሙያዎች በአዳማ ከተማ ስልጠና ሰጠ፡፡ በስልጠናው ላይ የተገኙት የባለስልጣኑ የብቃትና ሰው ሀብት ስራ አስፈጻሚ አቶ ደጀኔ ጌታቸው ለሰልጣኙ ባስተላለፉት መልዕክት የባለስልጣን መስሪቤቱ የሰራ አፈጻጸም ከአመት ወደ አመት እየሻሻለ የመጣበት ዋነኛ ምክንያት የሲቪል ማህበረሰብ ድርጅቶች አዋጅ1113/2011 በተሟላ መልኩ ለመተግበር ለሰራተኛው የተለያዩ የአቅም ግንባታ ስልጠናዎች እንዲሁም የተቋሙን የውስጥ የመፈጸም እና የማስፈጸም አቅም ግንባታ ስራዎች አሁን ላለው ውጤታማነት መሳያ ናቸው ሲሉ ገልፀዋል፡፡ አያይዘውም አዋጅ ቁጥር 1064/2010 አንቀጽ 17 መሰረት በእውነት፣ በታማኝነት ፣በስናምግባር ህዝብን አገለግላለሁ ብለን ቃል በገባነው መሰረት ህብረተሰባችንን ማገልገል አለብን ብለዋል፡፡ ሌላው ያነሱት መስሪያ ቤታችን በሁለተኛው የለውጥ ሂደት ላይ የሚገኝ እንደመሆኑ ስኬታማ ስራዎችን በማጽናት ፣በማላቅ እና በዲጂታል ትራንስፎርሜሽን በመታገዝ የሚጠበቅብንን ውጤት ተግባራዊ ለማድረግ ስነ-ምግባር ትልቁን ድርሻ ይይዛል ብለዋል፡፡
ከስልጠናዉ በኃላ የአሰራር ስራአቶቸን ተከትሎ ሙያዊ ስነ-ምግባርን በኃላፊነት በመወጣትና በማረጋገጥ የተቋሙን ተልዕኮና ዓላማ ሊያሳካ የሚችል ብቁና ጥራት ያለው የሰው ሀብት እንዲኖር ማድረግ ተቀዳሚ ተግባር ነው ብለዋል፡፡
ተቋማችን ሞዴል ተቋም እንዲሆን ለቴክኖሎጂ ትኩረት በመስጠት ስራዎችን እየሰራ እንደሚገኝ አንስተዋል፡፡ ስነ-ምግባር በየትኛውም ቦታ እንደ እለታዊ ልብሳችን ልንላበሰው የሚገባ መሆንንም አንስተዋል፡፡


የሲቪል ማህበረሰብ ድርጅቶች ባለስልጣን የሴቶች የመረብ ኳስ ቡድን የብር ሜዳሊያ አሸናፊ ሆነ፡፡

የሲቪል ማህበረሰብ ድርጅቶች ባለስልጣን የሴቶች የመረብ ኳስ ቡድን የብር ሜዳሊያ አሸናፊ ሆነ፡፡

በ16ኛው የፌደራል መንግስት መስሪያ ቤቶች ስፖርታዊ ውድድሮች ላይ የተሳተፈው የሲቪል ማህበረሰብ ድርጅቶች ባለስልጣን የስፖርት ልዑክ ባደረገው የመጀመሪያ ተሳትፎ በሴቶች መረብ ኳስ የብር ሜዳሊያ በማሸነፍ አጠናቋል፡፡ በጥሩ መነሳሳት ውድድሩን የጀመሩት የባለስጣን መስሪያ ቤቱ የሴቶች መረብ ኳስ ቡድን የምድብና የጥሎ ማለፍ ጨዋታዎችን በስኬት አጠናቆ ከኢትዮ ቴሌኮም ጋር የፍጻሜ ጨዋታውን አድርጓል፡፡
ቡድኑ ከኢትዮ ቴሌኮም ጋር ያደረጉትን ጨዋታ በድምሩ ሁለት ለአንድ (2፡1) በሆነ ውጤት በኢትዮ ቴሌኮም አሸናፊነት የተጠናቀቀ ሲሆን ኢትዮ ቴሌኮም የዋንጫ አሸናፊ ሲሆን የሲቪል ማህበረሰብ ድርጅቶች ባለስልጣን የብር ሜዳሊያ አሸናፊ ሆኗል፡፡ 16ኛው የፌዴራል መስሪያ ቤቶች ስፖርታዊ ዉድድር ማጠቃለያውን  ሚያዚያ 17/2015 ዓ.ም በተለያዩ መርሃ ግብሮች የሚያደርግ ይሆናል፡፡
የሲቪል ማህበረሰብ ድርጅቶች ባለስልጣን የሴቶች መረብ ኳስ ቡድን ላስመዘገበው ውጤት ከፍተኛ ደስታ የተሰማው መሆኑን ይገልጻል፡፡