በሲቪል ማህበራት ዘርፍ በተከናወኑ የሪፎርም ተግባራት ሲቪክ ምህዳሩ ከመቼውም ጊዜ በላይ ሰፍቷል፡፡

የሲቪል ማህበረሰብ ድርጅቶች በኢትዮጵያ ሀገረ መንግስት ግንባታ፣ በልማት፣ በዴሞክራሲ ስርአት ግንባታ እና በዘላቂ ሰላም ማረጋገጥ ረገድ የማይተካ ሚና የሚጫወቱ ዋነኛ ተዋናዮች ናቸው። በተለይም የሕግ ማዕቀፍ ሪፎርሙን ተከትሎ ማህበራዊ፣ ኢኮኖሚያዊ እና ፖለቲካዊ ተሳትፏቸው እየጎላ የመጣ ሲሆን፣ ከመንግስትና ልማት አጋሮች ጋር በመተባበር ለሀገር ሁለንተናዊ እድገትና ለፖሊሲ ግብዓት በማመንጨት ትልቅ አስተዋጽኦ ያበረክታሉ።
ይህንን ሚና በመገንዘብም ከለውጡ በፊት አሳሪ የነበሩ ህጎችና ተቋማዊ አሰራሮች ላይ የሪፎርም እርምጃዎችን በመዉሰድ የሚጨበጥ ለዉጥ ከተመዘገበባቸዉ ዘርፎች መካከል አንዱ የሲቪል ማህበረሰብ ድርጅቶች(ሲማድ) ነዉ፡፡
መንግሥት የኢትዮጵያን ዘላቂ ሰላምና ብልጽግና ለማሳካት የሁሉም ዜጎች አስተዋጽዖ አስፈላጊ መሆኑን በጽኑ በማመን ሰዎች በተለያዩ ፍላጎቶቻቸውና ዝንባሌያቸው ተደራጅተው ለመሥራት ሳንካ የሆኑባቸውን እንቅፋቶች ለማስወገድ ከወሰዳቸው ጉልህ የሪፎርም እርምጃዎች አንዱ አዲሱ የሲቪል ማኅበረሰብ ድርጅቶች አዋጅ 1113/2011 መውጣቱ ነው። አዋጁ ቀደም ብሎ የሲቪክ ምኅዳሩን ያላግባብ ያጣበቡ ድንጋጌዎችና አሠራሮችን በማረም ሀሳብን በነጻነት የመግለጽና የመደራጀት ሕገ መንግሥታዊ መብቶች እንዲጠበቁ ጉልህ ሚና ተጫውቷል።

የሲቪል ማኅበረሰብ ድርጅቶች አስተዳደር ማሻሻያ በክልሎችም እንዲተገበር ባለፉት ዓመታት በተደረገው ክትትል 11 ክልሎች ተመሳሳይ የሪፎርም ሕጎች አውጥተው በትግበራ ላይ ይገኛሉ።