የሲቪል ማህበረሰብ ድርጅቶች ባለስልጣን ለሁለተኛ ዙር በጫንጮ ከተማ ጎርፎ ቀበሌ የችግኝ ተከላ ፕሮግራም አካሂዷል ፡፡
ተቋማችን ከህዳሴ ግድብ ማስተባበሪያ ጽ/ቤት ጋር በጋራ በመሆን የታላቁን ህዳሴ ግድብ ከደለል ስጋት ለመታደግ ‹‹አሻራችንን ለታላቁ ህዳሴ ግድባችን›› በሚል መሪ ቃል ዛሬ በጫንጮ ከተማ ጎርፎ ቀበሌ ከተለያዩ የሲቪል ማህበረሰብ ድርጅቶችና ከአከባቢው ማህበረሰብ ጋር በጋራ ችግኝ የመትከል መርሃ ግብር ተካሂዷል፡፡
በመርሃግብሩ ላይ የባለስልጣን መስሪያቤቱ ም/ዋና ዳይሬክተር አቶ ፋሲካው ሞላ እንደተናገሩት ተቋማችን የሲቪል ማህበረሰብ ድርጅቶችን በማስተባበር በቅርቡ የህዳሴ ግድብ በሚገነባበት ጉባ በመገኘት ግድባችን ያለበትን ሁኔታ ተመልክተናል አፈፃፀሙም ኩራት ፈጥሮብናል፤ ፀሃይና ሃሩር ሳይበግራችው ሌት ተቀን ግድቡን እየሰሩ ላሉ ባለውለታዎቻችንም ክብር ሰጥተን ተመልሰናል ብለዋል፡፡ በዚህ አጋጣሚ የሲቪል ማህበረሰብ ድርጅቶች ህዝብና አገርን በሚጠቅሙ ችግኞችን የመትከል እንዲሁም ታላቁ የህዳሴ ግድባችን በተያዘለት ጊዜ ተጠናቆ በሙሉ አቅሙ ሃይል በማመንጨት ለአገራችን ብርሃንን እንዲሰጥ ለሚያደርጉት ያላሳለሰ ጥረት ምስጋናቸውን አቅርበዋል፡፡

እንደሃገር በአንድ ጀምበር በመላው ህዝባችን ርብርብ የተሰበረውን ሪከርድ አስታውሰው ከተባበርን እና በጋራ ከተንቀሳቀስን የጋራ የሆነ ደማቅ ድል ማስመዝገብ እንችላለን ይህንንም አፈፃፀማችን አረጋግጦልናል ሲሉ ም/ዋና ዳይሬክተሩ አክለው ገልጸዋል፡፡ በዛሬው እለት ሁላችንም በርካታ ችግኞችን በመትከል የየግላችንን ሪከርድ እንድንሰብር እና የተሻለች ኢትዮጵያን በመገንባቱ ሂደት ላይ ታሪካችንን እንድንከትብ አደራዮን እያቀረብኩ ለምታደርጉት አስተዋፅኦ ሁሉ ምስጋዮን አቀርባለሁ ብለዋል፡፡
በመጨረሻም የዛሬውን ታላቅ የችግኝ ተከላ ፕሮግራም በጋራ ላዘጋጀውና ላስተባበረው የታላቁ ህዳሴ ግድብ ግንባታ የህዝባዊ ተሳትፎ ማስተባበሪያ ጽ/ቤት አመራሮችና ሰራተኞች፣ ለጫንጮና አከባቢው አስተዳደር አመራሮችና ሰራተኞች ምስጋናቸውን አቅርበዋል፡፡

የካ ተራራ
የሲቪል ማህበረሰብ ድርጅቶች ባለስልጣን እና የሲቪል ማህበረሰብ ድርጅቶች ምክርቤት በየካ ተራራ የ2015 ዓ.ም 500 ሚሊዮን የአንድ ጀንበር አረንጓዴ አሻራ መርሃ ግብር ላይ ተሳታፊ ሆነዋል፡፡ ‹ነገን ዛሬ እንትከል›› በሚል መርሃ ግብር የተቋማቱ አጠቃላይ ሰራተኞች ከፍትህ እና ተጠሪ ተቋማት ጋር በጋራ በመሆን በየካ ተራራ ላይ አሻራቸውን አኑረዋል፡፡

2ተኛው የሲቪል ማኅበረሰብ ድርጅቶች ባለስልጣን ተቋማዊ የንባብ ቀን በድምቀት ተካሄደ፡፡
የሲቪል ማህበረሰብ ድርጅቶች ባለስልጣን አመራሮችና ሰራተኞች ተሳታፊ የሆኑበት ተቋማዊ የንባብ ቀን በተለያዩ ዝግጅቶች በድምቀት ተካሂዷል፡፡ በፕሮግራሙ መክፈቻ ላይ የሲቪል ማህበረሰብ ድርጅቶች ባለስልጣን የዋና ዳይሬክተር ጽህፈት ቤት ኃላፊ የሆኑትን አቶ በፍቃዱ ወልደሰንበትን ጨምሮ በርካታ የተቋሙ የስራ ኃላፊዎችና ሰራተኞች ተሳታፊ ሆነዋል፡፡
መርኃ ግብሩን በንግግር የከፈቱት የባለስልጣን መስሪያ ቤቱ ጽህፈት ቤት ኃላፊ አቶ በፍቃዱ ወልደሰንበት እንዳሉት ተቋማዊ የንባብ ሳምንቱ የባለስልጣን መስሪያ ቤቱን ሰራተኞች የንባብ ባህል እንዲጎለብት ትልቅ አስተዋጽዖ የሚያደርግ መርኃ ግብር መሆኑን ገልጸው ከተለያዩ የተቋሙ ሰራተኞች የህይወት ልምድ የሚቀሰምበትና እርስ በርስ የሚያቀራርብ መድረክ መሆኑን አንስተዋል፡፡ በመርኃ ግብሩ ላይ የተለያዩ የስነጽሁፍ ስራዎች የቀረቡ ሲሆን የተቋሙ ጽህፈት ቤት ኃላፊ የሆኑት አቶ በፍቃዱ ወልደሰንበትና የሰው ኃብት የብቃትና የልማት ቡድን መሪ አቶ መስፍን ማጎ የንባብ ልምዳቸውን አካፍለዋል፡፡


