የባለስልጣን መስሪያ ቤቱ የአገልግሎት አሰጣጥ 91.34% መድረሱን እና ከባለፈው ተመሳሳይ ወቅት ጋር ሲነጻጸር በ4% ብልጫ ማሳየቱ ተገለጸ፡፡
ተቋሙ የ2014 በጀት ዓመት አፈጻጸሙን እና የ2015 በጀት ዓመት እቅድ በማኔጅመንት ደረጃ እንዲሁም ከአጠቃላይ ሰራተኛ ጋር እየገመገመ ይገኛል፡፡ በበጀት አመቱ 587 አዲስ የሲቪል ማህበረሰብ ድርጅቶች መመዝገባቸው፣ከክልሎችና ባለድርሻ አካላት ጋር ሞዴል የሲቪል ማህበረሰብ ድርጅቶች መነሻ ህግ ተዘጋጅቶ ውይይት መደረጉና ክልሎች ህግ እንዲያመጡ ድጋፍ መደረጉ፣የሚሰጡ አገልግሎቶችን በመለየትና ሰራተኞችን በማሰልጠን የኢ-ሰርቪስ አገልግሎት መጀመሩ፣የዴስክ ኦዲት በማድረግ መረጃዎችን መያዝ መቻሉ፣በበጎ ፈቃድ አተገባበር ማንዋል መዘጋጀቱና ለሲ.ማ.ድ ድርጅቶች የማስተዋወቂያ መድረኮች መካሄዳቸው፣አገልግሎት አሰጣጣችንን ሊመዝን የሚችል ስታንዳርድ ተዘጋጅቶ ስራ ላይ መዋሉ በተጨማሪም አገልግሎት አሰጣጣችን ከጊዜ ወደ ጊዜ እየተሻሻለ መሆኑ፣አገልግሎት አሰጣጣችንን ለማሻሻል እንዲቻል የመማክርት ጉባኤ በማቋቋም ስራ መጀመሩ፣ አቅምን ሊያሳድጉ የሚችሉ ስልጠናዎች ለሰራተኞች መሰጠቱ፣በፀደቁ መመሪያዎች ለሲቪል ማህበረሰሰብ ድርጅቶች ስልጠና መሰጠ፤በጎ ፈቃደኛንና በጎ ፈቃድ ፈላጊ ድርጅቶችን ሊያገናኝ የሚችል ሲስተም (VMIS) በልፅጎ ስራ ላይ መዋሉ፣ሁለተኛው የሲቪል ማህበረሰብ ድርጅቶች ቀን በደማቅ ሁኔታ መከበሩ፣የተለያዩ የበጎ ፍቃድ አገልግሎቶች የማስተባበርና የማከናወን ስራ መሰራቱ፣ የመማክርት ጉባኤ መቋቋሙ፣የአቅም ግንባታ ስራ ትኩረት አድርጎ መሰራቱ፣ ክልሎችን ያካተተ በዘርፉ የውጭ ሃገር ልምድ መወሰዱ እንዲሁም በሃገሪቱ በተከሰተው ጦርነትና ድርቅ ለተጎዱ ዜጎች የሲቪል ማህበረሰብ ድርጅቶችን በማስተባበር ምላሽ መሰጠቱ በበጀት ዓመቱ ከተከናወኑ ተግባራት መካከል መሆናቸውን ወ/ሮ ቃልኪዳን መንግስቴ የእቅድ፣በጀትና ክትትል ዳይሬክቶሬት ዳይሬክተር ገልጸዋል፡፡



የተቋሙ ዋና ዳይሬክተር አቶ ጂማ ዲልቦ በንግግራቸው እንደገለጹት በ2014 በጀት ዓመት እንደ ሃገር ብዙ ፈተናዎች የነበሩ መሆኑን አስታውሰው በዚሁ ሂደት በርካታ ተግባራትን በማከናወን ስኬት ያስመዘገብንበት ነው ብለዋል፡፡ ዋና ዳይሬክተሩ አክለውም አገልግሎት ሰጪ ተቋም እንደመሆናችን መጠን ስታንዳርድና ማንዋል፣የአሰራር ስርዓቶች ያስፈልጋሉ ይህንን ተግባራዊ አድርገናል ከዚህ በተጨማሪ እንደሃገር የተጀመረውን አዲስ መዋቅር አደረጃጀት መፈጸም፣የበጎ ፍቃድ ፖሊሲ እና ረቂቅ መመሪያዎችን የማጸደቅ፣የተጀመሩ ቋሚ መድረኮቻችን ማስቀጠል ትኩረት ሰጥተን የምንሰራቸው ጉዳዬች ይሆናሉ ሲሉ ተናግረዋል ፡፡ የተቋሙ ም/ዋና ዳይሬክተር አቶ ፋሲካው ሞላ በበኩላቸው በተቋሙ የተጀመረው የኦላይን አገልግሎት አጠናክሮ መቀጠል እና በተቋሙ Digitalization transformation ማረጋገጥ ቁልፍ ስራ ሆኖ መሰራት አለበት ብለዋል፡፡ ሌላው የዳግም ምዝገባ ሂደትን ማጠናቀቅ፣የእርስ በእርስ ቁጥጥርን ማጎልበት፣ለወቅታዊ ሃገራዊ ጉዳይ በሁለተኛ ዙር ቃል የገቡ ድርጅቶችን በማስተባበር ጉዳቱ ለደረሰበት አከባቢ ተደራሽ እንዲሆን ማስቻል ትኩረት ሰጥን የምንሰራቸው ጉዳዬች ይሆናሉ ሲሉ ገልጸዋል፡፡



በተቋሙ የተከናወኑ ስራዎችን በተመለከተም በተለያዩ መንገዶች ለማህበረሰቡ ተደራሽ የማድረግ ስራ ተሰርቷል፡: በዚሁ ልክ ደግሞ የተወሰኑ ተግባራ ሳይከናወኑ የቀሩ በመኖራቸው እሱን በ2015 ዓ.ም አካተን መፈጸም አለብን ሲሉ መ፤ልዕክታቸውን አስተላልፈዋል፡፡
የሲቪል ማህበረሰብ ድርጅቶች ባለስልጣን “አረንጓዴ አሻራችን ለትውልዳችን” በሚል መሪ ቃል ከፍትህ ሚንስቴር ተጠሪ ተቋማት ጋር በመሆን የችግኝ ተከላ መርኃ ግብር አካሄደ፡፡
የሲቪል ማህበረሰብ ድርጅቶች ባለስልጣን “አረንጓዴ አሻራችን ለትውልዳችን” በሚል መሪ ቃል ከፍትህ ሚንስቴር ተጠሪ ተቋማት ጋር በመሆን የችግኝ ተከላ መርኃ ግብር አካሄደ፡፡ የሲቪል ማህበረሰብ ድርጅቶች ባለስልጣን በሰሜን ሸዋ ዞን አሳግርት ወረዳ ታሞ ቀበሌ ከሶስት ሺህ በላይ ለምግብነት የሚውሉ ችግኞችን የፍትህ ሚንስቴር ሚንስትር ደዔታ አቶ አለም አንተ አግደውና የሰሜን ሸዋ ዞን ምክትል ዋና አስተዳዳሪ አቶ ክላል ሳህለማሪያም እንዲሁም ሌሎች ከፍተኛ የመንግስት ሃላፊዎች በተገኙበት አከናውኗል፡፡
የዞኑ ምክትል ዋና አስተዳዳሪ አቶ ክላል ሳህለማሪያም በአረንጓዴ አሻራው መርኃ ግብር ላይ የተሳተፉትን ሁሉ እንኳን ደህና መጣችሁ ካሉ በኋላ ዞኑ የአረንጓዴ አሻራ መርኃ ግብር ከተጀመረ ጊዜ አንስቶ በዞኑ ከጊዜ ወደ የማልማት ብቻ ሳይሆን የማጸደቅ ስራ እያደገ መምጣቱን አንስተው በአሁን ጊዜ በአንድ ቀን የችግኝ ተከላ መርኃ ግብር ብቻ ወደ 48.6 ሚሊዮን የሚጠጉ ችግኞችን መትከል መቻላቸውን ገልጸዋል፡፡ በአሁኑ ጊዜ በዞኑ ከሁለት መቶ ሰባ ሚሊዮን በላይ ችግኞችን ለመትከል ዕቅድ ተይዞ ከ180 ሚሊየን ችግኞቸ መተከሉን ምክትል ዋና አስተዳዳሪው ገልጸዋል፡፡



የፍትህ ሚኒስቴር ሚንስትር ደዔታው አቶ አለም አንተ አግደው በበኩላቸው ችግኝ ከመትከል ባሻገር አብሮ ተባብሮ ለማደግ ያለንን ፍላጎት ለመግለጽና ድጋፋችንን እንዲሁም ከወገናችን ጋር አብረን መሆናችንን ለማሳየት ጭምር መጥተናል ያሉ ሲሆን የአካባቢው ምርታማነት እንዲቀጥልና ለትውልድ እንዲሸጋገር ከተፈለገ ሁሉም አሻራውን ማኖር አለበት ብለዋል፡፡ በቀበሌው የተጀመረው ስራ ትልቅ ነው እኛ ደግሞ ዛሬ እዚህ የተገኘነው ይህንን ተግባር ለመደገፍ ነው በማለት ሚንስትር ዴኤታው አክለው ገልጸዋል፡፡ የባለስልጣን መስሪያ ቤቱ ዋና ዳይሬክተር አቶ ጂማ ዲልቦ በበኩላቸው ችግኝ መትከል በርካታ ጠቀሜታዎች እንዳሉት አንስተው ከ4 ዓመት በፊት የተጀመረው የአረንጓዴ አሻራ መርኃ ግብር እያደገና ባህል እየሆነ መምጣቱን አንስተዋል፡፡


ችግኝ መትከል ብቻ ሳይሆን መንከባከብ እንደሚገባ ያነሱት ዋና ዳይሬክተር አቶ ጂማ ዲልቦ ካሁን በፊት በዘመቻ ይደረግ የነበረው አሁን ግን አመቱን ሙሉ፤ ክረምት ደግሞ በልዩ ሁኔታ እየተሰራ ነው ሲሉ ገልጸዋል፡፡ በችግኝ ተከላ መርኃ ግብሩ ላይ የታሞ ቀበሌ ነዋሪዎችን ጨምሮ ከፍተኛ የፌደራልና የክልል እንዲሁም የዞን የስራ ኃላፊዎች ተገኝተዋል፡፡
5ተኛው የኢፌዲሪ የሲቪል ማኅበረሰብ ድርጅቶች ባለስልጣን እና የክልልና የፌደራል ባለድርሻ አካላት የጋራ ጉባኤ በአርባ ምንጭ ከተማ እየተካሄደ ይገኛል፡፡
በጉባኤው ላይ የተለያዩ ሚኒስትሮች ሚኒስትር ዴኤታ፣የፌደራልና የክልል ገንዘብና ኢኮኖሚ እና ጠቅላይ አቃቤ ህጎች፣የጋሞ አባቶች እንዲሁም የተለያዩ የፌደራል የባለድርሻ ተቋማት ሃላፊዎች በጉባኤው ላይ ተሳታፊ ሆነዋል፡፡
የጉባኤውን የመክፈቻ ንግግር ያደረጉት የኢፌዲሪ የፍትህ ሚኒስቴር ሚኒስትር ዶ/ር ጌዲዬን ጢሞቲዬስ የመድረኩ መመስረት በጣም መሰረታዊ እና አስፈላጊ መሆኑን በማንሳት እንደሃገር የሞራል ሚዛን መዛባት አጋጥሞናል ይህንን ለማስተካከል አዲስ አስተሳሰብ የተላበሰ ማህበረሰብ ለመፍጠር፣እርቅ፣ማህበራዊ እሴት እንዲዳብር እና ሰላም እንዲሰፍን የሲቪል ማህበረሰብ ድርጅቶች ሚና ከፍተኛ ነው ሲሉ ገልጸዋል፡፡ የሲቪል ማህበረሰብ ድርጅቶች ዘርፍ ውጤታማ መሆን እንደ ሃገር አስፈላጊ መሆኑን ጠቁመው ይህንን ደግሞ ወደ ተግባር ለመለወጥ የዚህ ጉባኤ እና የቅንጅታዊ አሰራሮች በጣም አስፈላጊ ነው ሲሉ መልዕክት አስተላልፈዋል፡፡
የተቋሙ ዋና ዳይሬክተር አቶ ጂማ ዲልቦ በንግግራቸው እንደገለጹት ከሲቪል ማህበረሰብ ድርጅቶች እንቅስቀሴ ጋር በተያያዘ ኃላፊነት ያላቸው የመንግስት አካላት በህግ የተሰጣቸው ስልጣንና ተግባር እንደተጠበቀ ሆኖ በዘርፋ ሃላፊነታቸውን በአግባቡ በመወጣት የሲቪል ማህበረሰብ ድርጅቶች በህግ አግባብ በመንቀሳቀስ የህዝብን የላቀ ተጠቃሚነት የሚያረጋግጥ ስራ ማከናወን እንዲችሉ እንዲሁም በሀገር ዐቀፍ ደረጃ ቅንጅታዊ አሰራርን ለማጎልበት እና ለሚያጋጥሙ ችግሮች የመፍትሄ አቅጣጫ ለማስቀመጥ የሚያስችል ጉባኤ መሆኑን ተናግረዋል፡፡



ጉባዔው የተመሰረተበትን ዓላማ ከማሳካት አኳያ አበረታች ውጤቶች የታዩ ሲሆን ከሁሉ በላይ በአስፈጻሚ አካላት መካከል መቀራረብን የፈጠረ፣ወጥነት ያለው አሰራር ከመዘርጋት አኳያም ጠቃሚ ውጤቶች ተገኝተዋል ሲሉ አብራርተዋል፡፡ በተለይም ከአራተኛው ጉባኤ በኋላ የተጀመረው የባለሙያዎች /CSO/NGO Desk ኃላፊዎች/ እንዲሁም የሲቪል ማህበረሰብ ድርጅቶች የምክክርና የልምድ ልውውጥ መድረክ ከሲቪል ማህበረሰብ ድርጅቶች አስተዳደር ጋር በተያያዘ መልካም ተሞክሮዎችን መለዋወጥ የተቻለበት መድረክ እንደነበርም አስታውሰዋል ፡፡ ዋና ዳይሬክተሩ አክለውም በዚህ ጉባዔ የተለያዩ ርዕሰ ጉዳዬች እንደሚነሱ እና በተለይም የክልል የሲቪል ማህረሰብ ድርጅቶች ረቂቅ ሕግ ላይ ትኩረት ተሰጥቶት ውይይት እንደሚደረግበት ገልጸዋል፡፡
አቶ ፋሲካው ሞላ የሲቪል ማህበረሰብ ድርጅቶች ባለስልጣን ም/ዋና ዳይሬክተር ከ4ተኛ ጉባኤ በኋላ የተከናወኑ ዋና ዋና የተቋሙ አፈጻጸሞችና ያጋጠሙ ተግዳሮቶች እንዲሁም የቀጣይ አቅጣጫን በተመለከተ ሪፖር አቅርበው ውይይት እየተደረገበት ይገኛል፡፡



ባለስልጣን መስሪያቤቱ የሲቪል ማህበረሰብ ፈንድ አሸናፊ ከሆኑ ድርጅቶች ጋር ስምምነት ሰነድ ተፈራረመ፡፡
በሲቪል ማኅበረሰብ ድርጅቶች አዋጅ ቁጥር 1113/2011 አንቀጽ 86 መሰረት በሲቪል ማህበረሰብ ድርጅቶች ባለስልጣን የሚተዳደር የሲቪል ማህበረሰብ ፈንድ እንደሚቋቋም ተደንግጓል፡፡ ባለስልጣን መስሪያቤቱም ይህንኑ በሚመለከት ባወጣው ‹‹የሲቪል ማህበረሰብ ፈንድ አስተዳደር መመሪያ ቁጥር 848/2014 መሰረት ለሃገር በቀል የሲቪል ማህበረሰብ ድርጅቶች ከፈንዱ ድጋፍ ለማድረግ በቀን 10/06/2014 ዓ.ም ግልጽ ፕሮፖዛል መቀበያ ጥሪ ማስታወቂያ በአዲስ ዘመን ጋዜጣ ያወጣ ሲሆን በጥሪው ማስታወቂያ መሰረት 95 /ዘጠና አምስት/ የሲቪል ማኅበረሰብ ድርጅቶች ለውድድር ቀርበው በመመዝገብ በቅድመ ምዘና እና ቴክኒክ ኮሚቴው ውሳኔ መሰረት ሶስት የሲቪል ማህበረሰብ ድርጅቶች መመረጣቸው ይታወቃል፡፡ በዚህም መሰረት ዛሬ በውድድሩ አሸናፊ ከሆኑ ድርጅቶች ጋር የድርጅቶቹን እና የተቋሙን ተግባርና ሃላፊነት የያዘ የስምምነት ሰነድ ተፈራርመዋል፡፡ ፈንዱ በሁለት ዙር የሚለቀቅ ሲሆን የመጀመሪያዎቹን ሶስት ወራት በመመልከት የሚቀጥለው 50 ፐርሰንት የሚለቀቅ መሆኑ በስምምነት ስነ ስርዓቱ ላዩ ተገልጿል፡፡ በውድድሩ አሸናፊ የሆኑ ድርጅቶች በሰጡት አስተያየት ሌሎች ሃገራት ላይ ያለ ልምድ መወሰዱ ፣የውድድር ሂደቱ ግልጽ መሆኑ አበረታች ነው በማለት ተቋሙ የሰጠንን ሃላፊነት ሙሉ በሙሉ ለመወጣት እንሰራለን ሲሉ ገልጸዋል፡፡



ለ2ተኛ ጊዜ የተዘጋጀው የሲቪል ማህበረሰብ ድርጅቶች ሳምንትን (CSOs Week) ዛሬ ተጠናቋል፡፡
ባዛርና ኤግዚቪሽኑ ከጉብኝት እና ከመክፈቻ ስነ ስርዓቱ ጎን ለጎን በአራት ርዕሰ ጉዳዬች ላይ የፓናል ውይይት ተደርጓል ፡፡ ውይይቱ የሲቪል ማህበረሰብ ድርጅቶች በሰላም ግንባታ ላይ ያላቸው ሚና፣ከአዲሱ አዋጅ በኋላ የመጡ ለውጦች እንዲሁም ስርዓተ ጾታ እና ተያያዥ ጉዳዬች ተዳሰዋል፡፡ በመዝግያ መርሃ ግብሩ ላይ የኢፌዴሪ የፍትህ ሚኒስቴር ሚኒስትር ዴኤታ አቶ ዓለምአንተ አግደው የተገኙ ሲሆን በንግግራቸውም ይህ ባዛርና ኤግዚቪሽን በመዘጋጀቱ ለዘርፉ እድገት ያለው አስተዋጽኦ ከፍተኛ መሆኑን እና ባዩት ስራ መደሰታቸውን ገልጸው ሚኒስትር መስሪያቤታቸው ሲቪል ማህበረሰብ ድርጅቶች በሚፈልጉት ድጋፍ ሁሉ ከጎናቸው እንደሆነ ገልጸዋል፡፡ የተቋሙ ዋና ዳይሬክተር አቶ ጂማ ዲልቦ በበኩላቸው የተሳካ ባዛርና ኤግዚቪሽን በመዘጋጀት ሂደት አስተዋጽኦ ላደረጉ ድርጅቶች ፣ተሳታፊዎችና አዘጋጅ ኮሚቴዎች ምስጋናቸውን አቅርበዋል፡፡



ሁለተኛው የሲቪል ማህበረሰብ ድርጅቶች ባዛርና ኤግዚቪሽን በድምቀት ተከብሮ ውሏል፡፡



ንቁ የሲቪል ማህበረሰብ ድርጅቶች ለሰላም፣ለዲሞክራሲና ለልማት በሚል መሪ ቃል ለ2ተኛ ግዜ ዛሬ በሒልተን ሆቴል ተጀምሯል፡፡ ኤግዚቪሽኑን ዶ/ር ጌዲዬን ጢሞቲዬስ የፍትህ ሚኒስቴር ሚኒስትሩን ጨምሮ ሌሎች ሚኒስትሮች፣ኮሚሽነሮች፣የሲቪል ማህበረሰብ ድርጅቶች ተወካዬች፣የተለያዩ የግል ሴክተሮች እና በርካታ እንግዶች በተገኙበት ተከፍቷል፡፡ የሲቪል ማህበረሰብ ድርጅቶች ሳምንት ከዛሬ ጀምሮ አስከ ቅዳሜ ሰኔ 25/2014 ዓ.ም ድረስ ይቆያል አርሶም መጥተው እንዲጎበኙ ጋብዘነዎታል፡፡
ለ2ተኛ ግዜ የተዘጋጀው የሲቪል ማህበረሰብ ድርጅቶች ሳምንትን (CSOs Week) በተመለከተ ጋዜጣዊ መግለጫ ተሰጥቷል፡፡

ፕሮግራሙ የሲቪል ማህበረሰብ ድርጅቶች ባለስልጣን ከሲቪል ማህበረሰብ ድርጅቶች ካውንስል ጋር በጋራ በመሆን የተዘጋጀ ሲሆን ዝርዝር ሂደቱን በተመለከተ የተቋሙ ዋና ዳይሬክተር አቶ ጂማ ዲልቦ እና የካውንስሉ ሃላፊ አቶ ሄኖክ መለሰ ማብራሪያ ለጋዜጠኞች ሰጥተዋል፡፡ የባለስልጣን መስሪያቤቱ ዋና ዳይሬክተር አቶ ጂማ ዲልቦ በመግለጫው በሰጡት ማብራሪያ የሲቪል ማህበረሰብ ድርጅቶች ከመንግስትና ከግሉ ዘርፍ ጋር የጀመሩትን መልካም ግንኙነት አጠናክረው እንዲቀጥሉና መብትና ግዴታውን በውል የተረዳ፤በውይይት በምክንያታዊነት የሚያምን የነቃና በነጻነት የተደራጀ ማህበረሰብ ለመፍጠር የተጀመሩ የልማትና የዴሞክራሲያዊ ስርዓት ግንባታ ስራዎች ሊጠነክሩ ይገባል ሲሉ መልዕክት አስተላልፈዋል፡፡ በተመሳሳይ የካውንስሉ ዋና ዳይሬክተር አቶ ሄኖክ መለሰ ባስተላለፉት መልዕክት የሲቪል ማህበረሰብ ድርጅቶች ሳምንት ፕሮግራም ከመንግስት፣ከግሉ ዘርፍ እና ከብዙሃን መገናኛ ጋር ያላቸውን እና የሚኖራቸውን ግንኙነት ከምንግዜውም በበለጠ ከማጎልበቱም በላይ በጋራ ጉዳዬቻቸው ላይ በአንድነት ለመስራት ሁኔታዎችን እንደሚያመቻች ምክር ቤቱ በጽኑ ያምናል ብለዋል፡፡ ሃላፊዎቹ ሌሎች ከጋዜጠኞች ለተነሳላቸው ጥያቄዎች ሰፊ ማብራሪያ ሰጥተዋል፡፡ ባዛርና ኤግዚቪሽኑ ከሰኔ 23 አስከ 25 /2014 በአዲስ አበባ ሂልተን ሆቴል የሚካሄድ ይሆናል፡፡
‹‹ማህበራዊ ተጠያቂነት የመንግስት አገልግሎት ከሙስና የፀዳና ውጤታማ እንዲሆን በማስቻል በአንድ አገር ውስጥ ሁለንተናዊ ልማት እንዲረጋገጥ የሚያደርግ ነው ሲሉ አቶ ፋሲካው ሞላ ተናገሩ››
በሁሉም ክልሎች በሶሻል አካውንተብሊቲ ዙሪያ ስልጠና ለመስጠት የተያዘው እቅድ በደቡብ ፣በሲዳማ ፣ሐረር እና አፋር ክልሎች እየተተገበረ ይገኛል፡፡
በደቡብ ብሔር ብሔረሰቦችና ህዝቦች ክልል አርባ ምንጭ ከተማ በተሰጠው ስልጠና ላይ የመክፈቻ ንግግር ያደረጉት የባለስልጣን መስሪያ ቤቱ ምክትል ዋና ዳይሬክተር አቶ ፋሲካው ሞላ ባስተላለፉት መልዕክት የሲቪል ማህበረሰብ ድርጅቶች ከተፈጠረው ምቹ ሁኔታ በመነሳት እንዲሁም ካላቸው ዘርፈ ብዙ ሃላፊነት በመንግስት አገልግሎት አሰጣጥ ሂደት ላይ የማህበራዊ ተጠያቂነት እንዲረጋገጥ ለማድረግ የመሪነት ሚና መጫዎት የሚችሉ በመሆኑ በሁሉም ክልሎች ስልጠናው መዘጋጀቱን አንስተዋል፡፡ ማህበራዊ ተጠያቂነት ሲባል ዜጎች በማንኛውም ደረጃ በሚገኝ የመንግስት አገልግሎት ገንቢ ተሳታፎ የሚያደርጉበት ሂደት ሲሆን በተሳትፎውም የመንግስት አገልግሎት ግልፅ፣ ተጠያቂነት ያለበት፣ ውጤታማ የሆነ፣መልካም አስተዳደርን በማስፈን የመንግስት አስተዳደር እንዲሻሻል እንደሚያደርግ እና በተጨማሪም የአንድ አገር ዜጎች መብታቸውንና ግዴታቸውን በውል እንዲረዱ በማድረግ ንቁና ነፃ የሆነ ዲሞክራሲያዊ ማህበረሰብ መፍጠር ያስችላል በአጠቃላይ ማህበራዊ ተጠያቂነት የመንግስት አገልግሎት ከሙስና የፀዳና ውጤታማ እንዲሆን በማስቻል በአንድ አገር ውስጥ ሁለንተናዊ ልማት እንዲረጋገጥ የሚያደርግ ነው ሲሉ መልዕክታቸውን አስተላልፈዋል፡፡ የሲቪል ማህበረሰብ ድርጅቶች በውስጣቸው በሚያከናውኗቸው ስራዎች ራሳቸው ለማህበረሰቡ ተጠያቂ የሚሆኑበትን ሁኔታ በማረጋገጥ በዘርፉ አርኣያ ሁነው መገኘት የሚገባቸው መሆኑ አንስተው በዋናነት ግን በአገር አቀፍ ደረጃ ማህበራዊ ተጠያቂነት በተደራጀ መንገድ እንዲተገበር ከፍተኛውን ሚና መጫዎት ይችላሉ፤ ይጠበቅባቸዋልም ብለዋል፡፡



በማህበራዊ ተጠያቂነት በተለይም በታችኛው የአስተዳደር እርከን መንግስት ለህብረተሰቡ የሚያቀርባቸው እንደ ትምህርት፣ ጤና፣ መንገድ ወዘተ የመሳሰሉት መሰረታዊ አቅርቦቶች ከእቅድ ጀምሮ እስከ አፈፃፀም በህብረተሰቡ ተሳትፎ እንዲፈፀሙ ለማድረግ የሲቪል ማህበረሰብ ድርጅቶች የተሳትፎ መደላድሎችን/መድረኮችን በመፍጠር፣ አቅምን በመገንባት፣ በተሳትፎ የሚገኙ ግኝቶች መፈፀማቸውን በመከታተል፣ አፈፃፀማቸው ላይ ተገቢውን ድጋፍ በማድረግ እና ድምፅ ለሌላቸው ድምፅ በመሆን መንቀሳቀስ ይኖርባቸዋል ሲሉ ተናግረዋል፡: በመጨረሻም የሲቪል ማህበረሰብ ድርጅቶች በማህበራዊ ተጠያቂነት ዙሪያ በቂ ግንዛቤ በመያዝ፣ በእቅዶቻቸውን ውስጥ በማካተትና ተገቢውን ሃብት በመመደብ ተግባራዊነቱን ማረጋገጥ ይኖርባቸዋል፡፡ ይህንንም መነሻ በማድረግ ተቋማችን የማህበራዊ ተጠያቂነት ፕሮጀክት ላልፈፀሙ ሲማዶች በሁሉም ክልሎች ስልጠናዎች እየሰጠ ይገኛል፡፡ በዚህ ስልጠና ፕሮግራም ስለማህበራዊ ተጠያቂነት ግንዛቤ የሚያዝበት ሲሆን ሲማዶች ይህንን እንደመነሻ በመውሰድ በራሳቸውን ማስፋትና መተግበር እንደሚችሉ ታሳቢ ተደርጓል በማለት ምክትል ዋና ዳይሬክተሩ መልዕክታቸውን አስተላልፈዋል፡፡
13ኛው ክልል አቀፍ የመንግስትና የሲቪል ማህበረሰብ ድርጅቶች ፎረም በአርባ ምንጭ ከተማ በመካሄድ ላይ ይገኛል፡፡
የሲቪል ማህበረሰብ ድርጅቶች ባለስልጣን ምክትል ዋና ዳይሬክተር አቶ ፋሲካው ሞላን ጨምሮ የክልሉ ከፍተኛ የስራ ሃላፊዎች የተሳተፉበት ይህ የጋራ ፎረም በመንግስትና በሲቪል ማህበረሰብ ድርጅቶች መካከል ያለውን ግንኙነት በማጠናከርና ችግሮችን በጋራ በመፍታት የህብረተሰቡን የላቀ ተጠቃሚነትን ማረጋገጥ ዓላማ አድርጎ የተዘጋጀ ፎረም እንደሆነ በመርኃ ግብሩ ማስጀመሪያ ወቅት ተገልጿል፡፡ በመድረኩ ንግግር ያደረጉት የተቋሙ ምክትል ዋና ዳይሬክተር አቶ ፋሲካው ሞላ እንደተናገሩት የሲቪል ማኅበረሰብ ድርጅቶች ለአገር የሚያደርጉት አስተዋፅኦ እንዲጎለበት በፌዴራልና በክልል በየደረጃው ያሉ የመንግስት ተቋማት ተገቢውን ድጋፋና ክትትል በማድረግ ምቹ ሁኔታዎችን መፍጠር ይጠበቅባቸዋል ሲሉ መልዕክታቸውን አስተላልፈዋል፡፡ በተለይም በፌዴራል ደረጃ የወጣው ህግ በየክልሎች በተሟላ መልኩ መተግበር ይኖርበታል፡፡ ለዚህ ደግሞ ቅንጅታዊ አሰራር መሰረታዊ ጉዳይ ነው ብለዋል፡፡ ይህ ቅንጅታዊ አሰራር በመንግስትና በሲማዶች መካከል እንዲሁም እርስ በእርስ በሲማዶች መካከል ቀጣይነት ባለው መልኩ መተግበር ያለበት ነው፡፡ በዚሁ መሰረት በርካታ ክልሎች የGO-CSO Forum ያደራጁ ሲሆን ሲማዶችም ኔትወርኮችን በመፍጠር ለመቀናጀትና ለመተባበር ጥረቶችን ያደርጋሉ፡፡



ከዚሁ ጋር በተያያዘ በዛሬው እለት የሚካሄደው የደቡብ ክልል GO-CSO Forum የዚሁ ቅንጅታዊ አሰራር አንድ አካል ሲሆን ክልሉ በሲማዶች ስራ የበለጠ ተጠቃሚ እንዲሆን የሚያደርግ ጠቃሚ መድረክ መሆኑን አንስተዋል፡፡ በመጨረሻም ይህ ፎረም ከዓመት ዓመት ሳይቆራረጥ እንዲካሄድ የሚደረገው ጥረት የሚያስመሰግን ነው በማለት ለዚህም የክልሉ ፋይናንስ ቢሮ ይህንን ፎረም በማስቀጠሉ እንዲሁም በአጠቃላይ አዲሱን አዋጅ በሚገባ በመረዳት ከተቋማችን ጋር እንዲሁም በክልሉ ከሚንቀሳቀሱ ሲማዶች ጋር ተቀራርቦ ለመስራት ለሚያደርገው ጥረት ላቅ ያለ ምስጋናዮን አቀርባለሁ በማለት መልዕክታቸውን አስተላልፈዋል፡፡
በምክትል ዋና ዳይሬክተር አቶ ፋሲካው ሞላ የተመራው የባለስልጣን መስሪያ ቤቱ የስራ ኃላፊዎች ቡድን በደቡብ ብሄር ብሄረሰቦችና ህዝቦች ክልል የሚሰሩ ድርጅቶችን የስራ እንቅስቃሴ ተመለከተ፡፡



በአዋጅ ቁጥር 1113/2011 ተመዝግበው በደቡብ ብሄር ብሄረሰቦችና ህዝቦች ክልል ወላይታ ሶዶ ከተማ እና አርባ ምንጭ ከተማ እየተንቀሳቀሱ የሚገኙ ሶስት ድርጅቶችን የስራ እንቅስቃሴ የባለስልጣን መስሪያ ቤቱ የስራ ሃላፊዎች በቦታው ተገኝተው ጎብኝተዋል፡፡ ጉብኝቱ በምክትል ዋና ዳይሬክተር አቶ ፋሲካው ሞላ የተመራ ሲሆን በክልሉ የሚንቀሳቀሱትን ዩሪያዲስ ቪሌጅ ኢትዮጵያ (uriyadis village Ethiopia) ፤ ቦሳጆ የበጎ አድራጎት ድርጅትን (bosajo charity organization)፣ የቢላቭድ ኢትዮጵያ እንዲሁም አናሲሞስ ችልድረንስ ቪሌጅ ኢትዮጵያ የተባሉ የሲቪል ማህበረሰብ ድርጅቶች በህጻናትና ማህበረሰብ አቀፍ ልማት ላይ የሰሩትን ስራ ተመልክተዋል፡፡ ድርጅቶቹ በጎዳና ላይ የሚገኙ ህጻናትን በማንሳትና በመደገፍ እንዲሁም በዝቅተኛ የኑሮ ደረጃ የሚገኙ የማህበረሰብ ክፍሎችን በመደገፍ የትምህርት፣ የጤናና እንክብካቤ አገልግሎት እየሰጡ እንደሚገኝ በመስክ ምልከታው ለመረዳት ተችሏል፡፡





