12ኛው የኢፌዲሪ የሲቪል ማኅበረሰብ ድርጅቶች ባለስልጣን እና የክልልና የፌዴራል ባለድርሻ አካላት የጋራ ጉባኤ ተጠናቋል፡፡
በመድረኩ የፌዴሬሽን ምክር ቤት ዋና አፈ-ጉባኤ አቶ አገኘሁ ተሻገር ጨምሮ በርካታ የመንግስት እና የክልሉ ከፍተኛ የስራ ሃላፊዎች ተገኝተዋል፡፡
የፌዴሬሽን ምክር ቤት ዋና አፈ-ጉባኤ አቶ አገኘሁ ተሻገር በመክፍቻ ንግግራቸው እንዳሉት መንግስት በርካታ ፈተናዎችን እያለፈ ዘርፈ ብዙ የልማት ስራዎችን እያከናወነ ይገኛል ብለዋል። የሲቪል ማህበረሰብ ድርጅቶች ከለውጡ በኋላ በመንግሥትና በግል ባለሃብቱ የማይሸፈኑ የልማት ሥራዎችን በመተካት ወሳኝ ሚና እየተወጡ እንደሚገኙ አብራርተዋል።
ሲቪል ማኀበረሰብ በሀገሪቱ ላይ የሚከሰቱ ችግሮችን መፍታት እንዲችሉ ህግና ፖሊሲዎችን አዘጋጅቶ በነፃነት እንዲንቀሳቀሱና መብቶቻቸው እንዲከበሩ አድርጓል። ሲቪል ማህበረሰቡ ለኢትዮጵያ ልማት እና ሰላም ግንባታ በሙሉ አቅማቸው እንዲሰሩ መንግስት የሚያደርገውን ሁለንተናዊ ድጋፍ አጠናክሮ እንደሚቀጥልም አፈ-ጉባኤው አስታውቀዋል።

የጋምቤላ ክልል ምክትል ርዕሰ መስተዳድር ዶክተር ጋትሉዋክ ሮን በበኩላቸው የሲቪል ማህበረሰብ በሀገራችን ተመዝግበው በልማት፣ በዴሞክራሲ ሥርዓት ግንባታ ፣ በሰላም ግንባታ፣ በሰብዓዊ ድጋፍ እና በሌሎች ጉዳዮች ላይ በስፋት መንቀሳቀስ የሚችሉበት አውድ መፍጠር ተችሏል ብለዋል። በቀጣይም በኢኮኖሚ ዕድገት ተጨማሪ አቅም በመሆን በማህበራዊ ልማት የነቃ ተሳትፏቸው እንዲጎለብት፤ አርዓያነት ያለዉን ተግባር በማሳየት አወንታዊ ሚናቸውን እንዲወጡ ጠይቀዋል።
የባለስልጣን መስሪቤቱ ዋና ዳይሬክተር አቶ ሳምሶን ቢራቱ እንደገለፁት ባለፉት የለውጥ ዓመታት በሪፎርም ሂደት ውስጥ በማለፍ ላይ ያለው የኢትዮጵያ የሲቪል ማህበረሰብ ድርጅቶች የህዝብን ኑሮ ለማሻሽል የሚየስችሉ ዘርፈ በዙ ተግባራትን ማከናወኑን ተናግረዋል። ሲቪል ማህበረሰብ ይበልጥ ውጤታማ እንዲሆኑ እና በዘርፉ የተጀመሩ ሪፎርሞች መሰረት እንዲይዙ ጥረት እየተደረገ መሆኑንም አስረድተዋል።

በቀጣይም የሲቪል ማህበረሰብ ምክር ቤትን ጨምሮ ህግን አክብረው የሚሰሩ ሲቪል ማህበረሰብ ሁሉ ድጋፍ ሊያደርጉ እንደሚገባ ጥሪ አቅርበዋል። በሁለት ቀናት ቆይታ በርካታ ርዕሰ ጉዳዬች የተነሱ ሲሆን በተለይም የሲቪል ማኅበረሰብ ድርጅቶች ክትትል እና ቁጥጥር ለማህበረሰብ እና ለሃገር ተጠቃሚነት በሚል ርዕስ በአቶ ፋሲካው ሞላ የሲቪል ማህበረሰብ ድርጅቶች ባለስልጣን ም/ዋና ዳይሬክተር ቀርቦ ሰፊ ውይይት ተደርጎበታል፡፡ ከዚህ በተጨማሪ የክልል የሲቪል ማህረሰብ ድርጅቶች NGO desk ላይ የሚሰሩ ሃላፊዎች የተወያዩበትን ተሞክሮ እና በቀጣይ ቢከናወኑ ብለው ያነሷቸውን ጉዳዬች ለጉባኤው አቅርበዋል፡፡


